Genesis 42–50

Genesis 42–50

Kinatibuk-ang Pagpasabot

Panahon sa pito ka tuig nga gutom nga gipanagna ni Jose sa Ehipto, ang iyang mga igsoon migikan sa yuta sa Canaan aron mopalit og pagkaon sa Ehipto. Si Jose wala mailhi sa iyang mga igsoon, pero nailhan niya sila. Giakusahan sila ni Jose nga mga espiya, gipriso si Simeon ug giingnan sila nga mobalik uban ang ilang kamanghorang igsoon nga si Benjamin. Gihatagan sila ni Jose og pagkaon ug gibutang ang kwarta nga ilang gibayad diha sa ilang mga sako sa pagkaon. Wala madugay, dihang mibalik sila uban ni Benjamin, gipaila ni Jose ang iyang kaugalingon ngadto sa iyang mga igsoon ug gipasaylo sila. Sa kataposan, ang amahan ni Jose nga si Jacob ug ang tanan niyang pamilya didto na mipuyo sa Ehipto. Sa kataposang bahin sa iyang kinabuhi, si Jose sa Ehipto nanagna nga sa ulahing mga adlaw, magtagana ang Ginoo og usa ka propeta aron makagawas sa kangitngit ang iyang katawhan. Kini nga propeta mao si Joseph Smith.

Pangita og angay nga mga paagi sa pagpahayag sa imong gugma. Kon bation niadtong imong gitudloan ang imong gugma, dako ang kahigayonan nga mabati usab nila ang gugma sa Manluluwas para nila dihang imo silang tudloan. Kanunayng mangitag talagsaon ug personal nga paagi ang Manluluwas aron tabangan ang mga tawong Iyang gitudloan nga mabati ang Iyang gugma. Aron makakat-on og dugang, tan-awa ang “Gipahayag sa Manluluwas ang Iyang Gugma alang Niadtong Iyang Gitudloan” (Pagtudlo Sumala sa Pamaagi sa Manluluwas [2022], 14–15).

Pangitag mga higayon karong semanaha nga ipahayag sa nahiangay nga paagi ang imong gugma para sa imong mga estudyante. Usa ka paagi sa paghimo niini mao ang pagpadalag mensahe sa pipila sa mga ginikanan sa mga estudyante aron ipakigbahin ang usa ka positibong butang nga imong nabantayan sa ilang anak. (Para sa dugang pagbansay, tan-awa ang “Pangita og angay nga mga paagi sa pagpahayag sa imong gugma” diha sa Pagpalambo sa mga Kahanas sa Magtutudlo.)

Pangandam sa pagtudlo

Ang mosunod nga impormasyon mohatag nimo og mga ideya kon unsay kinahanglan nimong andamon daan para sa matag leksiyon.

Genesis 42–45

Katuyoan sa leksiyon: Aron tabangan ang mga estudyante nga sundon ang ehemplo sa Manluluwas pinaagi sa pagkamapasayloon.

• Pagpangandam sa estudyante: Dapita ang mga estudyante nga pamalandongan ang sugo sa Manluluwas nga “mopasaylo sa tanang tawo” (Doktrina ug mga Pakigsaad 64:10). Hangyoa sila nga ilista ang pipila sa mga panalangin nga nasinati nila o sa uban pinaagi sa pagpasaylo sa usa ka tawo.

• Mga Bidyo: “Joseph and the Famine” (2:26) gikan sa time code 0:00 hangtod 1:42; “Forgiving Others: An Easter Message from President Russell M. Nelson” (5:01); “Ang Gahom sa Kadasig sa Espirituhanong Paglambo” (17:17) gikan sa time code 15:12 hangtod 15:54

Hubad ni Joseph Smith, Genesis 50

Katuyoan sa leksiyon: Aron tabangan ang mga estudyante nga mapalig-on ang ilang mga pagpamatuod nga gitawag sa Ginoo si Joseph Smith aron mahimong usa ka propeta.

• Pagpangandam sa estudyante: Dapita ang mga estudyante nga isulat ang nabuhat ni Propeta Joseph Smith nga nakatabang nila aron mas maduol ngadto ni Jesukristo. Pwede nilang hangyoon ang usa ka sakop sa pamilya o higala nga ipakigbahin usab ang ilang mga hunahuna ug pagbati.

• Sulod nga ipakita: Duha ka kolum nga tsart diin ang usa ka kolum naay ulohan nga “Panagna mahitungod kang Joseph Smith” ug ang lain “Posibleng mga paagi sa katumanan niini nga panagna”

• Mga imahe: Jose sa Ehipto; Moises; Joseph Smith; Jesukristo

• Video: “Joseph Smith” (14:49) gikan sa time code 11:44 hangtod 12:48

Sukda ang Imong Nakat-onan 2

Katuyoan sa leksiyon: Aron tabangan ang mga estudyante sa pagpamalandong sa mga tumong nga ilang gitakda ug sa pag-uswag nga ilang nasinati dihang ilang gitun-an ang Genesis 12–50 ug Abraham 1–2.

• Pagpangandam sa estudyante: Dapita ang mga estudyante nga mosulod sa klase nga andam ipakigbahin ang mga paagi diin sila miuswag sa espirituwal tungod sa ilang pagtuon sa Daang Tugon ug Perlas nga Labing Bililhon karong tuiga. Pwede nimong isugyot nga ilang irebyo ang ilang mga journal sa pagtuon o mga mubo nga sulat diha sa ilang mga kasulatan aron matabangan silang mabantayan ang ilang pagtubo ug pagkat-on.

• Sulod nga ipakita: Drowing sa usa ka gamayng kahoy ug dako nang kahoy, hulagway sa templo nga gigamit sa Leksiyon 29: “Genesis 24”; graphic bahin sa mga plano sa mga estudyante sa pagpundok sa Israel

• Mga hulagway: Damgo ni Jacob