Eksodi 1–6: Mësimi 39

Eksodi 2–4

“Unë do të Jem me Gojën Tënde”

Kur përballemi me vështirësi, Zoti na udhërrëfen me dashuri nëpërmjet profetëve të Tij. Nën mbretërimin e faraonit, fëmijët e Izraelit u munduan nga robëria dhe i thirrën Zotit. Zoti i dëgjoi vajtimet e tyre dhe thirri Moisiun si një profet që t’i ndihmonte ata. Ky mësim mund t’i ndihmojë nxënësit t’i përfshijnë më plotësisht fjalët e Zotit nëpërmjet profetëve të Tij në jetën e tyre.

Përgatitja e nxënësve: Ftojini nxënësit t’i shqyrtojnë mësimet e kohëve të fundit nga profeti. Më pas ftojini ata të diskutojnë me një pjesëtar të familjes ose shok për mënyrën se si ndjekja e mësimeve të profetit e ka bekuar jetën e tyre.

Veprimtari të Mundshme të të Mësuarit

Cilëve zëra t’u mirëbesoni

Merreni parasysh ta filloni orën mësimore duke dhënë këtë thënie dhe duke bërë pyetjet vijuese.

Plaku Nil L. Andersen, i Kuorumit të Dymbëdhjetë Apostujve, vërejti:

“Ne jetojmë në një planet ku ziejnë miliona zëra. Interneti, telefonat tanë inteligjentë, paketat me lojëra argëtuese, që të gjitha kërkojnë vëmendjen tonë dhe e hedhin ndikimin e tyre mbi ne.” (“Profeti i Perëndisë”, Liahona, maj 2018, f. 26)

Rendit disa shembuj të zërave që ke parë ose dëgjuar gjatë ditëve të fundit.

• Çfarë vë re rreth burimeve të ndryshme të informacionit?

• Në ç’mënyrë janë të ndryshme fjalët e profetëve nga zërat e tjerë?

Merreni parasysh të paraqitni thëniet vijuese të vetëvlerësimit dhe t’i ftoni nxënësit të mendojnë rreth përgjigjeve të tyre.

Për secilën prej thënieve vijuese, vlerësoje veten duke përdorur një shkallë nga 1 (aspak e vërtetë) në 5 (shumë e vërtetë):

1. Unë vendos më shumë mirëbesim te fjalët e profetëve dhe të apostujve sesa te zërat ose ndikimet e tjera.

2. Unë kam vetëbesim në këshillën dhe drejtimin që marrim nga profetët dhe apostujt e Zotit.

3. Unë bëj përpjekje për t’i studiuar fjalët e profetëve dhe apostujve të sotëm.

Ndërsa nxënësit studiojnë sot, ftojini ata të mbajnë vesh për mbresa nga Shpirti rreth mënyrës se si mund ta ndjekin më plotësisht këshillën e profetëve dhe apostujve në jetën e tyre.

Zoti e thërret Moisiun për të qenë një profet

Për t’i ndihmuar nxënësit të kuptojnë mënyrën se si Zoti e përgatiti Moisiun për të qenë profeti i Tij, merreni parasysh t’i ftoni nxënësit të tregojnë atë që dinë rreth jetës së hershme të Moisiut. Mund të paraqitni një figurë të Moisiut foshnjë për t’i ndihmuar nxënësit ta kujtojnë atë që dinë. Mund të shfaqni edhe materialin filmik “Baby Moses” [“Moisiu Foshnjë”] (1:37), në dispozicion në ChurchofJesusChrist.org.

Paragrafët vijues përmbajnë hollësi që mund të jenë të dobishme ndërsa nxënësit bëjnë përmbledhjen.

Megjithëse ishte izraelit nga lindja, profeti Moisi u rrit në shtëpinë e faraonit në Egjipt. Kur Moisiu ishte foshnjë, faraoni urdhëroi të vriteshin që të gjithë djemtë izraelitë të porsalindur (shih tek Eksodi 1:22). Për ta shpëtuar Moisiun, e ëma e fshehu në një shportë dhe e vendosi afër një lumi. Moisiu u zbulua nga e bija e faraonit, që e rriti atë si djalin e saj (shih tek Eksodi 2:1–10). Në Egjipt, Moisiu ishte mjaft i arsimuar dhe ishte “i pushtetshëm në fjalë e në vepra” (Veprat e Apostujve 7:22).

Kur u rrit, Moisiu vrau një egjiptian ndërkohë që mbrojti një nga skllevërit izraelitë. Moisiu ia mbathi në Madian, ku jetoi me një prift të lartë të quajtur Jethro dhe u martua me të bijën, Seforën (shih tek Eksodi 2:11–21). Ndërkohë që kujdesej për delet në Madian, Moisiu pati një përvojë me Jehovën.

Tregoni figurën vijuese. Ftojini nxënësit të imagjinojnë sikur të ishin Moisiu ndërsa i lexojnë vargjet vijuese dhe u përgjigjen pyetjeve vijuese në grupe të vogla. Më pas ata mund të japin pikat kulmore të asaj që mësuan si klasë.

Eksodi 3:1–6. Si do të ndiheshe? Përse?

Eksodi 3:7–14. Cili nga mësimet e Zotit mund të ketë qenë më kuptimploti ose ngushëlluesi për ty?

Për t’i ndihmuar nxënësit të përqendrohen te Jezu Krishti ndërsa i studiojnë këto vargje, merreni parasysh të paraqitni një figurë të Shpëtimtarit në qendër të tabelës. Mund t’i ftoni nxënësit të shkruajnë fraza për Shpëtimtarin përreth figurës, duke përshkruar nëpërmjet fjalëve të Tij atë që mund të mësojmë rreth Tij dhe marrëdhënies së Tij me Moisiun dhe fëmijët e Izraelit. Shembujt e ideve mund të përfshijnë që Jezusi e thirri Moisiun me emër (vargu 4), prania e Jezusit e bëri vendin të shenjtë (vargu 5), Jezusi i pa vuajtjet dhe i dëgjoi vajtimet e popullit të Tij (vargu 7) dhe Jezusi premtoi të ishte me Moisiun (vargu 12).

Nëse nxënësit nuk e përmendin, vini në dukje titullin “UNË JAM” (Eksodi 3:14). Shpjegoni se ai vjen nga e njëjta rrënjë e fjalës si Jehova, që mund të interpretohet si “Ai është” ose “Ai ekziston”. Emri do të kishte qenë lehtësisht i dallueshëm nga izraelitët. Për t’i ndihmuar nxënësit të kuptojnë domethënien e këtij emri, mund të pyesni përse do të ishte kuptimplotë të dinë se Zoti ekziston vërtet dhe është gjithmonë i pranishëm.

Pasi nxënësit të japin përgjigjet e tyre, mund të bëni pyetjen vijuese.

• Nëse do të kishe qenë në situatën e Moisiut, çfarë pyetjesh ose shqetësimesh mund të kishe pasur?

Shpjegoni se, pavarësisht nga deklarata e Zotit se kush është Ai dhe çfarë premton Ai, Moisiu ende kishte shqetësime rreth thirrjes së tij për të çliruar Izraelin.

Lexo tek Eksodi 4:10–15, duke kërkuar mënyrën se si Zoti i trajtoi shqetësimet e Moisiut.

• Çfarë mëson rreth fjalëve të profetëve nga këto vargje?

  Ndihmojini nxënësit të përcaktojnë të vërtetën se Zoti i thotë fjalët e Tij nëpërmjet profetëve të Tij.

• Si mund të ndikojë njohuria për këtë të vërtetë në jetën tënde ose në vendimet e tua?

Për t’i ndihmuar nxënësit ta kuptojnë më mirë këtë të vërtetë, mund të shfaqni një nga materialet filmike vijuese:

• “Përse Kemi Profetë?” (1:37)

• “Listen to a Prophet” [“Dëgjoni një Profet”] nga kodi kohor 0:53 deri në 2:56

Kujto fillimin e mësimit dhe zërat e ndryshëm që shpresojnë të fitojnë vëmendjen tonë. Mendo për atë që mund t’i tregosh dikujt tjetër për ta ndihmuar të kuptojë se Zoti flet nëpërmjet profetëve dhe se ne duhet t’ua vëmë veshin profetëve në vend të zërave të tjerë. Mund të përfshish atë që mësove nga Eksodi 3 dhe çdo përvojë që ti ose dikush që ti njeh keni pasur, që të ka ndihmuar të dish se Zoti i thotë fjalët e Tij nëpërmjet profetëve të Tij.

Ftojini nxënësit ta tregojnë atë që mund të thonë. Një pyetje e mundshme për ndjekjen e ecurisë është: “Si ju ka bekuar kjo kuptueshmëri ju ose dikë që njihni?”

Zbatimi i fjalëve të profetëve të Zotit në jetën tonë

• Cilat janë disa mënyra se si mund t’i dëgjojmë dhe zbatojmë fjalët e Zotit, të dhëna nëpërmjet profetëve të Tij, në jetën tonë?

Inkurajoni disa nxënës të japin shembuj të zbatimit të mësimeve të profetëve. Nëse është e dobishme, tregoni disa ide si:

• Zbatimi i këshillës profetike specifike nga një bisedë e konferencës së përgjithshme të kohëve të fundit.

• Studimi i fjalëve të profetëve më shpesh, si dëgjimi i një bisede të një konference të përgjithshme çdo mëngjes gjatë përgatitjes për shkollë.

• Krijimi i një plani për të studiuar bisedat e konferencave të përgjithshme më të fundit të secilit prej anëtarëve të Presidencës së Parë dhe Kuorumit të Dymbëdhjetë Apostujve. (Nëse nxënësit kanë qasje digjitale, ata mund të përdorin veçorinë Study Plans [Plane Studimi] në programin Gospel Library [Biblioteka e Ungjillit].)

Shkruaj në ditarin tënd të studimit mënyrën se si do ta dëgjosh dhe zbatosh fjalën e Zotit nëpërmjet profetëve të Tij në jetën tënde personale. Si pjesë e planit tënd, shëno ato pengesa që mendon se mund t’i hasësh. Për çdo pengesë, shkruaj se si mund ta kapërcesh atë.

Shpjegojuni nxënësve se ata do të kenë një mundësi në mësimin e ardhshëm, Mësimi 55: “Vlerësoni të Mësuarit Tuaj 3”, për të vlerësuar se si po ecin me zbatimin e planeve të tyre.

Përfundojeni duke dhënë dëshminë tuaj se Zoti flet nëpërmjet profetëve të Tij të gjallë sot.

Burime Shtesë

Çfarë tjetër dimë rreth titullit “UNË JAM”?

Në jetën e Tij në vdekshmëri, Shpëtimtari e përdori këtë titull për t’u njoftuar judenjve se Ai ishte Jehova (shih te Gjoni 8:56–59). Ai gjithashtu iu referua Vetes si “i Madhi Unë Jam” te Doktrina e Besëlidhje (Doktrina e Besëlidhje 29:1; 38:1; 39:1).

Si mund ta forcoj dëshminë time që profetët janë të thirrur nga Perëndia?

Presidenti Rasëll M. Nelson shpalli:

“Zoti Jezu Krisht, Kisha e të cilit është kjo, cakton profetë dhe apostuj për të komunikuar dashurinë e Tij dhe dhënë mësim ligjet e Tij. …

Pyeteni Atin tuaj Qiellor nëse ne jemi vërtet apostujt dhe profetët e Zotit. Pyetini nëse kemi marrë zbulesë mbi këtë çështje dhe të tjera.” (“The Love and Laws of God” [takim shpirtëror në Universitetin “Brigam Jang”, 17 shtator 2019], f. 3, 5, speeches.byu.edu)

Motra Karol F. Mek‑Konki, asokohe e Presidencës së Përgjithshme të Të Rejave, dha mësim:

“Ndërsa e lexojmë dhe e studiojmë plot lutje fjalën e shenjtë profetike me besim te Krishti, me qëllim të vërtetë, Fryma e Shenjtë do t’ua thotë të vërtetën mendjeve dhe zemrave tona”. (“Jetoni sipas Fjalëve të Profetëve”, Liahona, nëntor 2014, f. 79)

A duhet t’u mirëbesoj gjithmonë fjalëve të profetëve?

Plaku Nil L. Andersen, i Kuorumit të Dymbëdhjetë Apostujve, tregoi:

“Në vitin 1982, dy vjet përpara thirrjes si Autoritet i Përgjithshëm, Vëllai Rasëll M. Nelson tha: ‘Kurrë nuk e pyes veten: ‘Kur flet profeti si profet dhe kur nuk flet?’ Interesi im ka qenë: ‘Si mund të jem më shumë si ai?’ Dhe ai shtoi: ‘[Filozofia ime është të] mos vë më pikëpyetje pas deklaratave të profetit dhe të vendos pikëçuditje në vend të tyre’ [Russell M. Nelson, në Lane Johnson, “Russell M. Nelson: A Study in Obedience”, Ensign, janar 1983, f. 24]. Kjo është mënyra se si një burrë i përulur dhe shpirtëror zgjodhi se si t’i jepte drejtim jetës së vet. Tani, 36 vjet më vonë, ai është profeti i Zotit.” (“Profeti i Perëndisë”, Liahona, maj 2018, f. 27)

Po sikur të mos i kuptoj fjalët e profetëve?

Presidenti Henri B. Ajring, i Presidencës së Parë, shpjegoi:

“Nganjëherë do të marrim këshilla që nuk mund t’i kuptojmë, ose që duken sikur nuk gjejnë zbatim për ne, madje dhe pas lutjes dhe mendimit të kujdesshëm. Mos i hidhni poshtë këshillat, por mbajini fort. Nëse dikush të cilit i mirëbesoni, ju dorëzon diçka që duket sikur nuk është gjë tjetër veçse rërë me premtimin se përmban ar, ju mund ta mbanit me mençuri në dorë për pak kohë, duke e tundur lehtë. Për çdo herë që e kam bërë këtë me këshillën e një profeti, pas pak kohe leskrat e arit kanë filluar të shfaqen dhe unë kam qenë mirënjohës.” (“Finding Safety in Counsel”, Ensign, maj 1997, f. 26)

Veprimtari Plotësuese të të Mësuarit

Moisiu si një simbol i Krishtit

Për t’i ndihmuar nxënësit të kuptojnë se Moisiu ishte një lloj ose simbol për Krishtin, mund t’i ftoni ata të krahasojnë ngjashmëritë ndërmjet kapitullit tek Eksodi 2 dhe vargjeve te Mateu 2:13–16. Nxënësit mund të vënë në dukje ngjashmëritë si:

• Kur ishin fëmijë, Moisiu dhe Jezusi u vendosën nën dekretin e një mbreti për t’i vrarë fëmijët izraelitë.

• Për t’i shpëtuar ata nga dekreti i mbretit, Jezusi u çua nga Jozefi dhe Maria në Egjipt dhe Moisiu u rrit në një shtëpi egjiptiane.

• Edhe Moisiu, edhe Jezusi u rritën me idenë për të çliruar popullin e Perëndisë nga robëria.

Mund t’i pyesni më pas nxënësit se si këto ngjashmëri na mësojnë dhe dëshmojnë për Jezu Krishtin.

Reagimi ndaj një profeti

Për t’i ndihmuar nxënësit të kuptojnë se si ne duhet të reagojmë ndaj një profeti, ftojini ata të lexojnë tek Eksodi 4:29–31, duke kërkuar mënyrën se si reaguan izraelitët ndaj Moisiut. Mund të jepni edhe thënien vijuese nga Presidenti M. Rasëll Ballard (1928–2023), i Kuorumit të Dymbëdhjetë Apostujve:

“Kur e dëgjojmë këshillën e Zotit të shprehur nëpërmjet fjalëve të Presidentit të Kishës, përgjigjja jonë duhet të jetë pozitive dhe e shpejtë”. (“His Word Ye Shall Receive”, Ensign, maj 2001, f. 65)

Diskutojeni atë që mund të mësojmë nga reagimi i njerëzve dhe thënia e Presidentit Ballard. Kërkoni shembuj të reagimit pozitiv dhe të shpejtë dhe diskutoni përse këto zgjedhje bëjnë një ndryshim.

Veprimtari studimi për zbatimin e fjalëve të profetëve

Ja disa mënyra se si nxënësit mund ta ushtrojnë zbatimin e fjalëve të profetëve në jetën e tyre. Për veprimtarinë e parë, nxënësit mund t’i studiojnë fjalët e profetëve në mënyrë digjitale, ose ju mund t’u siguroni kopje të botimeve të konferencës së përgjithshme të revistës Liahona ose të shtypni mesazhet e kohëve të fundit.

• Ftojini nxënësit të kërkojnë nëpër mesazhet e tanishme nga profeti dhe apostujt (nga publikimet në rrjetet sociale, fjalimet e konferencës së përgjithshme ose mësime të tjera). Kërkojuni nxënësve të gjejnë fraza që janë kuptimplote për ta. Ftojini ata t’i shkruajnë këto fraza në tabelë.

• Përzgjidhni paragrafë ose mësime nga disa prej fjalimeve më të fundit të profetëve. Përzgjidhni pjesët e shkëputura që e ndieni se kanë më tepër lidhje me nxënësit tuaj. Përgatitini këto pjesë të shkëputura në një fletushkë dhe ftojini nxënësit t’i studiojnë ato sikur Zoti të ishte duke ju folur drejtpërdrejt. Ata mund të duan ta shenjojnë atë që u bëri përshtypje.