« លោកុប្បត្តិ ៦–៨ ៖ ‹ នោះណូអេ … តាមគ្រប់ទាំងសេចក្តីដែលព្រះយេហូវ៉ាបានបង្គាប់មក › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្តិ ៦–៨ ៖ ‹ នោះណូអេ … តាមគ្រប់ទាំងសេចក្តីដែលព្រះយេហូវ៉ាបានបង្គាប់មក › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ៦–១១; ម៉ូសេ ៨ ៖ មេរៀនទី ២០
លោកុប្បត្តិ ៦–៨
« នោះណូអេ … តាមគ្រប់ទាំងសេចក្តីដែលព្រះយេហូវ៉ាបានបង្គាប់មក »
ព្រះបានបង្គាប់យើងដោយក្តីស្រឡាញ់ឲ្យគោរពតាមបទបញ្ញត្តិរបស់ទ្រង់ ។ បទបញ្ញត្តិខ្លះអាចពិបាកយល់ ប៉ុន្តែវាសម្រាប់ជាអត្ថប្រយោជន៍របស់យើងជានិច្ច ។ គ្រួសាររបស់ណូអេត្រូវបានសង្គ្រោះឲ្យរួចផុតពីទឹកជំនន់ដែលមិនធ្លាប់មានពីមុន ដោយអព្ភូតហេតុ ដោយសារពួកគេគោរពប្រតិបត្តិតាមបទបញ្ញត្តិរបស់ព្រះឲ្យធ្វើទូកធំមួយ ។ មេរៀននេះអាចជួយសិស្សបង្កើនបំណងប្រាថ្នារបស់ពួកគេក្នុងការគោរពប្រតិបត្តិតាមបទបញ្ញត្តិរបស់ព្រះ ។
ការរៀបចំខ្លួនរបស់សិស្ស ៖ សូមអញ្ជើញសិស្សឲ្យពិចារណា ហើយមករៀនដោយត្រៀមខ្លួនចែកចាយពីរបៀបដែលបទបញ្ញត្តិជាក់លាក់មួយបង្ហាញពីសេចក្ដីស្រឡាញ់របស់ព្រះវរបិតាសួគ៌ចំពោះយើង និងបំណងប្រាថ្នារបស់ទ្រង់ដើម្បីការពារយើង ។
សកម្មភាពរៀនសូត្រដែលអាចមាន
បទបញ្ញត្តិទាំងឡាយរបស់ព្រះ
សូមពិចារណាចាប់ផ្ដើមមេរៀនដោយលើកទឹកចិត្តសិស្សឲ្យពិចារណាពីមូលហេតុដែលព្រះវរបិតាដ៏ពេញដោយក្តីស្រឡាញ់របស់យើងនៅស្ថានសួគ៌ ប្រទានឲ្យយើងនូវបទបញ្ញត្តិទាំងឡាយ ។ របៀបមួយដើម្បីធ្វើបែបនេះ គឺត្រូវបង្ហាញរូបភាពខាងក្រោមនេះ និងបង្កើតការពិភាក្សាដោយប្រើសំណួរដូចខាងក្រោមនេះ ។ របៀបមួយទៀត គឺត្រូវឲ្យសិស្សចែកចាយវិន័យដែលឪពុកម្ដាយរបស់ពួកគេបានដាក់ ដើម្បីរក្សាកូនៗរបស់ពួកគាត់ឲ្យមានសុវត្ថិភាព ។
សូមស្រមៃថា អ្នកកំពុងមើលថែកូនក្មេងតូចៗមួយក្រុមធំនៅទីលានបោះជំរំនេះ ។
-
តើអ្នកអាចដាក់វិន័យជាក់លាក់អ្វីខ្លះ ដល់ក្មេងៗដើម្បីរក្សាពួកគេឲ្យមានសុវត្ថិភាព ?
-
ប្រសិនបើក្មេងៗខឹងនឹងអ្នកចំពោះការដាក់វិន័យនេះ តើអ្នកនឹងពន្យល់អ្វីខ្លះដល់ពួកគេ ?
សូមអញ្ជើញសិស្សឲ្យចែកចាយជាមួយដៃគូអំពីរបៀបដែលពួកគេអាចប្រៀបធៀបស្ថានភាពនេះទៅនឹងបទបញ្ញត្តិរបស់ព្រះវរបិតាសួគ៌សម្រាប់យើង ។
បន្ទាប់មក សូមអញ្ជើញសិស្សឲ្យកត់ត្រាអារម្មណ៍ផ្ទាល់ខ្លួនរបស់ពួកគេអំពីព្រះ និងបទបញ្ញត្តិរបស់ទ្រង់នៅក្នុងសៀវភៅកំណត់ហេតុការសិក្សារបស់ពួកគេដោយប្រើការបំផុសគំនិតដូចខាងក្រោមនេះ ។ អ្នកអាចអញ្ជើញសិស្សស្ម័គ្រចិត្តពីរបីនាក់ឲ្យចែកចាយអ្វីដែលពួកគេបានសរសេរ ។
-
តើអ្នកគិតថា ហេតុអ្វីព្រះចង់ឲ្យអ្នកផ្ទាល់ គោរពតាមបទបញ្ញត្តិរបស់ទ្រង់ ?
-
តើអ្នកស្ម័គ្រចិត្តគោរពតាមអ្វីដែលព្រះបានបង្គាប់ ទោះបីជាអ្នកមិនយល់ពីមូលហេតុនៃបទបញ្ញត្តិនោះដោយរបៀបណា ? ហេតុអ្វី ?
ប្រជាជននៅសម័យណូអេ
សូមពិចារណាបង្ហាញរូបភាពរបស់ណូអេ ដែលមាននៅខាងដើមមេរៀននេះ ។ សូមឲ្យសិស្សចែកចាយអ្វីដែលពួកគេបានដឹងរួចហើយអំពីគំនិតដូចខាងក្រោមនេះ ។ សូមអញ្ជើញពួកគេឲ្យប្រើវគ្គបទគម្ពីរដែលត្រូវបានណែនាំឲ្យប្រើ ប្រសិនបើចាំបាច់ ។
-
ស្ថានភាពខាងវិញ្ញាណរបស់ប្រជាជននៅសម័យណូអេ និងជាលទ្ធផលនូវអ្វីដែលព្រះបានធ្វើ ( សូមមើល ម៉ូសេ ៨:១៧, ២០, ២២, ២៨–២៩ )
-
អ្វីដែលព្រះបានបញ្ជាឲ្យណូអេធ្វើដើម្បីសង្គ្រោះអ្នកដែលគោរពប្រតិបត្តិ ( សូមមើល ម៉ូសេ ៧:៤៣ )
ពេលសិស្សបន្តសិក្សា សូមលើកទឹកចិត្តពួកគេឲ្យស្វែងរកឥទ្ធិពលនៃព្រះវិញ្ញាណបរិសុទ្ធដើម្បីយល់ពីសេចក្ដីស្រឡាញ់របស់ព្រះចំពោះយើង ។ អ្វីៗគ្រប់យ៉ាងដែលព្រះធ្វើ រួមទាំងទឹកជំនន់ គឺត្រូវបានជំរុញចិត្តដោយក្តីស្រឡាញ់ ( សូមមើល នីហ្វៃទី២ ២៦:២៤ ) ។ សូមជួយសិស្សឲ្យដឹងថា ព្រះយេស៊ូវគ្រីស្ទបានទទួលរងទុក្ខសម្រាប់អំពើបាបរបស់មនុស្សដែលបានស្លាប់នៅក្នុងទឹកជំនន់ដើម្បីឲ្យពួកគេអាចរៀន និងប្រែចិត្តក្នុងពិភពវិញ្ញាណ ( សូមមើល ម៉ូសេ ៧:៣៨–៤០; ពេត្រុស ទី១ ៣:១៨–២០ ) ។ ផងដែរ ជម្រើសរបស់ព្រះដែលបានបញ្ជូនទឹកជំនន់បានការពារកូនវិញ្ញាណដទៃទៀតរបស់ទ្រង់មិនឲ្យកើតក្នុងកាលៈទេសៈដ៏គ្រោះថ្នាក់ និងទុច្ចរិតបែបនេះឡើយ ( សូមមើល យ៉ូហាន ថេលើរ នៅក្នុង Journal of Discourses ១៩:១៥៨–១៥៩ ) ។
ទូកធំ
សូមពិចារណាចែកក្រដាសដល់សិស្សជាក្រុមតូចៗ ហើយទុកពេលខ្លីឲ្យពួកគេធ្វើសកម្មភាពដូចខាងក្រោមនេះរួមគ្នា ។ ( សូមប្រុងប្រយ័ត្ន ដើម្បីសន្សំពេលវេលាបន្ទាប់ពីសកម្មភាពនេះ ដើម្បីឲ្យសិស្សពិភាក្សាអំពីអ្វីដែលពួកគេរៀន និងភ្ជាប់វាទៅជីវិតរបស់ពួកគេ ) ។
-
សូមអាន លោកុប្បត្ដិ ៦:១៤–២២; ៧:១–១២,២៣; ៨:១៣–១៧ ដោយរកមើលអ្វីដែលដំណើររឿងនេះបង្រៀនអំពីព្រះ និងអ្វីដែលយើងអាចរៀនមកពីណូអេ ។
-
សូមគូរគំនូរដ៏សាមញ្ញមួយអំពីអ្វីដែលបានកើតឡើង ។
-
ដាក់បញ្ចូលជាមួយនឹងគំនូររបស់អ្នកនូវរឿងមួយដែលអ្នកបានរៀនអំពីព្រះ និងរឿងមួយដែលអ្នកបានរៀនពីគំរូរបស់ណូអេ ។
សូមអញ្ជើញក្រុមឲ្យបង្ហាញ និងពន្យល់ពីគំនូររបស់ពួកគេ( ទោះបីជាវាមិនពេញលេញក៏ដោយ ) ទៅកាន់ក្រុមមួយផ្សេងទៀត ។ បន្ទាប់មក សូមអញ្ជើញក្រុមនានាឲ្យចែកចាយជាមួយនឹងសិស្សក្នុងថ្នាក់នូវអ្វីដែលពួកគេបានរៀនអំពីព្រះ និងអ្វីដែលពួកគេបានរៀនពីគំរូរបស់ ណូអេ ។
សេចក្ដីពិតមួយដែលសិស្សអាចស្គាល់នៅក្នុងដំណើររឿងនេះគឺ នៅពេលយើងគោរពតាមព្រះអម្ចាស់ដោយសេចក្ដីជំនឿ ទ្រង់នឹងប្រទានពរ និងការពារយើង ។
សូមពិចារណាដាក់បង្ហាញសេចក្ដីថ្លែងការណ៍ខាងក្រោម និងអញ្ជើញក្រុមនានាឲ្យអាន ហើយពិភាក្សាអំពីរបៀបដែលវាអនុវត្តចំពោះយើងនៅសព្វថ្ងៃនេះ ។
ប្រធាន ស្ពែនស៊ើរ ដបុលយូ ឃឹមបឹល ( ឆ្នាំ ១៨៩៥–១៩៨៥ ) បានចែកចាយនូវហេតុផលមួយចំនួនដែលណូអេ និងគ្រួសារគាត់ត្រូវការសេចក្ដីជំនឿលើព្រះគ្រីស្ទដើម្បីបំពេញព្រះបញ្ញត្តិក្នុងការសង់ទូកធំ ។
មកទល់ពេលនេះ មិនទាន់មានភស្តុតាងបញ្ជាក់ពីភ្លៀងធ្លាក់ និងទឹកជំនន់នោះទេ ។ ប្រជាជនរបស់ [ ណូអេ ] បានចំអក ហើយហៅគាត់ថា ជាមនុស្សល្ងង់ខ្លៅ ។ គ្មាននរណាស្ដាប់ការផ្សាយដំណឹងល្អរបស់លោកទេ ។ ការព្រមានរបស់លោកត្រូវបានគេចាត់ទុកថាជារឿងមិនសមហេតុផល ។ គ្មានព្រឹត្តិការណ៍ណាមួយពីមុនមកបានបង្ហាញថា ធ្លាប់មានទឹកជន់លិចដ៏ខ្លាំងមួយ [ ឬទឹកជំនន់ ]អាចពន្លិចផែនដីបាននោះទេ ។ ឱនោះជារឿងឆ្កួតលីលាដែលសាងសង់ទូកធំនៅលើដីស្ងួតដែលព្រះអាទិត្យកំពុងជះរស្មី រីឯជីវិតនានាកំពុងរីកលូតលាស់ជាធម្មតានោះ ! ( Teachings of Presidents of the Church: Spencer W. Kimball [ ឆ្នាំ ២០០៦ ] ទំព័រ ១៤០–១៤១ )
-
តើព្រះបញ្ញត្តិរបស់ព្រះអម្ចាស់មួយចំនួនដែលមនុស្សមិនអើពើ ឬសើចចំអកនៅសព្វថ្ងៃនេះមានអ្វីខ្លះ ?
-
តើអ្នកដឹងអ្វីខ្លះអំពីព្រះ និងព្យាការីរបស់ទ្រង់ដែលអាចជួយយើងឲ្យគោរពតាមព្រះអម្ចាស់ទោះជាមានការប្រឆាំងក៏ដោយ ?
សូមអញ្ជើញសិស្សឲ្យចែកចាយបទបញ្ញត្តិដែលពួកគេជឿថា ជាការការពារពេញដោយក្តីស្រឡាញ់មកពីព្រះ ។
ការគោរពប្រតិបត្តិចំពោះព្រះក្នុងជីវិតរបស់យើង
សូមពិចារណាដាក់បង្ហាញសេចក្ដីថ្លែងការណ៍ខាងក្រោមនេះ រួមជាមួយនឹងការជញ្ជឹងគិតផ្ទាល់ខ្លួនដូចខាងក្រោម ។
ប្រធាន ថូម៉ាស អេស ម៉នសុន ( ឆ្នាំ ១៩២៧–២០១៨ ) បានចែកចាយមេរៀនដ៏អស្ចារ្យបំផុតមួយដែលយើងអាចរៀនក្នុងជីវិតរបស់យើង ។
ណូអេមានសេចក្ដីជំនឿដ៏មុតមាំដើម្បីធ្វើតាមបទបញ្ញត្តិរបស់ព្រះ ។ សូមឲ្យយើងធ្វើដូចគ្នានេះដែរ ។ សូមឲ្យយើងចងចាំថា ព្រះប្រាជ្ញារបស់ព្រះជាញឹកញាប់លេចឡើងហាក់ដូចជាភាពឆ្កួតលីលាដល់មនុស្ស ប៉ុន្តែមេរៀនដ៏អស្ចារ្យបំផុតដែលយើងអាចរៀននៅក្នុងជីវិតរមែងស្លាប់គឺថា នៅពេលព្រះមានព្រះបន្ទូល ហើយយើងគោរពប្រតិបត្តិតាម យើងនឹងធ្វើអ្វីដែលត្រូវជានិច្ច ។ ( « Models to Follow » Liahona ខែ វិច្ឆិកា ឆ្នាំ ២០០២ ទំព័រ ៦១ )
សូមកត់ត្រានៅក្នុងសៀវភៅកំណត់ហេតុការសិក្សារបស់អ្នកនូវ ៖
-
អារម្មណ៍របស់អ្នកចំពោះសេចក្តីថ្លែងការណ៍របស់ប្រធាន ម៉នសុនទាក់ទងទៅនឹងស្ថានភាព ឬបទបញ្ញត្តិក្នុងជីវិតរបស់អ្នក ។
-
អ្វីដែលអ្នកបានរៀន ឬទទួលអារម្មណ៍នៅថ្ងៃនេះអំពីព្រះវរបិតាសួគ៌ និងព្រះបញ្ញត្តិរបស់ទ្រង់ ។
-
អ្វីដែលអ្នកជឿថា ព្រះវរបិតាសួគ៌ចង់ឲ្យអ្នកធ្វើតាមគំរូរបស់ណូអេ អំពីការគោរពប្រតិបត្តិដ៏ស្មោះត្រង់ ។
អ្នកអាចបញ្ចប់មេរៀននេះ ដោយអញ្ជើញសិស្សឲ្យគូសចំណាំគំរូរបស់ណូអេ នៅក្នុង លោកុប្បត្តិ ៧:៥ ហើយធ្វើសេចក្ដីយោងបទគម្ពីរជាមួយនឹងគំរូពីព្រះជន្មមុនផែនដីរបស់ព្រះអង្គសង្គ្រោះនៅក្នុង ម៉ូសេ ៤:២ ។ សូមពិចារណាថ្លែងទីបន្ទាល់ថា ព្រះនឹងប្រទានពរដល់សិស្សរបស់អ្នកចំពោះការខិតខំដ៏ស្មោះត្រង់របស់ពួកគេដើម្បីធ្វើតាមគំរូនៃការគោរពប្រតិបត្តិរបស់ព្រះអង្គសង្គ្រោះ ។