Human ang mga lider nga Judeo midakop ug misukit-sukit ni Jesus, sila midala Kaniya ngadto ni Pilato aron taralon ug pagahukman. Si Pilato misugot sa Pagkalansang ni Jesus sa Krus bisan kon nakombinser siya sa Iyang pagka-inosente. Samtang diha sa krus, si Jesus misugo ni Apostol Juan sa pag-atiman sa Iyang inahan, si Maria. Human namatay si Jesus, ang Iyang lawas gipahimutang sa usa ka lubnganan.
Si Jesus gidakop ug gisukit-sukit sa mga lider nga Judeo, kinsa midala dayon Kaniya ngadto ni Pilato
Kanus-a man nga labing lisud alang kanimo nga magpakabana sa kaayohan sa uban?
Sa imong scripture study journal, pagdrowing og linya sa tunga sa usa ka pahina aron makahimo og duha ka kolum. Ngalani ang usa ka kolum og Mga kabalaka ni Jesukristo ug ang lain nga kolum Mga kabalaka ni Pilato. Atol sa pagdakop, pagtaral, ug Pagkalansang sa Manluluwas sa Krus, si Jesus ug ang Romano nga gobernador nga si Pilato mipili nga hatagan og bili, o prayoridad, ang managlahing mga butang. Samtang magtuon ka sa Juan 18–19, pangita og mga kamatuoran nga imong makat-unan gikan sa mga ehemplo ni Jesus ug ni Pilato nga makatabang kanimo nga masayud unsa nga mga kabalaka ang hatagan og prayoridad sa imong kinabuhi. Isulat ang mga kamatuoran nga imong madiskubrehan niining tibuok nga leksyon sa angay nga kolum sa imong scripture study journal.
Atong mabasa sa Juan 18:1–3 nga human si Jesus nag-antus sa Tanaman sa Getsemani, si Judas Iscariote miabut uban sa grupo sa mga opisyal kinsa mianha aron sa pagdakop ni Jesus. Kon nasayud ka nga usa ka pundok sa armado nga mga opisyales nagsingabut aron sa pagdakop kanimo ug sa katapusan mopatay kanimo, unsa kaha ang imong reaksyon?
Basaha ang Juan 18:4–11 ug Lucas 22:50–51, nga mangita kon unsay reaksyon ni Jesus pag-abut niini nga grupo.
Ang mga pulong kining mga tawhana diha sa Juan 18:8 ug sa mga diha sa Juan 18:9 nagpasabut sa mga Apostoles kinsa uban ni Jesus. Sumala niini nga mga bersikulo, unsa man ang gikabalak-an ni Jesukristo?
Human makabasa sa Juan 18:4–11 ug Lucas 22:50–51, isulat sa imong scripture study journal, diha sa kolum nga gingalanan og “Mga kabalaka ni Jesukristo,” unsa ang gikabalak-an sa Manluluwas.
Imahe
Christ before Caiaphas
Atong mabasa sa Juan 18:12–32 nga si Jesus mitugot sa mga opisyal sa pagdakop Kaniya. Sila midala Kaniya ngadto ni Anas, ang kanhi labawng sacerdote [high priest], kinsa mipadala ni Jesus aron masukit-sukit ni Caifas, ang umagad ni Anas (tan-awa sa Juan 18:13). Si Caifas mao ang gitudlo nga labawng sacerdote nianang higayuna, ug siya naningkamot gayud nga mapahamtangan sa kamatayon si Jesus (tan-awa sa Juan 18:14). Si Pedro ug lain nga disipulo misunod kang Jesus ug mitan-aw sa pagsukit-sukit ni Caifas Kaniya (tan-awa sa Juan 18:15–16). Sa dihang tulo ka lain-laing mga tawo nangutana kang Pedro kon usa ba siya sa mga disipulo ni Jesus, si Pedro milimud nga nakaila Kaniya sa matag higayon (tan-awa sa Juan 18:17, 25, 26–27). Human si Caifas misukit-sukit ni Jesus, ang mga lider nga Judeo midala kang Jesus, sayo sa buntag, ngadto ni Pilato, ang Romano nga gobernador sa probinsiya sa Judea, aron mataral ug masentensyahan (tan-awa sa Juan 18:28–30). Ang mga taga-Roma lamang ang may awtoridad sa pagpahigayon sa sentensya sa kamatayon didto sa Jerusalem (tan-awa sa Juan 18:31).
Basaha ang Juan 18:33–35, nga mangita kon unsay gusto nga mahibaloan ni Pilato kabahin ni Jesus.
Ang mga lider nga Judeo miakusar ni Jesus nga nangangkon nga maoy hari sa mga Judeo tungod kay kon si Jesus nangangkon nga usa ka hari, Siya mamahimong sad-an sa pagpanghulhog, o pagbudhi, batok sa panggobyerno nga Romano (tan-awa sa Juan 19:12) ug busa mahimong pahamtangan sa kamatayon.
Basaha ang Juan 18:36–37, nga mangita kon unsay gipasabut ni Jesus kang Pilato.
Basaha ang Juan 18:38, nga mangita kon unsay nahukman ni Pilato kabahin ni Jesus.
Sa Juan 18:39–19:5 atong nakat-unan nga si Pilato mitanyag nga buhian si Jesus sumala sa kustombre sa Judeo nga mobuhi og usa ka binilanggo sa fiesta sa Pagpalabay (tan-awa sa Juan 18:39). Ang mga sacerdote nga punoan ug mga opisyales mipili nga pabuhian hinoon ang tulisan nga si Barrabas (tan-awa sa Juan 18:40) ug namugos nga ilansang sa krus si Jesus (tan-awa sa Juan 19:6). Gipalatigo (gipalatus) ni Pilato si Jesus, ug ang mga sundalo nga Romano mipahaum og linukong nga mga sampinit sa Iyang ulo ug mibugal-bugal Kaniya (tan-awa sa Juan 19:1–2), ug dayon gipresentar ni Pilato si Jesus sa katawhan.
Basaha ang Juan 19:4, nga mangita kon unsay gibalik-balik og sulti ni Pilato ngadto sa mga Judeo.
Unsa ang malagmit nga gituohan ni Pilato nga maoy husto nga buhaton?
Sumala sa Juan 19:7, ang mga lider nga Judeo misulti ni Pilato nga si Jesus nangangkon nga Siya mao ang Anak sa Dios. Basaha ang Juan 19:8–11, nga mangita sa tubag ni Pilato dihang nakadungog siya nga si Jesus miingon nga Siya ang Anak sa Dios. Pangitaa usab kon unsay gisulti ni Jesus kang Pilato kabahin sa gahum ni Pilato isip gobernador.
Kon ikaw ang anaa sa posisyon ni Pilato, unsa kahay imong bation human makadungog ni Jesus nga nag-ingon nga wala kay gahum batok Kaniya “kon wala ka pa hatagi [niana nga gahum] gikan sa kahitas-an” (Juan 19:11)?
Ang pamahayag ni Jesus sa Juan 19:11 kabahin sa mga lider nga Judeo nga adunay “labaw pa kadakog sala” nagpasabut nga kon si Pilato mosugot sa hangyo sa pundok sa mga katawhan ug momando nga si Jesus ilansang sa krus, si Pilato adunay sala—hinoon dili sama ka dako niadtong aktibong nagtinguha sa kamatayon ni Jesus.
Basaha ang Mateo 27:19, nga timan-an unsay gitambag sa asawa ni Pilato nga iyang buhaton. Dayon basaha ang Juan 19:12–15, nga mangita kon unsay gisulayan pagbuhat ni Pilato kabahin ni Jesus ug unsay reaksyon sa mga Judeo kinsa nagtinguha sa pagpatay kang Jesus.
Timan-i sa Juan 19:12 kon sa unsang paagi ang mga lider nga Judeo mihulga ni Pilato dihang ilang nasayran nga gusto niyang buhian si Jesus.
Aron mapugos si Pilato, gipahinumduman sa mga Judeo si Pilato nga kon iyang buhian si Jesus, mahimong isipon siya nga mabudhion kang Cesar. Kon ang mga Judeo moreport niini nga pagkamabudhion, tingali kuhaon ni Cesar ang posisyon ug gahum ni Pilato isip gobernador. Niining higayona si Pilato kinahanglang mopili tali sa pagtinguha sa iyang kaugalingong interes ug pagbuhi ni Jesus, kinsa iyang nasayran nga walay sala.
Basaha ang Juan 19:16, nga mangita kon unsay gipili nga buhaton ni Pilato.
Imahe
Christ and Pilate
Unsay matudlo kanato sa mga lihok ni Pilato mahitungod sa iyang nag-unang mga kabalaka?
Sa imong scripture study journal, diha sa kolum nga gingalanan og “Mga kabalaka ni Pilato,” isulat kon unsay gikabalak-an og maayo ni Pilato.
Gikan sa atong pagtuon sa mga kabalaka ni Pilato nga gipakita diha sa Juan 18–19, atong nakat-unan nga ang pag-una sa atong kaugalingon nga mga interest kay sa pagbuhat sa unsay matarung modala kanato sa pagpakasala. Isulat kini nga baruganan sa imong scripture study journal diha sa kolum nga gingalanan og “Mga kabalaka ni Pilato.”
Tubaga ang mosunod nga mga pangutana diha sa imong scripture journal:
Unsa ang pipila ka sitwasyon diin kita mahimong matintal sa pag-una sa atong kaugalingong mga interes kay sa pagbuhat sa unsay matarung?
Unsa ang pipila ka butang nga mahimo nimong buhaton sa pagbuntog sa tintasyon nga unahon ang imong kaugalingong interes kay sa pagbuhat sa unsay matarung, bisan kon kini dili popular?
Si Jesus gilansang sa krus, ug ang Iyang lawas gipahimutang sa usa ka lubnganan
Atong mabasa sa Juan 19:17–24 nga si Jesus mipas-an sa Iyang krus ug miadto sa Golgota, diin Siya gilansang sa ikatulo nga oras (tan-awa sa Marcos 15:25; kini mao ang ikatulo nga oras human sa pagsubang sa adlaw). Basaha ang Juan 19:25–27, nga mangita kon kinsa ang anaa duol sa krus sa dihang si Jesus gilansang sa krus.
Samtang Siya nagbitay sa krus, si kinsa man ang gikabalak-an ni Jesus?
Ang mga pulong nga “tinun-an nga … hinigugma [ni Jesus]” (Juan 19:26) nagpasabut ngadto ni Apostol Juan, nailhan usab nga si Juan ang Hinigugma. Dihang si Jesus miingon ngadto kang Juan, “Tan-awa ang imong inahan,” siya nagsugo ni Juan sa pag-atiman ni Maria, Iyang inahan, sama nga siya ang kaugalingon nga inahan ni Juan. Sa imong scripture study journal, diha sa kolum nga gingalanan og “Mga kabalaka ni Jesukristo,” isulat kon kinsa ang gipakita niini nga mga bersikulo nga maoy gikabalak-an ni Jesus.
Basi sa mga kabalaka nga nailhan sa imong pagtuon sa Juan 18–19, unsaon nimo paghulagway ang kinaiya ni Jesukristo kon itandi ngadto sa kinaiya ni Pilato?
Gikan sa atong pagtuon sa kinaiya sa Manluluwas nga gipakita sa Juan 18–19, atong nakat-unan nga makasunod kita sa ehemplo sa Manluluwas pinaagi sa pagpili sa pagtabang sa uban bisan kon kita mismo nanginahanglan. Isulat kini nga baruganan sa imong scripture study journal diha sa kolum nga gingalanan og “Mga kabalaka ni Jesukristo.”
Imahe
Elder David A. Bednar
Si Elder David A. Bednar sa Korum sa Napulog Duha ka mga Apostoles mitudlo: “Ang karakter [kalig-on] sa usa ka tawo mapadayag … diha sa gahum nga makaila sa pag-antus sa ubang mga tawo kon kita mismo nag-antus; diha sa abilidad nga makamatikod sa kagutom sa uban kon kita gigutom; ug diha sa gahum sa pagtabang ug paghatag og kalooy alang sa espirituhanong pag-antus sa uban kon kita anaa taliwala sa atong kaugalingong espirituhanon nga kasakit. Sa ingon, ang karakter mapakita pinaagi sa pagtan-aw ug pagtabang sa uban sa diha nga ang natural ug kinaiyanhon nga reaksyon mao ang pagpokus sa kaugalingong panginahanglan ug gusto. Kon ang ingon nga kapasidad sa pagkatinuod mao ang katapusang sukdanan sa moral nga karakter, niana ang Manluluwas sa kalibutan mao ang hingpit nga ehemplo sa maong makanunayon ug manggiloy-on nga karakter” (“Ang Karakter ni Kristo” [Brigham Young University–Idaho Religion Symposium, Ene. 25, 2003], byui.edu/devotionalsandspeeches).
Tubaga ang mosunod nga mga pangutana diha sa imong scripture study journal:
Kanus-a ka nakakita og usa ka tawo nga misunod sa ehemplo sa Manluluwas pinaagi sa pagpili sa pagtabang sa uban bisan kon siya nanginahanglan?
Sa unsang paagi kaha kita makapalambo niining matanga sa Kristohanon nga karakter ug magtinguha sa pagtabang sa uban bisan kon kita mismo nanginahanglan?
Unsay imong buhaton sa pagsunod sa ehemplo sa Manluluwas pinaagi sa pagpili sa pagtabang sa uban bisan kon ikaw mismo nanginahanglan?
Atong nakat-unan diha sa Juan 19:28–42 nga human si Jesus namatay sa ikasiyam nga oras (tan-awa sa Marcos 15:34), si Jose nga taga-Arimatea mihangyo ni Pilato alang sa lawas ni Jesus. Si Jose ug Nicodemo dayon miandam dayon sa lawas sa Manluluwas ug gibutang kini sa usa ka lubnganan nga gidonar ni Joseph.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Juan 18–19 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: