Ruthit; 1 Samuelit 1–7: Mësimi 68

Ruthi

“Shpërblimi Yt të Jetë i Plotë nga Ana e Zotit”

Për shkak se çmimi i shpëtimit është tepër i lartë që ne ta paguajmë vetëm, është e nevojshme që secili prej nesh të shëlbohet. Tregimi i Ruthit, Naomit dhe Boazit në Dhiatën e Vjetër është një histori e shëlbimit fizik që simbolizon rolin e Jezu Krishtit si Shëlbuesi ynë vetjak. Ky mësim ka për qëllim t’i ndihmojë nxënësit të ndiejnë një dëshirë më të madhe për të mirëbesuar te Jezu Krishti dhe fuqia e Tij shëlbuese.

Përgatitja e nxënësve: Ftojini nxënësit të marrin parasysh se përse një nga titujt e Jezu Krishtit është Shëlbuesi. Inkurajojini ata të përsiatin se si Jezu Krishti na shëlbon nga vdekja fizike dhe shpirtërore. (Për ndihmë, ata mund t’i referohen zërin “Shëlbej, Shëlbuar (i), Shëlbim” tek Udhëzuesi për Shkrimet e Shenjta.) Inkurajojini ata të vijnë të përgatitur për t’ia treguar mendimet e tyre klasës.

Veprimtari të Mundshme të të Mësuarit

Çfarë do të thotë që Jezu Krishti është Shëlbuesi ynë?

Mund ta filloni orën mësimore duke paraqitur figurën vijuese të Jezu Krishtit ose një tjetër të zgjedhur prej jush dhe të shkruani fjalën Shëlbues në tabelë.

Paraqitni citimin nga Plaku Kristoferson dhe ftojini nxënësit t’u përgjigjen të dyja pyetjeve në ditarin e tyre të studimit.

Plaku D. Tod Kristoferson, i Kuorumit të Dymbëdhjetë Apostujve, shpjegoi:

“Një nga titujt më kuptimplotë që e përshkruajnë Jezu Krishtin, është Shëlbues. … Fjala shëlboj do të thotë të shlyesh një detyrim ose borxh. Shëlboj mund të ketë gjithashtu kuptimin të shpëtosh ose të çlirosh.” (“Shëlbimi”, Liahona, maj 2013, f. 109)

• Në ç’mënyra mund të jetë e nevojshme që ti dhe të tjerët të shëlboheni nga Jezu Krishti?

• Sa dëshiron të mirëbesosh te fuqia shëlbuese e Jezu Krishtit në jetën tënde? Përse?

Ftojini nxënësit të marrin parasysh se sa të sigurt janë për përgjigjet e tyre dhe çfarë mund të donin të kuptonin më mirë ose ndienin rreth Shpëtimtarit dhe fuqisë së Tij shëlbuese.

Nëse dëshironi, mund ta përmblidhni paragrafin e radhës me fjalët tuaja. Nëse dëshironi, gjithashtu mund të shkruani të vërtetën e theksuar me shkronja të zeza në tabelë afër fjalës Shëlbues.

Shëlbimi është një nga temat e dukshme në tregimin e Ruthit. Ndërsa e studion historinë e Ruthit, merre parasysh se si përngjasimi i këtij tregimi me veten tonë mund të na ndihmojë të mësojmë se nëse vijmë te Jezu Krishti, Ai do të na shëlbojë. Kërko ndihmën e Frymës së Shenjtë për të ditur mënyrat se si ne jemi si Ruthi dhe kemi nevojë për shëlbim dhe mënyrën se si Boazi është si Shpëtimtari Jezu Krisht dhe na shëlbon.

Tregimi i Ruthit

Mund ta lexoni ose shpjegoni përmbledhjen vijuese.

Në një kohë zie buke, një grua izraelite e quajtur Naomi, bashkëshorti i saj dhe dy djemtë e saj u zhvendosën nga Bethlehemi në Moab, një vend fqinj me një kulturë dhe bindje fetare të ndryshme. Ndërkohë që ishin atje, secili prej djemve u martua me gra moabite, Ruthin dhe Orpahun.

Tragjikisht, bashkëshorti dhe dy djemtë e Naomit vdiqën, duke i lënë të tria gratë vejusha. Naomi zgjodhi të kthehej në Bethlehem. Në pamundësi për t’u kujdesur për nuset e veta, Naomi i inkurajoi ato të ktheheshin te familjet e tyre në Moab. Orpahu u kthye te familja e saj.

Lexo te Ruthit 1:8–9, 14–17, duke kërkuar përgjigjen e Ruthit për Naomin.

• Cilat janë disa nga pasiguritë dhe vështirësitë me të cilat mund të përballet Ruthi duke shkuar në Bethlehem me Naomin?

  Pasi të dëgjoni atë që tregojnë nxënësit, mund të shpjegoni disa nga pikat vijuese:

  • Duke shkuar me Naomin, Ruthi do të linte pas familjen në Moab.

  • Ruthi do të ishte një e huaj në një vend të panjohur me një kulturë të ndryshme.

  • Pa bashkëshortët, Ruthi dhe Naomi do të përballeshin me varfëri të skajshme.

  • Zgjedhja e Ruthit tregoi gatishmërinë e saj për të adhuruar dhe për t’u mbështetur te Jehova (Jezu Krishti), jo te perënditë e rreme të moabitëve. (Mund t’i ftoni nxënësit ta shenjojnë frazën “Perëndia yt do të jetë edhe Perëndia im” te vargu 16.)

• Duke ditur rrethanat e Ruthit, çfarë të bën përshtypje rreth përgjigjes së saj?

Boazi shëlbon Ruthin

Për të vazhduar tregimin e Ruthit, mund t’i ftoni nxënësit të plotësojnë fletushkën “Ruthi dhe Naomi Shëlbohen”. Nxënësit mund të punojnë në dyshe për të shkruar hollësitë e rëndësishme të historisë. Një mundësi tjetër do të ishte t’u jepni nxënësve blloqet e shkrimit të shenjtë të fletushkës dhe t’i vini ata t’i përmbledhin vargjet me fjalët e tyre me një partner.

Pasi nxënësit ta plotësojnë fletushkën, mund të shpjegoni cilëndo prej pikave vijuese që e ndieni se do të ishte e dobishme:

• Si pjesë e Ligjit të Moisiut, izraelitëve iu kërkohej të linin drithë të pakorrur në ara për t’u kujdesur për të varfrit (shihni te Levitiku 19:9–10).

• Naomi i tha Ruthit se Boazi ishte një “njeri që ka të drejtë të na shpengojë” (shihni te Ruthit 2:20) ose i afërm i ngushtë. Termi “njeri që ka të drejtë të na shpengojë” vjen nga fjala në hebraisht go-el, që do të thotë “shëlbuesi”. Një “njeri që ka të drejtë të na shpengojë” pritej të kujdesej për (ose edhe të merrte për grua) të vejat në familjen e tij për t’ju rikthyer sigurinë dhe mbrojtjen.

• Për shkak se ishte një i afërm tjetër më i ngushtë që kishte të drejtën të martohej me Ruthin, Boazi e bleu të drejtën prej tij (shihni te Ruthit 3:12–13) para se të martohej me Ruthin (shihni te Ruthit 4:9–10, 13).

Mund të jetë e dobishme të krijoni një tabelë me dy kolona në dërrasë. Emërtojeni kolonën e parë Ruthi/Ne dhe kolonën e dytë Boazi/Jezu Krishti. Nxënësit mund të renditin në tabelë atë që gjejnë.

• Në ç’mënyra mund të jemi të ngjashëm me Ruthin?

  Nëse nxënësit e kanë të vështirë të përgjigjen, merreni parasysh t’u kërkoni atyre të mendojnë rreth mënyrës se si ata mund të mos kenë mjaftueshëm ose të mos jenë të vetëmjaftueshëm. (Kjo mund të përfshijë të mospasurit e drejtësisë ose bindjes së mjaftueshme, forcës së mjaftueshme për ta mposhtur mëkatin ose dobësinë, përkrahjen e mjaftueshme për të vazhduar bërjen e asaj që është e drejtë e me radhë.) Mund t’i pyesni gjithashtu se çfarë bëri Ruthi për të kërkuar shëlbim dhe se si mund të jemi të ngjashëm.

• Në ç’mënyra është Boazi i ngjashëm me Jezu Krishtin?

  Nëse nxënësit e kanë të vështirë të përgjigjen, merreni parasysh t’i ftoni të shqyrtojnë vargjet te Ruthit 2:12, 15–16. Mund të vini gjithashtu në dukje se Boazi hyri në një besëlidhje ose marrëdhënie martese me Ruthin për ta dashur dhe kujdesur gjithmonë për të.

  Nëse është e nevojshme, shpjegoni se Shpëtimtari na shëlbon në çdo mënyrë që na nevojitet. Merreni parasysh t’i ftoni nxënësit të lexojnë te Mosia 15:7–9 ose Helamani 5:9–11 për të përcaktuar mënyrën se si na shëlbon Shpëtimtari. Mund të shtoni gjithashtu se puna shëlbuese e Shpëtimtarit përfshin ndihmën ndaj nesh për problemet tona në tokë (shihni te D. Tod Kristoferson, “Shëlbimi”, Liahona, maj 2013, f. 109–110).

• Si do ta përshkruaje ndryshimin në situatën e Ruthit para dhe pasi Boazi e ndihmoi dhe u martua me të?

• Çfarë mësimesh mund të marrim rreth marrëdhënies sonë me Jezu Krishtin nëpërmjet historisë së Ruthit dhe Boazit?

Jezu Krishti është Shëlbuesi ynë

Sigurimi i mundësive që nxënësit t’u përgjigjen tri pyetjeve të radhës, mund ta ftojë Frymën e Shenjtë. Ndërsa nxënësit flasin dhe e dëgjojnë njëri-tjetrin të flasin, Fryma e Shenjtë mund t’i ndihmojë nxënësit të ndiejnë një dëshirë më të madhe për të mirëbesuar te Jezu Krishti dhe fuqia e Tij shëlbuese. Për t’i ndihmuar nxënësit të përgatiten për t’iu përgjigjur pyetjes së parë, mund të shfaqni “Finding Your Purpose in Life: Does Faith Matter?” [“Gjetja e Qëllimit Tuaj në Jetë: A Ka Rëndësi Besimi?”] (5:08) ose “Moving on from Past Mistakes” [“Kapërcimi i Gabimeve të së Shkuarës”] (3:43), të dy janë në dispozicion në ChurchofJesusChrist.org.

• Kur e ke ndier ti ose dikush që ti njeh, fuqinë shëlbuese të Jezu Krishtit?

• Përse ti, ashtu si Ruthi, mund të duash të mirëbesosh te Jezu Krishti dhe fuqia e Tij shëlbuese në të ardhmen?

• Çfarë mendon se mund të bëjë dikush për ta rritur dëshirën e vet për të mirëbesuar te fuqia shëlbuese e Shpëtimtarit?

Për ta përmbyllur, ftojini nxënësit të marrin parasysh se çfarë mendimesh ose mbresash morën nga Fryma e Shenjtë rreth mirëbesimit te Zoti dhe fuqia e Tij shëlbuese. Nëse dëshirojnë, mund t’i shtojnë mendimet për pyetjet që iu dhanë përgjigje në fillim të mësimit në ditarët e tyre të studimit.

Burime Shtesë

Cilat zakone të martesës ndikuan në historinë e Ruthit?

Ligji i martesës me kunatin shprehej se kur një burrë martohej dhe më pas vdiste para se t’i lindte një fëmijë mashkull, i afërmi i tij mashkull më i ngushtë duhej të martohej me vejushën (shihni te Bible Dictionary, “Levirate marriage”). “Njeriu që kishte të drejtë të shpengonte, kishte [gjithashtu] të drejtën të blinte (shëlbonte) tokën e të afërmit [të tij] që kishte ndërruar jetë.” (Ellis T. Rasmussen, A Latter-day Saint Commentary on the Old Testament [1993], f. 227)

A gjen zbatim tek unë fuqia shëlbuese e Shpëtimtarit?

Plaku Dejll G. Renland, i Kuorumit të Dymbëdhjetë Apostujve, tregoi:

“Shpëtimtari dëshiron shumë që të rivendosë atë që ju nuk mund ta rivendosni; Ai dëshiron shumë të shërojë plagë që ju nuk mund t’i shëroni; Ai dëshiron shumë që të ndreqë atë që është thyer në mënyrë të pariparueshme; Ai dëmshpërblen për cilëndo padrejtësi të shkaktuar mbi ju dhe Ai dëshiron shumë që t’i shërojë përgjithmonë edhe zemrat e thyera”. (“Kini Parasysh Mirësinë dhe Madhështinë e Perëndisë”, Liahona, maj 2020, f. 44)

Si mund të kem qasje në fuqinë shëlbuese të Jezu Krishtit?

Plaku Kim B. Klark, i Të Shtatëdhjetëve, dha mësim:

“Kur i jetojmë besëlidhjet tona, ato ndikojnë te çdo gjë që themi e bëjmë. Ne jetojmë një jetë besëlidhëse plot me veprime të thjeshta, të përditshme, besimi, të cilat na përqendrojnë te Jezu Krishti: lutja nga zemra në emrin e Tij, ushqimi me bollëk me fjalën e Tij, kthimi tek Ai për t’u penduar për mëkatet tona, zbatimi i urdhërimeve të Tij, marrja e sakramentit dhe mbajtja e shenjtë e Shabatit të Tij, adhurimi në tempullin e Tij të shenjtë sa më shpesh që mundemi, dhe ushtrimi i priftërisë së Tij të shenjtë për t’u shërbyer fëmijëve të Perëndisë.

Këto veprime të përkushtimit besëlidhës i hapin zemrën dhe mendjen tonë ndaj fuqisë shëlbuese të Shpëtimtarit dhe ndikimit shenjtërues të Frymës së Shenjtë. Rresht pas rreshti Shpëtimtari e ndryshon pikërisht natyrën tonë, ne kthehemi më thellësisht në besimin tek Ai dhe besëlidhjet tona bëhen të gjalla në zemrat tona.” (“Shihni te Jezu Krishti”, Liahona, maj 2019, f. 55)

Veprimtari Plotësuese të të Mësuarit

Historia e Ruthit

Për t’i ndihmuar nxënësit ta përfytyrojnë historinë e Ruthit, mund të merrni parasysh të shfaqni materialin filmik “Ruth and Naomi” [“Ruthi dhe Naomi”] (2:00).

Gjuha figurative te Ruthit 2:12

Për t’i ndihmuar nxënësit t’i dallojnë referencat ndaj fuqisë shëlbuese të Jezu Krishtit te Ruthit 2:12, mund t’i pyesni ata se si “shpërbl[imi]” lidhet me fjalën shëlboj dhe rolin e Jezu Krishtit si Shëlbuesi.

Gjithashtu, Plaku Patrik Kirën, i Kuorumit të Dymbëdhjetë Apostujve, dha mësim:

“Megjithëse mund të duket i pamundur, të ndihet i pamundur, shërimi mund të vijë nëpërmjet mrekullisë së fuqisë shëlbuese të Shlyerjes së Jezu Krishtit, i cili u ringjall ‘me shërimin në krahët e tij’”. (“Ai Është Ngritur me Shërim në Krahët e Tij”, Liahona, maj 2022, f. 39)

Materiale filmike shtesë rreth shëlbimit të Shpëtimtarit

Mënyra se si jetojmë është më e rëndësishme sesa prejardhja jonë

Mund të shpjegoni hollësitë vijuese rreth prejardhjes së Ruthit para se të martohej me Boazin: Ruthi ishte një moabite (Ruthit 1:4), një vejushë (Ruthit 1:5) dhe një e kthyer në besim në adhurimin e Jehovës (Ruthit 1:16).

Vini në dukje se, megjithëse Ruthi nuk ishte izraelite e lindur, as një person me ndonjë pasuri, ajo zgjodhi të mirëbesonte te Perëndia i Izraelit dhe ta ndiqte Atë. Për shkak të besimit të saj, ajo u shëlbua.

Ftojini nxënësit të lexojnë tek Alma 11:40 dhe 2 Nefi 30:2 dhe bëni pyetjen vijuese:

• Çfarë mund të mësojmë nga tregimi i Ruthit dhe këto vargje rreth pendimit dhe mbajtjes së besëlidhjeve?

Shpëtimtari lindi përmes prejardhjes familjare të Ruthit

Mund t’i ftoni nxënësit të lexojnë te Ruthit 4:13–22, duke kërkuar se kush do të lindte në familjen e Ruthit dhe Boazit. Vargjet thonë se Ruthi dhe Boazi do të bëheshin paraardhës të drejtpërdrejtë të Shëlbuesit të botës, Jezu Krishtit.

Merreni parasysh t’i ftoni nxënësit ta shënojnë dëshminë e tyre për Jezu Krishtin në ditarët e tyre të studimit. Mund t’i inkurajoni ata të gjejnë një mundësi në ditët e ardhshme për t’ia treguar dëshminë e tyre dikujt tjetër.