Mataio 21:1–11; Ioane 12:27–36

O Le Ulufale Atu Faatupu o le Faaola

Ata

Jesus Christ’s triumphal entry into Jerusalem. altered version

Na faia e le Faaola Lana ulufale atu faaatupu i Ierusalema, lea na vivii ma tapuai ai tagata ia te Ia i alalaga o le “Osana” (tagai i Mataio 21:9). Ona aoao atu lea e Iesu o tagata e uiga i Lana misiona e laveai ia te i latou. O lenei lesona e aofia ai se vaaiga aoao o le vaiaso mulimuli o Iesu Keriso i le olaga nei, lea e mafai ona fesoasoani e te lagonaina ai se faaaloalogia sili atu ma le migao mo Iesu Keriso ma Lana misiona e laveai i tatou.

Faaaogaina o le Sau, Mulimuli Mai ia te A’u—Mo Tagata Taitoatasi ma Aiga. Atonu na maua e tagata aoga se avanoa e suesue ai ma talanoaina ia fuaitau o tusitusiga paia na tuuina atu i le lesona ma mea e faatatau i punaoa o le Sau, Mulimuli Mai ia te A’u i le fale a o le i talanoaina ia fuaitau o tusitusiga paia i le seminare. Fetuunai le lesona e tusa ai ma aafiaga talu ai nei atonu na maua e tagata aoga e uiga i le anotusi. Vaai mo ni avanoa e faaaoga ai aafiaga na maua e tagata aoga i o latou aiga e mafai ona faamanuiaina ai le vasega seminare.

Gaoioiga e Ono Talafeagai mo Aoaoga

O le manaomia o se laveaiga

Valaaulia tagata aoga e toe tomanatu i a latou lava tapenaga mo le vasega. E mafai ona latou faasoa mai se tala patino e uiga i se taimi na latou manaomia ai se fesoasoani a se isi tagata, pe mafai foi ona latou faasoa ane se tala e uiga i se tasi latou te masani ai.

Mafaufau i se taimi na e i ai i se tulaga faigata ma manaomia ai se isi e fesoasoani pe laveai ia te oe.

Aisea na e manaomia ai se fesoasoani po o se laveaiga?
O le a se mea sa ono tupu pe ana e le mauaina se fesoasoani?
Na faapefea ona aafia ou lagona agai i le tagata na fesoasoani pe na laveaiina oe mai i lena mea?

O i tatou uma e manaomia le mana laveai a Iesu Keriso. Tatou te faia uma ni mea sese e le mafai ona tatou faaleleia, aafia i ni mea ua toesea ma ua le toe maua mai, ma feagai ma tiga, sauaga, mala faafuasei, avega mamafa, ma faafatiatamai e le mafai ona tatou taulimaina na o i tatou.Toe tomanatu i lou manaomiaina o Iesu Keriso. I lau api faamaumau suesuega, tusi i lalo mea e te manaomia ai le mana laveai o Iesu Keriso e fesoasoani ai ia te oe.

I lenei lesona, saili le musumusuga a le Agaga Paia e aoao atili ai pe aisea e mafai ai e le Faaola o Iesu Keriso ona laveai i tatou mai mea sese uma, mea toesea, tiga, ma tulaga e le mafai ona tatou faaleleia.

Ulufale atu faatupu o Iesu Keriso

Mafaufau e faaali atu se ata o le ulufale atu faatupu o le Faaola.

A o le i ulufale atu i Ierusalema mo le taimi mulimuli, sa fetalai atu Iesu i Ona soo e aumai ia te Ia se tamai asini. Na ufiufi e le au soo le asini ma le tamai asini i o latou ofu, ma latou faatietie ai le Faaola i luga o le tamai asini (tagai i Mataio 21:1–7 ; Ioane 12:14–15).

Faitau le Mataio 21:8–11 ma le Ioane 12:12–13 , ma vaavaai pe na faapefea ona tali atu tagata ia Iesu Keriso a o Ia ulufale atu i Ierusalema. A o e faitau, vaai faalemafaufau faapea o loo e i ai.

E toatele tagata sa ofoina atu le alaga o le “Osana,” o se upu Eperu “o lona uiga ‘faamolemole laveai i matou’ ma e faaaoga i viiga ma talosaga” (Taiala i Tusitusiga Paia, “Osana,” scriptures.ChurchofJesusChrist.org).

Sa faamatala mai e Elder Bruce R. McConkie (1915–85) o le Korama a Aposetolo e Toasefululua nle uiga o le tali atu a tagata i le ulufale atu o le Faaola i Ierusalema:

Ata
Head and shoulders portrait of Elder Bruce R. McConkie.

E na o tupu ma toa manumalo e mauaina se faailoga faapena e tulaga ese o le faaaloalo e pei o lea. … I le lotolotoi o le alalaga faaviivii ma aioiga mo le faaolataga ma le laveaiga, ua tatou vaaia soo o fola le ala o lo tatou Alii i laupama o se faailoga o le manumalo ma le fiafia. O lenei vaaiga maoae ua faataimua mai ai o le a i ai se potopotoga i le lumanai “o le a i ai se motu o tagata” … o le a tutu “i luma o le nofoalii, ma luma o le Tamai Mamoe, ua oofu i latou i ofu sinasina, ua i ai foi laupama i o latou lima,” ua latou alalaga ma le leotele, “O i ai le faaolataga i lo tatou Atua o le tietie i le nofoalii, atoa ai ma le Tamai Mamoe.” ( Faaaliga 7:9–10 .)

(Doctrinal New Testament Commentary [1965], 1:578)

Mata o le a sau tala, gaoioiga, ma lagona pe ana e i ai i le taimi o le ulufale atu manumalo o le Faaola i Ierusalema? Aisea?
O anafea na e lagona ai le fia alaga “Osana” (tuuina atu le viiga faamaoni ma le agaga faafetai) mo Iesu Keriso?
Aisea e te alaga ai “Osana” mo le Faaola i le taimi nei? I le lumanai?

Pe a talafeagai ai, talanoa ma tagata aoga pe na latou auai i se Alaga Osana. Mo se faataitaiga, atonu sa latou auai i se tasi o se vaega o le faapaiaga o se malumalu.

Ina ua tietie atu Iesu i Ierusalema i luga o se tamai asini, sa iloa e le toatele o tagata lenei mea o se tautinoga faalauaitele e le gata o Ia o le Mesia folafolaina ae o le Tupu folafolaina foi o Isaraelu. E toatele na vaai i ai o se faataunuuga o valoaga faale-Tusi Paia e pei o lea o loo faamauina i le Sakaria 9:9 .

Na manatu le toatele o le Mesia o le a avea ma taitaiau sili o le a laveaiina i latou mai pulega sauā a Roma. Sa latou le malamalama i le misiona laveiai a le Faaola.

O le a le mea na auina mai ai e le Tama Faalelagi ia Iesu Keriso e laveai mai ai i tatou?

O le faamoemoega ma le misiona a le Faaola

Ina ua mavae le ulufale atu faatupu o le Faaola, “o isi tagata Eleni” o e na o mai i Ierusalema e faamanatu le Paseka na talosaga atu e asiasi ma Ia (tagai i Ioane 12:20–21). Ina ua silafia e Iesu la latou talosaga, sa Ia aoao atu e uiga i Lona puapuaga, maliu, ma le Toetu o le a oo mai. Sa Ia faamalamalama mai o nei mea mulimuli na tutupu i Ierusalema, e aofia ai Lona Faasatauroga ua lata mai, o le faamoemoega atoa lea o Lona afio mai i le lalolagi (tagai i le Ioane 12:23–33).

Faitau le Ioane 12:27–28, 32–33, ma vaai po o le a le fetalaiga a Iesu o Lona faamoemoega ma [Lana] misiona. (Manatua o le siufofoga o fetalai mai le lagi o le siufofoga o le Tama Faalelagi o loo faailoa mai ai le talitonuga o le a faamaeaina e Iesu Keriso Lana Togiola.)

O le a le mea na aoao mai e Iesu e uiga i Lona faamoemoega ma le misiona?
E mafai faapefea e le talitonuga o le Tama Faalelagi ia Iesu Keriso ona faateleina lou talitonuga i le gafatia ma le naunautaiga o le Faaola e laveai oe?

O se tasi o auala e aotele ai mea na aoao mai e le Faaola i le Ioane 12:27–28, 32–33 o le sa faataunuuina e Iesu Keriso Lana Togiola ina ia mafai ona Ia aumaia i tatou uma ia te Ia.

Na molimau mai le Faaola i lenei lava upumoni e tasi i le 3 Nifae 27:13–1 5 . Faitau le fuaitau lenei, ma vaavaai mo mea ua faaopoopo e nei fuaiupu i lou malamalama i lenei upumoni. Atonu e te manao e faafemolimauai pe faafesootai le fuaitau lenei i le Ioane 12:32 .

O se vaaiga aoao o mea na tutupu i le vaiaso mulimuli o le Faaola

O nisi o mea na tutupu i le vaiaso mulimuli o le soifuaga faaletino o le Faaola sa taua i Lana misiona ma le faamoemoega e laveai i tatou e ala i le tosina atu o i tatou ia te Ia.

O ata o faamatalaga nei e mafai ona fesoasoani ia te oe e te malamalama atili ai i nei mea na tutupu.

Ata

New Testament Seminary Teacher Manaul - 2023

Tuuina atu i tagata aoga se kopi o ata o faamatalaga, pe faaali nei loa.

E faalagolago i manaoga o tagata aoga, atonu e aoga le faaaoga o nisi o manatu o loo maua i le vaega o “Gaoioiga Faaopoopo e Aoaoina Ai” o lenei lesona e faaopoopo atu pe suitulaga i le ata o faamatalaga.

Vaai i luga o le ata o faamatalaga. Faitau nisi o fuaitau o mau ina ia faamasani atili ai i mea na tutupu o loo faamatalaina. Mafaufau pe na faapefea ona saofaga ia mea na tutupu i le misiona faaola a Iesu Keriso, ma mafaufau loloto pe mafai faapefea ona Ia fesoasoani ma laveai oe ona o mea sa Ia aoao atu ma faia i lenei vaiaso.

I lau api faamaumau suesuega, tusi i lalo au fesili e uiga i nei mea na tutupu ma tusi po o a mea na tutupu e te manao e aoao atili i ai ma pe aisea.

O a ni au fesili e uiga i se tasi o nei mea na tutupu?
O le fea e te fia aoao atili ai? Aisea?
O le a sou manatu e mafai faapefea ona fesoasoani le aoao atili e uiga i nei mea e te malamalama atili ai i le gafatia ma le naunau o Iesu Keriso e laveai i tatou?

Valaaulia tagata aoga e faasoa mai a latou tali i le fesili na muamua atu. Tusi i lalo faamatalaga latou te faasoa mai, ma vaai mo ni auala e faaaoga ai nei faamatalaga e taiala ai le vasega i lesona i le lumanai.

Tala ma Faamatalaga o Talaaga

O le ā le uiga o le ulufale atu faatupu mo tagata Iutaia, ma o le a le uiga o lena mea mo i tatou?

O le ulufale atu faatupu a le Faaola i Ierusalema, i le taimi o le faamanatuina o le Paseka, na faataunuu tonu ai le valoaga o loo tusia i le Sakaria 9:9–10 ma sa tautino atu ai i le lautele o Iesu o le Mesia ma le Tupu o Isaraelu. I ona po anamua, o le asini, o se faatusa lea o le tulaga tautupu i Iutaia. I le taimi o pulega tautupu a Isaraelu anamua, ina ua mavae le sauniga o le faauuga o le Tupu o Saulo, sa faia e tagata Iutaia se sauniga faaletausaga ma o lea sauniga e faalauiloa ai se tupu o tietie atu i Ierusalema i luga o se asini. Na alu atu le tagata tietie i Ierusalema mai sasae o le aai ma alu atu i le malumalu. O nei sauniga sa faaata i le taimi o le a afio mai ai le Mesia i Lona nuu i le ala lava lea e tasi. O lea, i se taimi ua faatumulia ai Ierusalema i tagata Iutaia, sa ulufale atu ai Iesu i Ierusalema i se tulaga na faaataata atu ai o Ia o le Mesia, o le Tupu o Isaraelu. O le tietie i se asini sa faaalia ai foi le oo mai o Iesu o se Faaola toafilemu ma le “agamaualalo” ae le o se toa manumalo i luga o se solofanua tau (tagai i Sakaria 9:9–10).

I le Afio Mai Faalua, o le a toe foi mai Iesu i le lalolagi i le mana ma le mamalu silisili. O se faatusa o Lona mamalu, o le a Ia afio mai i luga o se “solofanua paepae” ae le o se asini lea na Ia tietie atu ai i Ierusalema (tagai i Faaaliga 19:11–16). O le a afio mai foi o ia e pule o se “Tupu o tupu, ma le Alii o alii” ( Faaaliga 17:14 ; tagai foi i le Faaaliga 19:16).

O le a se mea e mafai ona tatou aoaoina mai i le faaaogaina o lau pama i le ulufale atu faatupu?

Sa aoao mai Elder Gerrit W. Gong o le Korama a Aposetolo e Toasefululua:

Ata
Official Portrait of Gerrit W. Gong. Photographed in 2018.

I se tulaga masani ai, o lau pama o se faatusa paia e faaalia ai le olioli i lo tatou Alii, e pei o le Ulufale Atu Faatupu o Keriso i Ierusalema, lea sa “ave e tagata … lau o pama, ma o mai e faafetaiai ia te ia” [ Ioane 12:12-13 ; tagai foi i Mataiao 21:8–9 ; Mareko 11:8–10 ]. … I le tusi o Faaaliga, o i latou e vivii ae i le Atua ma le Tamai Mamoe latou te faia a o loo “oofu i ofu sisina, ua i ai foi lau pama i o latou lima” [ Faaaliga 7:9 ]. Faatasi ai ma “ofutalaloa o le amiotonu” ma “pale o le mamalu,” sa aofia ai lau pama i le tatalo o le faapaiaga o le Malumalu o Katelani [tagai i Mataupu Faavae ma Feagaiga 109:76 ]. …

(Gerrit W. Gong, “Osana ma Aleluia—O Le Iesu Keriso Soifua: O Le Fatu lea o le Toefuataiga ma le Eseta,” Ensign po o le Liahona, Me 2020, 53)

Gaoioiga Faaopoopo e Aoao Ai

Maimoaga taamilo i Ierusalema i luga o upega tafailagi

Ua fausia e le Iunivesite o Polika Iaga se polokalama e mafai ai e tagata ona faia ni maimoaga taamilo faakomepiuta i le aai o Ierusalema ma vaai i nofoaga e pei ona foliga mai ai i le taimi o le Faaola. Mafaufau e faataga tagata aoga e sii mai mai upega tafailagi le polokalama faatekinolosi ma faaaoga e suitulaga i le ata o faamatalaga i lenei lesona. E mafai foi ona faaaoga lenei polokalama faatekinolosi i isi lesona e fesoasoani ai i tagata aoga e vaai faalemafaufau i mea na tutupu i Ierusalema anamua ma atiina ae se malamalama sili atu i nei mea. O faatonuga mo le siiina mai i lalo mai le upega tafailagi o le polokalama faatekinolosi e mafai ona maua i le https://virtualscriptures.org/virtual-new-testament/.

Gaoioiga i ata

Faaali atu ata nei i le faasologa sao, ma valaaulia tagata aoga e faaaoga tusitusiga paia ma faamatalaga e fesoasoani ia i latou e faatulaga ia ata i le faasologa sao. Ona valaaulia lea o tagata aoga e tali fesili mulimuli e tolu i le lesona.

Ata

Jesus is riding a colt into Jerusalem through a great multitude of people holding tree branches. Outtakes include Jesus barely seen in a throng of people, images of the crowd, some small children, and Jesus walking through the crowd.

Ata

Jesus turning over a table of a money changer in the temple. Outtakes include images of Christ alone and with the crowd of merchants and buyers fleeing, people buying goods, and people looking.

Ata

Jesus giving the sop to Judas Iscariot. Outtakes include just Jesus, all the disciples seated, Jesus passing the cup of wine, Jesus holding the bread, a servant woman bring a jar, Judas Iscariot eating the sop, Jesus taking a piece of bread wrapped in cloth, and Jesus raising a glass of wine.

Ata

Christ kneeling in Gethsemane. Outtakes include the back of the savior shown kneeling in the tall grass, close-up of his face looking afraid, in a distance with blood on his face and hands near a river, an angel comforting him, profile portrait, and a glowing angel coming toward Christ who is huddled on the ground.

Ata

Jesus is on the cross between two malefactors, there is a crowd below that are watching. Outtakes include a sponge on a stick lifted up to Jesus by a Roman soldier, different views of the three me on the crosses, soldiers gambling and parting his clothes, Jesus walking wearing crown of thorns and covered in blood, and Caiaphas.

Ata

Mary Magdalene encountering the resurrected Christ.