« ជនគណនា ១១–១៤ ៖ ការរើសយកសេចក្ដីជំនឿលើភាពភ័យខ្លាច » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ជនគណនា ១១–១៤ ៖ ការរើសយកសេចក្ដីជំនឿលើភាពភ័យខ្លាច » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ជនគណនា ១១–១៤; ២០–២៤; ២៧ ៖ មេរៀនទី ៥៦
ជនគណនា ១១–១៤
ការរើសយកសេចក្ដីជំនឿលើភាពភ័យខ្លាច
ពេលខ្លះ វាអាចមានការលំបាកដើម្បីដើរឆ្ពោះទៅមុខដោយសេចក្ដីជំនឿជំនួសឲ្យភាពភ័យខ្លាច ។ កូនចៅអ៊ីស្រាអែលបានជួបនឹងការប្រឈមនោះ ។ បន្ទាប់ពីពួកគេបានធ្វើដំណើរនៅក្នុងទីរហោស្ថាន ព្រះអម្ចាស់បានដឹកនាំសាសន៏អ៊ីស្រាអែលទៅកាន់ព្រំប្រទល់នៃដែនដីសន្យា ។ ព្រះអម្ចាស់បានណែនាំម៉ូសេឲ្យចាត់បុរស ១២ នាក់ចូលទៅក្នុងដែនដីនោះ ហើយឲ្យពួកគេត្រឡប់មកវិញរាយការណ៍អំពីដែនដី និងប្រជាជននៅទីនោះ ។ បុរសទាំង ១២ នាក់នោះភាគច្រើនមានការភ័យខ្លាចអំពីលទ្ធភាពនៃការដណ្តើមយកដែនដីសន្យា ប៉ុន្តែកាលែប និងយ៉ូស្វេមានសេចក្ដីជំនឿថាព្រះអម្ចាស់នឹងជួយពួកគេ ។ មេរៀននេះអាចជួយសិស្សមើលការប្រឈមរបស់ពួកគេដោយសេចក្ដីជំនឿដ៏ធំធេងលើព្រះយេស៊ូវគ្រីស្ទ ។
ការរៀបចំសិស្ស ៖ អញ្ជើញសិស្សឲ្យគិតអំពីឧបសគ្គ ឬការប្រឈមដែលពួកគេកំពុងជួបប្រទះបច្ចុប្បន្ន ។ ពួកគេអាចពិចារណាពីរបៀបដែលពួកគេកំពុងប្រឈមនឹងវាដោយការភ័យខ្លាច ឬដោយសេចក្ដីជំនឿលើព្រះអម្ចាស់ ។
សកម្មភាពរៀនសូត្រដែលអាចមាន
ការមើលការប្រឈមដោយសេចក្ដីជំនឿ
សូមពិចារណាសរសេរចំណងជើងពីរនៅផ្នែកសងខាងនៃក្ដារខៀន ៖ សេចក្ដីជំនឿ និង ភាពភ័យខ្លាច ។ សូមដាក់បង្ហាញបទពិសោធន៍ខាងក្រោម ឬឧទាហរណ៍ពាក់ព័ន្ធផ្សេងទៀតម្តងមួយៗ ។ សូមអញ្ជើញសិស្សឲ្យជញ្ជឹងគិត ប្រសិនបើពួកគេមើលឧទាហរណ៍នីមួយៗដោយសេចក្ដីជំនឿលើព្រះយេស៊ូវគ្រីស្ទ ឬដោយភាពភ័យខ្លាច ។
ការប្រឡងដ៏ធំ ឬគម្រោងនៅសាលា
ការប្រែចិត្ត
អនាគត
ការចែកចាយដំណឹងល្អ
-
តើយើងអាចដឹងដោយរបៀបណាថាយើងកំពុងមើលស្ថានភាពមួយដោយសេចក្ដីជំនឿលើព្រះយេស៊ូវគ្រីស្ទ ឬដោយភាពភ័យខ្លាច ?
-
តើវាធ្វើឲ្យមានភាពខុសគ្នាយ៉ាងណាបើយើងមើលស្ថានការណ៍មួយដោយសេចក្ដីជំនឿ ឬភាពភ័យខ្លាចនោះ ?
-
ហេតុអ្វីបានជាពេលខ្លះវាពិបាកក្នុងការមើលឃើញស្ថានភាពបែបនេះដោយសេចក្តីជំនឿលើព្រះយេស៊ូវគ្រីស្ទ ?
សូមបន្តពិចារណាពីសំណួរទាំងនេះ ពេលអ្នកសិក្សានៅថ្ងៃនេះ ។ សូមអញ្ជើញព្រះវិញ្ញាណបរិសុទ្ធមកក្នុងការរៀនសូត្ររបស់អ្នក នៅពេលអ្នកគិតអំពីរបៀបមើលបញ្ហាប្រឈមរបស់អ្នកដោយសេចក្ដីជំនឿដ៏ធំលើព្រះយេស៊ូវគ្រីស្ទ ។
របាយការណ៍របស់អ្នកស៊ើបការណ៍ស្រុកកាណាន
បន្ទាប់ពីកូនចៅអ៊ីស្រាអែលបានធ្វើដំណើរនៅក្នុងទីរហោស្ថាន ព្រះអម្ចាស់បាននាំពួកគេទៅព្រំប្រទល់នៃដែនដីសន្យា ។ វាគឺជាដែនដីស្រុកកាណាន ។ ព្រះអម្ចាស់មានព្រះបន្ទូលទៅពួកគេថា ពួកគេនឹងត្រូវដណ្តើមយកទឹកដីនេះ ។ ព្រះអម្ចាស់បានណែនាំម៉ូសេឲ្យជ្រើសរើសសមាជិកម្នាក់ពីអំបូរនីមួយៗក្នុងចំណោមអំបូរទាំងដប់ពីរ ។ បុរសទាំងនេះត្រូវបានបញ្ជាឲ្យចុះពិនិត្យដែនដីនេះ ហើយត្រឡប់មករាយការណ៍វិញពីអ្វីដែលពួកគេបានរកឃើញ ។ ក្រោយពីស៊ើបអង្កេតដែនដីនេះអស់ ៤០ ថ្ងៃមក បុរសទាំង១២នាក់ក៏ត្រឡប់មកវិញជាមួយនឹងរបាយការណ៍របស់ខ្លួន រួមទាំងផ្លែឈើពីដែនដីនេះ ( សូមមើល ជនគណនា ១៣:១–២៥ ) ។
សូមពិចារណាបែងចែកសិស្សជាបីក្រុម ។ អញ្ជើញក្រុមនីមួយៗឲ្យអានដំណើររឿងមួយដូចខាងក្រោម ។ សូមឲ្យសិស្សស្រមៃថា ពួកគេតំណាងឲ្យមនុស្សដែលពួកគេបានអាន ។ ពួកគេអាចរៀបចំចម្លើយចំពោះសំណួរបន្ទាប់ ។ បន្ទាប់មកក្រុមនីមួយៗអាចចែកចាយចម្លើយរបស់ពួកគេ ឬអ្នកអាចឲ្យសិស្សម្នាក់ ឬពីរនាក់ឡើងមកខាងមុខក្ដារខៀន ហើយប្រើសំណួរដើម្បីសម្ភាសន៍ក្រុមនីមួយៗ ។
១. ជនគណនា ១៣:២៦–២៩, ៣១–៣៣ ៖ របាយការណ៍របស់អ្នកស៊ើបការណ៍ទាំង ១០ នាក់អំពីដែនដី និងប្រជាជន
-
តើអ្នកនឹងពណ៌នាអំពីស្រុកកាណាន និងប្រជាជនដែលអ្នកបានឃើញយ៉ាងដូចម្ដេច ?
-
តើអ្នកមានអារម្មណ៍យ៉ាងណា នៅពេលអ្នកបានឃើញប្រជាជននោះ ? ហេតុអ្វី ?
២. ជនគណនា ១៤:១–៤ ៖ ការឆ្លើយតបរបស់សាសន៏អ៊ីស្រាអែលចំពោះរបាយការណ៍របស់អ្នកស៊ើបអង្កេតទាំង ១០ នាក់
-
តើអ្នកមានអារម្មណ៍យ៉ាងណា នៅពេលអ្នកបានស្ដាប់របាយការណ៍របស់អ្នកស៊ើបការណ៍ទាំង ១០នាក់ ? ហេតុអ្វី ?
-
តើអ្នកបានផ្ដល់យោបល់ដល់ប្រជាជនឲ្យធ្វើអ្វី ជាជាងធ្វើតាមម៉ូសេដើម្បីទៅកាន់ដែនដីសន្យានោះ ? ហេតុអ្វី ?
៣. ជនគណនា ១៣:៣០; ១៤:៦–៩ ៖ របាយការណ៍របស់យ៉ូស្វេ និងកាលែបអំពីដែនដី និងប្រជាជន
-
តើអ្នកនឹងពណ៌នាអំពីស្រុកកាណាន និងប្រជាជនដែលអ្នកបានឃើញយ៉ាងដូចម្ដេច ?
-
អ្នកស៊ើបការណ៍ផ្សេងទៀតបានយល់ថា អ៊ីស្រាអែលមិនអាចយកឈ្នះលើប្រជាជននៅក្នុងស្រុកកាណានបានឡើយ ។ ហេតុអ្វីបានជាអ្នកជឿជាក់ថា អ៊ីស្រាអែលអាចយកឈ្នះបាន ?
បន្ទាប់ពីក្រុមនីមួយៗបានឆ្លើយសំណួររបស់ពួកគេរួចហើយ សូមថ្លែងអំណរគុណចំពោះការចូលរួមរបស់ពួកគេ ។
សូមពិនិត្យមើល ជនគណនា ១៣:៣០; ១៤:៨–៩ ឡើងវិញដោយរកមើលពាក្យ និងឃ្លាដែលបង្ហាញពីសេចក្ដីជំនឿរបស់កាលែប និងយ៉ូស្វេលើព្រះអម្ចាស់ ។
-
តើអ្នកបានរៀនមេរៀនអ្វីខ្លះមកពីបទពិសោធន៍របស់កាលែប និងយ៉ូស្វេ ?
ក្នុងចំណោមចម្លើយផ្សេងៗដែលសិស្សអាចនឹងផ្តល់ សូមជួយពួកគេរកឃើញការពិតថា ការទុកចិត្តលើព្រះអម្ចាស់អាចជួយយើងឲ្យមើលឃើញបញ្ហាប្រឈមរបស់យើងដោយសេចក្ដីជំនឿជាជាងភាពភ័យខ្លាច ។
-
តើអ្នកគិតថាការធ្វើដោយសេចក្តីជំនឿលើព្រះវរបិតាសួគ៌ និងព្រះយេស៊ូវគ្រីស្ទមានន័យដូចម្ដេច នៅពេលយើងជួបនឹងបញ្ហាប្រឈម ?
សេចក្ដីជំនឿ និងភាពភ័យខ្លាច
អែលឌើរ ខេវិន អ័រ ដាន់ខិន នៃពួកចិតសិបនាក់បានពន្យល់អំពីរឿងមួយដែលយើងអាចរៀនពីបទពិសោធន៍របស់កូនចៅអ៊ីស្រាអែលនៅក្នុង ជនគណនា ១៣–១៤ ៖
ដូចជាកូនចៅអ៊ីស្រាអែលដែរ យើងជួបនឹងបញ្ហាប្រឈមយ៉ាងខ្លាំង ។ … វាមិនខុសទេសម្រាប់យើងក្នុងការដឹងពីឧបសគ្គទាំងនោះ ។ ប៉ុន្តែវាសំខាន់ដែលយើងត្រូវប្រឈមមុខនឹងឧបសគ្គដោយជំនឿ ។ …
… ការប្រឈមនីមួយៗ និងឧបសគ្គនីមួយៗដែលយើងប្រឈម គឺជាឱកាសជ្រើសរើស ដូចជាយ៉ូស្វេ និងកាលែបដែរ ដើម្បីពឹងផ្អែកលើព្រះអម្ចាស់ ។ « កុំឲ្យតែបះបោរ … កុំឲ្យខ្លាចគេឡើយ » ( ជនគណនា ១៤:៩ ) គឺជាដំបូន្មានដ៏ល្អសម្រាប់កូនចៅអ៊ីស្រាអែល និងវានៅតែជាដំបូន្មានដ៏ល្អសម្រាប់យើងម្នាក់ៗនៅសព្វថ្ងៃនេះ ។ ( « Rebel Not, Neither Fear » Liahona ខែឧសភា ឆ្នាំ២០២២ ទំព័រ ៤៧ )
-
តើកូនចៅអ៊ីស្រាអែលធ្លាប់មានបទពិសោធន៍អ្វីខ្លះជាមួយព្រះអម្ចាស់ ? តើការចងចាំបទពិសោធន៍ទាំងនេះបានបង្កើនសេចក្ដីជំនឿរបស់ពួកគេលើទ្រង់យ៉ាងដូចម្ដេច ?
-
អ្នកគិតថា ហេតុអ្វីមនុស្សមួយចំនួនភ្លេចអ្វីដែលពួកគេដឹងអំពីព្រះអម្ចាស់ នៅពេលប្រឈមមុខនឹងឧបសគ្គ ?
ទោះជាមានអព្ភូតហេតុជាច្រើនដែលព្រះអម្ចាស់បានប្រទានឲ្យ និងទីបន្ទាល់របស់កាលែប និងយ៉ូស្វេក្តី ក៏សាសន៏អ៊ីស្រាអែលនៅតែបន្តរអ៊ូរទាំដែរ ។ ជាលទ្ធផល ព្រះអម្ចាស់បានប្រកាសថា ដោយសារការរអ៊ូរទាំ និងការសង្ស័យរបស់ពួកគេ នោះសាសន៏អ៊ីស្រាអែលពេញវ័យភាគច្រើននឹងមិនអនុញ្ញាតឲ្យចូលទៅក្នុងដែនដីសន្យាឡើយ ( សូមមើល ជនគណនា ១៤:២៦–៣៩ ) ។
សូមអាន ជនគណនា ១៤:២៤, ៣០ ដោយរកមើលពីរបៀបដែលព្រះអម្ចាស់ប្រទានពរដល់កាលែប និងយ៉ូស្វេ ដោយសារពួកគេដាក់សេចក្តីជំនឿទៅលើទ្រង់ ។
ដើម្បីជួយសិស្សប្រឈមមុខនឹងឧបសគ្គរបស់ពួកគេដោយសេចក្តីជំនឿ សូមពិចារណាបង្ហាញតារាងខាងក្រោមនេះនៅលើក្ដារខៀន ។ សូមអញ្ជើញពួកគេឲ្យចម្លងតារាងនេះដាក់នៅក្នុងសៀវភៅកំណត់ហេតុការសិក្សារបស់ពួកគេ ។
ឧបសគ្គ ៖
|
សេចក្តីថ្លែងការណ៍ដែលផ្អែកលើការភ័យខ្លាច |
សេចក្តីថ្លែងការណ៍ដែលផ្អែកលើសេចក្តីជំនឿ |
|---|---|
សេចក្តីថ្លែងការណ៍ដែលផ្អែកលើការភ័យខ្លាច | សេចក្តីថ្លែងការណ៍ដែលផ្អែកលើសេចក្តីជំនឿ |
សូមអញ្ជើញសិស្សឲ្យចែកចាយឧបសគ្គនៅសម័យទំនើបមួយចំនួនដែលពួកគេអាចប្រឈមមុខ និងរបៀបដែលពួកគេអាចឆ្លើយតបដោយការភ័យខ្លាច ឬសេចក្ដីជំនឿ ។
អ្នកអាចផ្តល់ឧទាហរណ៍ដូចជា ៖
ឧសគ្គ ៖ ការនិយាយនៅទីសាធារណៈ
សេចក្តីថ្លែងការណ៍ដែលផ្អែកលើការភ័យខ្លាច ៖ « ខ្ញុំមិនអាចនិយាយនៅចំពោះមុខអ្នកដទៃបានទេ ពីព្រោះខ្ញុំតែងតែនិយាយត្រឡប់ត្រឡិនពាក្យរបស់ខ្ញុំដោយភ័យខ្លាច » ។
សេចក្តីថ្លែងការណ៍ដែលផ្អែកលើសេចក្តីជំនឿ ៖ « ការនិយាយនៅទីសារធារណៈគឺពិបាកសម្រាប់ខ្ញុំ ប៉ុន្តែខ្ញុំជឿថាព្រះអម្ចាស់អាចប្រទានសេចក្តីក្លាហានដល់ខ្ញុំ ហើយពង្រឹងខ្ញុំឲ្យនិយាយនៅទីសារធារណៈបាន » ។
សិស្សអាចប្រើស្ថានភាពទាំងនេះនៅដើមនៃមេរៀននេះ ។
សម្រាប់សកម្មភាពខាងក្រោម សូមពិចារណាចែកក្រដាសសម្រាប់សិស្ស ។
សូមពិចារណាពីឧបសគ្គដែលអ្នកប្រឈមមុខ ឬអាចប្រឈមមុខក្នុងជីវិតរបស់អ្នក ។ សូមសរសេរឧបសគ្គនៅក្នុងតារាងរបស់អ្នក រួមជាមួយនឹងសេចក្តីថ្លែងការណ៍ដែលផ្អែកលើការភ័យខ្លាច ដែលអ្នកអាចគិត ឬជឿលើឧបសគ្គនោះ ។
សូមជញ្ជឹងគិតពីអ្វីដែលព្រះវិញ្ញាណបរិសុទ្ធបានបង្រៀនអ្នកអំពីព្រះវរបិតាសួគ៌ និងព្រះយេស៊ូវគ្រីស្ទពី បទគម្ពីរ ប្រសាសន៍របស់ព្យាការី និងបទពិសោធន៍ខាងវិញ្ញាណរបស់អ្នកផ្ទាល់ ។ សូមគិតអំពីរបៀបដែលចំណេះដឹងនេះអាចជួយអ្នកប្រឈមមុខនឹងឧបសគ្គទាំងឡាយដោយមានសេចក្តីជំនឿលើព្រះអម្ចាស់ ។ បន្ទាប់មកសូមសរសេរសេចក្តីថ្លែងការណ៍ដែលផ្អែកលើសេចក្តីជំនឿក្នុងសៀវភៅកំណត់ហេតុការសិក្សារបស់អ្នក ។ អ្នកក៏ប្រហែលជាចង់សរសេរសេចក្តីថ្លែងការណ៍ដែលផ្អែកលើសេចក្តីជំនឿនៅលើក្រដាសមួយសន្លឹក ដែលអ្នកអាចយកទៅផ្ទះ ហើយដាក់វានៅកន្លែងណាមួយដែលអ្នកនឹងមើលឃើញជាញឹកញាប់ ឬថតរូបសេចក្តីថ្លែងការណ៍នោះដាក់នៅលើទូរសព្ទដៃរបស់អ្នក ។ អ្នកអាចដាក់រូបភាពនេះជាផ្ទាំងរូបភាពនៅលើទូរសព្ទដៃរបស់អ្នកផងដែរ ។
សូមពិចារណាអញ្ជើញសិស្សពីរបីនាក់ដែលស្ម័គ្រចិត្តដើម្បីចែកចាយគំនិត និងអារម្មណ៍របស់ពួកគេអំពីព្រះវរបិតាសួគ៌ និងព្រះយេស៊ូវគ្រីស្ទ ។ ពួកគេអាចចែកចាយពីរបៀបដែលព្រះអម្ចាស់ជួយពួកគេប្រឈមមុខនឹងឧបសគ្គនានាដោយសេចក្ដីជំនឿ ។ សូមថ្លែងទីបន្ទាល់ថា ព្រះអម្ចាស់នឹងប្រទានពរដល់យើង នៅពេលយើងប្រឈមមុខនឹងឧបសគ្គរបស់យើងដោយស្មោះត្រង់ ។