Jozueut 1–8; 23–24: Mësimi 62

Jozueut 2–4

Ushtrimi i Besimit te Jezu Krishti

Pas udhëtimit të izraelitëve nëpër shkretëtirë, Zoti e urdhëroi Jozueun t’i udhëhiqte ata për në tokën e premtuar. Hyrja në tokën e premtuar kërkonte që ata të ushtronin besimin te Jezu Krishti. Fëmijët e Izraelit dhe një grua e quajtur Rahab treguan besimin e tyre te Jezu Krishti. Ky mësim mund t’i ndihmojë nxënësit të kuptojnë se si mund ta ushtrojnë besimin te Jezu Krishti.

Përgatitja e nxënësve: Ftojini nxënësit të gjejnë një shkrim të shenjtë që i ndihmon të kuptojnë se çfarë do të thotë të kesh besim te Jezu Krishti. Kërkojuni të vijnë të përgatitur për të folur në orën mësimore. Nëse është e nevojshme, ata mund ta kërkojnë fjalën “Besim” tek Udhëzuesi për Shkrimet e Shenjta.

Veprimtari të Mundshme të të Mësuarit

Besimi te Jezu Krishti

Merreni parasysh ta filloni orën mësimore duke e ftuar një nxënës të mendojë për një fjalë që përfaqëson hobet ose interesat e tij – për shembull, basketboll ose të kënduarit. Kërkojuni nxënësve t’i përshkruajnë fjalët e tyre pa e përdorur vetë fjalën. Anëtarët e klasës mund ta gjejnë fjalën.

Më pas, shkruani fjalën besim në tabelë dhe ftojini nxënësit të përshkruajnë besimin te Jezu Krishti. Ata mund ta tregojnë atë që gjetën, si pjesë e përgatitjes së tyre për orën mësimore. Nëse dëshironi, mund të vini në dukje se Ati Qiellor dëshiron që ne të ushtrojmë besim te Jezu Krishti në mënyrë që Ai të mund të na shpëtojë dhe bekojë (shihni te 2 Nefi 26:13; Ethëri 12:12, 18; Moroni 7:33).

Kujtojuni nxënësve se një nga rolet e Frymës së Shenjtë është të na udhërrëfejë drejt së vërtetës (shihni te Gjoni 16:13). Inkurajojini nxënësit ta ftojnë Frymën e Shenjtë t’i ndihmojë ata ta kuptojnë më mirë besimin te Jezu Krishti.

• Si mund të të ndihmojë rritja e besimit tënd te Jezu Krishti në rrethanat e tua të tanishme?

Lexoje atë që dha mësim Plaku Dejvid A. Bednar, i Kuorumit të Dymbëdhjetë Apostujve, rreth besimit te Jezu Krishti, ose shih materialin filmik “Seek Learning by Faith” [“Kërkoni të Mësoni me Anë të Besimit”] nga kodi kohor 3:15 deri në 4:33. Ky material filmik gjendet në ChurchofJesusChrist.org.

“Apostulli Pal e përkufizoi besimin si ‘siguria e gjërave që shpresohen [dhe] tregim i gjërave që nuk shihen’ (Hebrenjve 11:1). Alma shpalli se besimi nuk është që të kesh një njohuri të përsosur; përkundrazi, në qoftë se kemi besim, ne ‘shpreso[jmë] për gjëra që nuk shihen, [por] të cilat janë të vërteta’ (Alma 32:21). Për më tepër, te Lectures on Faith [Ligjërata mbi Besimin] ne mësojmë se besimi është … ‘parimi i veprimit tek të gjitha qeniet inteligjente’.

Këto mësime theksojnë tre elemente bazë të besimit: 1) besimi si siguria e gjërave që shpresohen, të cilat janë të vërteta, 2) besimi si prova e gjërave që nuk shihen dhe 3) besimi si parimi i veprimit tek të gjitha qeniet inteligjente. I përshkruaj këta tre përbërës të besimit te Shpëtimtari si [elemente] që njëherësh janë të kthyer drejt së ardhmes, vështrojnë nga e shkuara dhe fillojnë veprimin në të tashmen.” (“Seek Learning by Faith”, Ensign, shtator 2007, f. 61–62)

Figura “Ushtrimi i besimit te Jezu Krishti” mund t’i ndihmojë nxënësit të kuptojnë përkufizimin e Plakut Bednar për besimin te Jezu Krishti. Vizatojeni figurën në tabelë ose paraqiteni që nxënësit t’i referohen gjatë gjithë mësimit.

• Çfarë ka bërë Perëndia në të shkuarën që mund të të ndihmojë të kesh besim tek Ai?

• Si mund të të ndihmojë të pasurit e shpresës te bekimet e premtuara të Perëndisë që të ushtrosh besim tek Ai?

• Si do t’i përmblidhje mësimet e Plakut Bednar rreth besimit te Jezu Krishti?

Ndihmojini nxënësit të përcaktojnë një të vërtetë si: Ne e ushtrojmë besimin te Jezu Krishti ndërsa jemi të kthyer drejt së ardhmes, vështrojmë nga e shkuara dhe veprojmë në të tashmen.

Shembuj besimi

Tregimet te Jozueut 2–4 ilustrojnë një ose më shumë prej këtyre elementeve të ushtrimit të besimit te Jezu Krishti.

Ndihmojini nxënësit t’i studiojnë këto tregime. Një mënyrë është të krijoni një stacion mësimi për secilin kapitull. Mund ta vendosni një pjesë të fletushkës “Shembuj të Besimit te Jezu Krishti nga Jozueut 2–4” në tre zona të ndryshme të klasës. Nxënësit mund të lëvizin me radhë te secili stacion dhe të ndjekin udhëzimet në fletushkë. Për klasa më të mëdha, nëse dëshironi, mund të krijoni stacione të shumta mësimi për secilën pjesë. Lejojini nxënësit të marrin pjesë individualisht ose në grupe të vogla.

Nëse është e mundur, mund të paraqitni sa vijon në secilin stacion mësimi:

• Një fill i kuq për kapitullin te Jozueut 2

• Një palë këpucë për kapitullin te Jozueut 3

• Një gur për kapitullin te Jozueut 4

Nëse nxënësit kanë pyetje rreth shkatërrimit të popullit në Jeriko, mund t’i referoheni pyetjes: “Përse u shfarosën kanaanejtë?” në pjesën Burime Shtesë të Mësimit 63: “Jozueut 23–24”.

Pas një kohe të mjaftueshme, ftojini nxënësit t’i tregojnë klasës atë që mësuan rreth besimit te Jezu Krishti. Nxënësit mund të ngrenë lart fillin e kuq, këpucët ose gurin ndërsa flasin. Pyetje të tilla si ajo në vijim, mund të ndihmojnë.

• Çfarë ke mësuar rreth ushtrimit të besimit te Jezu Krishti? Si mund t’i ndihmojë të rinjtë sot ajo që mësove?

Merreni parasysh t’i ftoni nxënësit të tregojnë se si ata ose dikush që ata e njohin, e ka ushtruar besimin te Jezu Krishti duke u kthyer drejt së ardhmes, duke vepruar në të tashmen dhe duke vështruar nga e shkuara. Mund të tregoni edhe një përvojë vetjake rreth ushtrimit të besimit te Jezu Krishti.

Burime Shtesë

Si mund ta ushtroj besimin te Jezu Krishti?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Besimi, si siguria e gjërave që shpresohen, vështron nga e ardhmja. …

Besimi te Krishti është i lidhur në mënyrë të pandashme me shpresën te Krishti dhe çon në shëlbimin dhe ekzaltimin tonë. Dhe siguria e shpresa bëjnë të mundur që të ecim në skaj të dritës dhe pastaj të bëjmë pak hapa në errësirë – duke pritur dhe mirëbesuar se drita do të shfaqet dhe do ta ndriçojë udhën. Ndërthurja e sigurisë dhe e shpresës nxit veprimin në të tashmen.

Besimi, si prova e gjërave që nuk shihen, vështron nga e shkuara dhe pohon mirëbesimin tonë te Perëndia dhe vetëbesimin tonë në vërtetësinë e gjërave që nuk shihen. Ne u futëm në errësirë me siguri e shpresë dhe morëm një provë e pohim kur drita në fakt u shfaq dhe na dha ndriçimin që na nevojitej. Dëshmia që ne morëm pas sprovës së besimit tonë (shihni tek Ethëri 12:6), është një provë që e shton dhe e forcon sigurinë tonë.

Siguria, veprimi dhe prova ndikojnë te njëra-tjetra në një proces të vazhdueshëm. Kjo lakore është si një spirale dhe, ndërsa shkon për lart, ajo rritet dhe zgjerohet. Këto tre elemente të besimit – siguria, veprimi dhe prova – nuk janë të ndara dhe të shkëputura; përkundrazi, ato janë të ndërlidhura dhe të vazhdueshme dhe shkojnë lart. Dhe besimi që furnizon këtë proces të vazhdueshëm, zhvillohet, evoluon dhe ndryshon. Ndërsa ne kthehemi dhe përballemi sërish me një të ardhme të pasigurt, pasiguria çon në veprim dhe prodhon provë që rrit më tej sigurinë. Vetëbesimi ynë përforcohet rresht pas rreshti, parim pas parimi, pak këtu dhe pak atje.” (“Seek Learning by Faith”, Ensign, shtator 2007, f. 62−63)

Si mund të ushtroj besimin duke vështruar nga e shkuara dhe e ardhmja?

Presidenti Xhefri R. Holland, i Kuorumit të Dymbëdhjetë Apostujve, shpjegoi:

“E kaluara është për të mësuar, jo për ta jetuar. Ne e kthejmë kokën prapa që t’u marrim përvojave të ndritura thëngjijtë, por jo hirin. Dhe kur i kemi mësuar ato që na nevojitet të mësojmë dhe e kemi marrë me vete më të mirën që kemi përjetuar, atëherë shikojmë përpara dhe mbajmë mend që besimi gjithnjë drejtohet tek e ardhmja. Besimi ka të bëjë gjithnjë me bekimet, të vërtetat dhe ngjarjet që ende do të jenë dobiprurëse në jetën tonë.” (“The Best Is Yet to Be”, Ensign, janar 2010, f. 24)

Çfarë mund të bëj që ta rrit besimin tim te Jezu Krishti?

Presidenti Rasëll M. Nelson ftoi:

“Çfarë do të bënit nëse do të kishit më shumë besim? Mendoni për të. Shkruani për të. Më pas merrni më shumë besim duke bërë diçka që kërkon më shumë besim. …

Besimi te Jezu Krishti është fuqia më e madhe që kemi në dispozicion në këtë jetë. Të gjitha gjërat janë të mundshme për ata që besojnë.

Besimi juaj në rritje tek Ai, do të zhvendosë male – jo malet shkëmbore që zbukurojnë tokën, por malet e mjerimit në jetën tonë. Besimi juaj në lulëzim do t’ju ndihmojë t’i ktheni sfidat në mundësi dhe rritje të pashembullta.” (“Krishti u Ringjall; Besimi tek Ai do të Zhvendosë Malet”, Liahona, maj 2021, f. 103, 104)

Presidenti Henri B. Ajring, i Presidencës së Parë, shpalli:

“Vëllezër dhe motra, duhet besim për të qenë të bindur ndaj urdhërimeve të Zotit. Duhet besim te Jezu Krishti për t’u shërbyer të tjerëve në emrin e Tij. Duhet besim për të dalë e për ta dhënë mësim ungjillin e Tij dhe për t’ua ofruar atë njerëzve, të cilët mund të mos e ndiejnë zërin e Shpirtit ose madje mund ta mohojnë realitetin e mesazhit. Por teksa ne ushtrojmë besimin tonë te Krishti – dhe e ndjekim profetin e Tij të gjallë – besimi do të rritet anembanë botës.” (“Besimi për të Pyetur dhe Pastaj për të Vepruar”, Liahona, nëntor 2021, f. 75)

Veprimtari Plotësuese të të Mësuarit

Jozueut 3:5. “Shenjtërohuni”

Nxënësit tuaj mund të kenë dobi nga studimi i mënyrës se si shenjtërimi i vetes mund të na ndihmojë të ushtrojmë besim te Jezu Krishti dhe të përjetojmë mrekulli. Lexoni te Jozueut 3:5. Më pas mund të shfaqni materialin filmik “Sanctify Yourselves” [“Shenjtëroni Veten Tuaj”] (4:37). Ftojini nxënësit të kërkojnë mënyrën se si e përdori Zoti një mbajtës të ri dhe të denjë të Priftërisë Melkizedeke për të kryer një mrekulli. Më pas, diskutoni se çfarë do të thotë ta shenjtërojmë veten dhe se si ajo na kualifikon për të përjetuar mrekullitë e Zotit. Sipas nevojës, ndihmojini nxënësit të kuptojnë se shenjtëroj do të thotë të na bëjë të shenjtë ose të pastër shpirtërisht.

Jozueut 3:6. “Kështu ata morën arkën e besëlidhjes dhe ecën para popullit”

Sa vijon mund t’i ndihmojë nxënësit të shohin te Jezu Krishti ndërsa përjetojnë besimin tek Ai dhe shkojnë përpara. Ftojini nxënësit të lexojnë te Jozueut 3:6–16, duke kërkuar atë që bënë priftërinjtë me arkën e besëlidhjes.

Kujtojuni nxënësve se arka e besëlidhjes mund të simbolizojë Jezu Krishtin. Më pas ftojini nxënësit t’i shohin vargjet sërish, duke menduar për atë që mësojnë rreth Jezu Krishtit. Diskutoni mënyrat se si mund të shkojmë përpara dhe të presim mrekulli kur kemi besim se Jezu Krishti shkon përpara nesh. Merreni parasysh të bëni referencë-kryq të këtyre vargjeve te Jozueut 3 me vargjet tek Isaia 52:12 dhe Doktrina e Besëlidhje 84:88.

Jozueut 4. Përkujtuesit e besimit

Merreni parasysh t’i ndihmoni nxënësit të gjejnë përkujtuesit ose shembujt e tyre të besimit. Pasi të studiojnë te Jozueut 4, mund t’i ftoni nxënësit të mendojnë rreth trashëgimisë së besimit të lënë nga familja e tyre ose shenjtorët e ditëve të mëvonshme në vendin tuaj. Nxënësit mund të flasin (ndoshta edhe ta kontaktojnë gjatë orës mësimore) me një prind ose gjysh/e, ose mund të përdorin programin Pema Familjare për të gjetur kujtime të familjes. Nxënësit mund të mendojnë edhe për një vend ku patën një përvojë shpirtërore të rëndësishme.

Nxënësit gjithashtu mund të kërkojnë te Histori nga Tërë Bota te ChurchofJesusChrist.org për të kërkuar tregime për shenjtorë të ditëve të mëvonshme besnikë në vendin tuaj.

Ftojini nxënësit ta tregojnë atë që gjetën.

Ethëri 12:6. Dëshmia vjen pas një prove besimi

Për t’i ndihmuar nxënësit ta lidhin atë që po studiojnë me Librin e Mormonit, ftojini ata të lexojnë tek Ethëri 12:6. Diskutoni përse shpesh dëshmia vjen pas një sprove të besimit. Ftojini nxënësit të tregojnë se si kjo ishte e vërtetë në jetën e Rahabit (shihni te Jozueut 2; Jozueut 6:25) dhe tek izraelitët ndërkohë që kalonin lumin Jordan (shihni te Jozueut 3). Kërkojuni nxënësve të tregojnë përvojat kur kanë marrë një dëshmi pas sprovës së besimit të tyre.