Genesis 18–23: Leksiyon 28

Pagbansay 2 sa Doktrinal nga Kahanas

Pagsabot sa Doktrina ug Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makatabang sa mga estudyante nga makasabot sa mga kamatuoran nga gitudlo sa mga tudling sa doktrinal nga kahanas ug magamit ang balaanong mga baroganan sa pag-angkon og espirituhanong kahibalo.

Pagpangandam sa estudyante: Dapita ang mga estudyante nga mopili og tudling sa doktrinal nga kahanas nga gusto nilang mas masabtan. Dayon dapita sila sa pagtuon sa tudling, pamalandongan ang kahulogan niini, ug ikonsiderar nganong ang gitudlo nga doktrina mahinungdanon.

Posibleng mga Kalihokan sa Pagkat-on

Rebyo sa doktrinal nga kahanas: Pagsabot

Ikonsiderar ang pagdapit sa mga estudyante sa pagpamalandong sa usa ka panahon dihang naglisod sila sa pagkat-on o pagbuhat og bag-ong butang. Ang mga ehemplo mahimong maglakip sa pagkat-on og bag-ong pinulongan, pagpraktis og instrumento, o pagdula og isport. Ang mga estudyante mahimong mopakigbahin og mga butang nga nakatabang nila sa pagkat-on ug sa pagbuntog sa mga hagit sa pagkat-on og bag-ong butang. Kon dili kini hisgotan sa mga estudyante, mahimo nimong idugang nga makatabang ang pagpailob ug paglikay sa pagkompara sa imong pag-uswag ngadto sa uban.

Sa samang paagi ang pagkat-on og bag-ong kahanas mahimong lisod, ang pinulongan sa mga kasulatan usahay makapalisod kanila sa pagsabot.

• Unsa ang pipila ka mga butang nga nakatabang kanimo o sa uban nga mas makasabot sa pinulongan sa kasulatan?

Usa ka paagi aron madugangan ang atong pagsabot sa usa ka tudling sa kasulatan mao ang pagtuon niini og maayo, gamit ang mga himan sa pagtuon sa kasulatan sa pagpasabot ug pagpatin-aw sa pinulongan ug kahulogan.

Ipasabot nga niini nga bahin sa leksiyon, ang mga estudyante makabaton og mga oportunidad sa pagpalawom sa ilang pagsabot sa usa sa mga tudling sa doktrinal nga kahanas nga ilang natun-an karong tuiga. Mahimo nimong ipakita ang unang unom ka mga kapanguhaan sa doktrinal nga kahanas sa Daang Tugon ug mahinungdanong hugpong sa mga pulong sa kasulatan, nga makita sa Mahinungdanon nga Dokumento sa Doktrinal nga Kahanas (2022). Dapita ang mga estudyante sa pagpili og tudling sa doktrinal nga kahanas nga gusto nilang mas masabtan.

Alang niini nga kalihokan sa pagtuon, ang mga estudyante mahimong magtrabaho nga tinagsa o diha sa gagmay nga mga grupo uban sa ubang mga estudyante nga mipili sa samang tudling. Ikonsiderar ang pagpakita sa mosunod nga mga instruksiyon.

1. Basaha ang tudling sa doktrinal nga kahanas sa hinay-hinay ug sa mainampingong paagi, mainampoong magdapit sa Espiritu Santo sa pagtabang nga madugangan ang imong pagsabot. Markahi ang bisan unsang mga pulong ug hugpong sa mga pulong nga imong nakita nga makahuluganon.

2. Isulat ang bisan unsang mga pangutana nimo o sa uban mahitungod sa pinulongan o kahulogan sa bersikulo sa kasulatan.

3. Gamita ang anaa nga mga himan sa pagtuon sa kasulatan sa pagpangita sa mga kahulogan, mga pagklaro, mga cross-reference, mga pamahayag gikan sa mga lider sa Simbahan, o bisan unsa nga impormasyon nga makadugang sa pagsabot sa bersikulo o sa mga pulong o mga hugpong sa mga pulong nga imong gimarkahan.

4. Hisgoti kon unsa ang gitudlo sa tudling mahitungod sa Langitnong Amahan ug ni Jesukristo. Ngano sa imong hunahuna nga importante alang sa usa ka tin-edyer nga makahibalo ug makasabot niini nga tudling?

Alang sa usa ka ehemplo niini nga sumbanan sa pagtuon sa kasulatan, tan-awa ang bidyo nga “Analyzing a Passage” (8:12), nga makita sa ChurchofJesusChrist.org.

Kon itugot sa panahon, mahimong ipakigbahin sa mga estudyante ngadto sa uban ang ilang nadiskobrehan ug sa unsang paagi kini nakadugang sa ilang pagsabot sa tudling. Sa laing paagi, ang mga estudyante mahimong magpraktis sa pagpasabot sa doktrina sa tudling ngadto sa usa ka kapares gamit ang dugang nga panabot nga ilang naangkon pinaagi sa kalihokan sa pagtuon.

Mahimo nimong awhagon ang mga estudyante sa paggamit niini nga mga pamaagi sa ilang personal nga mga paningkamot sa pagtuon sa kasulatan.

Sa tibuok adlaw, palandonga ang tudling sa doktrinal nga kahanas nga imong gipili, nga mangita sa mga impresyon gikan sa Espiritu Santo nga nagtudlo nimo kon sa unsang paagi kana nga kasulatan makapanalangin sa imong kinabuhi.

Pagkat-on ug paggamit sa mga baroganan sa pag-angkon og espirituhanong kahibalo

Ang nahibilin sa leksiyon nagtutok sa pagtabang sa mga estudyante sa paggamit sa mga baroganan sa pag-angkon og espirituhanong kahibalo sa may kalabotan nga mga sitwasyon. Sa dili pa mopadayon, mahimong mapuslanon ang pagdapit sa mga estudyante sa pagrebyo sa mga baroganan sa pag-angkon og espirituhanong kahibalo. Ang gisugyot nga mga kalihokan sa pagrebyo gilakip diha sa seksiyon sa apendiks nga giulohan og “Mga Kalihokan sa Pagrebyo sa Doktrinal nga Kahanas.” Ang mga deskripsiyon sa mga baroganan makita diha sa mga parapo 5–12 sa “Pag-angkon og Espirituhanong Kahibalo” nga seksiyon diha sa Mahinungdanon nga Dokumento sa Doktrinal nga Kahanas (2022).

Hinumdomi nga ang mga leksiyon sa pagpraktis sa doktrinal nga kahanas wala gituyo sa pagpaila sa bag-ong sulod. Ang mga leksiyon sa pagpraktis sa doktrinal nga kahanas naghatag sa mga estudyante og kahigayonan sa pagrebyo sa unsay ilang nakat-onan, pagpraktis sa pagpasabot niini, ug paggamit niini sa may kalabotan nga senaryo. Makadugang kini sa abilidad sa mga estudyante sa paghinumdom ug paggamit sa importante nga mga baroganan sa doktrina diha sa ilang kinabuhi.

Aron matabangan ang mga estudyante nga makapraktis sa paggamit sa mga baroganan sa pag-angkon og espirituhanong kahibalo, ikonsiderar ang pagpakita sa mosunod nga senaryo. Mahimo nimong ipahiangay ang mga detalye sa senaryo nga labing mohaom sa mga panginahanglan sa imong klase.

Imbes sa senaryo, mahimo nimong gamiton ang bidyo “Find Answers through Jesus” (1:04).

Ang imong higala nga si Andy mipakigbahin nga siya mibati nga wala makontento sa iyang kinabuhi. Migahin siya og daghang oras sa iyang telepono, pagdula og bidyo nga mga dula [video games], ug pakig-uban sa mga higala, apan iyang nakita nga wala siyay daghang panahon alang sa Dios o sa iyang pamilya. Bag-ohay lang, naghunahuna siya kon aduna bay dugang nga katuyoan ug kahulogan sa iyang kinabuhi kaysa unsay iyang nasinati karon.

Ipakita diha sa pisara ang tulo ka baroganan sa pag-angkon og espirituhanong kahibalo ug ang mosunod nga mga pangutana. Ikonsiderar ang pagbahin sa mga estudyante ngadto sa gagmay nga mga grupo aron hisgotan ang mga baroganan ug sa unsa nga paagi sila makarepresentar niini nga makita. Dapita ang mga estudyante sa paghimo og pamplet o poster nga makatabang sa usa ka tawo sa paggamit sa mga baroganan sa pag-angkon og espirituhanong kahibalo aron matubag ang ilang mga kabalaka. Mahimo nimong hatagan og papel ug mga gamit sa art. Alang sa usa ka pamphlet, mahimong pil-on sa mga estudyante ang papel ngadto sa ikatulo nga bahin ug ihulagway ang usa ka baroganan sa matag seksiyon. Dasiga ang mga estudyante nga mahimong mamugnaon sa paghulagway sa tulo ka baroganan.

Kon gikinahanglan, ang mosunod nga mga pangutana makatabang sa mga estudyante nga mas makasabot kon unsaon sa paggamit ang mga baroganan sa pag-angkon og espirituhanong kahibalo. Hinumdomi nga kini nga kalihokan gituyo aron mahatagan ang mga estudyante og mga oportunidad sa pagpraktis sa pagpakigbahin sa unsay ilang nakat-onan. Samtang ikaw isip magtutudlo makatabang sa pag-facilitate sa ilang mga diskusyon ug paghatag og tabang kon gikinahanglan, buhata ang imong labing maayo sa paghimo og usa ka kahimtang diin ang mga panaghisgot nga gipangulohan sa estudyante mahimong mahitabo.

Susihon ang mga konsepto ug mga pangutana inubanan ang mahangtorong panglantaw

• Sa unsang paagi nga ang paghupot og mahangtorong panglantaw makatabang niini nga sitwasyon?

Tinguhaa ang dugang nga pagsabot pinaagi sa balaanong gitudlo nga mga tinubdan

• Unsa nga mga tudling sa doktrinal nga kahanas, ubang mga kapanguhaan sa kasulatan, o mga pamahayag gikan sa mga lider sa Simbahan ang mahimong makatabang ni Andy ug sa iyang sitwasyon?

Ikonsiderar ang pag-awhag sa mga estudyante sa paggamit sa Librarya sa Ebanghelyo sa pagpangita og tulo o daghan pa nga mga tinubdan nga ilang irekomendar sa pagtuon ni Andy. Kon ang mga estudyante nagkinahanglan og tabang sa pagpangita og mga kapanguhaan sa kasulatan, mahimo kang mosugyot og mga bersikulo sama sa Genesis 12:1–3; Moises 1:6, 39; Moises 6:26–33; ug Abraham 3:22–23.

Molihok inubanan sa hugot nga pagtuo

• Unsa ang pipila ka piho nga mga butang nga mahimo ni Andy aron mobati og mas dakong kahulogan ug katuyoan sa iyang kinabuhi?

  Hatagi ang mga estudyante og oportunidad nga ipakigbahin ang ilang mga poster o mga pamphlet sa laing grupo.

  Sa pagtapos sa klase, mahimo nimong hatagan ang mga estudyante og oportunidad sa pagtubag sa mosunod nga mga pangutana isip diskusyon o sa pagrekord sa ilang mga hunahuna diha sa ilang mga journal sa pagtuon.

• Unsa nga mga panabot ang imong nakita nga makahuloganon samtang ikaw nagtuon karon?

• Sa unsang paagi nga ang mga baroganan sa pag-angkon og espirituhanong kahibalo makatabang nimo nga mas maduol sa Langitnong Amahan ug ni Jesukristo?

Dugang nga Kalihokan sa Pagkat-on

Ikapuli nga senaryo

Mahimong magpraktis ang mga estudyante sa paggamit sa mga baroganan sa pag-angkon og espirituhanong kahibalo pinaagi sa paghimo og ilang kaugalingong may kalabotan nga senaryo. Mahimo nimong ipaila ang usa ka sukaranan nga senaryo ug dapita ang mga estudyante sa pagdugang og mga detalye nga nagpakita sa mga sitwasyon nga ilang giatubang o sa uban nga ilang nailhan. Aron mahimo kini, mahimo nimong ipakita ang mosunod nga dili kompleto nga mga pahayag. Mahimong pun-an sa mga estudyante ang mga detalye sa senaryo isip usa ka klase o maghimo og tagsa-tagsa nga mga senaryo nga magkauban o sa gagmay nga mga grupo.

Si (ngalan) naglisod sa pagpakig-uban sa mga miyembro sa

tungod kay .

(Siya) nahibulong .

Dapita ang mga estudyante sa paggamit sa matag usa sa tulo ka mga baroganan sa pag-angkon og espirituhanong kahibalo aron sa pagtabang niini nga tawo. Samtang maghisgot ang mga estudyante sa balaanong gitudlo nga mga tinubdan, mahimo nimong dapiton sila sa paggamit sa Moses 7:18 isip pagsugod nga punto. Mahimong pangitaon dayon sa mga estudyante ang Librarya sa Ebanghelyo alang sa mga cross-reference ug mga pamahayag gikan sa mga lider sa Simbahan nga makatabang niini nga tawo. Mahimo nimong isugyot ang mga termino nga pangitaon sama sa kalinaw, tigpasiugda og kalinaw, panagbingkil, ug panaghiusa.