Genesis 6–11; Moises 8: Lesson 19

Moises 8

Pagsunod sa Tagapagligtas Kahit nasa Isang Masamang Mundo

Tinawag ng Panginoon si Noe na maging propeta sa panahong inilalarawan ang mga tao na “nagpatuloy lamang sa kasamaan” (Moises 8:22). Maging sa gitna ng labis na kasamaan, pinili ni Noe at ng kanyang mga anak na lalaki na sundin si Jesucristo. Ang lesson na ito ay makatutulong sa mga estudyante na mas masunod ang Tagapagligtas kahit namumuhay sa isang masamang mundo.

Paghahanda ng estudyante: Anyayahan ang mga estudyante na isipin ang mga hamon o paghihirap na nararanasan nila sa pagsunod kay Jesucristo sa mundo ngayon. Sabihin sa kanila na pumasok sa klase na handang magbahagi kung ano ang nakatulong sa kanila na madaig ang mundo at sundin si Jesucristo.

Mga Posibleng Aktibidad sa Pag-aaral

Pamumuhay sa mundo ngunit hindi makamundo

Simulan ang klase sa pamamagitan ng pagpapakita sa mga estudyante ng isang timba ng tubig at isang maliit na tuyong bagay.

• Posible bang manatiling tuyo ang isang bagay kung ilalagay ito sa isang timba ng tubig? Paano?

  Matapos magkaroon ng pagkakataon ang mga estudyante na sabihin ang mga naisip nila, ilagay ang bagay sa isang supot o isang lalagyang may takip, at ilagay ito sa timba ng tubig.

• Paano nauugnay ang object lesson na ito sa ating mga pagsisikap na manatiling matwid kahit nasa isang masamang mundo tayo?

Upang matulungan ang mga estudyante na masuri ang kanilang kasalukuyang kakayahang mamuhay nang matwid sa isang masamang mundo, maaari mong ipakita ang mga sumusunod na pahayag. Sabihin sa mga estudyante na pag-isipan kung gaano katotoo ang bawat pahayag para sa kanila.

Mahirap para sa akin na labanan ang mga panunukso ng mundo at sumunod kay Jesucristo.

Alam ko kung saan ako makahihingi ng tulong para manatiling tapat kahit nasa isang masamang mundo ako.

Gumugugol ako ng oras araw-araw sa paghahangad na mas makilala pa si Jesucristo at sumunod sa Kanya.

Ipaalala sa mga estudyante na ipapakita sa atin ng Espiritu Santo kung ano ang dapat nating gawin (tingnan sa 2 Nephi 32:5). Anyayahan ang mga estudyante na maghangad ng inspirasyon para malaman kung ano ang magagawa nila upang manatiling matwid sa isang mundong lalong nagiging masama.

Isang masamang mundo

Nang dalhin ng Panginoon si Enoc at ang kanyang lungsod sa langit (tingnan sa Moises 7:69), nanatili sa lupa ang matwid na anak na lalaki ni Enoc na si Matusalem (tingnan sa Moises 8:2). Ang apo ni Matusalem na si Noe, at ang tatlong anak na lalaki ni Noe ay “lumakad na kasama ng Diyos” (Moises 8:27), samantalang pinili ng karamihan sa mga tao na nanatili sa mundo ang kasamaan.

Ipakita sa pisara ang sumusunod na mga tagubilin at chart. Anyayahan ang mga estudyante na kopyahin ang chart sa kanilang study journal. Maaaring kumpletuhin ng mga estudyante ang chart sa maliliit na grupo.

Basahin ang Moises 8:12–22, 28–29, at alamin ang espirituwal na kalagayan ng mga tao noong panahon ni Noe.

Pagkatapos ay tukuyin ang mga pagkakatulad ng espirituwal na kalagayan sa panahon ni Noe at ng kalagayang nakikita natin sa ating kasalukuyang panahon.

Espirituwal na Kalagayan ng Marami sa Panahon ni Noe	Mga Pagkakatulad ng Panahon ni Noe at ng Ating Kasalukuyang Panahon

Anyayahan ang mga grupo na ibahagi sa iba pang grupo ang nalaman nila. Hikayatin ang mga estudyante na idagdag ang ibinabahagi ng kanilang mga kaklase sa sarili nilang chart.

Kung kailangan ng tulong ng mga estudyante, maaari mong banggitin ang mga pagkakatulad na gaya ng sumusunod:

1. Tulad ng mga apong babae ni Noe, binabalewala ng ilang tao ngayon ang mga pagpapala na ibinibigay sa kanila ng Diyos sa pamamagitan ng walang hanggang tipan ng kasal (tingnan sa talata 12–15).

2. Kinakalaban din ng ibang tao ngayon ang propeta at hindi nila tinatanggap ang kanyang payo (tingnan sa talata 18–20).

Basahing muli ang Moises 8:16–17 upang makita kung ano ang sinabi ng Panginoon kay Noe na maaaring mangyari kung hindi magsisisi ang mga tao.

• Gaano kahabang panahon ang ibinigay ng Panginoon sa mga tao upang magsisi?

• Ano ang maituturo niyon sa atin tungkol sa katangian ng Diyos?

Pagsunod sa Tagapagligtas kahit nasa isang masamang mundo

Upang matulungan ang mga estudyante na makadama ng pag-asa na masusunod nila ang Tagapagligtas kahit sila ay nasa isang masamang mundo, maaari mong anyayahan ang isang estudyante na basahin ang sumusunod na pahayag.

Ibinahagi ni Pangulong Russell M. Nelson kung paano posibleng madaig ang masamang mundong ito:

Dahil nadaig ni Jesucristo ang makasalanang mundong ito, at dahil nagbayad-sala Siya para sa bawat isa sa atin, madaraig din ninyo ang mundong ito na puno ng kasalanan, makasarili, at kadalasa’y nakakapagod. (“Daigin ang Mundo at Makasumpong ng Kapahingahan,” Liahona, Nob. 2022, 96)

• Ano ang gagamitin ninyo mula sa pahayag ni Pangulong Nelson upang matulungan ang isang tao na nahihirapan dahil sa kasamaan sa paligid niya?

Maaari mong isulat sa pisara ang sumusunod na hindi kumpletong pahayag ng katotohanan. Sabihin sa mga estudyante na simulang isipin ang iba’t ibang paraan kung paano nila ito kukumpletuhin.

Maaari kong piliing sundin ang Tagapagligtas kahit nasa isang masamang mundo ako sa pamamagitan ng …

Upang matulungan ang mga estudyante na matuklasan ang mga paraan na masusunod nila ang Tagapagligtas kahit nasa isang masamang mundo, bigyan sila ng mga tagubilin sa ibaba at mga kopya ng kasamang handout. Maaaring maggrupo-grupo ang mga estudyante. Maaari nilang sama-samang pag-aralan ang resources, o maaaring pumili ang mga miyembro ng grupo ng iba’t ibang scripture passage at mga pahayag na pag-aaralan nang magkakahiwalay at pagkatapos ay magsasama-sama sila upang talakayin ang mga iyon.

Gamit ang mga pinili mula sa sumusunod na resources, gumawa ng listahan sa iyong study journal ng mga bagay na magagawa natin para masunod si Jesucristo sa kabila ng kasamaan at mga tukso sa paligid natin.

Matapos magkaroon ang mga grupo ng sapat na oras para mag-aral at gumawa ng mga listahan, maaari mong ipasulat sa pisara sa bawat grupo ang isang bagay na nahanap nila na kukumpleto sa pahayag ng katotohanan. Halimbawa, mula sa Moises 8:13, 23–24, maaaring nahanap ng mga estudyante ang pakikinig sa Panginoon at sa Kanyang mga propeta, paniniwala kay Jesucristo, pagsisisi, at pakikipagtipan sa Diyos.

Maaaring ibahagi ng ilang estudyante kung bakit mahalaga sa kanila ang mga bagay na isinulat nila.

Maaari mong ipanood ang video na “Sharing Your Light” (2:56), na makikita sa ChurchofJesusChrist.org. Sa video na ito, sinunod ng isang dalagita ang Tagapagligtas sa kabila ng mga pinipili ng ibang tao sa kanyang paligid.

Ang pagtigil sandali at pagninilay tungkol sa magkakaibang pinagmulan o background ng mga estudyante ay makapag-aanyaya ng paghiwatig, pagmamahal, at pagdamay na tulad ng kay Cristo sa iyong mga pakikipag-ugnayan sa kanila. Halimbawa, batay sa kanilang mga karanasan sa buhay, maaaring iba ang isagot ng ilang estudyante sa mga sumusunod na tanong kumpara sa isasagot mo. Sikaping unawain ang kanilang pananaw, tumugon nang may pagmamahal at pagdamay, at purihin ang kanilang mga pagsisikap na sundin ang Tagapagligtas. (Para sa karagdagang training tungkol sa pagdaragdag ng iyong pag-unawa sa mga kani-kanyang kalagayan ng mga estudyante, tingnan ang “Sikaping makilala sila—unawain ang kanilang mga kalagayan, pangangailangan, at kalakasan” sa Mga Kasanayan para sa Pag-unlad ng Guro.)

Isipin ang nagawa ninyo na makatutulong upang madaig ninyo ang kasamaan sa inyong paligid. Ang mga gawaing ito ay maaaring ang maliliit at simpleng bagay na karaniwan ninyong ginagawa, mga mithiing sinikap ninyong makamit sa programang Mga Bata at Kabataan, o iba pang mga karanasan.

• Ano ang nagawa ninyo na nakatulong sa inyo na mas masunod ang Tagapagligtas at madaig ang kasamaan sa paligid ninyo?

• Mayroon bang anumang balakid na naranasan ninyo sa inyong mga pagsisikap? Kung mayroon, ano ang ginawa o magagawa ninyo upang madaig ang mga balakid na iyon? Ano ang maipapayo ninyo sa iba?

Ang aking plano na sundin si Jesucristo

Tulungan ang mga estudyante na mag-isip ng mga paraan kung paano nila masusunod si Jesucristo. Magagawa mo ito sa pamamagitan ng pag-anyaya sa kanila na sagutin ang mga sumusunod na tanong. Maaari mong hikayatin ang mga estudyante na isulat ang kanilang mga sagot sa lugar na makikita nila ang mga ito nang madalas o ibahagi ang kanilang plano sa mga mapagkakatiwalaang kaibigan, kapamilya, o lider ng Simbahan. Ang mga mungkahing ito ay makapagpapaalala sa mga estudyante ng natutuhan at nais nilang gawin.

1. Ano ang nahikayat kang gawin ngayon?

2. Paano madaragdagan ng pagsunod sa mga impresyong ito ang kakayahan mong sundin ang Tagapagligtas at madaig ang mundo?

Maaari mong tapusin ang lesson gamit ang mga patotoo ng mga estudyante tungkol sa natutuhan at nadama nila ngayon at kung paano makatutulong sa kanila ang pagsunod sa Tagapagligtas upang madaig ang mundo. Maaari ka ring magbahagi ng iyong patotoo.

Karagdagang Resources

Moises 8:18. Ano kaya ang ibig sabihin ng “mga higante sa mundo”?

Ang pangalang Hebreo para sa “mga higante” sa Genesis 6:4 at Moises 8:18 ay Nephilim, na nagmula sa pandiwang naphal, na nangangahulugang “mahuhulog.” Samakatwid, maaaring ang mga ito ay ang mga tao na nag-apostasiya o tumalikod sa tunay na relihiyon.

Moises 8:25. Ano ang ibig sabihin ng “ito ay pinanghinayangan ni Noe, at ang kanyang puso ay nasaktan”?

Ang talatang ito ay isang mahalaga at inspiradong pagwawasto sa Genesis 6:6, na ganito ang isinasaad, “Nalungkot ang Panginoon na kanyang nilalang ang tao sa lupa at nalumbay ang kanyang puso.” Ang salitang Hebreo na ginamit dito, at ang isinalin na nagsisi sa Biblia, ay nacham (naw-kham), na ang ibig sabihin ay “bumuntong-hininga,” “malungkot,” o “maawa.”

Paanong ang pagpapabatid sa iba ng tungkol sa mga pinaniniwalaan ko ay makatutulong sa akin na mamuhay nang matwid sa isang masamang mundo?

Ibinahagi ni Elder Peter F. Meurs ng Pitumpu:

Sa aking karanasan, ang susi para mabuhay sa masamang mundo ay hayaang malaman ng ating mga kaibigan at kasamahan sa trabaho ang ating pinaniniwalaan. Maraming beses na akong naprotektahan at ipinagtanggol ng mga kaibigan na nakakaalam na ako ay isang Banal sa mga Huling Araw at alam kung ano ang pinaninindigan ko. (“Living Righteously in a Wicked World,” Ensign, Peb. 2018, 51)

Paano nakikita ng Diyos ang aking taos-pusong pagsisisi?

Ipinaliwanag ni Elder Dale G. Renlund ng Korum ng Labindalawang Apostol:

Kapag natuklasan natin na wala na tayo sa landas, maaaring piliin natin na magpakalayo na talaga rito, o dahil sa Pagbabayad-sala ni Jesucristo, maaari nating piliing bumalik at magpatuloy sa landas ng tipan. …

Gaano man katagal na wala tayo sa landas ng tipan o gaano man tayo nalihis, sa sandaling magpasiya tayong magbago, tutulungan tayo ng Diyos na makabalik. Sa pananaw ng Diyos, sa pamamagitan ng taos-pusong pagsisisi at pagpapatuloy sa paglakad nang may katatagan kay Cristo, kapag nakabalik tayo sa landas, ito ay magiging tila hindi tayo umalis rito. Ang Tagapagligtas ay nagbabayad para sa ating mga kasalanan at pinalalaya tayo sa napipintong paglalaho ng kaligayahan at mga pagpapala. (“Piliin Ninyo sa Araw na Ito,” Liahona, Nob. 2018, 106)

Mga Karagdagang Aktibidad sa Pag-aaral

Pagsunod sa Tagapagligtas

Maaaring basahin ng mga estudyante ang ilan sa mga bahagi ng Para sa Lakas ng mga Kabataan: Isang Gabay sa Paggawa ng mga Pagpili upang makatukoy ng mga alintuntunin na maaaring gumabay sa kanila na piliin si Jesucristo. Maaari mo itong gamitin bilang karagdagang ideya sa pag-aaral kasama ng handout sa lesson.

Tinutupad ng Panginoon ang Kanyang mga tipan

Upang matulungan ang mga estudyante na makakita ng halimbawa ng kung paano tinutupad ng Panginoon ang Kanyang mga tipan sa Kanyang mga anak, maaaring basahin ng mga estudyante ang Moises 7:50–52, at alamin ang ipinangako ng Panginoon (tingnan sa talata 52). Kung kinakailangan, ipaliwanag na dinala ng Panginoon ang lungsod ni Enoc sa langit dahil sa kabutihan ng mga tao (tingnan sa Moises 7:69). Pagkatapos ay maaari mong basahin ang Moises 8:1–2 upang malaman kung paano tinupad ng Panginoon ang Kanyang pangako. (Hindi dinala ng Panginoon sa langit ang isang mabuting tao na nagngangalang Matusalem upang maisilang si Noe bilang bahagi ng mga inapo ni Enoc.)

Maaari mong anyayahan ang mga estudyante na ibahagi kung paano nila nakita na tinupad ng Panginoon ang Kanyang mga pangako sa kanilang buhay. Maaari mo ring sabihin sa mga estudyante na basahin ang Doktrina at mga Tipan 1:38 at iugnay ito sa Moises 8:1–2.

Pagpipiliang video

Maaari mong ipanood ang video na “Dare to Stand Alone” (4:20) upang matulungan ang mga estudyante na makita ang mga halimbawa ng mga tao na sumusunod kay Jesucristo sa mundo ngayon.