« លោកុប្បត្តិ ៣៩ ៖ ការយកឈ្នះលើសេចក្តីល្បួង » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្តិ ៣៩ ៖ ការយកឈ្នះលើសេចក្តីល្បួង » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ៣៧–៤១ ៖ មេរៀនទី ៣៤
លោកុប្បត្តិ ៣៩
ការយកឈ្នះលើសេចក្តីល្បួង
បន្ទាប់ពីយ៉ូសែបបានក្លាយជាអ្នកមើលការខុសត្រូវក្នុងផ្ទះរបស់ប៉ូទីផារ ប្រពន្ធរបស់ប៉ូទីផារបានល្បួងគាត់ឲ្យបំពានច្បាប់ព្រហ្មចារីភាព ។ យ៉ូសែបបានដឹងថា ការបន្ទន់ទៅតាមការល្បួងនោះគឺនឹង « មានបាបនៅចំពោះព្រះ » ហើយបានជ្រើសរើសគេចចេញពីការល្បួងនោះ ( សូមមើល លោកុប្បត្តិ ៣៩:៩, ១២ ) ។ មេរៀននេះអាចជួយសិស្សបង្ហាញការលះបង់របស់ពួកគេចំពោះព្រះ ដោយទប់ទល់នឹងការល្បួងឲ្យបំពានច្បាប់ព្រហ្មចារីភាព ។
ការរៀបចំសិស្ស ៖ សូមអញ្ជើញសិស្សឲ្យស្រមៃថា ពួកគេត្រូវបានស្នើឲ្យដឹកនាំការពិភាក្សានៅក្នុងថ្នាក់រៀននៃសាលាថ្ងៃអាទិត្យរបស់ពួកគេ អំពីវិធីផ្សេងៗដែលពួកគេអាចទប់ទល់នឹងការល្បួងរបស់សាតាំង ។ សូមអញ្ជើញសិស្សឲ្យគិតអំពីវិធីបីយ៉ាងដែលពួកគេនឹងចែកចាយជាមួយនឹងថ្នាក់រៀនរបស់ពួកគេ ។
សកម្មភាពរៀនសូត្រដែលអាចមាន
សេចក្តីល្បួងដែលយើងប្រឈមមុខ
សូមពិចារណាឲ្យសិស្សក្នុងថ្នាក់បង្កើតនៅលើក្ដារខៀននូវបញ្ជីមួយអំពីការល្បួងដែលយុវវ័យប្រឈមមុខនៅសព្វថ្ងៃនេះ ។ ដើម្បីជួយសិស្សគិតបន្ថែមអំពីការល្បួងដែលពួកគេប្រឈមមុខដោយផ្ទាល់ និងរបៀបដែលពួកគេឆ្លើយតបចំពោះការល្បួងទាំងនោះ អ្នកអាចអញ្ជើញសិស្សម្នាក់ៗឲ្យបំពេញសកម្មភាពខាងក្រោមនៅលើក្រដាសមួយសន្លឹក ។
សូមជ្រើសរើសការល្បួងមួយ ហើយសរសេរសាច់រឿងជាក់ស្តែងខ្លីៗ ដែលជាការល្បួងដែលក្មេងជំទង់ៗអាចប្រឈមមុខ ។
សូមប្រមូលសាច់រឿងទាំងឡាយ ហើយចែកចាយវាបន្តក្នុងសិស្សក្នុងថ្នាក់ ។
សូមអានសាច់រឿងថ្មីរបស់អ្នក ។ សូមសរសេរលើខ្នងក្រដាសនូវអ្វីដែលអាចធ្វើឲ្យវាពិបាកទប់ទល់នឹងការល្បួងនោះ ។ សូមសរសេរផងដែរនូវរឿងពីរដែលអ្នកអាចលើកទឹកចិត្តនរណាម្នាក់ឲ្យធ្វើ ដើម្បីជួយពួកគេទប់ទល់ ឬយកឈ្នះលើការល្បួងនោះ ។
សូមចង្អុលបង្ហាញដល់សិស្សថា ទោះបីជាពួកគេអាចនឹងមិនប្រឈមមុខនឹងការល្បួងដូចគ្នាដូចបានរាយក្នុងសាច់រឿងក៏ដោយ ពួកគេអាចនឹងអនុវត្តការប្រឹក្សាស្រដៀងគ្នានេះចំពោះស្ថានភាពរបស់ពួកគេផ្ទាល់ផងដែរ ។ សូមជួយសិស្សវាយតម្លៃសមត្ថភាពរបស់ពួកគេផ្ទាល់ក្នុងការទប់ទល់ ឬយកឈ្នះលើការល្បួង ។
សូមគិតអំពីការល្បួងដែលអ្នកជួបប្រទះដោយផ្ទាល់ ។
-
តើអ្វីខ្លះដែលអ្នកធ្លាប់ ឬអាចបានធ្វើ ដើម្បីទទួលបានកម្លាំងពីព្រះវរបិតាសួគ៌ និងព្រះយេស៊ូវគ្រីស្ទ ដើម្បីទប់ទល់នឹងការល្បួងទាំងនោះ ?
អ្នកអាចអញ្ជើញសិស្សឲ្យបន្ថែមលើអ្វីដែលពួកគេបានសរសេរនៅក្នុងសាច់រឿងជាមួយនឹងបទពិសោធន៍របស់ពួកគេផ្ទាល់ ។ សូមលើកទឹកចិត្តពួកគេឲ្យបន្តបន្ថែមគំនិតទាំងឡាយទៅក្នុងសាច់រឿងរបស់ពួកគេ នៅពេលពួកគេសិក្សា លោកុប្បត្តិ ៣៩ ។ សូមឲ្យពួកគេដឹងថា នៅពេលពួកគេស្វែងរកជំនួយពីព្រះវិញ្ញាណបរិសុទ្ធ ទ្រង់អាចបំផុសគំនិតពួកគេជាមួយគំនិតទាំងឡាយ ដើម្បីទប់ទល់ និងថែមទាំងយកឈ្នះលើការល្បួងដែលពួកគេប្រឈមមុខទៀតផង ។
បទពិសោធន៍របស់យ៉ូសែបពីការល្បួង
ប្រសិនបើអ្នកបានប្រើរូបភាពដើម្បីសង្ខេបព្រឹត្តិការណ៍នៃជីវិតរបស់យ៉ូសែបនៅក្នុងមេរៀនទី ៣៣ ៖ « លោកុប្បត្តិ ៣៧–៤១ » សូមពិចារណាបង្ហាញរូបភាពទាំងនោះម្តងទៀត ។ សូមអញ្ជើញសិស្សម្នាក់ឲ្យសង្ខេបអ្វីដែលពួកគេចាំបានអំពីរបៀបដែលព្រះអម្ចាស់បានប្រទានពរដល់យ៉ូសែបនៅក្នុងផ្ទះរបស់ប៉ូទីផារ ។ ប្រសិនបើសិស្សត្រូវការជំនួយ សូមអញ្ជើញពួកគេឲ្យអាន ហើយសង្ខេប លោកុប្បត្តិ ៣៩:១–៦ ។
សូមអាន លោកុប្បត្តិ ៣៩:៧–៨ ដោយរកមើលអ្វីដែលបានកើតឡើងចំពោះយ៉ូសែប បន្ទាប់ពីគាត់បានក្លាយជាអ្នកមើលការខុសត្រូវនៅផ្ទះរបស់ប៉ូទីផារ ។
-
តើយ៉ូសែបបានប្រឈមមុខនឹងការល្បួងអ្វីខ្លះ ?
សូមពន្យល់ថា យ៉ូសែបបានប្រឈមមុខនឹងការល្បួងឲ្យបំពានច្បាប់ព្រហ្មចារីភាព ។ សូមជួយសិស្សឲ្យគិតពិចារណានូវអ្វីដែលពួកគេយល់អំពីច្បាប់ព្រហ្មចារីភាព ដោយការអញ្ជើញពួកគេឲ្យធ្វើដូចខាងក្រោម ។
នៅក្នុងសៀវភៅកំណត់ហេតុការសិក្សារបស់អ្នក សូមសរសេរពីរបៀបដែលអ្នកនឹងកំណត់ន័យនៃច្បាប់ព្រហ្មចារីភាព និងមូលហេតុដែលវាសំខាន់ ។
នៅពេលសិស្សសរសេរចប់ សូមពិចារណាបង្ហាញប្រយោគខាងក្រោម ។ សូមអញ្ជើញសិស្សឲ្យអានវាដោយខ្លួនពួកគេ ដោយរកមើលការយល់ដឹងដែលពួកគេអាចបន្ថែមទៅលើអ្វីដែលពួកគេបានសរសេរនៅក្នុងសៀវភៅកំណត់ហេតុការសិក្សារបស់ពួកគេ ។
ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស មានចែងអំពីច្បាប់ព្រហ្មចារីភាពដូចតទៅ ៖
ច្បាប់ព្រហ្មចារីភាពចែងថា ព្រះអនុម័តសកម្មភាពខាងផ្លូវភេទរបស់យើងតែរវាងបុរស និងស្រ្តីដែលបានរៀបការហើយប៉ុណ្ណោះ ។ …
រវាងបុរស និងស្រ្តីដែលនៅក្រៅចំណងអាពាហ៍ពិពាហ៍ គឺវាខុសដែលត្រូវប៉ះពាល់ផ្នែកសម្ងាត់ ពិសិដ្ឋលើរូបកាយរបស់មនុស្សផ្សេង សូម្បីតែវាបានបិទបាំងដោយសម្លៀកបំពាក់ក៏ដោយ ។ នៅក្នុងជម្រើសរបស់អ្នកអំពីអ្វីដែលអ្នកធ្វើ សូមមើល អាន ស្តាប់ គិតអំពី ការចុះផ្សាយ ឬអត្ថបទ សូមចៀសវាងអំពីអ្វីៗដែលមានចេតនាដាស់អារម្មណ៍ចំណង់ចំពោះអ្នកដទៃ ឬខ្លួនឯង ។ អ្វីៗទាំងនេះរួមទាំងរូបអាសគ្រាមនៅគ្រប់ទម្រង់ ។ ( ដើម្បីកម្លាំងនៃយុវជន ៖សេចក្តីណែនាំដើម្បីធ្វើការជ្រើសរើស ទំព័រ ២៣, ២៥ )
-
តើអ្នកគិតថាហេតុអ្វីបានជាព្រះវរបិតាសួគ៌ប្រទានច្បាប់ព្រហ្មចារីភាពដល់យើង ?
-
តើវិធីមួយចំនួនដែលសាតាំងល្បួងយុវវ័យឲ្យបំពានច្បាប់ព្រហ្មចារីភាពមានអ្វីខ្លះ ?
ចម្លើយដែលសិស្សអាចផ្តល់ឲ្យ រួមមានការថត ឬផ្ញើរូបភាពមិនសមរម្យ ការមើល ឬស្តាប់ប្រព័ន្ធផ្សព្វផ្សាយដែលណែនាំ ឬស្ដែងពីលក្ខណៈផ្លូវភេទ ការមិនចាត់ទុកការរួមភេទ ឬអារម្មណ៍ផ្លូវភេទជារឿងពិសិដ្ឋ ។ ប្រសិនបើសិស្សមានសំណួរអំពីការប្រតិព័ទ្ធភេទដូចគ្នា វាអាចមានប្រយោជន៍ក្នុងការពន្យល់ថា « ការមានអារម្មណ៍ប្រតិព័ទ្ធភេទដូចគ្នាមិនមែនជាអំពើបាបនោះទេ ។ ប្រសិនបើ [ នរណាម្នាក់ ] មានអារម្មណ៍ទាំងនេះ ហើយមិន [ ចង់ ] បាន ឬធ្វើតាមអារម្មណ៍នេះ នោះ [ ពួកគេ ] កំពុងរស់នៅតាមច្បាប់ព្រហ្មចារីភាព ដ៏ពិសិដ្ឋរបស់ព្រះវរបិតាសួគ៌ដ៏ពេញដោយក្តីស្រឡាញ់ហើយ » ( ដើម្បីកម្លាំងនៃយុវជន ៖ សេចក្ដីណែនាំដើម្បីការជ្រើសរើស ទំព័រ ២៧ ) ។
សូមអាន លោកុប្បត្តិ ៣៩:៩–១២ ដោយរកមើលរបៀបដែលយ៉ូសែបបានទប់ទល់នឹងការល្បួងឲ្យបំពានច្បាប់ព្រហ្មចារីភាព ។
លោកុប្បត្តិ ៣៩:៩ គឺជាវគ្គបទគម្ពីរចំណេះចំណានខាងគោលលទ្ធិមួយ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីពួកគេអាចងាយរកវាឃើញ ។
-
តើអ្នកបានរៀនអ្វីខ្លះពីឧទាហរណ៍របស់យ៉ូសែប ?
សិស្សអាចរកឃើញសេចក្ដីពិតដូចជា ៖ ការលះបង់របស់យើងចំពោះព្រះអាចផ្តល់ឲ្យយើងនូវកម្លាំងដើម្បីទប់ទល់នឹងការល្បួងឲ្យបំពានច្បាប់ព្រហ្មចារីភាព ( ខទី ៩ ) ។
សិស្សអាចគូសចំណាំនៅក្នុងព្រះគម្ពីររបស់ពួកគេនូវអ្វីដែលភក្ដីភាពរបស់យ៉ូសែបចំពោះព្រះបានបង្កលទ្ធភាពឲ្យគាត់ធ្វើបាន ឧទាហរណ៍នៅក្នុង ខទី ៨ ( « គាត់មិនព្រមសោះ » ) ខទី ១០ ( « គាត់មិនព្រមស្តាប់តាម » ) និង ខទី ១២ ( « រត់ចេញទៅក្រៅទៅ » ) ។
ដើម្បីជួយសិស្សឆ្លើយសំណួរខាងក្រោម អ្នកអាចនឹងចង់ផ្តល់ឲ្យពួកគេនូវសាច់រឿងដែលពួកគេអាចប្រើ ដើម្បីចែកចាយអំពីរបៀបដែលនរណាម្នាក់អាចធ្វើរឿងបីយ៉ាងដែលយ៉ូសែបបានធ្វើ ។ សាច់រឿងដែលអាចទៅរួចមួយអាចទាក់ទងនឹងការអញ្ជើញទៅមើលកុន កម្មវិធីសម្ដែង ឬការប្រគុំតន្ត្រី ដែលមានប្រើប្រាស់រូបភាព និងពាក្យសម្ដីអសីលធម៌ ។ សាច់រឿងដែលអាចទៅរួចមួយទៀតអាចទាក់ទងនឹងការបង្ខិតបង្ខំឲ្យផ្ញើអត្ថបទ ឬរូបភាពមិនសមរម្យទៅកាន់មិត្តភក្ដិ ។
-
តើតាមវិធីណាខ្លះដែលយើងអាចធ្វើតាមគំរូរបស់យ៉ូសែប នៅពេលយើងប្រឈមមុខនឹងការល្បួង ?
ការពង្រឹងសមត្ថភាពរបស់យើងក្នុងការគោរពច្បាប់ព្រហ្មចារីយភាព
ដើម្បីជួយសិស្សឲ្យយល់កាន់តែស៊ីជម្រៅអំពីសេចក្តីពិតនេះ សូមចែកចាយសំណៅមេរៀនដែលភ្ជាប់មកជាមួយដល់សិស្សទាំងឡាយ ។ សូមពិចារណាដាក់សិស្សជាគូ ហើយចាត់ដៃគូនីមួយៗឲ្យផ្តោតលើសំណួរមួយក្នុងចំណោមសំណួរទាំងឡាយលើសំណៅមេរៀននោះ ។
សូមអញ្ជើញសិស្សឲ្យចែកចាយកអ្វីដែលពួកគេបានរៀនជាមួយដៃគូរបស់ពួកគេ ។
ព្រះអង្គសង្គ្រោះអាចជួយយើងឲ្យយកឈ្នះលើការល្បួងបាន
អ្នកអាចមានសិស្សដែលកំពុងពុះពារនឹងការគោរពប្រតិបត្តិតាមច្បាប់ព្រហ្មចារីភាព ហើយត្រូវការអារម្មណ៍នៃសេចក្ដីសង្ឃឹមក្នុងការប្រែចិត្ត និងយកឈ្នះលើការញៀន ។ សូមថ្លែងទីបន្ទាល់ពីសេចក្តីស្រឡាញ់ អំណត់ និងនិស្ស័យនៃការអភ័យទោសរបស់ព្រះវរបិតាសួគ៌ និងព្រះយេស៊ូវគ្រីស្ទ ។ សូមពិចារណាបង្ហាញវីដេអូ « Temptation Fades as We Seek Christ in Every Thought » ( ២:៥៧ ) ដែលមាននៅលើគេហទំព័រ ChurchofJesusChrist.org ។ សូមអញ្ជើញសិស្សឲ្យរកមើលរបៀបដែលព្រះអង្គសង្គ្រោះអាចប្រទានក្តីសង្ឃឹមដល់យើង ។
អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានបង្រៀនពីរបៀបដែលព្រះអង្គសង្គ្រោះអាចប្រទានក្តីសង្ឃឹមដល់អ្នកដែលបានពុះពារគោរពតាមព្រះបញ្ញត្តិរបស់ព្រះ ។
មិនថាយើងធ្លាក់ចេញពីផ្លូវនេះយូរប៉ុនណា ឬរសាត់ព្រាត់ឆ្ងាយប៉ុនណាទេ នៅគ្រាណាដែលយើងសម្រេចចិត្តដើម្បីផ្លាស់ប្តូរ នោះព្រះជួយយើងឲ្យត្រឡប់មកវិញ ។ តាមទស្សនៈរបស់ព្រះ តាមរយៈការប្រែចិត្តដោយស្មោះសរ ហើយខិតខំជឿនទៅមុខដោយខ្ជាប់ខ្ជួននៅក្នុងព្រះគ្រីស្ទ នៅពេលយើងបានត្រឡប់មកលើផ្លូវនេះវិញ នោះយើងហាក់ដូចជាមិនដែលធ្លាក់ចេញពីផ្លូវនេះឡើយ ។ ព្រះអង្គសង្គ្រោះបង់ថ្លៃសម្រាប់អំពើបាបយើង ហើយរំដោះយើងចេញពីការពុំសូវមានសុភមង្គល និងពរជ័យ ។ ( « Choose You This Day » Liahona ខែវិច្ឆិកា ឆ្នាំ២០១៨ ទំព័រទី ១០៦ )
-
តើអ្នកចង់ឲ្យនរណាម្នាក់ ដែលមានអារម្មណ៍អស់សង្ឃឹមដោយសារជម្រើសពីមុនរបស់ពួកគេ យល់អ្វីខ្លះពីសេចក្តីថ្លែងការណ៍របស់អែលឌើរ រិនឡាន់ ?
-
តើអ្វីខ្លះបានជួយអ្នកឲ្យទប់ទល់នឹងការល្បួងដែលអ្នកអាចផ្ដល់យោបល់ទៅមនុស្សផ្សេងទៀតបាន ?
ការដាក់ផែនការគោរពច្បាប់ព្រហ្មចារីភាព
ដើម្បីជួយសិស្សដាក់ផែនការធ្វើតាមអ្វីដែលព្រះវិញ្ញាណបានបង្រៀនពួកគេអំពីការគោរពតាមច្បាប់ព្រហ្មចារីភាព សូមផ្ដល់ពេលពីរបីនាទីឲ្យពួកគេឆ្លើយសំណួរខាងក្រោមនេះ នៅក្នុងសៀវភៅកំណត់ហេតុការសិក្សារបស់ពួកគេ ។
-
តើអ្នកបានរៀនអ្វីខ្លះដែលអាចជួយអ្នកគោរពតាមច្បាប់ព្រហ្មចារីភាព ឬទប់ទល់នឹងការល្បួងផ្សេងទៀត ?
-
តើអ្នកបានរៀនអ្វីខ្លះអំពីការមានភក្ដីភាពចំពោះព្រះ ?
-
តើអ្នកនឹងចាប់ផ្តើមអនុវត្តអ្វីខ្លះដែលអ្នកបានរៀន និងទទួលអារម្មណ៍នៅថ្ងៃនេះយ៉ាងដូចម្ដេច ?
សូមលើកទឹកចិត្តសិស្សដើម្បីឲ្យព្រះវរបិតាសួគ៌ និងព្រះយេស៊ូវគ្រីស្ទមានចំណែកនៅក្នុងកិច្ចខិតខំរបស់ពួកគេដើម្បីទប់ទល់នឹងការល្បួង ។ សូមពិចារណាចែកចាយទីបន្ទាល់របស់អ្នកអំពីសមត្ថភាពរបស់ព្រះអង្គសង្គ្រោះក្នុងការជួយយើងឲ្យយកឈ្នះលើការល្បួង និងសេចក្ដីមេត្តាករុណារបស់ទ្រង់ក្នុងការជួយយើងឲ្យប្រែចិត្ត ។
ទន្ទេញ
អ្នកអាចចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឺះគឺ « ដូច្នេះ តើខ្ញុំអាចប្រព្រឹត្តអំពើទុច្ចរិតដ៏ធំនេះ ហើយប្រព្រឹត្តអំពើបាបនៅចំពោះមុខព្រះដោយរបៀបណា ? » គំនិតសម្រាប់សកម្មភាពទន្ទេញមាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។