ម៉ាថាយ ២៨; លូកា ២៤; យ៉ូហាន ២០
សាក្សីរបស់ព្រះអង្គសង្គ្រោះដែលមានព្រះជន្មឡើងវិញ
ព្រះយេស៊ូវគ្រីស្ទបានបង្ហាញព្រះកាយដល់បុគ្គល និងក្រុមជាច្រើន បន្ទាប់ពីការមានព្រះជន្មរស់ឡើងវិញរបស់ទ្រង់ ។ មេរៀននេះអាចជួយពង្រឹងទីបន្ទាល់របស់អ្នកថា ព្រះអង្គសង្គ្រោះមានព្រះជន្មនៅរស់ ពេលអ្នកសិក្សានូវបទពិសោធន៍របស់សាក្សីមួយចំនួនទាំងនេះ ។
ការជឿដោយមើលមិនឃើញ
សូមមើលរូបភាពព្រះអង្គសង្គ្រោះដែលមានព្រះជន្មរស់ឡើងវិញផុសចេញពីផ្នូរដូចខាងក្រោមនេះ ។ សូមកត់ត្រានៅក្នុងសៀវភៅកំណត់ហេតុការសិក្សារបស់អ្នកនូវអ្វីដែលអ្នកអាចចែកចាយជាមួយនរណាម្នាក់ដែលមានមន្ទិលសង្ស័យថាព្រឹត្តិការណ៍ដ៏សំខាន់នេះបានកើតឡើង ។ តើដំណើររឿងខគម្ពីរអ្វីខ្លះអំពីការមានព្រះជន្មឡើងវិញរបស់ព្រះអង្គសង្គ្រោះ ដែលអ្នកអាចចែកចាយជាមួយពួកគេបាន ?
-
ហេតុអ្វីបានជាអ្នកគិតថា វាសំខាន់ចំពោះព្រះអម្ចាស់ ដែលយើងម្នាក់ៗទទួលបានទីបន្ទាល់ផ្ទាល់ខ្លួនថាទ្រង់មានព្រះជន្មរស់ ?
សូមសញ្ជឹងគិតពីទីបន្ទាល់របស់អ្នកថា ព្រះយេស៊ូវគ្រីស្ទមានព្រះជន្មនៅរស់ និងអំពីរបៀបដែលអ្នកនឹងត្រូវបានប្រទានពរដោយសារការពង្រឹងទីបន្ទាល់នេះ ។ ការសិក្សាពាក្យសម្ដីរបស់អ្នកដែលដឹងថា ព្រះអង្គសង្គ្រោះមានព្រះជន្មនៅរស់ អាចពង្រឹងសេចក្ដីជំនឿរបស់យើងលើការពិតនៃការមានព្រះជន្មរស់នៅរបស់ទ្រង់ ទោះជាអ្នកដទៃជុំវិញយើងមានមន្ទិលសង្ស័យក៏ដោយ ។ នៅពេលអ្នកសិក្សាថ្ងៃនេះ សូមយកចិត្តទុកដាក់ខ្ពស់លើការបំផុសគំនិតពីព្រះវិញ្ញាណបរិសុទ្ធ ដែលបញ្ជាក់ពីសេចក្តីពិតនៃដំណើររឿងទាំងនេះដល់ចិត្ត និងគំនិតរបស់អ្នក ។
ពួកសាក្សីក្នុងព្រះគម្ពីរសញ្ញាថ្មី
១. សូមបំពេញឃ្លាខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
សូមសិក្សាយ៉ាងហោចណាស់ដំណើររឿងមួយក្នុងចំណោមដំណើររឿងក្នុងព្រះគម្ពីរសញ្ញាថ្មីខាងក្រោមនេះ អំពីបុគ្គលដែលបានឃើញព្រះអង្គសង្គ្រោះបានមានព្រះជន្មរស់ឡើងវិញ ។
-
ស្រ្តីដែលស្មោះត្រង់ ៖ ម៉ាថាយ ២៨:១–១០
-
ពួកសិស្សពីរនាក់នៅលើផ្លូវទៅទីក្រុងអេម៉ោស ៖ លូកា ២៤:១៣–៣៥
-
ម៉ារា ជាអ្នកស្រុកម៉ាក់ដាឡា ៖ យ៉ូហាន ២០:១១–១៨
-
ថូម៉ាស ៖ យ៉ូហាន ២០:២៤–២៩
សូមកត់ត្រាចម្លើយរបស់អ្នកចំពោះសំណួរពីរដែលមានបន្ទាប់មក ព្រមទាំងគំនិត និងចំណាប់អារម្មណ៍ផ្សេងទៀតដែលអ្នកអាចទទួលបាន ។
-
តើអ្នកបានរៀនអ្វីខ្លះដែលអាចពង្រឹងសេចក្តីជំនឿរបស់អ្នកថា ព្រះយេស៊ូវគ្រីស្ទមានព្រះជន្មរស់នៅ ?
-
តើអ្នកបានរៀនអ្វីខ្លះអំពីព្រះអង្គសង្គ្រោះចេញពីការប្រាស្រ័យទាក់ទងរបស់ទ្រង់ជាមួយបុគ្គលនេះ ឬបុគ្គលទាំងនេះ ?
សាក្សីក្នុងព្រះគម្ពីរផ្សេងទៀត
២. សូមបំពេញឃ្លាខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
ទីបន្ទាល់របស់អ្នកអំពីព្រះអង្គសង្គ្រោះអាចត្រូវបានពង្រឹងបន្ថែមទៀតដោយការសិក្សាសាក្សីបន្ថែមទៀតនៅក្នុងព្រះគម្ពីរផ្សេងទៀត ។ សូមសិក្សាវគ្គបទគម្ពីរខាងក្រោមនេះយ៉ាងហោចណាស់មួយ ។
-
ប្រជាជននៅទ្វីបអាមេរិកសម័យបុរាណមិនយូរប៉ុន្មានបន្ទាប់ពីការរស់ឡើងវិញរបស់ព្រះអង្គសង្គ្រោះ ៖ នីហ្វៃទី៣ ១១:៨–១៧
-
យ៉ូសែប ស៊្មីធ និង ស៊ីឌនី រិកដុន ៖ គោលលទ្ធិ និង សេចក្ដីសញ្ញា ៧៦:១៩–២៤
សូមកត់ត្រាចម្លើយរបស់អ្នកចំពោះសំណួរពីរដែលមានបន្ទាប់មក ព្រមទាំងគំនិត និងចំណាប់អារម្មណ៍ផ្សេងទៀតដែលអ្នកអាចទទួលបាន ។
-
តើអ្វីដែលអ្នកបានអានអាចពង្រឹងជំនឿរបស់អ្នកថា ព្រះយេស៊ូវគ្រីស្ទមានព្រះជន្មរស់នៅដោយរបៀបណា ?
-
តើការយល់ដឹងបន្ថែមអ្វីខ្លះអំពីព្រះយេស៊ូវគ្រីស្ទ ដែលអ្នកបានទទួល ?
សាក្សីសម័យទំនើប
មធ្យោបាយសំខាន់មួយទៀតដើម្បីពង្រឹងទីបន្ទាល់របស់អ្នកថា ព្រះយេស៊ូវគ្រីស្ទមានព្រះជន្មរស់ គឺតាមរយៈការសិក្សាទីបន្ទាល់នៃ « ពួកសាក្សីពិសេសអំពីព្រះនាមនៃព្រះគ្រីស្ទនៅពេញសព្វក្នុងពិភពលោក » ( គោលលទ្ធិ និង សេចក្តីសញ្ញា ១០៧:២៣ ) ជាពួកសាវកដែលបានតែងតាំងនៅសម័យរបស់យើង ។
អ្នកអាចចង់មើលវីដេអូ « Come unto Me » ( ចាប់ពីនាទីទី ១៦:១៨ ដល់នាទីទី ១៦:៤៧ ) និងវីដេអូ « The Only True God and Jesus Christ Whom He Hath Sent » ( ២:២៦ ) វីដេអូទាំងពីរមាននៅលើគេហទំព័រ ChurchofJesusChrist.org ។ ឬអានសេចក្ដីថ្លែងការណ៍របស់ប្រធាន អាវរិង និងអែលឌើរ ហូឡិន ដែលជាសាក្សីសម័យទំនើបពីររូបរបស់ព្រះយេស៊ូវគ្រីស្ទ ។
ប្រធាន ហិនរី ប៊ី អាវរិង ក្នុងគណៈប្រធានទីមួយបានថ្លែងទីបន្ទាល់ថា ៖
ខ្ញុំជាសាក្សីម្នាក់អំពីការរស់ឡើងវិញរបស់ព្រះអម្ចាស់យ៉ាងប្រាកដដូចជាខ្ញុំបាននៅទីនោះនាល្ងាចនោះជាមួយនឹងសិស្សទាំងពីរនាក់ក្នុងផ្ទះតាមផ្លូវទៅភូមិអេម៉ោសដូច្នោះដែរ ។ ខ្ញុំដឹងថា ព្រះមានព្រះជន្មរស់យ៉ាងប្រាកដដូចយ៉ូសែប ស្ម៊ីធដែរ ពេលលោកបានឃើញព្រះវរបិតា និងព្រះរាជបុត្រាក្នុងសសរពន្លឺនៃពេលព្រឹកដ៏ភ្លឺត្រចះត្រចង់មួយក្នុងព្រៃនៅភូមិប៉ាលម៉ៃរ៉ា ។
នេះជាសាសនាចក្រពិតនៃព្រះយេស៊ូវគ្រីស្ទ ។
( ហិនរី ប៊ី អាវរិង « Come unto Me » Liahona ខែ ឧសភា ឆ្នាំ ២០១៣ ទំព័រ ២៥ )
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានថ្លែងទីបន្ទាល់ ៖
ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទគឺពិតជាព្រះរាជបុត្រាដ៏មានព្រះជន្មរស់នៃព្រះដ៏មានព្រះជន្មរស់នៃយើង ។ ខ្ញុំសូមថ្លែងទីបន្ទាល់ថា ទ្រង់ត្រូវបានប្រោសឲ្យរស់ឡើងវិញពីផ្នូរ ហើយបន្ទាប់ពីការឡើងទៅគាល់ព្រះវរបិតារបស់ទ្រង់ ដើម្បីបញ្ចប់ដំណើរការនៃការមានព្រះជន្មឡើងវិញនោះ ទ្រង់បានបង្ហាញព្រះកាយមកម្តងហើយម្តងទៀតដល់សិស្សរាប់រយនាក់នៅក្នុងពិភពលោកចាស់ ហើយនិងក្នុងពិភពលោកថ្មី ។ ខ្ញុំដឹងថា ទ្រង់គឺជាព្រះដ៏វិសុទ្ធនៃអ៊ីស្រាអែល ជាព្រះមែស៊ី ដែលនៅថ្ងៃណាមួយនឹងយាងមកម្តងទៀតក្នុងសិរីល្អចុងក្រោយ ដើម្បីសោយរាជ្យនៅលើផែនដីជាព្រះអម្ចាស់លើអស់ទាំងព្រះអម្ចាស់ និងជាស្តេចលើអស់ទាំងស្តេច ។
( ជែហ្វ្រី អ័រ ហូឡិន « The Only True God and Jesus Christ Whom He Hath Sent » Liahona ខែ វិច្ឆិកា ឆ្នាំ ២០០៧ ទំព័រ ៤២ )
-
ហេតុអ្វីបានជាអ្នកគិតថា ព្រះអង្គសង្គ្រោះបានប្រទានដល់យើងនូវសាក្សីសម័យទំនើបបន្ថែមលើសាក្សីពីបុរាណរបស់ទ្រង់ ?
សាក្សីរបស់អ្នក
សូមអាន យ៉ូហាន ២០:២៩ ដោយស្វែងរកការពិតដែលព្រះយេស៊ូវគ្រីស្ទបានបង្រៀនថូម៉ាសអំពីការទទួលបានទីបន្ទាល់ ។
-
តើខគម្ពីរនេះបង្រៀនអ្នកអ្វីខ្លះអំពីការបង្កើនទីបន្ទាល់របស់អ្នកអំពីព្រះយេស៊ូវគ្រីស្ទ ?
សេចក្តីពិតមួយ ដែលយើងអាចរៀនបានពីការបង្រៀនរបស់ព្រះអង្គសង្គ្រោះនៅក្នុងខនេះគឺថា យើងទទួលបានពរជ័យសម្រាប់ការជ្រើសរើសជឿថា ព្រះយេស៊ូវគ្រីស្ទមានព្រះជន្មរស់ ទោះបីយើងមិនបានឃើញទ្រង់ក៏ដោយ ។
សូមបន្ថែមសាក្សីផ្ទាល់ខ្លួនរបស់អ្នកអំពីព្រះអង្គសង្គ្រោះទៅនឹងអ្វីៗដែលអ្នកបានសិក្សានៅថ្ងៃនេះ ។ ជាមធ្យោបាយមួយក្នុងការធ្វើដូចនេះ សូមពិចារណាកត់ត្រាចម្លើយចំពោះសំណួរដូចតទៅនេះនៅក្នុងសៀវភៅកំណត់ហេតុការសិក្សារបស់អ្នក ។
-
តើភស្ដុតាងអ្វីខ្លះដែលអ្នកបានឃើញក្នុងជីវិតរបស់អ្នក និងក្នុងជីវិតអ្នកដទៃថា ព្រះយេស៊ូវគ្រីស្ទមានព្រះជន្មរស់ ?
-
តើពេលណាដែលអ្នកមានអារម្មណ៍ថា ព្រះវិញ្ញាណបរិសុទ្ធធ្វើជាសាក្សីដល់អ្នកអំពីភាពពិតនៃព្រះយេស៊ូវគ្រីស្ទ ?
-
តើអ្នកនឹងផ្តល់ដំបូន្មានអ្វីដល់អ្នកដែលមិនទាន់ប្រាកដថា ពួកគេជឿថាព្រះអង្គសង្គ្រោះមានព្រះជន្មរស់នៅឡើយ ?
ជម្រើស ៖ តើចង់រៀនសូត្របន្ថែមទៀតដែរឬទេ ?
ហេតុអ្វីបានជាមានរបួសពីការឆ្កាងលើព្រះកាយរបស់ព្រះយេស៊ូវដែលបានមានព្រះជន្មរស់ឡើងវិញ ?
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានសរសេរ ៖
ទោះជាអំណាចនៃការមានព្រះជន្មរស់ឡើងវិញអាចត្រូវបានស្ដារឡើងទាំងស្រុងក្ដី—ហើយពិតណាស់ នៅថ្ងៃណាមួយវានឹងមកដល់—ហើយបានធ្វើឲ្យស្នាមរបួសដោយសារតែការឆ្កាងបានជាសះស្បើយក្ដី ប៉ុន្តែព្រះគ្រីស្ទបានជ្រើសរើសដើម្បីរក្សាស្នាមរបួសទាំងនោះក្នុងគោលបំណងមួយ រួមបញ្ចូលទាំងការបង្ហាញព្រះកាយរបស់ទ្រង់នៅថ្ងៃចុងក្រោយផងដែរ នៅពេលទ្រង់នឹងបង្ហាញស្នាមទាំងនោះ ហើយបើកសម្ដែងថា ទ្រង់បានរងរបួស ‹ នៅក្នុងផ្ទះរបស់មិត្តសំឡាញ់ [ ទ្រង់ ] › [ សាការី ១៣:៦; សូមមើលផងដែរ គោលលទ្ធិ និង សេចក្តីសញ្ញា ៤៥:៥២ ] ។
ស្នាមរបួសនៅលើព្រះហស្ដ ព្រះបាទា និងនៅចំហៀងទ្រង់គឺជាសញ្ញាថា នៅក្នុងជីវិតរមែងស្លាប់រឿងដ៏ឈឺចាប់បានកើតឡើង សូម្បីតែចំពោះបុគ្គលបរិសុទ្ធ ហើយល្អឥតខ្ចោះ ជាសញ្ញាថា ការឈឺចាប់ដ៏ខ្លាំង ពុំមែន មានន័យថា ព្រះពុំស្រឡាញ់យើងនោះឡើយ ។ វាគឺជាការពិតដ៏សំខាន់ ហើយពោរពេញដោយសេចក្ដីសង្ឃឹមមួយថា ព្រះគ្រីស្ទដែល បានរងរបួស ពិតជាបានយាងមកសង្គ្រោះយើងប្រាកដមែន ។
( ជែហ្វ្រី អ័រ ហូឡិន Christ and the New Covenant [ ឆ្នាំ ១៩៩៧ ] ទំព័រ ២៥៨–៥៩ )
យ៉ូហាន ២០:១៧ ។ តើព្រះអង្គសង្គ្រោះមានន័យយ៉ាងណា ពេលទ្រង់បានបង្គាប់ឲ្យម៉ារា ជាអ្នកស្រុកម៉ាក់ដាឡា « កុំពាល់ [ ទ្រង់ ] » ?
អែលឌើរ ប្រ៊ូស អ័រ ម៉ាក់ខន់ឃី ( ឆ្នាំ ១៩១៥–ឆ្នាំ ១៩៨៥ ) ក្នុងកូរ៉ុមនៃពួកសាវកដប់ពីរនាក់បានពន្យល់ ៖
កំណែរបស់ស្តេចជេមស៍ ដកស្រង់ព្រះបន្ទូលរបស់ព្រះយេស៊ូវដែលមានបន្ទូលថា « កុំពាល់ខ្ញុំ » ។ ការបកប្រែដោយយ៉ូសែប ស្ម៊ីធសរសេរថា « កុំប៉ះខ្ញុំ » ។ ការបកប្រែផ្សេងទៀតពីភាសាក្រិកបកស្រាយវគ្គបទគម្ពីរនេះថាជា « កុំនៅជាប់នឹងខ្ញុំ » ឬ « កុំប៉ះខ្ញុំ » ។ អ្នកខ្លះផ្តល់អត្ថន័យថា « កុំនៅជាប់នឹងខ្ញុំទៀតឡើយ » ឬ « កុំពាល់ខ្ញុំទៀតឡើយ » ។ អ្នកខ្លះនិយាយអំពីការឈប់កាន់ទ្រង់ ឬនៅជាប់នឹងទ្រង់ ដោយបញ្ជាក់ថា ម៉ារាបានកាន់ទ្រង់រួចហើយ ។ មានហេតុផលត្រឹមត្រូវសម្រាប់ការសន្មតថា គំនិតដែលបានបញ្ជូនទៅកាន់ម៉ារាដោយព្រះអម្ចាស់ដែលមានព្រះជន្មរស់ឡើងវិញ គឺមានឥទ្ធិពលបែបនេះ ៖ « អ្នកមិនអាចពាល់ខ្ញុំនៅទីនេះបានទេ ព្រោះខ្ញុំមិនទាន់ឡើងទៅឯព្រះវរបិតាខ្ញុំនៅឡើយ » ។
( ប្រ៊ូស អ័រ ម៉ាក់ខន់ឃី The Mortal Messiah: From Bethlehem to Calvary [ ឆ្នាំ ១៩៨១ ] ៤:២៦៤ )
តើមានវីដេអូអ្វីខ្លះដែលអាចជួយខ្ញុំឲ្យមើលឃើញពីដំណើររឿងនៃការបង្ហាញព្រះកាយរបស់ព្រះអង្គសង្គ្រោះដែលមានព្រះជន្មរស់ឡើងវិញបាន ?
អ្នកអាចចង់មើលវីដេអូដូចខាងក្រោម ( ដែលមាននៅលើគេហទំព័រ ChurchofJesusChrist.org ) ៖ « Jesus Is Resurrected » ( ៤:០៥ )
« Christ Appears on the Road to Emmaus » ( ៣:៣២ )
« Blessed Are They That Have Not Seen, and Yet Have Believed » ( ២:២៩ )
