O soo uma o Iesu Keriso o le a oo iai tofotofoga o lo latou faatuatua. E faapena le tulaga mo le toatele o Kerisiano Iutaia. I lalo o le mamafatu o sauaga eseese, e toatele na faamaamulu mai i le Ekalesia ma toe foi atu i le saogalemu o tapuaiga faa-Iutaia i le sunako. Na manao Paulo e faailoa atu i nei Kerisiano Iutaia o Iesu Keriso e sili atu nai lo Mose ma o Lana galuega na aumaia ai se feagaiga fou e maualuga atu i lo le feagaiga tuai i lalo o le tulafono a Mose. O lenei lesona e mafai ona fesoasoani e tapue ai lou faatuatua i le Faaola a o e aoao i Lona mana i luga o mea uma e ala i le faailoaina ma le suesueina o nisi o Ona suafa ma matafaioi.
O le taulai atu ia Iesu Keriso. “A o tatou taulai atu i Ona faalagiga, matafaioi, ma amioga, ma uiga, o le a molimau mai le Agaga e uiga ia te Ia, ma aumaia ai le malamalama sili atu ma le alofa mo Ia moni lava ma se naunautaiga sili atu ia avea e faapei o Ia” (Chad H Webb, “We Talk of Christ, We Rejoice in Christ” [saunoaga na tuuina atu i le faasalalauga faaletausaga o aoaoga mo Seminare ma Inisitituti o Mataupu Faalelotu, 12 Iuni, 2018], ChurchofJesusChrist.org).
Sauniuniga a le tagata aoga: Valaaulia tagata aoga e vaavaai mo suafa o Iesu Keriso i le taimi o a latou suesuega faaletagata lava ia pe faaleaiga o tusitusiga paia ma o mai saunia i le vasega e faasoa mai igoa na latou mauaina.
Gaoioiga e ono Mafai Ona Aoao Ai
Faalagiga o Iesu Keriso
Mafaufau e valaaulia tagata aoga e fai le gaoioiga lenei i se laupepa. Ona ao mai lea o pepa ma faitau i tali, ma valaaulia tagata aoga e mate mai po o ai le tagata aoga na tusia faamatalaga taitasi.
Faaaoga se minute se tasi ma lisi i lau api faamaumau mo suesuega le tele o upu po o fasifuaitau e mafai ona e mafaufau i ai e faamatalaina ai lou tagata.
Aisea na e faaaogaina ai upu ma fasifuaitau na e faaaogaina?
E pei lava ona i ai ni au upu po o fasifuaitau e faamatala ai oe, e tele foi suafa po o faalagiga o Iesu Keriso o loo faamatalaina ai o Ia. A oo ina tatou iloa atoatoa nei faalagiga, o le a tatou malamalama atili ai po o ai o Ia atoa ma le tele o Lona alofa mo i tatou.
Atonu sa faia e ni isi o le vasega se lisi o faalagiga ma matafaioi a le Faaola i a latou api faamaumau mo suesuega. Afai e leai, e mafai ona valaaulia i latou ia faia o lea.
I lau api faamaumau mo suesuega, lisi ai nisi o faalagiga ua uma ona e iloa mo le Faaola.
E faapefea e le iloaina ma le malamalama ai i nei faalagiga o Iesu Keriso ona aafia ai lau vaai atu ia te Ia?
Mafaufau e fai se lisi o tali a tagata aoga i luga o le laupapa. Ina ia fesoasoani i tagata aoga e faaloloto atili lo latou faatuatua ia Iesu Keriso, mafaufau e fai atu ni fesili tulitatao e pei o le “Aisea e te manatu ai e taua mo le autalavou ona iloa e uiga i le Faaola?” po o le “O le a se mea o aoao mai e lenei faalagiga ia i tatou e uiga i Lana amio ma uiga?”
Na aoao Peresitene Russell M. Nelson ni auala e mafai ona faamanuiaina ai i tatou a o tatou aoao atili e uiga i le Faaola:
Ata
Official portrait of President Russell M. Nelson taken January 2018
O le faateleina o lou a’oa’o e uiga i le Faaola, o le faigofie foi lena o le faalagolago i Lona alofa mutimutivale, Lona alofa lēmafuatia, ma Lona mana faamalosi’au, faamalolo, ma laveai.
(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103)
O a ni auala e te manaomia ai le fesoasoani mai le Faaola lea na faamatalaina e Peresitene Nelson?
Mafaufau e faaali atu pe aotele faapuupuu ia anomea nei e fesoasoani ai i tagata aoga ia malamalama i le faatatauga o le tusi o Eperu.
E pei lava ona tatou manaomia le Faaola, sa faapena foi i Kerisiano Iutaia o e sa lei auai i sauniga a le Ekalesia ona o sauaga ma isi ituaiga o uunaiga. Na latou toe foi ai i mea na masani ai ma le saogalemu o tapuaiga masani faa-Iutaia, lea sa lei aofia ai se talitonuga ia Iesu Keriso (tagai i le Eperu 10:25, 38–39). E mafai ona e aoao atili e uiga i lenei tusi e ala i le suesueina o le “ Eperu, Tusi i Tagata ” i le Taiala i Tusitusiga Paia.
O le mauaina o faalagiga ma matafaioi o Iesu Keriso
Sa faasoa atu e Paulo le tele o faalagiga ma matafaioi a le Faaola atonu na fesoasoani i le Au Paia e iloa ai lo latou manaomia o Ia. Mo se faataitaiga, o le Eperu 1:2 o loo faamamafa mai ai le faalagiga o le Faaola o le “Alo,” lea e faatatau ia te Ia o le “e fai mea uma lava mona tofi.” O le Eperu 1:2, 10 o loo faamatala mai ai le matafaioi a Iesu o Lē Foafoa o le lagi ma le lalolagi.
E mafai ona atofa atu i tagata aoga ni fuaiupu faapitoa e faitau taitoalua pe i ni vaega toalaiti. A uma ona latou faitau, mafaufau e fai se lisi i luga o le laupapa o faalagiga na maua e tagata aoga.
O lea la ua e vaai i nisi o faataitaiga o faalagiga o le Faaola, faitau fuaiupu nei ma vaavaai mo faalagiga ma matafaioi faaopoopo a Iesu Keriso. Mafaufau e faailoga mea ua e maua.
O le a se upumoni na e faailoa mai e uiga i le Faaola mai se tasi pe sili atu o Ona faalagiga ma matafaioi?
E mafai e tagata aoga ona faailoa mai ni upumoni eseese, e pei o Iesu Keriso na foafoaina le lagi ma le lalolagi (tagai i le Eperu 1:2, 10) pe o Iesu Keriso o le Alo o le Atua ma o loo i ai i le faatusa moni o Lona Tama (tagai i le Eperu 1:2–3).
Filifili se faalagiga po o se matafaioi e faaalia ai se faatinoga e te manaomia ona faia e Iesu Keriso i lou olaga, ma tusi i le ogatotonu o se fasipepa. I le faaaogaina o tusitusiga paia, o le polokalama o le Gospel Library, po o le ChurchofJesusChrist.org, vaavaai mo nisi malamalamaga i le faalagiga o Iesu Keriso na e filifilia. O se tasi o auala e amata ai lau suesuega o le sailia lea o le faamatalaga “Iesu Keriso” i le Taiala i Tusitusiga Paia po o le Topical Guide. Ona mafai lea ona e sueina mau eseese o loo faatatau i le Faaola.
Tusi faataamilo i le faalagiga ou manatu e uiga ia Iesu Keriso ma pe aisea e taua ai lena faalagiga ia te oe. O manatu nei e mafai ona aofia ai
fasifuaitau mai fuaiupu po o upusii e te faitauina,
manatu i le auala e mafai ai e le faataunuuina e le Faaola o lena matafaioi ona fesoasoani ia te oe i lou olaga,
o ou malamalamaaga e uiga i le auala e mafai ai e le malamalama i lena faalagiga ona faamalosia lou faatuatua ia Iesu Keriso, ma
soo se fesili o ia te oe e uiga i lena faalagiga.
Afai e lava le taimi, e mafai ona tuu atu i tagata aoga se avanoa e sue ai le tali i a latou fesili. E mafai foi ona valaaulia tagata aoga e faasoa mai o latou malamalamaaga faatasi ma le vasega, i ni vaega toalaiti, pe i ni faiga paga. Molimau atu e uiga ia Iesu Keriso ma le taua o le aoaoina atili e uiga ia te Ia.
Ona o lea ua e faataitaiina le faailoaina o suafa ma faalagiga o Iesu Keriso, faaaoga sina taimi e mafaufau ai po o le a le lelei o loo e faaaogaina ai lenei tomai i lau suesuega o tusitusiga paia.
Na faapefea e le sueina o faalagiga o Iesu Keriso ona fesoasoani e te iloa atili ai o Ia?
E mafai faapefea ona e faaaofiaina le suesueina o faalagiga o Iesu Keriso i au suesuega masani o tusitusiga paia?
Vaavaai mo faalagiga o Iesu Keriso i au suesuega faaletagata lava ia ma faatasi ai ma lou aiga a o faaauau pea ona e suesue i le Feagaiga Fou ma isi tusitusiga paia.
Tala Auiliili ma Faamatalaga o Talaaga
Aisea e ao ai ona ou aoao e uiga ia Iesu Keriso?
Na aoao mai Peresitene Russell M. Nelson:
Ata
Official portrait of President Russell M. Nelson taken January 2018
Afai e faaauau ona e aoao mea uma e te mafaia e uiga ia Iesu Keriso, ou te folafola atu ia te oe o lou alofa mo Ia, ma mo tulafono a le Atua, o le a tuputupu ae i talaatu o mea o loo e mafaufauina i le taimi nei. Ou te folafola atu foi ia te outou o le a faateleina lo outou gafatia e liliu ese ai mai agasala. O lou naunau e tausi poloaiga o le a siitia. O le a e iloa ai ua sili atu ona mafai ona e savali ese mai faafiafiaga ma faauilavea a i latou o e faatauemu i soo o Iesu Keriso. …
Suesue i mea uma e uiga ia Iesu Keriso e ala lea i le saili ma le agaga tatalo ma le filiga ia malamalama po o a uiga o Ona faalagiga ma suafa taitasi eseese mo oe lava ia .
Eperu 1:2, 10. E mafai faapefea e le matafaioi a Iesu o Lē Foafoa ona aafia ai lo’u olaga?
Na faamalamalama mai e Chad H. Webb, taitai o Seminare ma Inisitituti o Mataupu Faalelotu:
Ata
Portrait of Chad Webb
Atonu tou te manatuaina o Peresitene Boyd K. Packer o se tufuga atamai na fiafia e ta vane manulele laupapa. I se tasi aso, sa tietie ai o ia i se taavale na aveina e Elder A. Theodore Tuttle, ma o se tasi o ana faatusavane laupapa sa i le nofoa pito i tua o le taavale. I se magaala, sa taofi faafuasei ai e Elder Tuttle le taavale ma patatū ai i lalo le faatusavane laupapa i luga o le fola ma nuti ai. Sa matua faanoanoa Elder Tuttle, ae sa lei faapea lagona o Peresitene Packer. Sa na ona ia fai mai lava, “Faagalo ia. O a’u na faia. E mafai ona ou toe faaleleia.” Ma sa faapena ona ia faia. Na ia toe faia ma sili atu ona malosi nai lo le mea sa i ai ma sa faaleleia atili foi. Na faamalamalama mai e Peresitene Packer, “O ai na faia oe? O ai lou Foafoa? E leai se mea e uiga i lou olaga ua gausia pe malepelepe e le mafai ona Ia le toe faaleleia ma o le a toe faaleleia lava.”
(Chad H Webb, “We Talk of Christ, We Rejoice in Christ,” Faasalalauga Faaletausaga o Aoaoga mo Seminare ma Inisitituti o Mataupu Faalelotu, 12 Iuni, 2018, ChurchofJesusChrist.org)
E mafai faapefea e le iloaina o Iesu Keriso ona aumaia ia te au le faamoemoe?
O le aafiaga lenei na faasoa mai e Elder Ronald A. Rasband e mafai ona fesoasoani ia tatou malamalama ai pe mafai faapefea e le iloaina o faalagiga ma matafaioi a Iesu Keriso ona maua ai le faamoemoe.
Eperu 2:10. O a ni auala ua avea ai Iesu ma “le taimua o lo [tatou] faaolataga”?
O le vaega lenei o le faasalalauga o loo faasoa mai ai ni malamalamaga i le ala ua avea ai Iesu Keriso ma taimua o lo tatou faaolataga:
Galuega Faatino Faaopoopo e Aoao Mai Ai
O le sailia o faalagiga o Iesu Keriso i le Tusi a Mamona
O le isi auala e fesoasoani ai i tagata aoga ia maua ai faalagiga o Keriso o le faaaogaina lea o le Tusi a Mamona. Mafaufau e fai le gaoioiga lenei.
Fesili i tagata aoga, “O le a le ulutala atoa o le Tusi a Mamona?”
Faamanatu i tagata aoga na tusia le Tusi a Mamona ina ia faatalitonuina ai tagata uma o Iesu o le Keriso.
Ina ia fesoasoani i tagata aoga e faafetaia le faamoemoega autu o le Tusi a Mamona, fai atu i se tagata aoga e faitau leotele le faamatalaga lenei mai ia Peresitene Ezra Taft Benson (1899–1994):
Ata
Photograph of President Ezra Taft Benson. He is seated in a leather chair in front of a fireplace. His hands are clasped in front of him and he is wearing a large turquoise ring on one finger. Official portrait. 1986
O le tagata e saili faamaoni i le upumoni, e mafai ona ia maua le molimau o Iesu o le Keriso, pe a ia manatunatu ma le agaga tatalo i upu musuia o le Tusi a Mamona.
E sili atu ma le afa o fuaiupu uma o loo i le Tusi a Mamona e faatatau ia i lo tatou Alii. O nisi o faalagiga o le suafa o Keriso o loo sili atu ona taua i fuaiupu taitasi o le Tusi a Mamona, nai lo le Feagaiga Fou.
E sili atu i le selau suafa eseese ua taua ai o Ia i le Tusi a Mamona. O na suafa e i ai se taua faapitoa i le faamatalaina o Lona natura paia.
Valaaulia tagata aoga e susue i soo se mataupu i le Tusi a Mamona ma vaai pe mafai ona latou mauaina igoa po o faalagiga e faasino ia Iesu Keriso. Fai i le vasega e lipoti mai se igoa po o se faalagiga na latou mauaina ma faamatala mai po o le a se mea e mafai ona aoao mai ia i tatou e uiga ia Iesu Keriso.
O lenei o le a tuuina atu ai i tagata aoga ni faalagiga faaopoopo e filifili mai ai pe a latou filifilia ma suesue i se faalagiga e sili ona anoa ia i latou.
