Jozueut 1–8; 23–24: Mësimi 61

Jozueut 1

Zoti Nuk do të na Lërë apo Braktisë

Si profeti i zgjedhur i Zotit, Jozueu u shugurua nga Moisiu për të udhëhequr Izraelin për në tokën e premtuar. Megjithëse kjo detyrë mund të jetë dukur shumë e vështirë, Shpëtimtari e urdhëroi Jozueun të ishte i fortë dhe guximtar, me premtimin që Ai nuk do ta linte apo braktiste profetin e Tij (shih te Jozueut 1:5–6). Ky mësim mund të ndihmojë për ta rritur vetëbesimin e nxënësve se Zoti mund t’i ndihmojë të jenë të fortë dhe guximtarë kur përballen me sfida.

Përgatitja e nxënësve: Ftojini nxënësit të mendojnë për situata kur një të riu mund t’i nevojitet të tregojë guxim. Nxënësit mund të pyesin një pjesëtar të familjes ose mik për përvojat që ka pasur, që kërkonin guxim.

Veprimtari të Mundshme të të Mësuarit

Guxim kur përballesh me sfida

Për ta filluar orën mësimore, merreni parasysh të shkruani fjalën Guxim në tabelë. Ndërsa nxënësit u përgjigjen pyetjeve vijuese, ftojini ata t’i shkruajnë përgjigjet e tyre në tabelë.

• Në ç’mënyrë ishte Jezu Krishti një shembull guximi?

• Cilat janë disa situata me të cilat mund të përballet një adoleshent, që do të kërkonin guxim?

Në ditarin tënd të studimit, shkruaj disa nga sfidat me të cilat po përballesh tani ose mund të përballesh në të ardhmen, që kërkojnë guxim.

Vetëvlerësimi mund t’i ndihmojë nxënësit të vlerësojnë situatën e tyre aktuale dhe të sigurojë një mundësi për Frymën e Shenjtë që të plotësojë nevojat e tyre individuale gjatë gjithë mësimit. Një mënyrë për ta bërë këtë mund të jetë t’i ftoni nxënësit t’u përgjigjen nxitjeve vijuese në ditarët e tyre të studimit.

• Kur më kërkohet të bëj diçka që duket sfiduese, unë shpesh ndiej .

• Në një shkallë nga 1 (pak) deri në 5 (shumë), sa i sigurt ndihem që Ati Qiellor dhe Jezu Krishti do të më ndihmojnë të përballem me sfidat e mia me guxim? Përse?

Ndërsa studion sot, kushtoju vëmendje mbresave nga Fryma e Shenjtë që mund të të ndihmojnë të jesh guximtar dhe ta rritësh vetëbesimin se Zoti është me ty.

Jozueu shugurohet për të udhëhequr fëmijët e Izraelit

Merreni parasysh të paraqitni një figurë të Moisiut që shuguron Jozueun, si figura në fillim të këtij mësimi (shihni te Ligji i Përtërirë 34:9).

Megjithëse Moisiu kishte qenë me fëmijët e Izraelit që nga çlirimi i tyre nga Egjipti, Zoti e thirri Jozueun t’i udhëhiqte ata për në tokën e premtuar.

• Cilat janë disa nga sfidat me të cilat mund të ishte përballur Jozueu si profet i Zotit dhe udhëheqës ushtarak i Izraelit?

Ndihmojini nxënësit të kuptojnë se Jozueu do të kishte përgjegjësinë e udhëheqjes shpirtërore të Izraelit. Jozueu ishte gjithashtu komandanti ushtarak dhe do ta udhëhiqte Izraelin që të pushtonte tokën e kanaanejve që ishin të mbushur me paudhësi (shihni te 1 Nefi 17:31–40). Zoti ua kishte premtuar këtë tokë Abrahamit dhe pasardhësve të tij të drejtë (shihni te Jozueut 1:1–4).

Lexo te Jozueut 1:5–9, duke shenjuar premtimet dhe udhëzimet e përsëritura nga Zoti që mund ta kishin ndihmuar Jozueun të përqendrohej tek Ai kur përballej me sfida.

• Çfarë gjen të rëndësishme në këto vargje?

• Si do ta përmblidhje një të vërtetë për të ndihmuar dikë që po kalon sfida?

Ndërsa nxënësit i tregojnë të vërtetat që kanë përcaktuar, ndihmojini ata të kuptojnë se, kur e dimë se Zoti është me ne, ne mund të jemi të fortë dhe guximtarë. Mund të përdorni disa ose të gjitha pyetjet vijuese për t’i ndihmuar nxënësit ta kuptojnë këtë të vërtetë. Nxënësit mund të punojnë me një partner ose grup të vogël dhe më pas t’ia tregojnë klasës atë që diskutuan.

Mendo rreth situatave sfiduese të renditura në tabelë dhe në ditarin tënd.

• Si mund të jetë të qenit i fortë dhe me guxim kur përballesh me këto sfida?

• Çfarë di ti rreth Zotit që mund ta ndihmojë dikë të jetë i fortë dhe të ketë guxim? Nga e di ti këtë?

Lexo te Doktrina e Besëlidhje 84:88, duke kërkuar mënyrat se si Zoti është me ne.

Mënyra për ta ftuar ndihmën e Zotit

Veprimtaritë vijuese mund t’i ndihmojnë nxënësit të dallojnë mënyrat se si ta ftojnë ndihmën e Zotit kur nevojitet të jenë të fortë dhe guximtarë. Ftojini nxënësit të zgjedhin njërën nga veprimtaritë. Pas një kohe të mjaftueshme, nxënësit mund t’ua tregojnë atë që mësuan, atyre që zgjodhën veprimtarinë tjetër.

Mund të jepni njërën nga thëniet në dispozicion te pjesa Burime Shtesë që nxënësit ta studiojnë për secilën veprimtari.

Veprimtaria A: Bindja ndaj ligjit të Perëndisë

Lexo te Jozueut 1:7 dhe një ose më shumë nga shkrimet e shenjta vijuese: Gjoni 15:10; 1 Nefi 3:7; Mosia 2:41; Doktrina e Besëlidhje 93:20.

• Çfarë lidhjesh sheh ndërmjet bindjes ndaj urdhërimeve të Perëndisë dhe të qenit i fortë dhe guximtar?

• Cilat janë disa mënyra se si Ati Qiellor dhe Jezu Krishti mund të na bekojnë për shkak të bindjes sonë?

Veprimtaria B: Meditimi për fjalën e Perëndisë

Lexo te Jozueut 1:8 dhe një ose më shumë nga shkrimet e shenjta vijuese: 2 Timoteut 3:15–17; 2 Nefi 31:20; 32:3.

• Çfarë të ndihmon që të meditosh për shkrimet e shenjta?

• Si mendon se mund të të ndihmojë meditimi për fjalët e Perëndisë që të ndihesh pranë Tij?

Rishikimi i synimeve mund t’i ndihmojë nxënësit të dallojnë përparimin që kanë bërë, dhe të bëjnë çdo rregullim të nevojshëm të synimit të tyre. Inkurajojini nxënësit të rishikojnë synimin e studimit të shkrimeve të shenjta që mund të kenë vendosur. Më pas ftojini ata të vlerësojnë përparimin e tyre dhe të bëjnë ndonjë rregullim të synimit të tyre. (Për trajnim shtesë mbi të kujtuarit e nxënësve për synimet e tyre të studimit të shkrimeve të shenjta, shihni pjesën “Nxitini nxënësit që të arrijnë ta njohin Shpëtimtarin duke e studiuar ungjillin çdo ditë – synim studimi” te Zotësitë për Përmirësimin e Mësuesve] [2022], f. 31.)

Të kujtuarit se Zoti është me ne

• Cilat janë disa mënyra se si e ke ndier që Zoti është me ty gjatë sfidave të tua?

Jepni një mundësi që nxënësit të reflektojnë mbi atë që kanë mësuar dhe ndier sot. Ata mund ta ftojnë Shpirtin t’i ndihmojë të shohin se si përpjekjet e tyre e kanë rritur vetëbesimin e tyre se Zoti do të jetë me ta.

Në ditarin tënd të studimit, mendo për sfidat me të cilat përballesh tani ose që mund të përballesh në të ardhmen.

• Çfarë ke mësuar ose ndier rreth Atit Qiellor dhe Jezu Krishtit që mund të të ndihmojë të jesh i fortë dhe guximtar kur përballesh me sfida?

• Nga ajo që mësove ose ndjeve rreth Atit Qiellor dhe Jezu Krishtit, çfarë dëshiron të mbash mend herën tjetër që do të ndiesh pasiguri për aftësinë tënde për të përballuar një situatë të vështirë?

Merreni parasysh të jepni dëshminë tuaj që Zoti do ta mbajë premtimin e Tij për të qenë me ne gjithmonë, për të mos na lënë ose braktisur kurrë, ashtu siç i premtoi Jozueut.

Burime Shtesë

Çfarë kuptojmë rreth vdekjes së Moisiut? (Ligji i Përtërirë 34:5–7; Jozueut 1:1–2)

Megjithëse disa vargje të Dhiatës së Vjetër i referohen vdekjes së Moisiut, ne e dimë nga shkrimet e shenjta të rivendosjes se Moisiu nuk e provoi vdekjen (shihni tek Alma 45:19), por përkundrazi u përndryshua. Personat që janë të përndryshuar, nuk përjetojnë dhembje ose vdekje gjatë ekzistencës së tyre të mbetur në vdekshmëri. Më pas ata ringjallen në çast në pavdekësi (shihni tek 3 Nefi 28:8). Qeniet e përndryshuara kryejnë detyra specifike që kërkojnë një trup fizik. Moisiu u shfaq në Malin e Shpërfytyrimit përpara Ringjalljes së Jezusit (Marku 9:2–4). Nëse Moisiu do të kishte qenë vetëm një shpirt, ai nuk mund t’ua kishte dhënë çelësat e priftërisë të vdekshmëve Pjetrit, Jakobit dhe Gjonit në mal (shihni zërin “Moisi” tek Udhëzuesi për Shkrimet e Shenjta).

Në ç’mënyrë Jozueu është një simbol i Krishtit?

Si udhëheqësi tokësor dhe shpirtëror i izraelitëve, Jozueu është gjithashtu një simbol dhe shenjë e Jezu Krishtit. Emri Jesus është “forma greke e emrit Jozue ose Jeshua, ‘Perëndia është ndihmë’ ose ‘Shpëtimtar’” (Bible Dictionary, “Jesus”). Jozueu/Jeshuai/Jezusi do të ishte ai që do ta udhëhiqte Izraelin drejt tokës së premtuar.

Si mund ta rritë bindja vetëbesimin tonë te Zoti?

Vëllai M. Xhozef Brof, i Presidencës së Përgjithshme të Të Rinjve, shpjegoi:

“Në familjen tonë, ne kemi një thënie që u bë një pjesë e rëndësishme e misionit tonë. Presidenti Rasëll M. Nelson ka kohë që e jep mësim këtë koncept. Ai e shprehu në këtë mënyrë: ‘Bindja sjell sukses; bindja e përpiktë sjell mrekulli’. (R. Scott Lloyd, “Elder Nelson Delivers Spiritual Thanksgiving Feast to MTCs”, newsroom.ChurchofJesusChrist.org)

Unë nuk e kuptoj plotësisht se çfarë do të thotë bindje e përpiktë, por ja se çfarë kam arritur të kuptoj. Ajo nuk do të thotë se ne jemi përsosmërisht të bindur pikërisht tani në të gjitha gjërat, edhe pse mund të jemi të përsosur në bindjen ndaj shumë prej urdhërimeve të Zotit. Kështu, pendimi duhet të jetë një pjesë e rëndësishme e bindjes së përpiktë. Bindja e përpiktë kërkon një zotim ndaj të gjitha paralajmërimeve dhe nxitjeve, dhe urdhërimeve që na jep Ati Qiellor.” (“A Still, Small Voice among Big Decisions”, Liahona, dhjetor 2018, f. 44)

Si mund ta rritë studimi i shkrimeve të shenjta vetëbesimin tonë te Zoti?

Presidenti Rasëll M. Nelson tha:

“Kur unë mendoj për Librin e Mormonit, mendoj për fjalën fuqi. Të vërtetat e Librit të Mormonit kanë fuqinë ta shërojnë, ngushëllojnë, rivendosin, ndihmojnë, forcojnë, përkrahin dhe gëzojnë shpirtin tonë. …

Unë ju premtoj se, kur e studioni me lutje Librin e Mormonit çdo ditë, ju do të merrni vendime më të mira – çdo ditë. Ju premtoj se, teksa e përsiatni atë që studioni, dritaret e qiellit do të hapen dhe ju do të merrni përgjigje për vetë pyetjet tuaja dhe drejtim për vetë jetën tuaj. Ju premtoj se, ndërsa e zhytni veten përditë në Librin e Mormonit, ju mund të fitoni imunitet kundër të ligave të ditës.” (“Libri i Mormonit: Si do të Ishte Jeta Juaj pa Të?” Liahona, nëntor 2017, f. 62)

Veprimtari Plotësuese të të Mësuarit

Ushtroni “meditimin” për fjalët e Krishtit

Nëse nxënësit do të kishin dobi nga mundësia për të ushtruar meditimin ose përsiatjen e një shkrimi të shenjtë, mund të jepni thënien vijuese nga Plaku D. Tod Kristoferson, i Kuorumit të Dymbëdhjetë Apostujve:

“Kur unë them ‘studioni’, e kam fjalën për diçka më shumë se leximi. Ndonjëherë është gjë e mirë të lexoni një libër të shkrimit të shenjtë brenda një periudhe të caktuar kohe për të marrë një kuptim të përgjithshëm të mesazhit të tij, por për kthimin në besim, ju duhet të kujdeseni më shumë për sasinë e kohës që kaloni me shkrimet e shenjta sesa për sasinë e asaj që lexoni në atë kohë. Ju përfytyroj ndonjëherë duke lexuar pak vargje, duke ndaluar për t’i përsiatur, duke i lexuar me kujdes vargjet sërish dhe, ndërsa mendoni rreth kuptimit të tyre, duke u lutur për t’i kuptuar, duke bërë pyetje në mendjen tuaj, duke pritur për mbresa shpirtërore dhe duke i hedhur në letër mbresat dhe idetë që ju vijnë, që ju të mund t’i kujtoni dhe të mësoni më shumë. Duke studiuar në këtë mënyrë, ju mund të mos lexoni shumë kapituj ose vargje në gjysmë ore, por ju do t’i bëni vend në zemrën tuaj fjalës së Perëndisë dhe Ai do t’ju flasë juve.” (“When Thou Art Converted”, Liahona, maj 2004, f. 11)

Ftojini nxënësit të përzgjedhin një fragment të shkrimit të shenjtë për të ushtruar meditimin rreth tij. Përgatitni dhomën, duke eliminuar sa më shumë shpërqendrime që të jetë e mundur.

Nxënësit mund të krijojnë një listë të gjërave që mund të bëjnë në bazë të citimit të Plakut Kristoferson. Nëse ata kanë nevojë për ndihmë shtesë, mund të jepni disa nga pikat vijuese:

• Lexoni dhe rilexoni fragmentin që përzgjodhët, me dëshirën për të mësuar prej tij në vend që thjesht ta përfundoni.

• Reflektoni mbi atë që po lexoni, kuptimin e fjalëve dhe mënyrën se si ato gjejnë zbatim te ju. Mendoni thellë për të herë pas here.

• Përpiquni ta mbani mendjen në një proces aktiv, duke kërkuar me mendje dhe duke menduar për shkrimin e shenjtë, fjalët dhe frazat dhe mënyrën se si mund t’ju ndihmojë mesazhi i vargut.

• Shkruani çdo mendim ose ndjenjë që vjen ndërsa ushtroheni.

Pas një kohe të caktuar, falënderojini me sinqeritet nxënësit për gatishmërinë e tyre për të marrë pjesë në veprimtari. Mund t’u kujtoni atyre se i takon Zotit se si dhe kur na bekon për përpjekjet tona për të medituar për fjalën e Tij. Ftojini ata të vazhdojnë të kërkojnë mundësi për ta ushtruar këtë aftësi si pjesë e studimit të tyre të rregullt të ungjillit.

Shembuj të guximit dhe vetëbesimit te Zoti

Nëse nxënësit do të kishin dobi nga një shembull kur Zoti e rrit guximin dhe vetëbesimin tonë, mund të shfaqni materialin filmik “Dare to Stand Alone” [“Kini Guxim të Qëndroni Vetëm”] (4:20). Ky material filmik paraqet historinë e Presidentit Monson, i cili gjeti vetëbesim te Zoti ndërsa ndiente se qëndronte vetëm.

Materiali filmik “Your Great Adventure: Overcoming Life’s Obstacles” [“Aventura Juaj e Madhe: Kapërcimi i Pengesave të Jetës”] nga kodi kohor 5:48 deri në 8:19 mund të përdoret për të ilustruar mënyrën se si e rriti Zoti guximin dhe vetëbesimin e një të riu për t’u përballur me sfidat e jetës.