Ma ua Matou Tautalatala e uiga ia Keriso, ua Matou Olioli ia Keriso

Chad H Webb

Taitai, Seminare ma Inisitituti o Mataupu Faalelotu

Faasalalauga mo Aoaoga Faaletausaga a Seminare ma Inisitituti o Mataupu Faalelotu • 12 Iuni, 2018 • Fale Faafiafia o le Maota Autu mo Konafesi

Faafetai, matagofie lena mea. Ua matua faamanuiaina i ma’ua. O se faamanuiaga le faatasi ai ma outou i le asō. Faafetai mo mea uma o outou faia. Matou te alolofa ma fiafia e auauna atu faatasi ma outou.

Ma le toatele o outou, e masani ona ou mafaufau i le avanoa e a matou e aoao atu ai le autalavou ma talavou matutua e uiga i le Ekalesia ma mafaufau soo i le ala tatou te ono aoao atu ai i latou ma le malosi atili e fesoasoani ia i latou e fausia le faatuatua loloto ma le mausali i le Alii o Iesu Keriso. A o ou mafaufau i lenei fesili taua, ou te mafaufau i le manatu na faasoa mai e Elder Clark ia Ianuari talu ai ina ua ia fai mai, o le valaaulia a le Faaola e aoao e uiga ia te Ia o lona uiga, muamua e tatau ona tatou aoao ia iloa o Ia. Ma le lona lua, e tatau ona tatou aoao mai ia te Ia. Sa ia si’i maia le saunoaga a Elder Neal A. Maxwell, o lē sa faasino atu i le valaaulia a le Faaola o le “aoao ia te a’u” ma faaopoopo mai, “E leai se isi a auala e aoao loloto ai.”¹

Ua ou malamalama ma talitonu o le auala e tasi e sili ona taua e mafai ai ona tatou fesoasoani e faateleina le faatuatua i le tupulaga faia’e o le tuu atoatoa lea o Iesu Keriso i le totonugalemu o la tatou aoao atu ma le aoao mai e ala i le fesoasoani i a tatou tamaiti aoga ia iloa o Ia, ia aoao mai ia te Ia, ma taumafai malosi e avea e faapei o Ia. I aso uma, e tatau ona tatou “tautalatala e uiga ia Keriso, … olioli ia Keriso, … [ma] talai atu Keriso.”²

E toatele outou ua amata ona tali atu i lenei valaaulia, ma sauniuni ma le faaeteete ia lesona faatasi ai ma nei manatu i le mafaufau ma vaavaai mo avanoa e molimau atu ai e uiga ia Iesu Keriso ma Ona uiga paia, Lona alofa e le faatuaoia, ma Lona mana e le mavae, ma Ona uiga paia uma. I nei vasega sa i ai se uunaiga faateleina a le Agaga Paia, le tele o le faailoaga o le agaga faafetai mo le Faaola, le tele o le faaaogaina patino anoa ma talafeagai, ma le tele o tagata talavou o loo galulue i le faatuatua.

E moni, o le auala sili ona taua e mafai ona tatou fesoasoani ai i a tatou tamaiti aoga ia iloa le Faaola o le fesoasoani lea ia i latou ia saunia mo sauniga paia o le perisitua ma tausi a latou feagaiga.³ O le fesoasoani ia i latou ia agavaa mo faamanuiaga o le malumalu o le fesoasoani foi lea ia i latou ia iloa ma mulimuli ia Iesu Keriso. Ae o loo i ai isi mea e mafai ona tatou faia, a o latou faatasi ma i tatou, o le a fesoasoani ia i latou e faalagolago ai ia te Ia ma i Ana aoaoga ma le Togiola.

I lea tulaga, seʻi ou fautuaina atu ni auala se fa e mafai ai ona tatou tuu atili Iesu Keriso i le totonugalemu o la tatou aoao atu ma le aoao mai i aso uma.

1. Taulai atu i Faalagiga, Matafaioi, Amio ma Uiga o Iesu Keriso

Muamua, taulai atu i faalagiga, matafaioi, amio, ma uiga o Iesu Keriso. Sa tuuina mai e Peresitene Russell M. Nelson ia i tatou se valaaulia ia “avea ia mau o tusitusiga paia e uiga ia Iesu Keriso o loo i le Taiala i Tusitusiga Paia ma a [tatou] mataupu aoaoina autu faaletagata lava ia.”⁴ O lenei valaaulia ua faamoemoe e fesoasoani ia i tatou ia sili atu nai lo le na o le iloaina o mea na faia e Iesu ma fesoasoani ia i tatou ia iloa o Ia—o Ona uiga ma amio.

Mo se faataitaiga, o se tasi o faalagiga o Iesu Keriso o le Foafoa. I lalo o le taitaiga a Lona Tama, na foafoa ai e Iesu le lagi ma le lalolagi. O le Foafoa o se tasi lea o Ana matafaioi paia ma e talanoa mai i Lona natura. A o tatou suesue i le ala ma pe aisea na foafoaina ai e Iesu le lalolagi, atonu tatou te fesili, “O le a le mea o loo aoao mai e lenei mea e uiga ia te Ia? O le a le mea o loo aoaoina ai i tatou e uiga i Ona faamoemoega, Lona alofa, ma Lona mana? O a ni uiga paia o le Faaola o loo faaalia i Lana matafaioi o le Foafoa?”

Atonu tou te manatuaina o Peresitene Boyd K. Packer o se tufuga atamai na fiafia i le vaneina o manulele laupapa. I se tasi aso, sa tietie ai o se pasese i le taavale na aveina e Elder A. Theodore Tuttle, ma o se tasi o ana [ata] vane sa i le nofoa pito i tua o le taavale. I se magaala, sa tu faafuasei ai Elder Tuttle i taofi ma patatū ai i lalo le [ata] vane i luga o le fola ma malepe ai. Sa matua le fiafia Elder Tuttle, ae sa [fiafia pea] Peresitene Packer. Sa na ona ia fai mai lava, “Faagalo ia. O a’u na faia. E mafai ona ou faia.” Ma sa ia faia. Na ia faia ma sili atu ona malosi nai lo le mea sa i ai ma sa faaleleia atili foi. Na faamalamalama mai e Peresitene Packer, “O ai na faia oe? O ai lou Foafoa? E leai se mea e uiga i lou olaga e gausia pe malepelepe e Le mafai ona Ia toe faaleleia ma o le a toe faaleleia lava.”⁵

A malamalama a tatou tamaiti aoga i le matafaioi a Iesu o le Foafoa, ma a o latou mafaufau loloto i tala faatusipaia o molimau mai i Lona mana ofoofogia e faaleleia ma faamalolo Ana foafoaga, o le a faananau o latou loto i lena mana ma le folafolaga i o latou lava olaga. Ona latou galulue ai lea ma le faatuatua e iloa Lona mana ofoofogia e toe faaleleia ai mea ua malepelepe.

O se isi faalagiga paia o Iesu o le Togiola. E 930 mau o loo faasino atu ia te Ia i lenei matafaioi. O le a se mea o aoao mai e lenei faalagiga ia i tatou e uiga i Lana amio ma uiga? O le a le uiga o Lona mana togiola mo Alema, Saulo, ma le fafine na molia i le mulilua? O le a le uiga ia Mataio, le ao lafoga ma le tusitala Evagelia?

Ou te fiafia ua tatou aoao e uiga i le valaauga a Mataio i le Toasefululua i le mataupu e tasi e pei o tala ia Iesu o faia vavega ma “faamalolo foi i ma’i uma, ma ma’i tiga uma o le nuu.”⁶ O le uiga moni mo nei vavega ona o Iesu sa uunaia e le “mutimutivale … lona alofa.”⁷ Ae aiseā ua na o Mataio lava, o tusitala uma o Evagelia, na aofia ai lona valaauga i le lotolotoi o nei vavega? Atonu sa avea ma se tala o faasologa o taimi, ae ou te manatu e i ai ma se isi mea e mafai ona tatou aoaoina. Mata e mafai e Mataio ona iloa o le vavega silisili na faia e Iesu o le togiolaina o i tatou e ala i le faamagaloina, alofaina, siitiaina, ma le faaali atu i se tagata o lona faasinomaga moni ma lona gafatia, e pei lava ona sa Ia faia mo Mataio?

O le isi auala e fesoasoani ai i tamaiti aoga ia iloa uiga o Iesu o le taulai atu lea e le na o mea na tutupu i tusitusiga paia ae o na mea na tutupu o loo aoao mai ai i tatou e uiga i le Faaola. Mo se faataitaiga, aisea tatou te aoao atu ai le tala ia Amona i lona tipiina o lima o alii na faataapeina mamoe a le Tupu o Lamonae? Pe o talanoa ea e uiga i le maoae o Amona? Pe o lenei tala e faatatau moni i le silisiliese o le Atua? O le a se mea ua aoao mai e lenei tala ia i tatou e uiga i le Alii ma le ala Na te faamanuiaina ai i latou o e tuu atu lo latou faatuatuaga ia te Ia? Ua faaiu le tala a Amona i lenei molimau naunautai: “Ou te le mitamita i loʻu lava malosi. … Ua ou iloa o au o se meanoa; … o lea … ou te mitamita i lo’u Atua, ona o lona malosi e mafai ai ona ou faia o mea uma.”⁸

I nai masina ua mavae, sa matou faatasi ai ma se vaega o faiaoga lelei ma fai atu ia i latou e filifili mai soo se tala faatusitusiga paia po o se mea na tupu i le talafaasolopito o le Ekalesia ma mafaufau e uiga i le mea o faaalia mai ai e uiga i le natura o le Atua. Sa tali mai le faiaoga muamua i le, “Autaunonofo.” O lo’u manatu muamua lava, “Faafetai tele lava! Ua e filifilia se autu e sili ona faigata.” Ae a o amata ona matou talanoa, na tupu se mea matagofie. Sa amata e tagata ona molimau atu i le mea moni e alofa le Tama Faalelagi i Lana fanau uma ma e finagalo ina ia tausia i latou. O le isi na talanoa e uiga i le finagalo o le Alii e talosagaina mea faigata mai ia i tatou, ae Na te lagolagoina pea i tatou ma tauia lo tatou usiusitai. O le isi na talanoa e uiga i le Atua o se tasi e alofa i aiga ma e finagalo i fanau ina ia aoaoina e matua alolofa. A o faagasolo pea le talanoaga, na ou iloaina o le Agaga o loo molimauina le natura ma le uiga o le Atua, na matou lagonaina le latalata atili i lo tatou Tama oi le Lagi ma Lona Alo o Iesu Keriso, ma ua matou iloa ma alolofa atili ia i Laua.

O Iesu Keriso o lo tatou Foafoa. O Ia o lo tatou Togiola ma le Laveai alofa ma faamagalo, ma le agaalofa. O Ia foi o Emanuelu, le Tamai Mamoe a le Atua, le Mesia, le Paia e Toatasi o Isaraelu, ma le Tusitala ma le Mutaaga o lo Tatou Faatuatua. A o tatou taulai atu i Ana faalagiga, matafaioi, amio, ma uiga, o le a molimau le Agaga e uiga ia te Ia, e aumaia le malamalama sili atu ma le alofa mo le tagata moni ua avea ai o Ia ma se manao sili atu ia avea faapei o Ia.

2. Faamamafa le Faataitaiga a Iesu Keriso

O le auala lona lua e tuu ai Iesu i le totonugalemu o a tatou aoaoga o le iloa ma faamamafa atu o Ia o le faataitaiga atoatoa, o le faatinoga ma le faaalia o mataupu faavae uma o le talalelei.⁹ Na faasoa talu ai nei e se tasi o o matou faiaoga ia te au e faapea, mo a latou suesuega faaleaiga o tusitusiga paia, ua latou filifili ai e toe faitau le Feagaiga Fou. Ae o le taimi nei, nai lo le taulai atu i mea na fetalai ai Iesu, ua latou taulai tonu lava i mea na faia e Iesu. O le taulai atu i Lana faataitaiga atoatoa ua valaaulia ai fo le Agaga Paia e molimau e uiga ia te Ia.

E tusa lava pe le o faasino tonu Iesu i se tala o loo tatou aoaoina atu, e mafai lava ona tatou faasino atu ia te Ia o se faataitaiga o le mataupu faavae o loo faamatala mai le tala. Mo se faataitaiga, a maeʻa ona faailoaina ma auiliiliina se mataupu faavae, atonu tatou te fesili, “E mafai ona e mafaufau i se taimi i tusitusiga paia na faataitaia ai e Iesu lenei mataupu faavae?” Po o le, “O anafea na e vaaia ai Iesu o faaalia lenei mataupu faavae i lou olaga pe mo oe foi?” Na fesili talu ai nei se tasi o tamaitiiti aoga i lena fesili e uiga i le faataitaiga a le Faaola o le agamalu. Na faasolosolo ona mafaufauga ma lagona i le auala agamalu lea na masani ona tausia ai o ia e le Faaola. O lenei aafiaga, i totonu o se potuaoga, na fatu ai ia te ia se naunautaiga loloto ina ia avea atili faapei o Keriso ma sili atu ona agalelei i tagata e faalagolago ia te ia, ao ia faalagolago atu i le Alii.

E mafai ona e faitauina uma tusi na tusia ae le maua se ata sili atu o mataupu faavae taitasi o le talalelei nai lo le maua i tala faatusipaia a Iesu Keriso ma Lana galuega e faavavau. O le mafaufau loloto ai i faataitaiga a le Alii i Ana matafaioi o Ieova, o le Keriso faaletino, ma le Faaola toetu o le a faateleina ai le mana ma le gafatia o a tatou tamaiti aoga e faia ni faatinoga mataalia, amiotonu. O le a ave a tatou lesona i tala atu o talatalanoaga e uiga i amioga lelei ma le pulea e le tagata o ia lava ma fesootai ia tamaiti aoga i le mana o le Faaola ma le fuafuaga e faavavau o le fiafia.

E ala i ata, e mafai faapefea ona tatou aoao atua le mataupu faavae o le faamaoni? E pei lava o le “aiaiga faavae sili ona lelei,” aua o le a sili ona faatuatuaina i tatou e tagata pe a tatou faamaoni? Pe o le amio sa’o e totonugalemu i le uiga o Keriso? Afai e tatau ona tatou faapei o Ia, e tatau la ona tatou aoao e mulimuli i Lana faataitaiga atoatoa i le faamaoni a’ia’i? O ituaiga lava ia o fesili e mafai ona fesiligia mo mataupu faavae taitasi o le talalelei.

Na aoaoina e Arthur Henry King lenei manatu ma le matagofie ina ua ia faapea mai, “Tatou te faatusaina le [lelei] i se tagata moni—o Iesu Keriso, le Alo o le Atua. O Ia o se tagata, ae le o se mataupu faavae, o se tagata ua i ai uma mataupu faavae. … Ma o le mulimuli i se tagata e matuai ese lava mai le mulimuli i se mataupu faavae. … Tatou te le tau galulue i suesuega faafilosofia faigata o uiga tauleleia. E le faatatau i lena mea. E tatau ona tatou suesue i Talalelei, vaavaai i mea na faia e Keriso, ma taumafai e faailoa atu i tatou lava i mea na ia faia. Ona ua tatou lagona le agaga o le Matai, le alofa o le Matai, ma ona ua tatou faatofuina i tatou lava i le talalelei, ua tatou iloa ai le mea e tatau ona tatou faia. O le talelei ua tatou teufatuina i totonu o i tatou ua mafai ai ona tatou lagona i soo se taimi mea e tatau ona tatou faia i se tulaga faapitoa.”¹⁰

O loo i ai se mana e oo mai pe a tatou faafesootaia a tatou taumafaiga e ola i le talalelei ia Iesu Keriso. Afai tatou te lagona o loo tau na ona tatou faatino ni mea, pe o le ola i le talalelei ua na o se lisi o galuega e fai, masalo ua tatou motusia mai le punavai o le alofatunoa ma le olioli o loo tatou sailia. Atonu o loo tatou faia uma mea e sa’o ae iloaina ai o loo misi ia i tatou le faailoga. O le talalelei e le o se lisi o manaoga; o le tala lelei a Iesu Keriso na faatoilaloina le agasala ma le oti. O Iesu Keriso o le tagata autu i le fuafuaga a lo tatou Tama oi le Lagi e fesoasoani ia i tatou ia avea faapei o Ia. O Ia o le faataitaiga atoatoa o le auala e tatau ona tatou ola ai ma le punavai o le mana faalelagi tatou te manaomia. A o tatou aoao e mulimuli i Lana faataitaiga ma fesootai a tatou taumafaiga e ola i le talalelei ia te Ia, o le a tatou maua le olioli i le avea ai ma Ona soo.

3. Vaavaai mo Faatusa ma Ata o Iesu Keriso

Tolu, e tatau ona tatou vaavaai mo faatusa ma ata¹¹ o le Faaola i olaga o perofeta ma isi alii ma tamaitai faatuatua e pei ona faamaumauina i tusitusiga paia. E pei ona aoao mai le perofeta o Iakopo, “Ma o mea uma na tuu mai e le Atua mai le amataga o le lalolagi, i le tagata, o ni faatusatusaga o ia.”¹²

Ona o lenei manatu, ina ua ou aoaoina le Feagaiga Tuai i le seminare, sa ou tuuina ni fasipepa lapopoa i le puipui i tua o le potu aoga. I le pito i luga o pepa taitasi sa ou tusia ai le igoa o se perofeta o le Feagaiga Tuai. Ina ua maea le ma suesueina o se vaega o le Feagaiga Tuai, sa ou fai atu i tamaiti aoga e mafaufau i mea na latou aoaoina e uiga i le perofeta na matou suesueina ma le auala na muai faailoa pe faamanatu mai ai e ona aafiaga ia i latou le Faaola. I le mavae ai o le aoaoina e uiga ia Atamu, sa tusia e tamaiti aoga mea e pei, “O Atamu o se atalii o le Atua.” “Sa ola pea o ia.” “Sa alu o ia i se faatoaga.” “Sa ia ofo e ave i ona lava luga le oti ina ia tatou ola.” E le umi ae fesili mai se tasi, “O tatou talanoa pea e uiga ia Atamu, pe o tatou talanoa ea e uiga ia Iesu?”

I lena taimi, sa vave ona sau se tamaitiiti aoga i le vasega ma faasoa mai ia te au lona aafiaga i le suesueina o tusitusiga paia. O le po ao lei faitau e uiga i taunuuga o le Pau o Atamu i le Mose 4, lea o loo faapea mai, “O laau tuitui foi, ma laau talatala o le a ia aumai ia te oe.”¹³ Talu ai ona sa ia aoao e fai atu le fesili, “E faapefea ona molimau lenei tala e uiga ia Keriso?”, sa taitaiina o ia e fesili atu, “Pe na silafia e Iesu ina ua Ia fetalai atu ia Atamu o le a Ia ofuina moni taunuuga o le Pau o se palealii talatala?”

Na maua e a matou tamaiti aoga se isi faataitaiga i le olaga o Iosefa o Aikupito, ma iloa ai le silia ma le 60 o auala na avea ai o ia ma se ituaiga o Faaola. Na faailoa mai e tagata aooga, o i laua uma sa alofagia e lo latou Tama, inosia e o latou uso, ma faatauina mo le tau o se tagata pologa. Sa latou maitauina le tutusa i o la faaosoosoga ma i le mea moni sa i ai lava le Atua ma i laua. O nei fesootaiga e sili atu nai lo na o se mea manaia e tusi. O soifuaga o perofeta filifilia a le Alii o faatusa ia o Ia ma aoao mai ia i tatou i Ona uiga paia. A faaaogaina lelei, o nei tulaga e mafai ona fesoasoani ia i tatou ia iloa atili Iesu ma avea atili e faapei o Ia.

O lo’u toalua o Kristi, sa aoao atu talu ai nei lenei tala faatusipaia e uiga ia Iosefa i Aikupito ma fesili atu i le vasega, “O a uiga FaaKeriso o loo e vaaia i le faataitaiga a Iosefa?” Sa matou talanoa e uiga i lona mafai ona liliu uma tofotofoga i se faamanuiaga. Sa matou talanoa e uiga i lona usiusitai, lona onosai, lona naunau e manatua i latou o loo manaomia le fesoasoani, ma lona naunau e faamagalo atu. O le fesili na mafua ai ona ou manatuaina se taimi muamua a o suesueina lenei tala ma le vaai faalemafaufau pe na faape’i ona faaali atu e Iosefa o ia lava i ona uso. Na faapea mai tusitusiga paia sa latou “matua atuatuvale i ona luma.”¹⁴ E mafai ona e mafaufau pe na faape’i lena taimi ma pe o a ni o latou lagona, i le iloaina o mea na latou faia? Ae sa tali atu Iosefa ia te i latou, “Ina soso mai ia ia te au … O aʻu o lo outou uso o Iosefa. … Aua nei tiga outou … aua na auina mai a’u e le Atua e muamua ia te outou e fai ma faaola.”¹⁵ A o ou vaai i lena mea na tupu i loʻu mafaufau, ua ou malamalama atili pe faape’ī pe a tatou tutu i luma o le Alii i le Aso Faamasino. E mautinoa lava e mafai ona ou mafaufauina o le a tatou manatuaina a tatou agasala ma mafai ona lagona le “atuatuvale” i le i ai i Lona afioaga. Ae e mafai foi ona ou vaai faalemafaufau o fetalai mai o Ia a o Ia si’i i tatou mai o tatou tulivae, “Ina soso mai ia ia te a’u, o au o lou uso. Na auina mai a’u e le Atua e fai ma faaola.”

A tatou taulai atu i faatusa ma ata o Iesu Keriso, e mafai ona tatou fesoasoani i a tatou tamaiti aoga ia iloa Ona uiga ma amioga e ala i le faia o fesili faapenei:

“O a amioga FaaKeriso e te vaaia i le olaga o lenei perofeta?”
“O anafea na faamanuiaina ai oe ona sa i ai ia Iesu lenei uiga?” Po o le, “Na faapefea ona faaalia e le Faaola lenei uiga mo oe?”
“O a mea e mafai ona e faia ina ia avea atili ai e pei o Iesu Keriso ma maua ai lenei uiga paia?” Po o le, “O a mea na e aoao e uiga i lou Tama oi le Lagi ma Iesu Keriso e musuia oe e faatino i le faatuatua e mulimuli ia te i Laua?”

Ma pe a tuuina mai e tamaiti aoga tali e pei o le “tatalo” po o le “faitau i tusitusiga paia,” o le a lelei ona tatou fesoasoani ia i latou e faafesootai atu na faatinoga i le Tama Faalelagi ma Iesu Keriso e ala i le fai atu o fesili e pei o le:

“E faapefea ona ‘ese au tatalo i le iloaina o le tagata o loo e talanoa i ai?”
“E faapefea ona e suesue i tusitusiga paia i se auala o le a fesoasoani ia te oe e te iloa lelei ai le Faaola ma avea atili ai faapei o Ia?”

O nei ituaiga o fesili o le a fesoasoani ia tatou tamaiti aoga ia atiae se mana sili atu ma se malosiaga ia iloa ai le Faaola ma aoao ai mai ia te Ia.

4. Tuuina Atu le Molimau Manino e uiga ia Iesu Keriso

O le mea lona fa e mafai ona tatou faia o le tuuina atu lea o molimau manino e uiga ia Iesu Keriso.

E tatau ona tatou talanoa soo e uiga ia te Ia ma le mamana sili atu ma le tele o le migao, faamemelo, ma le faafetai. E tatau ona tatou fefaasoaaʻi a tatou lava molimau, ma e tatau ona tatou sailia auala mataalia e valaaulia ai a tatou tamaiti aoga e fefaasoaai a latou molimau i le tasi ma le isi. I se talanoaga lata mai a se vasega i le mataupu faavae o le tatalo, na valaaulia ai e se faiaoga ia tagata aoga e mafaufau pe o le a le valaaulia a le Alii e tatalo ma Lana folafolaga e tali mai, ua aoao ai i tatou e uiga i le natura o lo tatou Tama oi le Lagi. Ona valaaulia lea o i latou e mafaufau i uiga o le Faaola, lea e mafai ai ona tatou tatalo i Lona suafa. Faatasi ai ma nei fesili faigofie, o se lesona e uiga i le tatalo na liliu atu i se avanoa mo tamaiti aoga e tuuina atu ai le molimau i le mana ma le alofa o lo tatou Tama oi le Lagi ma Lona Alo, o Iesu Keriso. Na tuua e tamaiti aoga faatasi ma le faateleina o le talisapaia o la latou sootaga ma le Atua ma mo le faamanuiaga maoae ua tuuina mai ia i tatou e tatalo ai i le suafa o Iesu Keriso, lo tatou Fautua i le Tama.

O le isi auala taua e molimau atu ai ia Iesu Keriso o le faatagaina lea o le molimau a perofeta, anamua ma aso nei, ina ia faalogoina i totonu o o tatou potu aoga. Fai mai le Aposetolo o Peteru o i tatou “o ni molimau na uluai filifilia e le Atua. … Ua na poloai mai foi ia te i matou e … molitino atu, o ia lava le ua tofia e le Atua. … Ua molitinoina mai o ia e le au perofeta uma.”¹⁶

Talu ai nei lava, na faia ai e Elder Robert D. Hales se faamatalaga na mafua ai ona ou manatunatu tele ai. Sa ia saunoa mai, “Ua tatou matamata, faalogo, faitau, suesue, ma faasoa atu upu a perofeta ina ia muai lapataiina ma puipuia ai i tatou. Mo se faataitaiga, “O Le Aiga: O Se Folafolaga i le Lalolagi” ua leva ona tuuina mai ae tatou te le i taitai oo i luitau ua feagai nei ma aiga. Ona ia faaopoopo lea o le manatu lenei, “O Le Keriso Soifua: O Le Molimau a Aposetolo” ua leva lava ona saunia mo le taimi o le a sili ona tatou manaomia ai.”¹⁷

E le o au o se tasi na tuuina atu i le atuatuvale ma le malaia, ae ua manino mai le mafuaaga na muai tuuina mai ai le folafolaga o matagi malolosi o loo agai faasagatau mai i aiga masani. Ma o le faalogo i se perofeta o saunoa mai o le malelega o le “Keriso Soifua” na mua’i tuuina atu “ao leʻi oʻo i le taimi o le a sili ona tatou manaʻomia ai” ou te manatu ai o isi matagi malolosi o le a agi mai, e faalavelaveina ai le faatuatua o a tatou tamaiti aoga ma a tatou fanau.

Ua tautino mai e le “O Le Keriso Soifua: O Le Molimau a le Au Aposetolo,” “Matou te tuuina atu la matou molimau i le moni o Lona soifua le mafaatusalia ma le aoga e le gata mai o Lana taulaga togiola sili. … O Ia o le Ieova Silisili o le Feagaiga Tuai, o le Mesia o le Feagaiga Fou. … Na ia femaliuai i auala o Palesitina, e faamalolo i e mama’i, faapupula i e tauaso, ma faatutu mai e na oti. Na Ia aoao atu upumoni o le faavavau. … Na Ia tuuina atu Lona soifua e togiola ai agasala a tagata uma. … Na toe tu mai o Ia mai le tuugamau e “avea ma faapolopolo o e ua momoe.’ … I le lalolagi i nei ona po, na faaali atu ai o Ia ma Lona Tama i le taulealea o Iosefa Samita, i le amataga o le oo mai o le ‘sauniga i le atoaga o tausaga.’ … Matou te ta’utino atu o le a i ai se aso e toe foi mai ai o Ia i le lalolagi … [ma] pule o Ia o le Tupu o Tupu ma nofotupu foi o le Alii o Alii. … Ou te molimau atu o Iesu o le Keriso soifua, le Alo tino ola pea o le Atua. O Ia o le Tupu silisili o Emanuelu, o loo afio i le taimi nei i le itu taumatau o Lona Tama. O Ia o le malamalama, o le ola, ma le faamoemoega o le lalolagi. Ia faafetaia le Atua mo le meaalofa lē mafaatusalia o Lona Alo paia lea.”¹⁸

O lenei molimau e uiga i perofeta a le Atua na tuuina mai a’o le’i oo i le taimi o le a sili ona manaomia ai e o tatou tamaiti aoga ma a tatou fanau. E tatau ona tatou fesoasoani ia latou totoina lenei molimau loloto i o latou mafaufau ma loto. E leai se mea e mafai ona tatou faia o le a sili atu ona faamanuiaina ai a tatou tamaiti aoga nai lo le fesoasoani ia i latou ia iloa Iesu Keriso. E tatau ona tatou fesoasoani ia i latou ia alolofa ia te Ia, mulimuli ia te Ia, ma taumafai ma le loto i ai ia avea faapei o Ia. I le molimau a perofeta a le Atua, ou te faaopoopo atu ai ma la’u molimau faamaualalo o Iesu o le Keriso, le Alo o le Atua ma o le Faaola o le lalolagi.

I le suafa paia o Iesu Keriso, amene.