Mga Salmo 1–2; 8; 19–33; 40; 46: Leksiyon 101

Pasiuna sa Mga Salmo, Bahin 2

Simbaha ang Ginoo ug Dayega ang Iyang Balaang Ngalan

Usa ka paagi sa pagsimba sa Langitnong Amahan ug kang Jesukristo mao ang pagpahayag sa imong gugma ug debosyon Kanila. Daghan sa Mga Salmo maoy balaknong mga ehemplo sa pagsimba sa Amahan ug Anak pinaagi sa mga pagdayeg, mga pangaliyupo, ug mga pag-ampo. Kini nga leksiyon makatabang sa mga estudyante sa pagpahayag sa ilang mga pagbati sa pagsimba para sa Langitnong Amahan ug kang Jesukristo.

Pagpangandam sa estudyante: Pahibaloa ang mga estudyante nga aduna silay higayon sa pagpamalandong sa ilang mga hunahuna ug pagbati bahin sa Langitnong Amahan, kang Jesukristo, ug sa sagradong mga butang ingon nga pagpangandam sa pagpakigbahin sa maong mga pagbati niini nga leksiyon. Dapita ang mga estudyante nga maminaw sa matinahorong musika ug rebyohon ang paboritong mga kasulatan, kinutlo, o sagradong mga hulagway, nga pangitaon ang pihong mga butang nga gusto nilang ipakigbahin. Ang paghimo niini makapangandam sa ilang mga kasingkasing ug hunahuna alang sa kalihokan niini nga leksiyon.

Posibleng mga Kalihokan sa Pagkat-on

Pagsimba sa Dios

Timan-i: Ang kalihokan sa kataposan niini nga leksiyon mahimong bahin sa pagpamalandong sa Leksiyon 112: “Pagsukod sa Imong Nakat-onan 7.” Seguroa ang paggahin og daghang panahon aron masugdan sa mga estudyante ang kalihokan panahon sa klase.

Sa pagsugod sa klase, hatagi og usa ka minuto ang mga estudyante sa pagpamalandong sa mosunod nga pangutana:

• Para nimo, unsay kahulogan sa “pagsimba sa Dios”?

Si Elder Dean M. Davies, kanhi nagserbisyo sa Presiding Bishopric, mipakigbahin og pipila ka paagi nga atong masimba ang Dios dihang siya mitudlo:

Kon kita magsimba sa Dios, moduol kita Kaniya inubanan sa matinahurong gugma, kamapainubsanon, ug pagdayeg. Kita moila ug modawat Kaniya isip atong Hari, ang Tiglalang sa uniberso, ang atong pinalangga ug walay kinutuban ang kamahigugmaon nga Amahan.

Motahod ug motamod kita Kaniya.

Motugyan kita sa atong kaugalingon ngadto Kaniya.

Mobayaw kita sa atong mga kasingkasing diha sa pag-ampo, mopakabililhon sa Iyang pulong, magmaya sa Iyang grasya, ug mopasalig sa pagsunod Kaniya uban sa gipahinungod nga kamaunungon. (“Ang mga Panalangin sa Pagsimba,” Liahona, Nob. 2016, 94)

• Unsaon nimo sa paghulagway ang kalainan tali sa pagtambong lang sa simbahan, sa templo, o sa seminary ikompara ngadto sa pagsimba sa Dios samtang nagtambong?

Sa daklit ipakigbahin sa mga estudyante ang usa o duha sa imong paboritong mga paagi sa pagpahayag sa mga tawo sa ilang mga pagbati sa pagsimba para sa Langitnong Amahan ug kang Jesukristo. Apil sa mga ehemplo mao ang balak, bidyo, buhat sa art, piraso sa sinulat, o piraso sa sagradong musika. Pwede nimong apilon ang mga butang nga kaugalingon nimong gisulat o gihimo. Ipasabot sa mga estudyante nga adunay daghang paagi nga mapahayag sa usa ka tawo ang mga pagbati sa pagsimba para sa Langitnong Amahan ug kang Jesukristo.

Awhaga ang mga estudyante nga pamalandongan kon unsaon nila pagpahayag ang ilang mga pagbati sa pagsimba para sa Langitnong Amahan ug kang Jesukristo. Sa tibuok leksiyon, hunahunaa ug mahimong sensitibo sa mga estudyante nga wala tingali mobati og koneksyon sa Langitnong Amahan ug kang Jesukristo sa karon.

Sa imong journal sa pagtuon, pagpili og usa o kapin pa nga tubagon sa mosunod nga mga pangutana. Pwede nimong gamiton ang pipila sa mga mensahe ni Elder Davies o ang kaugalingon nimong mga pulong aron sa pag-summarize sa imong mga pagbati.

• Unsay imong gibati bahin sa Langitnong Amahan, kang Jesukristo, ug sa balaang mga butang?

• Sa unsang paagi nimo maayong mapahayag ang gugma, pagtahod, o pagsimba sa Langitnong Amahan, kang Jesukristo, o sa espirituwal nga mga panalangin?

Sa kataposan sa leksiyon karong adlawa, sugdan nimo paghimo ang usa ka ekspresyon sa imong mga pagbati. Kanunay kining hunahunaa samtang nagtuon ka. Hunahunaa kon sa unsang paagi nimo gustong ipahayag ang imong nakat-onan ug gibati. Dapita ang Espiritu Santo aron tabangan ka sa imong mga paningkamot.

Pagsimba sa Ginoo diha sa mga salmo

Balaknon ang kadaghanan sa mga salmo, mainampoong pagpahayag sa balaang mga panghunahuna, mga pagbati, mga paglaom, ug mga tinguha sa mga magsusulat. Samtang daghang kasulatan ang nagrekord sa mga pulong sa Ginoo kanato, ang mga salmo kanunayng nagpakita sa mga pulong sa magsusulat para Kaniya. Basaha ang Salmo 18:1–6, nga pangitaon ang mga pulong ug hugpong sa mga pulong nga gigamit ni David sa pagpahayag sa iyang mga pagbati bahin sa Ginoo.

Dapita ang mga estudyante sa pagsulat sa mga pulong ug hugpong sa mga pulong nga ilang nakaplagan diha sa pisara. Mailhan tingali sa mga estudyante ang daghang magkalainlaing hugpong sa mga pulong, sama sa:

• Ang Ginoo ang akong kalig-on (bersikulo 1).

• Ang Ginoo mao ang akong bato, lig-on nga kota, tigluwas, Dios, kalig-on, taming, sungay sa kaluwasan, o hataas nga tore (bersikulo 2).

• Dalaygon ang Ginoo (bersikulo 3).

• Patalinghogan sa Ginoo ang atong mga pangamuyo Kaniya (bersikulo 6).

Ang mga estudyante nga misulat og hugpong sa mga pulong pwedeng mopakigbahin kon nganong gusto tingali ni David nga mahibalo ang iyang tigpiminaw bahin sa Ginoo. Ikonsiderar ang pagpangutana sa mga estudyante kon sa unsang paagi gituman sa Ginoo kini nga mga papel diha sa ilang kinabuhi.

Dapita ang mga estudyante sa pagpili og usa sa mosunod nga mga tudling nga tun-an uban sa usa ka kauban. Dasiga sila nga mohunong kanunay ug ipakigbahin sa usag usa ang ilang mga gihunahuna ug mga pagbati.

Gipakita sa mga salmo ang daghang paagi nga atong ikapakigbahin ang atong mga pagbati para sa Ginoo. Hinay-hinayag tuon ang usa sa mosunod nga mga tudling, nga markahan ang mga pulong ug hugpong sa mga pulong nga nagpakita sa imong mga pagbati bahin sa Ginoo.

Salmo 8:1–9

Salmo 27:1–9

Salmo 30:1–12

Salmo 46:1–11

Ikonsiderar ang pagpakita sa mga estudyante og mga paagi sa pagpahayag sa ilang pagsimba gawas sa pagsulat. Pwede kang mopili og bidyo nga nagpahayag og mga pagbati sa Langitnong Amahan ug kang Jesukristo pinaagi sa pagsayaw, musika, o art, sama sa mosund nga mga bidyo nga anaa sa ChurchofJesusChrist.org. Dapita ang mga estudyante sa pagpamalandong kon unsa sa ilang hunahuna ang gipahayag sa mga tigbuhat pinaagi sa mga liriko, mga painting, ug uban pa.

• Sayaw: “Trust in the Lord: Music Video” (4:11)

• Musika: “Here I Am, I Will Follow Jesus Christ” (3:07) o “Peace in Christ” (4:09)

• Art: Gipakigbahin ni Sister Kristin M. Yee ang iyang painting sa Manluluwas diha sa Facebook (https://www.facebook.com/reel/1240140883346653?mibextid=kcDB8O)

Ipahayag ang imong mga pagbati sa pagsimba

Ihatag sa mga estudyante ang nahibiling oras sa klase sa paghimog usa ka butang nga nagpakita kon unsay ilang gibati bahin sa Langitnong Amahan ug kang Jesukristo. Timbangtimbanga ang panginahanglan sa imong mga estudyante, ug ipakita ang pipila o tanan sa mosunod nga mga opsiyon.

Pwede kang mohatag og mga kinahanglanon sa art sama sa papel, dikolor nga lapis, mga marker, ug uban pa para sa mga estudyante nga gustong maghimo og biswal nga pagpahayag sa ilang mga pagbati.

Tungod kay kini indibidwal man nga proyekto, pwede kang molibot sa lawak klasehan aron motanyag og tabang, giya, ug pagdasig kon gikinahanglan. Kon nahiangay, ikonsiderar ang pagpatukar og mananoy [soft], sagradong musika panahon sa kalihokan.

Makatabang tingali kini nga mapahayag ang imong gugma ug pagsalig ngadto sa mga estudyante nga tingali naglisod sa ilang mga hunahuna o mga pagbati bahin sa Ginoo. Maayo tingaling opsiyon ang Kalihokan 6 alang niadtong mga estudyante nga dili pa segurado sa ilang pagtuo.

Paggahin og pipila ka panahon sa pagpahayag sa imong hunahuna ug mga pagbati bahin sa Langitnong Amahan, kang Jesukristo, ug sa sagradong mga butang. Gamita ang usa sa mosunod nga mga opsiyon, o pagdisenyo og imong kaugalingon. Wala tingali kay panahon nga humanon ang imong proyekto diha sa klase karon, pero pwede kang magsugod sa pagsulat og kanta o balak o sa pagplano og konsepto sa drowing o bidyo. Pwede nimong padayonon og himo ang imong ekspresyon human sa klase. Pwede kang mopili sa paglakip sa kasulatan gikan sa mga Salmo nga nakita nimo nga makahuloganon.

1. Paghimog balak o usa ka kanta nga nagpahayag sa imong mga pagbati bahin sa Langitnong Amahan ug kang Jesukristo.

2. Paghimog bidyo o audio nga girekord diin pwede nimong ipakigbahin ang imong mga pagbati bahin sa Langitnong Amahan ug kang Jesukristo. Para sa bidyo, pwede kang mag-apil og mga hulagway sa sagradong mga butang gikan sa Librarya sa Ebanghelyo.

3. Sagad itandi sa mga salmista ang Manluluwas sa ubang butang aron ipakita ang Iyang kaimportante alang nila. Ang mga ehemplo naglakip sa “Ang Ginoo mao ang akong bato, ug akong kota” (Salmo 18:2) ug “Ang Ginoo mao ang akong kahayag” (Salmo 27:1). Ilista ang mga butang sa imong kinabuhi nga pwedeng magpakita sa imong gibati bahin sa Ginoo.

4. Paghimog drowing, painting, meme, hulagway, o uban pang buhat sa art nga nagpakita sa imong mga pagbati bahin sa Langitnong Amahan ug kang Jesukristo.

5. Pangitag daghang sagradong mga hulagway ug paghimog collage. Pilia ang mga imahe nga nagrepresentar sa mga butang bahin sa Langitnong Amahan, kang Jesukristo, ug sa ebanghelyo nga importante para nimo. Paghimog mubo nga sulat sa matag imahe nga nag-summarize sa imong mga hunahuna ug mga pagbati.

6. Isulat ang imong mga hunahuna bahin sa Langitnong Amahan ug kang Jesukristo. Pwede nimong ipakigbahin ang usa ka kasinatian nga nakaapekto sa imong pagbati bahin Kanila.

Pwede nimong tugotan ang mga estudyante nga ipakigbahin ang ilang gihimo karon. Pwede kang maggahin og panahon aron ipakigbahin sa mga estudyante ang ilang gihimo panahon sa umaabot nga mga leksiyon human sila mahuman sa ilang mga hinimo. Ikonsiderar ang pagdapit sa mga estudyante nga dugangan ang ilang gihimo samtang padayon silang nagkat-on bahin ni Jesukristo atol sa sunod nga pipila ka leksiyon. Sultihi ang mga estudyante nga ilang pamalandongan kini nga mamugnaon nga kasinatian diha sa Leksiyon 112: “Sukda ang Imong Nakat-onan 7.”

Dugang nga mga Kapanguhaan

Unsay ipasabot sa pagsimba sa Dios?

Ang pagsimba sa Dios mao ang paghatag Kaniya sa atong gugma, pagtahod, pag-alagad, ug debosyon. Gisugo sa Ginoo si Moises nga “Simbah[on] ang Dios, kay kaniya lamang ikaw moalagad” (Moises 1:15). Misugo usab siya, “Higugmaa ang Ginoo nga inyong Dios uban sa inyong tibuok nga kasingkasing, uban sa inyong tibuok nga gahom, hunahuna, ug kusog; ug sa ngalan ni Jesukristo kamo moalagad kaniya” (Doktrina ug mga Pakigsaad 59:5). Ang pagsimba wala lang nagpakita sa atong gugma sa Dios ug sa atong pasalig ngadto Kaniya, naghatag kini nato og kusog nga tumanon ang Iyang mga sugo. Pinaagi sa pagsimba molambo kita sa kahibalo ug pagkamatinud-anon. (Mga Hilisgotan sa Ebanghelyo, “Pagsimba,” Librarya sa Ebanghelyo)

Sa unsang paagi makatabang ang sagradong musika sa atong pagsimba sa Ginoo?

Si Elder David A. Bednar sa Korum sa Napulog Duha ka Apostoles mipasabot:

Ganahan kong kantahon ang himno nga “Unsa Kalig-on ang Tukoranan.” Ako na gayoy kinayabagan sa tibuok kalibotan. Pero ang kombinasyon sa makapadasig nga musika ug ang mga pulong sa himno nakatabang nako sa pagkat-on mahitungod sa kaluoy ug sa makapalig-ong gahom sa Pag-ula sa Manluluwas sa gamhanan nga paagi. Ang mga himno nga ganahan kaayo nako nagpunting sa pagpahiuli ug pagtudlo og gamhanang doktrinal nga mga leksiyon. Ug sa maong mga mensahe, sa musika ug mga liriko, ikaw “[Maka]paminaw Kaniya.” Para nako, ang musika kanunay nga maoy usa ka paagi sa pagkadungog sa tingog sa Ginoo. (“‘Hear Him’ in Your Heart and in Your Mind,” Inspiration [blog], Abr. 21, 2020, ChurchofJesusChrist.org)

Si Presidente Dallin H. Oaks sa Unang Kapangulohan miingon:

Ang sagradong musika adunay talagsaong kapasidad sa pagpahayag sa atong mga pagbati sa gugma alang sa Ginoo. Kini nga matang sa komunikasyon usa ka katingalahang tabang sa atong pagsimba. Daghang adunay kalisod sa pagpahayag sa masimbahong mga pagbati sa mga pulong, apan ang tanan makauban sa pagpakigsulti sa mao nga mga pagbati pinaagi sa dinasig nga mga pulong sa atong mga himno. (“Worship through Music,” Ensign, Nob. 1994, 10)

Samtang nagserbisyo isip sakop sa Seventy, si Elder Merrill J. Bateman mipakigbahin:

Ang mga himno sa simbahan maoy usa ka matang sa pagsimba; nagsilbi kining pag-ampo sa mga pasalamat ug usa ka pahayag sa pasalig. Daghang himno ang nagtukod og panaghiusa diha sa mga Santos ingon man nagtukod og komunidad sa mga Santos. Gidapit niini ang Espiritu nganha sa mga panagtigom ug sa atong kinabuhi. Nagtudlo kini og doktrina. Ang mga himno kasagaran nagpahayag og mga pamatuod ug mahimo pa gani nga usa ka matang sa proteksyon o tinubdan sa paghupay ug kaayohan. (“The Power of Hymns,” Ensign, Hulyo 2001, 15–16)

Dugang nga mga Kalihokan sa Pagkat-on

Salmo 8

Pwedeng rebyohon sa klase ang Salmo 8 isip ehemplo sa pagsimba sa Ginoo pinaagi sa pagtagamtam sa katahom sa Iyang mga gilalang. Dapita ang mga estudyante nga basahon ang Salmo 8:1–9. Dayon basaha o kantaha ang himno nga “Gamhanan Ka.”

Gikan sa salmo ug sa himno, dapita ang mga estudyante nga kompletohon ang mosunod nga kamatuoran: Ang Ginoo maoy …

Pwedeng dapiton sa mga estudyante nga ipakigbahin ang ilang nakat-onan ug gibati samtang ilang tun-an kining mga pulonga. Pwede nilang ipakigbahin ang mga kasinatian dihang natural silang nasuod sa Ginoo.

Mga ekspresyon sa kasingkasing

Samtang hisgotan ninyo ang mga paagi sa mga tawo sa pagpahayag og pagsimba, pwede nimong ipasalida ang mga bahin sa bidyo nga “The Remarkable Power of Music.” Gipakigbahin ni Craig Jessop, kinsa nagserbisyo isip direktor sa Tabernacle Choir at Temple Square, ang mga istorya luyo sa mosunod nga mga himno. Apil usab ang mga pagtugtog.

• “It Is Well with My Soul” [Makaayo Kini sa Akong Kalag] (time code 2:20 hangtod 08:25)

• “Amazing Grace” [Makapahingangha nga Kaluoy] (time code 08:52 hangtod 14:33)

• “O Come, O Come, Emmanuel” [Umari Ka, Umari Ka, Emmanuel] (time code 14:34 hangtod 20:38)

• “Savior, Redeemer of My Soul” [Manluluwas, Manunubos sa Akong Kalag] (time code 35:31 hangtod 41:00)

Mga Salmo sa ubang mga basahon sa kasulatan

Makabenepisyo tingali ang mga estudyante gikan sa pagtuon bahin sa mga salmo nga gisulat sa matinud-anong mga babaye ug lalaki diha sa ubang mga basahon sa kasulatan. Pwede nimong ipakigbahin ang mosunod nga mga tudling sa kasulatan. Dapita ang mga estudyante sa pagpili og usa nga tun-an.

• Hana: 1 Samuel 2:1–10

• Maria: Lucas 1:46–55

• Nephi: 2 Nephi 4:16–25

• Nephi: 2 Nephi 4:26–35

• Ammon: Alma 26:8–20

Pwedeng pangitaon sa mga estudyante ang mga tinguha, mga pagbati, ug mga hunahuna nga gipakigbahin sa tagsulat. Human mabasa, pwedeng ipakigbahin sa mga estudyante ang ilang nadiskobrehan uban sa usa ka kauban nga nagtuon og laing salmo.