Dihang gitawag si Enoch aron isangyaw ang paghinulsol ngadto sa daotang grupo sa mga tawo, gibati niya nga dili angayan. Gitabangan ug gipalig-on siya sa Ginoo aron molampos sa usa ka butang nga para niya dili niya mabuhat. Kini nga leksiyon makatabang sa mga estudyante nga mobati og pagsalig sa Ginoo ug sa Iyang gahom sa pagtabang ug pagpalig-on kanila.
Pagpangandam sa estudyante: Dapita ang mga estudyante sa paghunahuna sa mga panahon sa dihang ang mga tawo nakasinati sa gahom sa Ginoo samtang gitabangan Niya sila sa pagbuntog sa mga kalisdanan. Dasiga silang mangitag mga ehemplo sa kasulatan.
Mga Posibleng Kalihokan sa Pagkat-on
Mga pagbati nga dili angayan
Ikonsiderar ang pagpakita sa mga pamahayag nga sama sa mosunod diha sa pisara: Dili nako kaya. Dili ko ingon ana ka maayo. Lisod kaayo kini.
Unsang mga kahimtang nga makasinati tingali og ingon niini nga mga pagbati ang mga tinedyer?
Pwede kang maghimo og listahan sa mga sitwasyon diha sa pisara nga gipakigbahin sa mga estudyante.
Paghunahuna og usa ka sitwasyon sa imong kaugalingong kinabuhi nga tingali mobati ka nga dili angayan o naglisod. Paggahin og panahon ug pamalandongi kini nga pangutana:
Unsa ka kamasaligon nga tabangan ka sa Ginoo niini nga sitwasyon?
Dasiga ang mga estudyante nga hunahunaon mahitungod sa kaugalingon nilang mga sitwasyon samtang ilang tun-an ang pagtawag kang Enoch aron mahimong propeta. Dapita silang tinguhaon ang giya sa Espiritu Santo aron madugangan ang ilang pagsalig sa katakos sa Ginoo nga motabang ug mopalig-on nila.
Nasinati ni Enoch ang gahom sa Ginoo
Pipila ka henerasyon human ni Adan, usa sa iyang mga kaliwat, si Enoch, ang nagpuyo taliwala sa gahi og kasingkasing ug daotang mga tawo. Basaha ang Moises 6:26–28, nga mangita kon unsay gipahimo sa Ginoo kang Enoch.
Kon ikaw si Enoch unsa kaha ang imong bation? Ngano man?
Aron tabangan ang mga estudyante nga tun-an ang kasinatian ni Enoch uban sa Ginoo, ikonsiderar ang paggamit sa handout nga nag-ulohan og “Nasinati ni Enoch ang Gahom sa Ginoo.” Pwedeng tun-an sa mga estudyante ang handout uban sa ilang pares. Aron dili magparehas, pwede silang magbaylo og mga pares human sa kada kalihokan. Pwede usab nimong gamiton ang mga ideya diha sa handout aron tabangan ang mga estudyante nga tun-an ang kasinatian ni Enoch isip usa ka klase.
Ang ubang estudyante maglisod unsaon pagsugod sa panag-istorya nga nakatutok sa ebanghelyo. Apil sa handout ang pipila ka pangutana nga pwedeng hisgotan. Makatabang ang paghatag og mga pangutana nga pwedeng hisgotan nga sama ini aron makapraktis ang mga estduyante sa pagpakigbahin sa ilang mga hunahuna ug gibati bahin sa ilang gitun-an diha sa mga kasulatan o mga pulong sa mga propeta. (Para sa dugang pagbansay para sa mga panaghisgot, tan-awa sa “Awhaga ang mga tigkat-on nga ipakigbahin ang mga kamatuoran nga ilang nakat-onan” diha sa Pagpalambo sa mga Kahanas sa Magtutudlo.)
Hatagig panahon ang mga estudyante sa pagpakigbahin sa unsay ilang nakat-onan gikan sa ilang pagtuon ug panaghisgot, apil ang mga kamatuoran nga ilang nailhan sa Kalihokan sa Pagtuon 4. Gamit ang ilang kaugalingong mga pulong, nailhan na tingali sa mga estudyante ang usa ka kamatuoran nga sama sa mosunod: Kon matinuoron natong himoon ang gisugo sa Ginoo, hatagan kita Niya og tabang ug kusog.
Ang tabang ug kusog sa Ginoo diha sa imong kinabuhi
Aron tabangan ang mga estudyante nga masabtan ang baroganan sa ibabaw, pwede nimong ipakita ang pipila ka ehemplo sa kasulatan o sa modernong mga ehemplo. Dapita ang mga estudyante nga basahon (o tan-awon) ang ehemplo ug mangandam sa pagpakigbahin kon giunsa pagtabang ug pagpalig-on sa Ginoo ang mga tawo diha sa ehemplo. Ang mga ehemplo mahimong maglakip ni Nephi ug sa iyang pamilya diha sa kamingawan (tan-awa ang 1 Nephi 5:7–8; 7:16–18; 17:1–3; 18:1–4), si Alma ug ang iyang katawhan nga giulipon (tan-awa sa Mosiah 24:10–22), o ang Propeta Joseph Smith diha sa Liberty Jail (tan-awa sa Doktrina ug mga Pakigsaad 121:1–10; 122:7–9). Pwede usab nimong ikonsiderar ang pagpakita sa ehemplo nga gipakigbahin ni Presidente Russell M. Nelson gikan sa iyang kinabuhi sa “Pagkahimo nga Tinuod nga mga Milenyal” (time code 9:05 hangtod 12:29). Kini nga bidyo anaa sa ChurchofJesusChrist.org.
30:35
Sa unsang paagi nakita o nasinati nimo ang gahom sa Ginoo nga mohatag og tabang ug kusog diha sa imong kinabuhi?
Ikonsiderar ang pagpakigbahin sa imong personal nga mga kasinatian sa gahom sa Ginoo.
Pamalandongi ang imong nakat-onan
Hatagig panahon ang mga estudyante sa pagpamalandong sa unsay ilang nakat-onan ug gibati karon gikan sa mga kasulatan, sa usag usa, ug sa Espiritu. Ang usa ka paagi nga mabuhat nimo kini mao ang pagpakita sa mosunod nga pangutana ug paghatag sa mga estudyante og panahon aron irekord ang ilang mga tubag diha sa ilang mga journal sa pagtuon.
Unsay akong nakat-onan og gibati karon bahin sa Ginoo nga makatabang nako dihang mobati kong dili angayan, nawad-an sa kadasig, o kulang ang kusog?
Ikonsiderar ang pagdapit sa pipila ka andam nga mga estudyante nga ipakigbahin kon unsay ilang gisulat diha sa klase. Pagpamatuod sa Manluluwas ug sa Iyang gahom sa paghatag natog kusog ug tabang.