Mga Salmo 1–2; 8; 19–33; 40; 46: Leksiyon 100

Pasiuna sa Mga Salmo, Bahin 1

Mga Panagna bahin ni Jesukristo diha sa mga Salmo

Unsay gitudlo kanimo bahin kang Jesukristo sa paborito nimong mga himno? Ang mga himno mao ang paagi sa mga musikero ug mga magbabalak nga ipahayag ang ilang mga pagbati bahin sa Manluluwas sulod sa daghang siglo. Sama sa daghang modernong himno, daghan sa mga salmo ang nagtudlo ug nagpamatuod sa kinabuhi ug misyon sa Manluluwas. Kini nga leksiyon makatabang sa mga estudyante nga mas masabtan ang kinabuhi ug misyon ni Jesukristo sumala sa gipanagna sa mga Mga Salmo.

Pagpangandam sa estudyante: Dapita ang mga estudyante nga pamalandongan kon sa unsang paagi ang ilang paboritong mga himno nagtudlo ug nagpamatuod kang Jesukristo. Dapita sila nga mangandam sa pagpakigbahin sa ilang paboritong himno bahin ni Jesukristo ngadto sa klase. Kon gibati sa mga estudyante nga wala silay paboritong himno, dapita silang mangita sa basahon sa himno para sa mga kanta nga nagtudlo bahin kang Jesukristo.

Posibleng mga Kalihokan sa Pagkat-on

Mga himno nga nagtudlo bahin kang Jesukristo

Ang paggamit og balaang musika diha sa klase makahatag og pagbati sa pagtahod, makadapit sa Espiritu Santo, ug makadugang sa pagbati sa panaghiusa. Ang musika puwede nga magamit sa pagkonektar sa mensahe sa mga himno ug sa mga kamatuoran nga nakat-onan sa mga estudyante.

Pwede kang mogamit og baalang musika sa sinugdanan niini nga leksiyon. Usa ka paagi mao ang pagdapit sa mga estudyante nga mangita sa Mga Himno (1985) o Mga Himno—para sa Panimalay ug Simbahan (2026). Dapita ang mga estudyante nga mopilig himno ilawom sa hilisgotan nga “Jesukristo.” Hatagig panahon ang mga estudyante nga basahon ug pamalandongan ang mga liriko sa maong himno. Pwede nimong ipasabot ang ngalan sa mga tagsulat ug mga pakisayran sa kasulatan ubos sa musika ug mga liriko. Ipakita ang mosunod nga mga pangutana ug dapita ang mga estudyante sa pagpakigbahin sa ilang mga tubag ngadto sa ilang kauban.

(Para sa dugang pagbansay sa paggamit og balaang musika diha sa klase, tan-awa sa “Paghimo og mga sitwasyon ug mga oportunidad alang sa mga tigkat-on nga matudloan pinaagi sa Espiritu Santo” sa Pagpalambo sa mga Kahanas sa Magtutudlo.)

• Unsay atong makat-onan bahin sa Manluluwas ug sa Iyang kinabuhi gikan sa mga pulong niini nga himno?

• Naa bay laing himno bahin sa Manluluwas nga adunay espesyal nga kahulogan para nimo? Kon mao, ngano man?

Samtang magtuon ka karon, dapita ang Espiritu Santo aron tabangan kang mabati ang gahom sa mga pulong ug musika nga nagtudlo ug nagpamatuod kang Jesukristo.

Ang basahon sa Mga Salmo

Ang basahon sa Mga Salmo maoy koleksiyon sa mga pag-ampo, mga balak, ug mga himno nga sa pipila ka paagi susama sa atong modernong himno.

Dapita ang mga estudyante sa pagpakli sa basahon sa Mga Salmo. Hatagig duha ngadto sa tulo ka minuto ang mga estudyante aron mapakli ang pipila sa mga salmo, nga pangitaon ang katibuk-ang impresyon.

• Samtang imong gipakli ang basahon, unsay imong nabantayan sa Mga Salmo nga nakapapahimo niini nga talagsaon?

• Unsay imong mga pangutana bahin niini nga basahon?

Tan-awa kadiyot ang Salmo 3, nga markahan ang matag pulong nga Selah. Samtang dili segurado kon unsay kahulogan sa Selah, nagsilbi tingali kining timailhan sa mang-aawit o magbabasa nga mohunong kadiyot ug mamalandong (sama sa musical rest).

Basaha ang Salmo 3, nga mohunong kadiyot matag higayon nga makita nimo ang pulong Selah. Dapita ang Espiritu Santo aron tabangan ka sa pagpamalandong niini nga mga bersikulo.

• Ngano kahang gusto sa tagsulat nga mohunong kita kadiyot ug mamalandong niini nga mga bersikulo?

• Sa unsang paagi ang pagpamalandong sa usa o kapin pa niini nga mga bersikulo motabang o mohupay sa tin-edyer karon?

Depende sa mga pangutana ug kasinatian sa imong klase, pwede nimong ipasabot kadiyot ang pipila o tanan sa mosunod:

• Daghan sa mga salmo ang nailhan tungod sa piho nga mga tagsulat niini sama kang David (Salmo 3). Ang ubang salmo wala mailhi ang mga tagsulat (tan-awa ang Salmo 1).

• Makita sa tibuok Salmo ang mga balaknon nga Hebreohanong elemento.

  • Ang parallelism maoy klase sa balak diin ang duha o kapin pang linya naay konektadong mga ideya (tan-awa sa Salmo 29:4).

  • Ang pagsublisubli maoy balaknon nga Hebreohanong himan nga naghatag og gibug-aton sa usa ka linya pinaagi sa pagsubli niini (sama sa “Dayga siya” sa Salmo 150).

• Sa Hebreohanong pinulongan, ang Salmo 119 maoy usa ka ehemplo sa acrostic nga balak. Ang acrostic nga balak mogamit sa unang letra sa kada linya aron espelingon ang mga pulong o ang Hebreohanong alpabeto.

• Ang basahon sa Mga Salmo gikutlo og kapin sa 115 ka higayon diha sa Bag-ong Tugon (tan-awa ang Salmo 6:8 ug Lucas 13:27).

• Human sa Kataposang Panihapon, si Jesus ug ang Iyang mga disipulo miawit og usa ka himno (tan-awa sa Mateo 26:30). Posible nga mao ni ang Salmo 113–118, ang “Hallel,” ang himno nga tradisyonal nga awiton panahon sa Pagsaylo (tan-awa ang Merrill J. Bateman, “The Power of Hymns,” Ensign, July 2001, 17).

Basaha ang Lucas 24:44, nga pangitaon kon unsay gitudlo sa Manluluwas sa Iyang mga disipulo bahin sa mga salmo wala madugay human ang Iyang Pagkabanhaw.

Dihang naghisgot bahin sa labing importanteng mga mensahe nga naa sa basahon sa Mga Salmo, si Presidente Jeffrey R. Holland sa Korum sa Napulog Duha ka Apostoles mittudlo:

Si Jesus mismo mikutlo sa basahon sa Mga Salmo labaw kay sa bisan hain nga basahon sa Daang Tugon. … Makataronganon ang paghunahuna nga sa tanang balaang kasulatan, walay laing basahon nga detalyado kaayong naghisgot bahin sa misyon sa Mesiyas o ang pagpangita o paghandom alang sa Iyang pagbalik nga gipahayag pinaagi sa mga awit sa Salmista. (For Times of Trouble: Spiritual Solace from the Psalms [2012], 7–8)

• Unsay imong nakat-onan gikan sa Lucas 24:44 ug kang Presidente Holland? Nganong takos man nga tun-an ang basahon sa Mga Salmo?

Tabangi ang mga estudyante nga mailhan nga makakat-on kita bahin sa kinabuhi ug misyon ni Jesukristo pinaagi sa pagtuon sa mga salmo. Ikonsiderar ang pagsulat niini nga kamatuoran diha sa pisara.

Mga Salmo nga nanagna bahin kang Jesukristo

Aron matabangan ang mga estudyante nga masabtan ang pipila sa propetikanhong mga pamahayag diha sa Mga Salmo bahin sa kinabuhi ug misyon ni Jesukristo, ihatag ang pipila o ang tanang pakisayran sa kasulatan sa ubos. Ang mosunod mao ang pipila sa mga paagi nga pwedeng tun-an sa imong klase kini nga mga bersikulo:

• Isulat ang mga pares sa bersikulo diha sa mga piraso sa papel ug ibutang ang kada papel palibot sa lawak klasehan. Hatagig panahon ang mga estudyante nga molibot sa lawak klasehan ug basahon ang pipila sa mga panagna ug mga katumanan.

• Sagola ang mga pares sa kasulatan ug dapita ang mga estudyante sa pagtukma sa mga panagna diha sa Mga Salmo ngadto sa mga katumanan niini.

• Ipakita lang ang mga bersikulo sa Mga Salmo. Dapita ang mga estudyante nga gamiton ang footnotes ug uban pang himan sa pagtuon sa kasulatan sa pagpangitag mga pakisayran gikan sa kinabuhi sa Manluluwas nga nagtuman sa matag panagna.

Mga Salmo nga nanagna bahin kang Jesukristo	Panagna nga natuman
Mga Salmo nga nanagna bahin kang Jesukristo Salmo 22:1	Panagna nga natuman Mateo 27:46
Mga Salmo nga nanagna bahin kang Jesukristo Salmo 22:7–8	Panagna nga natuman Mateo 27:41–43
Mga Salmo nga nanagna bahin kang Jesukristo Salmo 22:16	Panagna nga natuman Doktrina ug mga Pakigsaad 6:36–37
Mga Salmo nga nanagna bahin kang Jesukristo Salmo 22:18	Panagna nga natuman Juan 19:23–24
Mga Salmo nga nanagna bahin kang Jesukristo Salmo 31:5	Panagna nga natuman Lucas 23:46
Mga Salmo nga nanagna bahin kang Jesukristo Salmo 34:20	Panagna nga natuman Juan 19:31–36
Mga Salmo nga nanagna bahin kang Jesukristo Salmo 41:9	Panagna nga natuman Lucas 22:47–48; Mga Buhat 1:16–17
Mga Salmo nga nanagna bahin kang Jesukristo Salmo 69:20–21	Panagna nga natuman Juan 19:28–29
Mga Salmo nga nanagna bahin kang Jesukristo Salmo 118:22	Panagna nga natuman Mga Buhat 4:10–12

Paghunahuna og kahimtang nga giatubang nimo o sa minahal sa kinabuhi diin makatabang ang pagkahibalo sa usa ka butang nga imong nakat-onan bahin sa kinabuhi ug misyon sa Manluluwas nga gikan niini nga mga panagna. Irekord ang imong mga hunahuna diha sa imong journal sa pagtuon.

Aron matabangan ang mga estudyante nga mahanduraw ang katumanan sa pipila sa mga panagna, pwede nimong ipasalida ang bidyo nga nagpakita sa mga hitabo gikan sa kinabuhi sa Manluluwas. Pananglitan, pwede nimong gamiton ang “My Kingdom Is Not of This World,” sa time code 0:00 hangtod 3:18, gikan sa ChurchofJesusChrist.org. Gipakita niini nga bidyo ang mga panagna sa Salmo 22:1, 7–8, 16.

Samtang tan-awon sa mga estudyante ang bidyo, dapita silang iisa ang ilang mga kamot dihang ilang mailhan ang hitabo nga gipanagna sa Mga Salmo. Ikonsiderar ang paghunong sa bidyo ug pagdapit sa mga estudyante nga ipakigbahin ang gusto nilang masabtan sa usa ka tawo bahin niini nga hitabo sa kinabuhi sa Manluluwas.

Ang kinabuhi ni Jesukristo

Dapita ang mga estudyante nga ipakita ang ilang pagsabot sa kinabuhi ug misyon sa Manluluwas sigon sa gipanagna sa Mga Salmo. Ang usa ka opsiyon mao ang pagdapit sa mga estudyante nga hisgotan ang mosunod nga mga pangutana uban ang usa ka kauban, diha sa gamayng grupo, o sa klase.

Pagpili og usa sa mga panagna gikan sa mga Mga Salmo nga makahuloganon para nimo.

• Unsay gitudlo kanimo niini nga panagna bahin kang Jesukristo?

• Nganong importanteng mahibaloan ang imong nakat-onan bahin Kaniya?

Ikonsiderar ang pagpakigbahin sa imong pagsaksi sa kinabuhi ug misyon ni Jesukristo. Pwede nimong dapiton ang mga estudyante nga ipadayon sa pagpangitag mga pakisayran kang Jesukristo samtang ilang tun-an ang basahon sa Mga Salmo sa sulod sa mosunod nga pipila ka semana. Haom tingali ang pagtapos sa klase pinaagi sa pagkanta o pagpaminaw og usa ka himno bahin sa Manluluwas, nga gipili sa mga estudyante.

Sa Leksiyon 101: “Pasiuna sa Mga Salmo, Bahin 2,” ang mga estudyante maghimog ekspresyon sa ilang gugma ug debosyon sa Langitnong Amahan ug ni Jesukristo sama sa gihimo sa mga Salmista. Ikonsiderar ang pagdapit sa mga estudyante nga sugdan na kini sa paghunahuna karon. Hangyoa sila nga pamalandongan ang ilang gibati bahin sa Langitnong Amahan ug kang Jesukristo ug kon unsaon nila pagpahayag ang maong mga pagbati.

Dugang nga mga Kapanguhaan

Nganong kinahanglan natong tun-an ang basahon sa Mga Salmo?

Si Presidente Jeffrey R. Holland sa Korum sa Napulog Duha ka Apostoles mitudlo:

Gikaingon nga ang basahon sa Mga Salmo sa katibuk-an mas nakaimpluwensiya sa Kasadpan nga bahin sa kalibotan kay sa bisan unsang koleksiyon sa balaknong mga bersikulo nga nasulat sukad. Magdepende sa kagustohan sa mga tawo kon tinuod man ni o dili, pero seguradong tinuod para sa katibuk-an sa mga magbabasa sa Biblia, nga usa ang Mga Salmo sa mga kasulatan nga personal nga magamit ug ginatun-an pag-ayo diha sa tibuok koleksiyon sa tanang kasulatan. Sa maong kasulatan, kini nga basahon talagsaon sa dakong tinguha niini alang sa katubsanan, kahupayan, ug kaluwasan. … [Walay laing basahon sa Daang Tugon nga] ikatandi sa personal nga tono, sunod, gidaghanon, ug kalidad sa mga salmo, mga pangamuyo kini sa usa maluluy-ong Dios, tig-ayo sa mga gun-ob nga kasingkasing, Manluluwas sa dinaogdaog ug kabos. Tungod niini, usa tingali ang basahon sa Mga Salmo sa mga basahon sa biblia nga gitahod pag-ayo sa mga Kristiyano ug mga Judeo, gawas pa niadtong lahi og tinuohan—o wala gayoy tinuohan—nga nahupayan ug nadasig sa mga bersikulo niini tungod sa paglaom nga gipahayag niini. (For Times of Trouble: Spiritual Solace from the Psalms [2012], 7–8)

Giunsa kaha paggamit sa Manluluwas ang mga salmo?

Samtang nagserbisyo isip sakop sa Seventy, si Elder Merrill J. Bateman mitudlo:

Kon gidapit ka ngadto Kataposang Panihapon, unsang mga himno kaha gikan sa atong basahon sa mga himno ang nahiangay? …

Malagmit nga daghang himno ang giawit niadtong gabhiona. Gipadayag ni Mateo nga gitapos sa Ginoo ug sa Iyang Apotoles ang Kataposang Panihapon sa usa ka himno sa wala pa mibiya paingon sa Bukid sa mga Olibo (tan-awa sa Mat. 26:30). Unsay ilang gikanta? Bisan og wala nato mahibaloi ang panapos nga himno, naa kitay usa ka kanta nga nahibaloan. Gitawag kinig Hallel, nga naglangkob sa Mga Salmo 113–18. Gikan sa panahon ni Kristo hangtod sa atong kasamtangang panahon, tradisyonal nang gikanta sa mga pamilya sa Judeo ang Mga Salmo 113–14 sa dili pa ang pagkaon sa Pagsaylo ug ang Mga Salmo 115–18 pagkahuman. …

Handurawa ang Manluluwas sa kalibotan nga nag-awit niini nga mga himno uban sa Iyang mga disipulo, nga naghulagway sa mga sunod nga nahitabo nianang gabhiona ug sa sunod adlaw. Ang tanang miyembro sa Judeo nga pagtuo miapil niini nga mga hitabo. Masaligon sila sa pagmemorya niini nga mga Salmo. Nasabtan nila ang mga kahulogan niini. (“The Power of Hymns,” Ensign, July 2001, 17, 18)

Asa nako makakat-on og dugang bahin sa Hebreohanong mga balak sa mga salmo?

Enrichment Section G: Hebrew Literary Styles

Pagbasa og Balak diha sa Daang Tugon

Pagsabot sa Balak sa Daang Tugon

Dugang nga mga Kalihokan sa Pagkat-on

Ang gahom sa musika

Sama sa mga salmo, ang mga liriko ug musika sa modernong mga himno nagpakita sa dakong pagtahod ug gugma para sa Langitnong Amahan ug kang Jesukristo ug makadapit sa pagsaksi sa Espiritu diha Kanila. Aron matabangan ang mga estudyante nga makaila kon sa unsang paagi mahimong usa ka gamhanang himan ang matinahorong musika, nga nagdapit sa Espiritu Santo sa pagpamatuod sa Langitnong Amahan ug kang Jesukristo, ikonsiderar ang pagpasalida sa bidyo sa kinabuhi sa Manluluwas, sama sa “Nearer, My God, to Thee” (3:30). Ipasalida ang una nga 30 segundos sa bidyo nga walay tingog. Dayon, ipasalida ang bidyo nga gi-on ang tingog o dungan nga ipatugtog sa ubang gipili nga balaang musika. Dapita ang mga estudyante sa pagpakigbahin kon unsay kalainan nga nahimo sa musika.

Mga Salmo ingon nga pakisayran sa modernong mga himno

Makabenepisyo tingali ang mga estudyante sa pagkakita kon sa unsang paagi gigamit sa modernong mga himno ang mga bersikulo gikan sa Mga Salmo. Pwede nimong ipakigbahin ang pipila o tanan sa mosunod. Dapita ang mga estudyante sa pagtandi kon sa unsang paagi ang mga tudling sa Mga Salmo nakaimpluwensiya tingali sa mga mensahe sa mosunod nga mga himno.

Mga Salmo 8:3–9; 9:1–2. “Gamhanan Ka”

Mga Salmo 26:8. “We Love Thy House, O God”

Salmo 27:1. “Ang Dios Kahayag Ko”

Mga Salmo 33:1–6; 95:1–6. “Sa Katahum sa Yuta”

Salmo 37:3–9. “Akong Kalag, Magmalinawon”

Salmo 148. “Tanan nga Nilalang sa Atong Dios”

Salmo 150. “Daygon ang Dios, nga Gamhanan”

(Matikdi: Ang Leksiyon 102 magpunting sa Salmo 23, nga maoy inspirasyon sa himno “Ang Dios ang Akong Magbalantay.”)

Human makahigayon ang mga estudyante sa pagtandi sa mga tudling sa Salmo ug sa mga liriko, dapita ang pipila ka andam nga estudyante nga ipakigbahin ang ilang nakaplagan.

Paghimog acrostic nga balak

Aron tabangan ang mga estudyante nga masabtan ang usa ka klase sa Hebreohanong balak, pwede nimo silang tudloan bahin sa acrostic nga balak. Dapita ang mga estudyante nga isulat ang pulong “Jesus” sa usa ka panid sa ilang journal sa pagtuon, nga naay usa ka letra sa kada linya:

J

E

S

U

S

Dayon dapita ang mga estudyante sa pagsulat og usa ka kapahayag nga nagsugod sa kada letra ug nagpakita sa ilang nakat-onan bahin sa Manluluwas samtang ilang gitun-an ang Mga Salmo karon.

Ang usa ka ehemplo sa acrostic nga balak gamit ang pulong “Sacrament” nga makita sa “Fun with Hebrew.”