Eksodi 1–6: Mësimi 38

Eksodi 1

Të Nderosh Perëndinë Përballë Kundërshtimit

Faraoni i Egjiptit i skllavëroi izraelitët dhe i urdhëroi mamitë t’i vrisnin foshnjat izraelite meshkuj që në lindje. Këto mami zgjodhën të mos i bindeshin faraonit për shkak të nderimit të tyre për Perëndinë. Ashtu si këto gra besnike, ne mund të zgjedhim ta vendosim mirëbesimin tonë te Perëndia edhe në rrethana të vështira. Ky mësim mund t’i ndihmojë nxënësit të dëshirojnë ta vendosin Perëndinë mbi presionet e tjera.

Përgatitja e nxënësve: Merreni parasysh t’i ftoni nxënësit ta pyesin një pjesëtar të familjes ose shok se si e ka parë Perëndinë ta bekojë sepse ndoqi Atë dhe jo të tjerët.

Veprimtari të Mundshme të të Mësuarit

Guxim si i Krishtit

Merreni parasysh të tregoni sa vijon nga Presidenti Nelson.

Presidenti Rasëll M. Nelson përshkroi karakteristikat e dishepujve të Jezu Krishtit:

“Dishepujt e vërtetë të Jezu Krishtit janë të gatshëm të ngulmojnë, ta ngrenë zërin dhe të jenë të ndryshëm nga njerëzit e botës. Ata janë të patrembur, të përkushtuar e të guximshëm.” (“Marrja e Fuqisë së Jezu Krishtit në Jetën Tonë”, Liahona, maj 2017, f. 40–41)

• Përse mund të duhet guxim për të vepruar sipas mënyrës që përshkroi Presidenti Nelson?

• Si mendon, përse është e rëndësishme ta ndjekësh këshillën e Presidentit Nelson?

Paraqiteni vetëvlerësimin vijues për t’i ndihmuar nxënësit të përsiatin për mënyrën se si ndihen rreth bindjes ndaj Perëndisë në vend që t’u dorëzohen presioneve të tjera.

Lexoji thëniet vijuese dhe vlerëso se sa të vërteta janë për ty në një shkallë nga 1 (aspak e vërtetë) në 5 (shumë e vërtetë).

• Jam i/e gatshëm/me ta vendos Zotin të parin, edhe kur ndiej presion nga të tjerët për t’i ulur standardet e mia.

• Jam i/e pasigurt nëse Perëndia do të më bekojë për përpjekjen e fortë për t’iu bindur urdhërimeve të Tij.

• Jam i/e gatshëm/me të mbaj qëndrim për atë që e di se është e drejtë, edhe nëse nuk është zgjedhja e përhapur.

Inkurajojini nxënësit t’u kushtojnë vëmendje mbresave nga Shpirti ndërsa studiojnë tek Eksodi 1. Shpirti mund t’i ndihmojë ata të përgatiten për të vepruar me guxim kur ndiejnë presion për të bërë gjëra që janë kundër vullnetit të Perëndisë.

Shembuj të drejtë

Merreni parasysh t’i ftoni nxënësit të tregojnë atë që dinë rreth asaj që u ndodhi izraelitëve pas vdekjes së Jozefit të Egjiptit. Sipas nevojës, përdorni një pjesë ose të gjithë përmbledhjen vijuese.

Pasi vdiq Jozefi i Egjiptit, izraelitët (të quajtur edhe hebrenj) u rritën në numër në vendin e Egjiptit. I frikësuar se izraelitët mund t’i vinin për poshtë egjiptianët, faraoni i ri i skllavëroi ata (shih tek Eksodi 1:6–14).

Lexo tek Eksodi 1:15–16, duke kërkuar atë që i urdhëroi faraoni Shifrahës dhe Puahës, dy mamive hebreje, të bënin. “Mami[të]” u referohet grave që ndihmojnë në lindjen e fëmijëve. “Ndenjëse[t]” (vargu 16) u referohet vendeve të përdorura nga gratë që janë duke lindur.

Ftojini nxënësit ta tregojnë atë që gjetën. Gjeni mënyra për t’i ndihmuar nxënësit të gjejnë veten te presioni që mund të kenë ndier këto gra për të bërë atë që donin të tjerët dhe jo atë që donte Perëndia. Pyetja dhe veprimtaria vijuese është një mënyrë për ta bërë këtë.

• Po të ishe Shifraha ose Puaha, çfarë mund të ta kishte bërë të vështirë ta vendosje vullnetin e Perëndisë mbi atë të faraonit?

Merreni parasysh ta ndani klasën në grupe. Ftojini grupet të përcaktojnë rrethanat që kanë hasur ose mund të hasin aty ku mund të jetë e vështirë të zgjedhin vullnetin e Perëndisë për shkak të presioneve të tjera. Vërini ata të krijojnë një listë arsyesh përse dikush mund të shqetësohet për ndjekjen e Perëndisë në ato rrethana.

Lexo tek Eksodi 1:17–21, duke kërkuar arsyen përse Shifraha dhe Puaha i morën ato vendime.

• Çfarë gjete?

• Çfarë gjëje në këto vargje mund të jetë shtysë për dikë që mund të pyesë veten nëse duhet ta vendosë Perëndinë mbi presionet e tjera me të cilat përballet?

  Ndërsa nxënësit flasin, mund të doni t’u thoni atyre se “frik[a] nga Perëndia” (shihni vargjet 17, 21) nënkupton ta nderoni ose respektoni Perëndinë. Vini në dukje frazën “Perëndia u bëri të mirë” Shifrahës dhe Puahës (vargu 20) nëse nxënësit nuk e përcaktojnë atë. Ftojini nxënësit ta shenjojnë këtë frazë. Kjo do të thotë se Perëndia e bekoi Shifrahën dhe Puahën që e vendosën Atë mbi presionet me të cilat u përballën. Një bekim që Zoti i dha Shifrahës dhe Puahës ishin pasardhësit.

• Çfarë të vërtete mund të mësojmë nga Shifraha dhe Puaha që mund të na ndihmojë kur përballemi me presione për të ndjekur të tjerët në vend të Perëndisë?

  Duke përdorur vetë fjalët e tyre, nxënësit mund të përcaktojnë një të vërtetë si ndërsa ia nënshtrojmë vullnetin tonë Perëndisë në vend që të përkulemi para presioneve të tjera, Ai do të na bekojë.

  Megjithëse pjesa tjetër e mësimit përqendrohet te mënyra se si “Perëndia [na] bë[n] të mir[a]”, mund të merrni parasysh të shpenzoni kohë për t’u përqendruar te shembulli i Shpëtimtarit që iu nënshtrua vullnetit të Atit Qiellor. Mund të përdorni një pyetje si vijuesja për ta bërë atë. Nëse nxënësit e kanë të vështirë të krijojnë shembuj, mund t’i drejtoni ata te Gjoni 6:38 ose Lluka 22:42.

• Çfarë ka dhënë mësim ose ka bërë Shpëtimtari që tregon se si Ai është shembulli i përsosur i kësaj të vërtete?

  Mendoni për një veprimtari për t’i ndihmuar nxënësit të kuptojnë mënyrat se si Zoti mund t’u bëjë të mirë (t’i bekojë) atyre që e nderojnë Atë duke e vendosur të parin. Ja ku janë dy ide. Zgjidhni njërën nga këto ose një tjetër sipas zgjedhjes suaj për t’i ndihmuar nxënësit t’u përgjigjen pyetjeve vijuese.

  1. Shfaqni për nxënësit materialin filmik “Leave the Party” [“Largohuni nga Festa”] (6:26) ose materialin filmik “Be Valiant in Courage, Strength, and Activity” [“Ji Trim me Guxim, Fuqi dhe Energji”] nga kodi kohor 1:20 deri në 5:13 (të dyja materialet filmike janë në dispozicion në ChurchofJesusChrist.org). Ftojini nxënësit të përcaktojnë mënyrën se si e bekoi Zoti Gjonin që e vendosi Perëndinë mbi presionet e tjera.

  1. Jepuni nxënësve disa shkrime të shenjta për t’i studiuar, që tregojnë mënyrat se si u bëri të mirë Perëndia të tjerëve që zgjodhën Atë në vend të presioneve të tjera. Ata mund të studiojnë te 2 Nefi 5:6–13; Mosia 24:11–15; 4 Nefi 1:15–18. Nxënësit gjithashtu mund të gjejnë shkrime të tjera të shenjta që ilustrojnë mënyrën se si Perëndia u bën të mirë fëmijëve të Tij kur e vendosin Atë të parin.

• Si mund të duket kur “Perëndia [na] bë[n] të mirë”?

• Si të ka bërë Perëndia të mirë ty ose dikujt që ti e njeh për nënshtrimin ndaj vullnetit të Tij në vend që t’u nënshtrohesh presioneve të tjera?

• Përse ia vlen për ty të zgjedhësh ta vendosësh Perëndinë të parin pavarësisht nga rezultati?

Nënshtrimi i vullnetit tonë ndaj Perëndisë

Merreni parasysh të paraqitni pyetjet vijuese për t’i ndihmuar nxënësit të mendojnë për atë që kanë mësuar ose ndier sot dhe se si ajo mund t’i ndihmojë kur përballen me situata të vështira.

Zgjidh njërën nga pyetjet vijuese për t’iu përgjigjur në ditarin tënd të studimit:

• Çfarë ke mësuar ose ndier sot që mund të të ndihmojë të kesh siguri se Perëndia do të të bekojë kur zgjedh ta vendosësh Atë të parin?

• Çfarë do t’i thoshe dikujt që është i pasigurt nëse ia vlen të zgjedhim Perëndinë kur përballemi me presione të tjera?

Merreni parasysh t’u jepni nxënësve një mundësi për ta treguar atë që shkruan. Mund të tregoni edhe premtimin e Shpëtimtarit për njerëzit që përndiqen se zgjedhin Atë, që gjendet te Mateu 5:10–12. Merreni parasysh të jepni dëshminë tuaj për mënyrën se si Perëndia do të na bekojë kur zgjedhim ta ndjekim Atë, edhe kur është e vështirë.

Burime Shtesë

Eksodi 1:17. Çfarë do të thotë të kesh frikë nga Perëndia?

Udhëzuesi për Shkrimet e Shenjta jep dy përkufizime për frikën: “(1) të kesh frikë Perëndinë është të ndiesh nderim e admirim për të dhe t’u bindesh urdhërimeve të tij; (2) të kesh frikë njeriun, rreziqet vdekjeprurëse, dhembjen dhe të ligun është të jesh i frikësuar nga këto gjëra dhe të tmerrohesh prej tyre” (Udhëzuesi për Shkrimet e Shenjta, “Frikë”, Ndihma për Studimin).

Plaku Dejvid A. Bednar, i Kuorumit të Dymbëdhjetë Apostujve, dha mësim:

“E ndryshme nga frika që zakonisht përjetojmë, por e lidhur me të, është ajo që shkrimet e shenjta e përshkruajnë si ‘frikë [e perëndishme]’ (Hebrenjve 12:28) ose ‘frikë nga Zoti’ (Jobit 28:28; Fjalët e Urta 16:6; Isaia 11:2–3). Në ndryshim me frikën nga bota, e cila krijon panik dhe ankth, frika nga Perëndia është një burim paqeje, sigurie dhe vetëbesimi.

Por si mund të jetë diçka që lidhet me frikën, lartësuese apo e dobishme nga ana shpirtërore?

Frika e drejtë që po përpiqem ta përshkruaj, përfshin një ndjenjë të thellë nderimi, respekti dhe mrekullimi për Zotin Jezu Krisht (shih Psalmeve 33:8; 96:4), bindjeje ndaj urdhërimeve të Tij (shih Ligji i Përtërirë 5:29; 8:6; 10:12; 13:4; Psalmeve 112:1) dhe pritjeje për Gjykimin Përfundimtar dhe për drejtësinë në dorën e Tij.” (“Prandaj, Ata e Përmbajtën Frikën”, Liahona, maj 2015, f. 48)

Si mund të eci përpara me guxim edhe kur ndihem i frikësuar?

Plaku Karl B. Kuk, i Presidencës së Të Shtatëdhjetëve, tha:

“Perëndia i qiellit dhe tokës do të na ndihmojë ta kapërcejmë shkurajimin dhe çfarëdo pengesash që hasim nëse shohim tek Ai, i ndjekim nxitjet e Frymës së Shenjtë dhe thjesht vazhdojmë përpara – me besim.

Fatmirësisht, kur ne jemi të dobët apo të paaftë, Zoti mund të na e forcojë besimin. Ai mund të na e rritë fuqinë përtej asaj që kemi.” (“Thjesht Vazhdoni Përpara – me Besim”, Liahona, maj 2023, f. 14)

Presidenti Tomas S. Monson (1927–2018) dha mësim:

“Ne të gjithë do të hasim frikë, do të përjetojmë tallje dhe do të ndeshemi me kundërshtim. Paçim – ne të gjithë – guximin për t’iu kundërvënë mendimit të përgjithshëm, guximin për ta mbrojtur parimin. Guximi, jo kompromisi, e sjell buzëqeshjen dhe miratimin e Perëndisë. Guximi bëhet një virtyt i gjallë dhe tërheqës kur mbahet parasysh jo vetëm si një gatishmëri për të vdekur … por si vendosmëria për të jetuar denjësisht. Ndërsa ecim përpara, duke u përpjekur që të jetojmë siç duhet, ne sigurisht do të marrim ndihmë nga Zoti dhe mund të gjejmë ngushëllim në fjalët e Tij.” (“Ji i Fortë dhe Guximtar”, Liahona, maj 2014, f. 69)

Veprimtari Plotësuese të të Mësuarit

Fillim ndryshe

Në vend që të lexoni thënien e Presidentit Nelson, mund ta nisni mësimin duke parë materialin filmik “Leave the Party” [“Largohuni nga Festa”]. Ndalojeni materialin filmik në kodin kohor 3:08. Pyetini nxënësit se çfarë mund të ketë qenë e vështirë për Gjonin në këtë situatë. Pyetini ata se në cilat situata edhe adoleshentët mund të ndiejnë presionin për të mos iu bindur Perëndisë.

Pasi nxënësit të përcaktojnë të vërtetën e theksuar me të zezë rreth bekimeve të Perëndisë, shikoni pjesën tjetër të materialit filmik. Vërini nxënësit të kërkojnë vendimin që mori Gjoni dhe mënyrën se si Perëndia “[i] bëri të mirë” Gjonit për shkak të vendimit të tij.

Eksodi 1:17, 21. Frika nga Perëndia dhe ndjekja e Tij

Pasi nxënësit të diskutojnë situatat ku ata janë ndier ose mund të ndihen nën presion, mund t’i ndihmoni ata të zbulojnë se çfarë do të thotë të kesh frikë nga Perëndia dhe ta ndjekësh me guxim Atë. Merreni parasysh t’i ftoni nxënësit të përdorin Udhëzuesin për Shkrimet e Shenjta dhe të studiojnë shkrimet e shenjta të renditura nën zërin “Guxim, Guximtar”, “Frikë” ose “Frikë nga Perëndia”. Inkurajojini ata të kërkojnë shkrimet e shenjta që mund të ndihmojnë kur dikush po përjeton presionin për t’i shpërfillur urdhërimet ose standardet e Zotit.

Të kuptosh bekimet e Zotit

Për t’i ndihmuar nxënësit të kuptojnë se bekimet e Perëndisë për ndjekjen e vullnetit të Tij nuk duken gjithmonë njëlloj në çdo situatë, lexojeni thënien vijuese nga Presidenti Monson.

Presidenti Tomas S. Monson (1927–2018) dha mësim:

“Jo të gjitha veprimet e guximit sjellin përfundime kaq mbresëlënëse apo të menjëhershme dhe, prapëseprapë, të gjitha ato vërtet sjellin paqe të mendjes dhe njohuri se e drejta dhe e vërteta janë mbrojtur”. (“Ji i Fortë dhe Guximtar”, Liahona, maj 2014, f. 69)

Mund të shpjegoni gjithashtu se ndjekja e Perëndisë nuk nënkupton se ne do të jemi gjithmonë të mbrojtur nga zgjedhjet e të tjerëve. Ndërkohë që në dukje këto mami nuk u lënduan nga faraoni, të bijat e Onitahut u vranë nga priftërinjtë e ligj sepse refuzuan t’i adhuronin perënditë e rreme (shihni tek Abraham 1:11). Për t’i ndihmuar nxënësit të kuptojnë nevojën për t’i mirëbesuar Perëndisë pavarësisht nga rezultati, mund të bëni pyetje si vijueset:

• Përse mendoni se bekimet e Perëndisë nuk i largojnë gjithmonë sfidat ose vuajtjen?

• Çfarë ju ndihmon ta vendosni vullnetin e Tij mbi presionet e tjera pavarësisht se cili mund të jetë rezultati?

“Mos u Shqetësoni”

Nëse komentet e nxënësve e drejtojnë mësimin drejt diskutimit të frikës, merreni parasysh të shikoni “Be Not Troubled” [“Mos u Shqetësoni”] (4:30). Kërkojuni nxënësve të kërkojnë mënyrën se si mund të na ndihmojë Perëndia ta kapërcejmë frikën tonë. Më pas, ftojini nxënësit të tregojnë mënyrën se si Perëndia i ka ndihmuar ata ta kapërcejnë frikën.