Չնայած կեղծ մեղադրանքներին և ֆիզիկական հալածանքին՝ Պողոսը չլռեց: Նույնիսկ շղթայակապ վիճակում և ղեկավարների ու թագավորների առջև Պողոսը հավատարմորեն կիսվում է Հիսուս Քրիստոսի և Նրա ավետարանի մասին իր զորեղ վկայությամբ: Այս դասի նպատակն է օգնել ձեզ ավելի մեծ ցանկություն ունենալ՝ հետևելու Պողոսի օրինակին ձեր առօրյա կյանքում Հիսուս Քրիստոսի և Նրա ավետարանի մասին վկայելու հարցում:
Ուսանողներին առաջարկեք վկայել վարդապետության և սկզբունքների մասին. Օգնեք ուսանողներին հասկանալ, որ «վկայությունով կիսվելը ոչ միայն օրհնում է այն անձին, ով բերում է այդ վկայությունը, այլև կարող է ամրապնդել ուրիշների հավատքը և վկայությունները: … [Վկայությունը] կարող է ուղղակի անկեղծ և համոզմունքով լի հայտարարություն լինել այն մասին, թե հայտարարող մարդն ինչ է համարում ճշմարիտ: Դա կարող է լինել հասարակ հաստատում այն բանի, թե այդ մարդն ինչ է զգում ավետարանի վարդապետության կամ սկզբունքի մասին և այն ազդեցության մասին, որը դա ունեցել է իր կյանքի վրա» (Ավետարանի ուսուցում և ուսումնասիրություն․ Ձեռնարկ սեմինարիաների և կրոնի ինստիտուտների ուսուցիչների համար [2012], 33):
Ուսանողի նախապատրաստում. Ուսանողներին առաջարկեք խորհել և պատրաստ լինել կիսվելու փորձառությամբ, երբ նրանց վրա ազդեցություն է թողել որևէ մեկի վկայությունը:
Հնարավոր ուսումնական վարժություններ
Կիսվեք վկայությամբ
Երբ ուսանողները պատասխանեն հետևյալ հարցերին, հիշեցրեք այս դասի համար ուսանողի նախապատրաստման առաջարկի մասին:
Կրոնական կամ հոգևոր իմաստով վկայելը կամ վկայություն բերելը սովորաբար նշանակում է Սուրբ Հոգու կողմից տրված հոգևոր գիտելիքների վերաբերյալ անձնական համոզմունքներով կիսվելը (տես Սուրբ գրքերի ուղեցույց, « Վկայել » և « Վկայություն »):
Ե՞րբ եք զգացել ձեր սեփական վկայությունով կիսվելու կամ ուրիշի կողմից կիսված վկայությունը լսելու զորությունը: Այն ի՞նչ ազդեցություն է ունեցել ձեզ վրա:
Որքանո՞վ եք պատրաստակամ ձեր վկայություններով կիսվել ուրիշների հետ: Ինչո՞ւ որևէ մեկը կարող է երկմտել՝ վկայությունով կիսվելու գործում:
Ի՞նչ հարցեր և մտահոգություններ ունեք ուրիշներին ձեր համոզմունքների մասին վկայելու վերաբերյալ:
Այս դասի ժամանակ դուք կուսումնասիրեք Պողոսի վկայությունը Փրկիչի մասին և այն մասին, թե Փրկիչն ինչ ազդեցություն է թողել Պողոսի կյանքի վրա: Դուք նաև կսովորեք, թե ուրիշներն ինչպես արձագանքեցին Պողոսի վկայությանը: Այս դասն ուսումնասիրելիս մտածեք, թե Փրկիչն ինչպես կարող է օրհնել ձեր կյանքը, եթե դուք պատրաստ եք կիսվելու Նրա և Նրա ավետարանի մասին ձեր վկայությամբ՝ անկախ նրանից, թե, ձեր կարծիքով, ձեր վկայությունը հզոր է, թե ոչ:
Պողոս Առաքյալի վկայությունը
Չնայած Պողոսին ծեծեցին, քարկոծեցին և բանտարկեցին կեղծ մեղադրանքների հիման վրա, նա շարունակեց կիսվել Հիսուս Քրիստոսի և Նրա ավետարանի մասին իր վկայությամբ: Պողոսի պատմությունը կարդալիս փորձեք պատկերացնել, թե ինչ է տեղի ունենում այդ պատմության մեջ:
Դա կարող է լավ հնարավորություն լինել՝ ուսանողներին պատկերացնելու արդյունավետության մասին հիշեցնելու համար: Հորդորեք նրանց պատկերացնել, որ նրանք ներկա էին պատմությանը: Կարդալիս նրանք կարող են պատկերացնել, թե ինչ տեսարաններ կտեսնեին, ինչ ձայներ կլսեին կամ ինչ զգացմունքներ կունենային:
Հետևյալ հատվածները ներկայացնում են Պողոսի վկայությունը և նրան լսողների արձագանքը: Ընտրեք հատվածներից մեկը կարդալու համար և մտածեք, թե նրա վկայությունն ինչ ազդեցություն կունենար ձեզ վրա, եթե դուք այնտեղ լինեիք:
Կարող եք ուսանողների համար ցուցադրել հետևյալ տեղեկությունը: Եթե ժամանակը չի ներում, օգտակար կլինի շեշտել, որ ուսանողների համար պարտադիր չէ կարդալ բոլոր երեք վկայությունները:
Պողոսի վկայությունը
Մարդկանց արձագանքը
Պողոսը շղթայվեց Երուսաղեմում ձերբակալվելուց հետո: Նրանց թույլ տվեցին մարդկանց հետ խոսել Անտոնիայի ամրոցից դուրս:
Պողոսը ձերբակալվեց Երուսաղեմի տաճարից դուրս և բերվեց հրեա ղեկավարների մոտ: Նրան հարցաքննեցին և բանտարկեցին: Պողոսին ձերբակալած հռոմեացի հրամանատարը իմացավ հրեա հրոսակախմբի՝ Պողոսին սպանելու գաղտնի ծրագրի մասին և Պողոսին ուղարկեց Կեսարիա: Կեսարիայում Պողոսին թույլ տվեցին պաշտպանել իրեն հռոմեացի կուսակալ Ֆելիքսի առաջ:
Երկու տարի բանտում անցկացնելուց հետո Պողոսը հայտնվեց նոր կուսակալի առջև և պահանջեց, որ իրեն հնարավորություն տան խոսել Կեսարի հետ: Ագրիպպաս թագավորը լսեց Պողոսի վկայությունը Հռոմ գնալուց առաջ:
Երբ ուսանողներն ավարտեն վերը ներկայացված ընթերցման հանձնարարություններից մեկը, առաջարկեք նրանց կիսվել իրենց անձնական տպավորություններով՝ հետևյալ վարժությանն անցնելուց առաջ:
Ձեր օրագրում գրեք այն, ինչ սովորել եք: Չմոռանաք ներառել հետևյալ կետերը.
Ի՞նչն է առավել նշանակալից ձեզ համար Հիսուս Քրիստոսի և Նրա ավետարանի մասին Պողոսի վկայության մեջ:
Ինչո՞վ է Պողոսը տպավորել ձեզ այս հատվածներում:
Ձեր կարծիքով, ինչո՞ւ էր Պողոսը այնքան քաջ և ուժեղ՝ այսպիսի դժվարին իրավիճակներում Քրիստոսի մասին վկայելիս:
Ձեր կարծիքով, ինչո՞ւ է կարևոր կիսվել վկայությամբ, նույնիսկ, եթե ուրիշները մերժեն այն:
Մինչ ուսանողները կիսվեն իրենց պատասխաններով, ուշադիր լսեք՝ ճշմարիտ սկզբունքները գրատախտակին գրելու համար: Հնարավոր սկզբունքներից մեկն է. Հիսուս Քրիստոսի աշակերտները քաջաբար կիսվում են իրենց վկայություններով:
Կարդացեք հետևյալ հայտարարությունը և խորհեք, թե այն ինչպես կարող է ձեզ օգնել քաջություն ունենալ՝ Պողոսի նման վկայելու համար:
Շեշտելով, որ վկայությամբ ուրիշների հետ կիսվելը չպետք է կատարյալ լինի և փորձ է պահանջում, Երեց Դիտեր Ֆ. Ուխդորֆը Տասներկու Առաքյալների Քվորումից կիսվել է հետևյալով.
Նկար
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Ձեզ համար սովորական և բնական ձևով մարդկանց հետ կիսվեք, թե Հիսուս Քրիստոսն ու Նրա Եկեղեցին ինչու են կարևոր ձեզ համար
Հասկացեք, որ մարդկանց դարձի բերելը ձեր աշխատանքը չէ։ Դա Սուրբ Հոգու դերն է։ Ձեր դերն այն է, որ կիսվեք նրանով, ինչ կա ձեր սրտում և կայուն ապրեք ձեր հավատքում։
Սուրբ գրությունների ուսումնասիրության ձեր օրագրում գծեք երկու սյունակ: Առաջին սյունակում գրանցեք ձեր վկայությունները, այդ թվում անձնական փորձառությունները, որոնք ամրապնդել են և կառուցել են Երկնային Հոր, Հիսուս Քրիստոսի և Նրանց ավետարանի մասին ձեր վկայությունը: Երկրորդ սյունակում գրանցեք մտքեր և տպավորություններ այն մասին, թե առօրյա կյանքում ինչպես եք ուրիշների հետ կիսվում այդ վկայությամբ Պողոսի օրինակով:
Կարող եք կիսվել (և թույլ տալ ուսանողներին կիսվել) վկայությամբ, ինչպես նաև մտքերով, տպավորություններով և գաղափարներով սովորական և բնական կերպով վկայելու մասին: Դա անելիս շեշտեք Փրկիչի վկայելու օրինակը: Դա կարող է արվել հետևյալ հարցերը քննարկելուց առաջ կամ հետո:
Դուք կարող եք երկմտել կամ նյարդայնանալ Փրկիչի մասին վկայելիս: Ձեզ ինչպե՞ս կարող է օգնել միտքը այն մասին, թե Փրկիչն ինչպես է վերաբերվում Իր մասին վկայելու ձեր ջանքերին:
Բացատրական և պատմական տեղեկություններ
Որտե՞ղ կարող եմ ավելի շատ բան սովորել այն մասին, թե ինչ է վկայությունը, և ինչպես կարող եմ ամրապնդել իմ վկայությունը
Որպեսզի հասկանաք, թե ինչ է վկայությունը, և ինչպես կարող եք ամրապնդել ձեր վկայությունը, կարդացեք Ավետարանական թեմաների «Վկայություն» հոդվածը (topics.ChurchofJesusChrist.org):
Տեսնելու համար, թե ուրիշներն ինչպես են ամրապնդել իրենց վկայությունը, կարող եք դիտել «Ամրապնդեք ձեր վկայությունը» տեսանյութը (4:59) ChurchofJesusChrist.org կայքում:
Ինչո՞ւ է կարևոր, որ ես անվեհեր լինեմ իմ վկայության մեջ
Երեց Քվենթին Լ. Քուքը Տասներկու Առաքյալների Քվորումից ուսուցանել է.
Նկար
Official portrait of Elder Quentin L. Cook. Called to the Quorum of the Twelve Apostles on 6 October 2007.
«Հիսուսի վկայության մեջ անվեհեր լինելը» [ վարդապետություն և Ուխտեր 76․79 ] պարզ, հիմնական ստուգարք է նրանց միջև, ովքեր կժառանգեն սելեստիալ արքայության օրհնությունները, և նրանց միջև, ովքեր կժառանգեն ավելի ցածր՝ թերեստրիալ արքայության օրհնությունները: …
Հիսուսի վկայության մեջ անվեհեր լինելը ցատկահարթակ է Փրկիչի շնորհին և սելեստիալ արքայությանն արժանանալու համար:
Ինչպե՞ս կարող եմ հասարակ և բնական եղանակով կիսվել իմ վկայությամբ
Տեսնելու համար, թե դուք ինչպես կարող եք հասարակ և բնական եղանակով կիսվել ձեր վկայությամբ, դիտեք «Կիսվեք ձեր համոզմունքներով» տեսանյութը (2:02) ChurchofJesusChrist.org կայքում: Կարող եք նաև հետազոտել «Կիսվեք ավետարանով. Կիսվեք առցանց» էջը ChurchofJesusChrist.org կայքում կամ կարդալ «Ծառայելու սկզբունքներ. Թե ինչպես ավելի բնական եղանակով կիսվել վկայությամբ» (Ensign, մարտ 2019, 8-11):
Կարող եք ուսանողներին օգնել հասկանալ Պողոսի վկայության ազդեցությունը՝ կարդալով Ջոզեֆ Սմիթի զգացմունքները Պողոսի մասին, որոնցով նա կիսվել է Ջոզեֆ Սմիթ - Պատմություն 1:21-25 հատվածներում: Ջոզեֆ Սմիթն ինչո՞ւ էր իրեն կապված զգում Պողոսի հետ: Ձեր կարծիքով, Ջոզեֆն ինչպես ամրապնդվեց Պողոսի վկայության շնորհիվ: Պողոսի փորձառություններն ինչո՞վ են առնչվում ձեզ հետ այսօր: Պողոսի վկայությունը և փորձառություններն ինչպե՞ս կարող են օգնել ձեզ:
Օգնեք ուսանողներին պատկերացնել
Որպեսզի ուսանողներին օգնեք պատկերացնել Պաղոսի՝ Ագրիպպայի առաջ արված վկայությունը կարող եք դիտել «Պողոս՝ ընտրուած անոթ» 3:36-8:36-ը ChurchofJesusChrist.org կայքում:
Այս շաբաթ Եկ, հետևիր ինձ ծրագիրը ներկայացնում է այն ճշմարտությունը, որ «Հիսուս Քրիստոսի աշակերտները քաջաբար կիսվում են իրենց վկայություններով» (տես «հուլիսի 31-ից օգոստոսի 6-ը: Գործք Առաքելոց 22–28. «Ծառա եւ վկա» Եկ, հետևիր ինձ. Անհատների և ընտանիքների համար. Նոր Կտակարան 2023): Այն հրավիրում է բոլորին մտածել իրենց վկայություններով կիսվելու հնարավորությունների մասին: Կարող եք ուսանողներին հարցնել՝ արդյոք նրանք արել են դա և առաջարկել նրանց, ովքեր դա արել են, կիսվել իրենց փորձառություններով: Եթե ուսանողները դա չեն արել, հիշեցրեք, որ նրանք հնարավորություն կունենան Եկ, հետևիրինձ ուսումնասիրության շրջանակներում: