Migakos ang usa ka Hispanic nga tawo sa Manluluwas, si Jesukristo. Si Kristo nagsul-ob og puti nga kupo.
Sa panahon diin ang mga miyembro sa Simbahan sa Roma nagkulang og pagkahiusa ug nabahin-bahin sa daghang importanteng mga isyu, si Pablo nagsulat ngadto kanila mahitungod sa unsaon nila pagsunod sa Espiritu aron maangkon ang Pag-ula ni Jesukristo sa pagbuntog sa ilang napukan nga kinaiya. Si Pablo misaad nga kon ila kining buhaton, sila mahimong isigkamanununod uban ni Jesukristo sa tanang anaa sa Langitnong Amahan. Sa imong pagtuon, tinguhaa nga madugangan ang imong tinguha sa pagsunod sa Espiritu ug makadawat sa tanan nga anaa sa Langitnong Amahan.
Unsay gusto nimong masunod?
Kon kamo makapili ni bisan kinsa nga makapanunod sa usa ka butang, kinsa ang imong pilion? Ngano man?
Unsay imong gusto nga masunod gikan niining tawhana?
Si Apostol Pablo misulat ngadto sa mga Santos sa Roma mahitungod sa kabilin nga gitanyag sa Langitnong Amahan alang sa matag usa sa Iyang mga anak. Basaha ang Mga Taga-Roma 8:16–17, 32, ug markahi unsa ang gitanyag kanato sa Langitnong Amahan. Mahimong makatabang ang pagkasayod nga ang usa ka manununod “usa ka tawo [nga] gihatagan og katungod sa pagpanunod sa yutan-on ug espirituhanon nga mga gasa” (Giya sa mga Kasulatan, “Manununod,” scriptures.ChurchofJesusChrist.org).
Unsa nga mga pulong o hugpong sa mga pulong ang imong gimarkahan?
Unsa sa imong hunahuna ang gipasabot nga mahimong isigkamanununod ni Jesukristo?
Usa sa mga kamatuoran niining mga bersikulo nga makatabang nato sa pagsabot mao nga ang Langitnong Amahan nagtinguha nga mapanalanginan kita sa tanang anaa Kaniya (tan-awa usab sa Doktrina ug mga Pakigsaad 76:55; 84:38).
Nagpasabot sa kabilin nga gitinguha sa Langitnong Amahan nga panalanginan kita, si Presidente Dieter F. Uchtdorf, kanhi sa Unang Kapangulohan, mitudlo:
Imahe
Opisyal nga hulagway ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga hulagway niadtong 2008 nga gipuli sa litrato nga gikuha niadtong 2004.
Dili nako mahunahuna ang tanan nga may kalabotan niini nga saad. Apan nasayod ko nga dako kaayo kini, balaanon, mahangtoron, ug takos sa tanan natong paningkamot.
(Dieter F. Uchtdorf, “Upat Ka Tawag,” Liahona, Mayo 2013, 60)
Paggahin og higayon sa paghunahuna mahitungod sa unsa kaha ang ipasabot sa pagsunod sa tanang anaa sa Langitnong Amahan, ug ikonsiderar unsang mga pangutana ang lagmit anaa kanimo mahitungod niining kamatuoran. Ikonsiderar unsang mga kinaiya, mga hiyas, ug uban pang mga panalangin ang imong gustong masunod gikan sa Langitnong Amahan. Sa imong pagpadayon sa pagtuon karon, pangitaa ang mga kamatuoran nga makatabang kanimo nga mas makasabot sa kabilin nga gitinguha sa Langitnong Amahan aron ipanalangin kanimo ug unsa ang imong mabuhat aron mahimong angayan alang niini.
Pagkat-on og dugang mahitungod sa kabilin sa Langitnong Amahan
Himoa ang mosunod nga tsart diha sa imong journal sa pagtuon:
Mga panalangin nga gusto sa Langitnong Amahan nga atong mapanunod
Unsa ang atong mabuhat aron mahimong angayan alang niini nga kabilin
Sa atong dispensasyon, ang Ginoo mipadayag og dugang mahitungod sa kabilin nga gitinguha sa Langitnong Amahan nga ihatag kanato. Isip kabahin sa usa ka pagpadayag nga gihatag ngadto kang Propeta Joseph Smith ug natala sa unsay giila karon nga Doktrina ug mga Pakigsaad 76, ang Ginoo naghulagway niadtong kinsa ang makapanunod ugma damlag sa celestial nga gingharian.
Tun-i ang Doktrina ug mga Pakigsaad 76:50–70 ingon man ang uban sa mga pangtulon-an ni Pablo sa Mga Taga-Roma 8:1, 5–9, 13–14, lakip na ang Hubad ni Joseph Smith alang sa Mga Taga-Roma 8:8–9, nga anaa sa mga footnote. Sa imong pagtuon, idugang sa imong tsart ang mga saad nga imong nabasa ug unsa ang gisulti sa mga bersikulo nga imong mahimo aron mahimong angayan alang niadto nga mga saad. Hinumdomi nga bisan tuod pipila niini nga mga bersikulo naggamit og mga pulong sama sa “anak nga mga lalaki” ug “mga tawo,” ang mga saad sa Dios parehas nga magamit sa tanang mga anak sa Langitnong Amahan (tan-awa sa Doktrina ug mga Pakigsaad 25:1). Mahimo usab nga makatabang ang pagkasayod nga ang pulong “lawasnon,” nga nasulti sa Mga Taga-Roma 8, nagtumong sa usa ka tawo nga nakapokus sa kalibotanon o temporal nga mga butang. Kini mahimo usab nga magpasabot sa mga gana sa unod (tan-awa sa Giya ngadto sa mga Kasulatan, “Kalibotanon,” scriptures.ChurchofJesusChrist.org).
Unsa nga mga bersikulo gikan sa imong pagtuon ang labing makahuluganon nganha kanimo? Ngano man?
Unsa ang natabang niining mga bersikulo kanimo aron mas makasabot mahitungod sa kabilin nga gitinguha sa Dios nga ihatag kanimo? Unsa ang imong mabuhat aron mahimong angayan alang niana nga kabilin?
Sa tsart nga imong gihimo sa imong journal sa pagtuon, irebyo unsa ang imong gisulat, lakip na ang mga panalangin nga gustong ipanunod kanimo sa Langitnong Amahan.
Unsa ang natabang niining gisaad nga mga panalangin kanimo nga makasabot mahitungod sa Langitnong Amahan ug ni Jesukristo?
Unsa ang tahas sa Manluluwas sa pagtabang kanato nga makadawat niini nga maong kabilin? (tan-awa sa Doktrina ug mga Pakigsaad 76:69).
Sa unsang paagi kini makaapekto sa imong kinabuhi?
Paghunahuna sa makadiyot kon sa unsang paagi ang pagsabot sa kabilin nga gitinguha sa Langitnong Amahan nga mahatag kanimo makaapekto sa imong kinabuhi ug sa mga pagpili nga imong himoon.
Karon ikonsiderar kon sa unsang paagi ang mga kamatuoran nga imong gitun-an karon makaapekto sa mga tinedyer sa mosunod nga mga senaryo:
Si Estelle nakasinati og daghang mga kalisdanan sa iyang kinabuhi ug mibati og walay kadasig. Naghunahuna siya kon ang pagpadayon sa pagsimba ug pagsunod sa mga sugo mapuslanon ba.
Si Calvin ganahan kaayo sa makapahibulong nga teknolohiya nga ikatanyag sa kalibotan. Siya naggahin sa kadaghanan sa iyang panahon sa pagdula og mga video game, paggamit sa social media, o paglantaw og mga video.
Si Liz kanunay nakigbisog sa mga pagbati og kaubos sa bili sa kaugalingon ug naghunahuna kon aduna bay bisan usa nga tinuod nga nagpakabana kaniya.
1. Buhata ang mosunod diha sa imong journal sa pagtuon:
Pagpili og usa sa mosunod nga mga senaryo (o paghunahuna og usa ka lahi nga senaryo). Pagsulat og mubo nga sulat ngadto sa tawo sa senaryo nga imong gipili, ipakigbahin ang mga kamatuoran ug mga kasulatan nga imong natun-an niini nga leksiyon nga mahimong makatabang sa tawo sa ilang sitwasyon. Ang mosunod nga mga pangutana lagmit makatabang alang kanimo nga ikonsiderar samtang magsulat kamo sa imong mubo nga sulat:
Unsa ang ipasabot alang kanimo nga kita makadawat sa tanang anaa sa Langitnong Amahan ug kang Jesukristo?
Sa unsang paagi nga ang pagsabot niining kabilin makatabang sa tawo sa senaryo nga imong gipili?
Unsa ang nabuhat sa Langitnong Amahan ug ni Jesukristo aron mahimong posible alang kanato ang pagdawat niining mga panalangin?
Unsa ang pipila sa yano nga mga butang nga mahimong sugdan og buhat sa tawo gikan sa imong senaryo nga makatabang kanila sa ilang sitwasyon?
Opsiyonal: Gustong Makakat-on Pa og Dugang?
Sa unsang paagi ang paghinumdom sa atong kabilin makatabang kanato?
Si Presidente Elaine S. Dalton, kanhi Kinatibuk-ang Presidente sa Young Women, mipakigbahin og usa ka istorya mahitungod sa usa ka hari nga naghulagway niini nga leksiyon:
Imahe
Kataposang opisyal nga hulagway ni Sister Elaine S. Dalton, kinatibuk-ang kapangulohan sa Young Women, 2008. Gi-release isip ikaduhang magtatambag ug gipaluyohan isip unang magtatambag atol sa Abril 2007 nga kinatibuk-ang komperensiya. Gipaluyohan isip presidente sa Abril 2008 nga kinatibuk-ang komperensiya. Gi-release isip presidente sa Abril 2013 nga kinatibuk-ang komperensiya.
[Ang hari] adunay dili matarog nga kahibalo sa iyang pagkasiya. Isip usa ka batan-on, siya gikidnap sa daotang mga tawo kinsa mipapahawa sa trono sa iyang amahan, ang hari. Kining mga tawhana nasayod nga kon madaot nila ang iyang dungog, dili siya mahimong makapanunod sa trono. Sulod sa unom ka bulan siya ilang gisulayan sa tanang malaw-ay nga butang nga matanyag sa kinabuhi, ug bisan niana wala siya motugyan sa pagpamugos. Nakapalibog kini sa iyang mga magbibihag, ug human mabuhat ang tanan nga ilang nahunahunaan, nangutana sila kon ngano nga siya adunay sama ka lig-on nga moralidad. Ang iyang tubag yano lamang. Siya miingon, “Dili ko makahimo sa imong gipangayo, tungod kay ako gipakatawo nga mahimong usa ka hari” [tan-awa sa Vaughn J. Featherstone, “The King’s Son,” New Era, Nob. 1975, 35].
Sama sa anak sa hari, ang matag usa kanimo adunay napanunod nga harianong katungod. Ang matag usa kanimo adunay langitnong panulundon.
Unsa nga klase sa paningkamot ang gikinahanglan aron padayon nga masunod ang Espiritu ug makadawat sa tanang anaa sa Langitnong Amahan?
Samtang nagserbisyo isip sakop sa Seventy, si Elder Bruce C. Hafen mipasabot:
Imahe
Kataposang opisyal nga hulagway ni Elder Bruce C. Hafen sa Unang Korum sa Seventy, 2007. Gitawag isip presidente sa St. George Utah Temple sugod niadtong Nobiyembre 2010. Gihatagan og emeritus nga estado niadtong Oktubre 2010 nga kinatibuk-ang komperensiya.
Kon atong tinguhaon “tanan nga [ang] anaa sa Amahan” [ Doktrina ug mga Pakigsaad 84:38 ], ang Dios mangayo sa tanang anaa kanato. Aron mahimong kwalipikado sa ingon nga matahom nga bahandi, sa bisan unsang paagi atoa, kita kinahanglang mohatag sa paagi sa paghatag ni Kristo—matag tulo nga anaa Kaniya: “Unsa ka hilabihan kaanindot ikaw wala masayod, oo, unsa kalisod sa pag-antos ikaw wala masayod” [Doktrina ug mga Pakigsaad 19:15]. Si Pablo miingon, “Kon mao nga kita mag-antos uban kaniya,” kita “isigkamanununod uban ni Kristo” [Mga Taga-Roma 8:17]. Ang tibuok Niyang kasingkasing, ang tanan natong mga kasingkasing.
(Bruce C. Hafen, “Ang Pag-ula: Ang Tanan alang sa Tanan,” Liahona,Mayo 2004, 98)
Nganong gitudlo ni Pablo nga kita kinahanglan mahimong mga anak sa Dios kon kitang tanan Iyang mga anak?
Bisan tuod ang matag tawo literal nga usa ka espirituhanong anak sa langitnong mga ginikanan, ang mga pagtulon-an ni Pablo mahitungod sa “ang Espiritu sa mapahiangayon” ug ang pagkahimong “mga anak nga lalaki [ug mga anak nga babaye] sa Dios” (tan-awa sa Mga Taga-Roma 8:14–15) makatabang kanato sa pagsabot nga kita gipakatawo pag-usab nga espirituhanon, o gisagop, isip mga anak ni Kristo sa pakigsaad sa ebanghelyo (tan-awa sa Giya ngadto sa mga Kasulatan, “ Pakigsaad,” scriptures.ChurchofJesusChrist.org).
Ang katawhan ni Hari Benjamin nakasinati niining matang sa espirituhanong pagkatawo pag-usab, hinungdan nga si Benjamin nakaobserbar, “Ug karon, tungod sa pakigsaad diin kamo nakahimo kamo pagatawgon nga mga anak ni Kristo, iyang anak nga mga lalaki, ug iyang anak nga mga babaye; kay tan-awa, niining adlawa siya sa espirituhanon nga paagi nagpakatawo kaninyo” (Mosiah 5:7). Ang pagkahimong mga anak nga lalaki ug mga anak nga babaye ni Jesukristo pinaagi sa espirituhanong pagpakatawo pag-usab mahinungdanon alang sa pagkahimong angayan sa tanang anaa sa Langitnong Amahan (tan-awa sa Mosiah 27:25–26).
