រ៉ូម ៤–៥
សេចក្ដីជំនឿ កិច្ចការទាំងឡាយ និងព្រះគុណ
នៅក្នុងសំបុត្ររបស់លោកទៅកាន់សាសន៍រ៉ូម ប៉ុលបានព្យាយាមជួយពួកបរិសុទ្ធនៅក្រុងរ៉ូមឲ្យយល់ពីព្រះគុណរបស់ព្រះគ្រីស្ទ តាមរយៈការបង្រៀនអំពីទំនាក់ទំនងនៃព្រះគុណទៅនឹងសេចក្តីជំនឿ និងកិច្ចការទាំងឡាយ ។ ការបង្រៀនរបស់ប៉ុលអាចជួយយើងឲ្យយល់កាន់តែស៊ីជម្រៅអំពីតម្រូវការរបស់យើងដើម្បីទទួលបានការលើកលែងទោស និងសេចក្ដីសង្គ្រោះតាមរយៈព្រះគុណនៃព្រះយេស៊ូវគ្រីស្ទ ។ មេរៀននេះនឹងជួយអ្នកឲ្យបង្កើនការយល់ដឹង និងការដឹងគុណរបស់អ្នកចំពោះព្រះគុណនៃព្រះយេស៊ូវគ្រីស្ទ ។
តើអ្វីទៅដែលនឹងជួយសង្គ្រោះអ្នក ?
សូមស្រមៃថា អ្នកហៀបនឹងស្លាប់ដោយការស្រេកទឹកនៅក្នុងទីរហោស្ថានមួយ ហើយមានទឹកមួយដបនៅលើទីទួលមួយនៅក្បែរអ្នក ។ តើចំណុចនីមួយៗខាងក្រោមនេះមានសារៈសំខាន់យ៉ាងណាចំពោះការរស់រានរបស់អ្នក ?
១. សូមសរសេរអត្ថបទខាងក្រោម ហើយគូររូបភាពដែលស្រដៀងនឹងអត្ថបទនេះដាក់នៅក្នុងសៀវភៅកំណត់ហេតុការសិក្សារបស់អ្នក ។
-
ជំនឿរបស់អ្នកថា ទឹកនោះអាចសង្គ្រោះអ្នកបាន
-
ការខិតខំប្រឹងប្រែងរបស់អ្នកដើម្បីទៅដល់ទឹកនោះ
-
ទឹក
-
ហេតុអ្វីបានជាទឹកគឺជាវត្ថុតែមួយគត់ដែលជួយឲ្យអ្នកមិនឲ្យស្លាប់ដោយសារការស្រេកទឹក ?
-
ហេតុអ្វីបានជាជំនឿទៅលើទឹក និងការប្រឹងប្រែងដើម្បីទទួលបានទឹកនោះមិនគ្រប់គ្រាន់ ?
-
តើជំនឿរបស់អ្នក ការប្រឹងប្រែងរបស់អ្នក និងទឹក ទាំងបីមុខនេះដំណើរការរួមគ្នាយ៉ាងដូចម្តេចទៅ ?
សាច់រឿងនេះអាចជួយអ្នកឲ្យយល់ពីការបង្រៀនរបស់ប៉ុលអំពីរបៀបដែលសេចក្ដីជំនឿ កិច្ចការទាំងឡាយ និងព្រះគុណទាក់ទងនឹងការរាប់ជាសុចរិត ។
-
តើអ្នកនឹងកំណត់ន័យពាក្យថា សេចក្ដីជំនឿ កិច្ចការទាំងឡាយ និង ព្រះគុណ យ៉ាងដូចម្ដេច ?
វាអាចនឹងមានប្រយោជន៍ក្នុងការពិនិត្យមើលនិយមន័យនៃពាក្យទាំងនេះនៅក្នុង មេរៀនអំពីរ៉ូម ២–៣ ឬនៅក្នុង សេចក្ដីណែនាំដល់បទគម្ពីរទាំងឡាយ នៅលើគេហទំព័រ ( scriptures.ChurchofJesusChrist.org) ។
នៅសម័យរបស់ប៉ុល ពួកគ្រីស្ទានសាសន៍យូដាខ្លះបានជឿថា ពួកគេត្រូវបានសង្រ្គោះដោយសារកិច្ចការទាំងឡាយរបស់ពួកគេក្នុងការធ្វើតាមច្បាប់របស់លោកម៉ូសេ ។ ប៉ុលបានព្យាយាមកែតម្រូវការយល់ខុសនេះ ។ សូមអាន ការបកប្រែដោយ យ៉ូសែប ស្ម៊ីធ នៃ រ៉ូម ៤:១៦ [ នៅក្នុង រ៉ូម ៤:១៦ footnote a ] ។
-
តើខគម្ពីរនេះបង្រៀនអ្វីខ្លះអំពីរបៀបដែលយើងត្រូវបានរាប់ជាសុចរិត ឬបានលើកលែងទោសពីអំពើបាបរបស់យើង ?
នៅក្នុងខគម្ពីរនេះ ប៉ុលបង្រៀនថា យើងត្រូវបានរាប់ជាសុចរិតដោយសារសេចក្ដីជំនឿ និងកិច្ចការទាំងឡាយតាមរយៈព្រះគុណនៃព្រះយេស៊ូវគ្រីស្ទ ។
២. សូមដាក់ស្លាករូបភាពដែលអ្នកគូរតាមវិធីខាងក្រោម ហើយសរសេរចម្លើយចំពោះសំណួរទាំងពីរនៅពីក្រោមរូបភាពនេះ ៖
សូមសរសេរពាក្យ សេចក្ដីជំនឿ កិច្ចការទាំងឡាយ និង ព្រះគុណ នៅជាប់នឹងឃ្លាមកពីរូបភាពរបស់អ្នក ដែលត្រូវគ្នានឹងពាក្យនីមួយៗ ។
-
តើអ្នកអាចរៀនអ្វីខ្លះមកពីដំណើររឿងប្រៀបប្រដូចនេះអំពីសេចក្តីជំនឿ និងកិច្ចការទាំងឡាយ ?
-
តើអ្នកអាចរៀនអ្វីខ្លះមកពីដំណើររឿងប្រៀបប្រដូចអំពីព្រះគុណនៃព្រះអង្គសង្គ្រោះ ?
ការយល់ដឹងបន្ថែមអំពីព្រះគុណរបស់ព្រះយេស៊ូវគ្រីស្ទ
ព្រះគុណរបស់ព្រះយេស៊ូវគ្រីស្ទអាចឲ្យយើងត្រូវបានរាប់ជាសុចរិត ឬបានលើកលែងទោសពីអំពើបាបរបស់យើង ហើយព្រះគុណរបស់ទ្រង់ក៏ប្រទានពរដល់យើងតាមរបៀបជាច្រើនទៀតផងដែរ ។ ព្រះយេស៊ូវគ្រីស្ទមិនគ្រាន់តែប្រទានទឹកសង្គ្រោះជីវិតប៉ុណ្ណោះទេ ប៉ុន្តែទ្រង់ក៏ពង្រឹងសេចក្តីជំនឿ និងការខិតខំរបស់យើង ដើម្បីឲ្យយើងអាចទទួលបានទឹកផងដែរ ។ យើងអាចមានពរជ័យ តាមរយៈព្រះគុណនៃទ្រង់ពីមុន អំឡុងពេល និងក្រោយពីពេលដែលយើងអនុវត្តសេចក្ដីជំនឿទៅលើទ្រង់ ហើយប្រព្រឹត្តការល្អ ។
ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយបានបង្រៀន ៖
ពេញមួយជីវិតយើង ព្រះគុណនៃព្រះស្រោចស្រពខាងសាច់ឈាម និងអំណោយទានខាងវិញ្ញាណ ដែលបង្កើនសមត្ថភាពយើង ហើយធ្វើឲ្យជីវិតយើងរីកចម្រើន ។ ព្រះគុណទ្រង់ដុសខាត់យើង ។ ព្រះគុណទ្រង់ជួយយើងឲ្យក្លាយជាបុគ្គលដ៏ល្អបំផុត ។
( ឌៀថើរ អេស្វ អុជដូហ្វ « The Gift of Grace » Liahona ខែ ឧសភា ឆ្នាំ ២០១៥ ទំព័រ ១០៨ )
-
តើព្រះគុណរបស់ព្រះអង្គសង្គ្រោះអាចជួយអ្នកឲ្យក្លាយជាបុគ្គលដ៏ល្អបំផុតដោយរបៀបណា ?
សូមអានវគ្គបទគម្ពីរខាងក្រោម ហើយរកមើលពរជ័យផ្សេងទៀតដែលទាក់ទងនឹងព្រះគុណរបស់ព្រះអង្គសង្គ្រោះ ។
-
តើពរជ័យអ្វីបន្ថែមទៀតដែលអាចមានមកពីព្រះយេស៊ូវគ្រីស្ទ តាមរយៈព្រះគុណរបស់ទ្រង់ ?
-
តើពេលណាដែលអ្នកបានដកពិសោធន៍ព្រះគុណរបស់ព្រះអង្គសង្គ្រោះនៅក្នុងជីវិតរបស់អ្នក ?
-
តើព្រះគុណនេះមានឥទ្ធិពលយ៉ាងណាទៅលើអារម្មណ៍របស់អ្នកអំពីព្រះអង្គសង្គ្រោះ ?
ការយាងអញ្ជើញព្រះគុណរបស់ព្រះអង្គសង្គ្រោះមកក្នុងជីវិតរបស់អ្នក
ប្រធាន អុជដូហ្វ បានផ្តល់ការយល់ដឹងនេះអំពីរបៀបដែលអ្នកអាចទទួលបានព្រះគុណរបស់ព្រះយេស៊ូវគ្រីស្ទយ៉ាងពេញលេញបន្ថែមទៀត ៖
ព្រះគុណគឺជាអំណោយពីព្រះ ហើយបំណងប្រាថ្នាយើងក្នុងការគោរពប្រតិបត្តិតាមបញ្ញត្តិព្រះ គឺជាការបង្ហាញដល់ព្រះវរបិតាសួគ៌ថា យើងចង់ទទួលបានអំណោយពិសិដ្ឋនេះ ។
( ឌៀថើរ អេស្វ អុជដូហ្វ « The Gift of Grace » Liahona ខែ ឧសភា ឆ្នាំ ២០១៥ ទំព័រ ១១០ )
៣. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើគំនិត និងអារម្មណ៍អ្វីកើតមានដល់អ្នក នៅពេលអ្នកគិតអំពីឥទ្ធិពលនៃព្រះគុណរបស់ព្រះយេស៊ូវគ្រីស្ទនៅក្នុងជីវិតរបស់អ្នក ?
-
តើអ្នកអាចធ្វើអ្វីខ្លះដើម្បីយាងអញ្ជើញព្រះគុណនៃព្រះយេស៊ូវគ្រីស្ទឲ្យកាន់តែពេញលេញនៅក្នុងជីវិតអ្នក ?
ជម្រើស ៖ តើចង់រៀនសូត្របន្ថែមទៀតទេ ?
តើយើងអាចទទួលស្គាល់តម្រូវការរបស់យើងដើម្បីមានព្រះគុណដោយរបៀបណា ?
ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយ បានសួរសំណួរខាងក្រោមអំពី តម្រូវការរបស់យើងដើម្បីមានព្រះគុណ ៖
តើយើងយល់ពីការជំពាក់បំណុលរបស់យើងនឹងព្រះវរបិតាសួគ៌ ហើយអង្វរដោយអស់ពីព្រលឹងយើង ដើម្បីបានព្រះគុណនៃព្រះដែរឬទេ ?
កាលយើងលុតជង្គង់អធិស្ឋាន តើយើងអួតអាងពីទង្វើឆ្នើមនៃសុចរិតភាពរបស់យើង ឬជាការសារភាពកំហុស ដោយអង្វរសូមក្ដីមេត្តាករុណា ហើយសម្រក់ទឹកភ្នែកថ្លែងអំណរគុណចំពោះផែនការនៃការប្រោសលោះដ៏អស្ចារ្យដែរឬទេ ?
( ឌៀថើរ អេហ្វ អុជដូហ្វ « The Gift of Grace » Liahona ខែ ឧសភា ឆ្នាំ ២០១៥ ទំព័រ ១០៩ )
តើអ្វីជាឧទាហរណ៍នៃព្រះគុណដែលធ្វើការក្នុងជីវិតរបស់នរណាម្នាក់ ?
វីដេអូ « Faith Journey: When Parents Get Divorced » ( ៣:០៥ ) ដែលមាននៅលើគេហទំព័រ ChurchofJesusChrist.org បង្ហាញពីបទពិសោធន៍របស់ស្ត្រីម្នាក់ដែលបានរកឃើញថា ព្រះគុណនៃព្រះយេស៊ូវគ្រីស្ទបានជួយនាងឲ្យឆ្លើយតបនឹងការលែងលះរបស់ឪពុកម្តាយនាង ។
រ៉ូម ៤:១៦ ។ ហេតុអ្វីបានជាអ័ប្រាហាំត្រូវបានប្រើជាគំរូនៃការត្រូវបានរាប់ជាសុចរិត ?
ដើម្បីកែតម្រូវគំនិតដែលថាមានតែអ្នកដែលបានកាត់ស្បែក ហើយកំពុងកាន់ក្រឹត្យវិន័យលោកម៉ូសេប៉ុណ្ណោះទើបអាចសង្គ្រោះបាន នោះប៉ុលបានបង្រៀនថា អ័ប្រាហាំបានទទួលពរ មុន ពេលលោកបានកាត់ស្បែក ហើយជាច្រើនសតវត្សរ៍មុនពេលដែលមានក្រឹត្យវិន័យលោកម៉ូសេ ។ អ័ប្រាហាំបានបន្តមានភាពស្មោះត្រង់ បន្ទាប់ពីចុះសេចក្ដីសញ្ញានឹងព្រះ ហើយបានកាត់ស្បែក ។ ដូច្នេះ ប៉ុលអាចបង្ហាញថា មនុស្សម្នាក់ៗមិនត្រូវបានរាប់ជាសុចរិតតាមរយៈការគោរពតាមក្រឹត្យវិន័យលោកម៉ូសេនោះទេ ប៉ុន្តែដោយសេចក្ដីជំនឿ និងកិច្ចការទាំងឡាយតាមរយៈព្រះគុណនៃព្រះយេស៊ូវគ្រីស្ទវិញ ។
តើព្រះគុណរបស់ព្រះទាក់ទងនឹងការធ្លាក់របស់លោកអ័ដាមយ៉ាងដូចម្ដេចខ្លះ ?
នៅក្នុង រ៉ូម ៥:១២–២១ ប៉ុលបានបង្រៀនថា ព្រះយេស៊ូវគ្រីស្ទជួយយើងឲ្យយកឈ្នះលើឥទ្ធិពលនៃការធ្លាក់ ។ ដោយសារការរំលងរបស់លោកអ័ដាម អំពើបាប និងសេចក្ដីស្លាប់បានចូលមកក្នុងពិភពលោកនេះ ។ ទោះជាយ៉ាងណាក៏ដោយដោយសារតែ « អំណោយទាននៃព្រះគុណនោះ ដែលមកដោយសារមនុស្សតែម្នាក់ គឺព្រះយេស៊ូវគ្រីស្ទ » ( រ៉ូម ៥:១៥ ) នោះមនុស្សទាំងអស់អាចយកឈ្នះលើឥទ្ធិពលនៃអំពើបាប និងសេចក្ដីស្លាប់បាន ហើយទទួលបានជីវិតដ៏នៅអស់កល្បជានិច្ច ។ សេចក្ដីយោងទៅកាន់ការធ្លាក់របស់ប៉ុល ជួយយើងឲ្យយល់ពីអំណាចដ៏ទូលំទូលាយនៃព្រះគុណរបស់ព្រះអង្គសង្គ្រោះដើម្បីយកឈ្នះលើគ្រប់អ្វីៗទាំងអស់ ។