សេចក្តីណែនាំស្តីពីចំណេះចំណានខាងគោលលទ្ធិ
គោលបំណងនៃចំណេះចំណានខាងគោលលទ្ធិ
មេរៀននេះនឹងណែនាំអ្នកឲ្យស្គាល់ពីចំណេះចំណានខាងគោលលទ្ធិ និងរបៀបដែលវាអាចផ្តល់ពរដល់ជីវិតរបស់អ្នក និងជួយអ្នកឲ្យសង់គ្រឹះខាងវិញ្ញាណរបស់អ្នកលើព្រះយេស៊ូវគ្រីស្ទ ។
សង់គ្រឹះលើព្រះយេស៊ូវគ្រីស្ទ
អែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់បានព្រមានអំពីទស្សនវិស័យរបស់ខ្យល់គួចខាងវិញ្ញាណ ៖
កង្វល់ដែលធំជាងការរញ្ជួយដី និងសង្គ្រាម [ នៅក្នុងថ្ងៃចុងក្រោយ ] ដែលបានព្យាករទៅទៀតនោះគឺ ខ្យល់គួចខាងវិញ្ញាណដែលអាចផ្ដាច់អ្នកចេញពីគ្រឹះខាងវិញ្ញាណរបស់អ្នក ហើយដាក់វិញ្ញាណអ្នកនៅទីដែលអ្នកមិនដែលនឹកស្មានមិនដល់ ពេលខ្លះអ្នកមិនបានទាំងដឹងខ្លួនថាអ្នកត្រូវបានផ្ដាច់ចេញផង ។
( នែល អិល អាន់ឌើរសិន « Spiritual Whirlwinds » Liahona ខែ ឧសភា ឆ្នាំ ២០១៤ ទំព័រ ១៨ ) ។
-
តើមានខ្យល់គួចខាងវិញ្ញាណមួយចំនួនអ្វីខ្លះ ដែលព្យាយាមដកយើងចេញពីគ្រឹះខាងវិញ្ញាណរបស់យើង ?
សូមគិតអំពីខ្យល់គួចខាងវិញ្ញាណដែលអ្នកអាចនឹងកំពុងប្រឈម ។ សូមអាន ហេលេមិន ៥:១២ ហើយរកមើលវិធីដើម្បីទប់ទល់នឹងខ្យល់គួចនេះ ។
-
តើអ្នកបានកត់សម្គាល់ឃើញអ្វីខ្លះ ដែលអាចជួយអ្នកឲ្យទប់ទល់នឹងខ្យល់គួចខាងវិញ្ញាណបាន ?
-
តើអ្នកគិតថា ការសង់គ្រឹះលើព្រះយេស៊ូវគ្រីស្ទមានន័យបែបណា ?
-
តើតាមរបៀបណាខ្លះដែលអ្នកនឹងទទួលបានប្រយោជន៍ដោយផ្ទាល់ ពីការសង់គ្រឹះដ៏រឹងមាំមួយលើព្រះយេស៊ូវគ្រីស្ទ ?
គ្រឹះខាងវិញ្ញាណរបស់ខ្ញុំ
សូមគិតអំពីគ្រឹះខាងវិញ្ញាណរបស់អ្នក ហើយវាយតម្លៃខ្លួនអ្នកនៅលើសេចក្តីថ្លែងការណ៍ខាងក្រោមដោយ « យល់ស្រប » « យល់ស្របខ្លះ » « មិនយល់ស្របខ្លះ » ឬ « មិនយល់ស្រប » ។
-
ខ្ញុំកំពុងសង់គ្រឹះដ៏រឹងមាំមួយលើព្រះយេស៊ូវគ្រីស្ទ និងដំណឹងល្អរបស់ទ្រង់ ។
-
ខ្ញុំកំពុងបង្កើនចំណេះដឹងរបស់ខ្ញុំអំពីព្រះយេស៊ូវគ្រីស្ទ និងគោលលទ្ធិរបស់ទ្រង់ ។
-
ខ្ញុំមានទំនុកចិត្តក្នុងការប្រើប្រាស់ព្រះគម្ពីរដើម្បីពន្យល់អំពីគោលលទ្ធិនៃព្រះយេស៊ូវគ្រីស្ទ ។
-
ខ្ញុំអាចរកចម្លើយចំពោះសំណួរដែលខ្ញុំ ឬអ្នកផ្សេងទៀតមានអំពីដំណឹងល្អ ។
ចំណេះចំណានខាងគោលលទ្ធិ
ថ្នាក់សិក្ខាសាលាអាចជួយអ្នកឲ្យសង់គ្រឹះរបស់អ្នកលើព្រះយេស៊ូវគ្រីស្ទ នៅពេលដែលអ្នករៀនពីគោលលទ្ធិរបស់ទ្រង់ មករកទ្រង់ ហើយក្លាយជាសិស្សរបស់ទ្រង់ ( សូមមើល នីហ្វៃទី៣ ១១:៣៩ ) ។ សូមអានកថាខណ្ឌពីរដំបូងនៅក្នុងជំពូក « សេចក្តីណែនាំស្តីពីចំណេះចំណានខាងគោលលទ្ធិ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ដោយ ស្វែងរក វិធីនានាដែលថ្នាក់សិក្ខាសាលាអាចជួយអ្នកសង់គ្រឹះរបស់អ្នកលើព្រះយេស៊ូវគ្រីស្ទ ។
-
តើអ្នកបានរកឃើញអ្វីខ្លះ ?
មានលទ្ធផលចម្បងពីរសម្រាប់ចំណេះចំណានខាងគោលលទ្ធិដែលនឹងជួយអ្នកសង់គ្រឹះរបស់អ្នកលើព្រះយេស៊ូវគ្រីស្ទ ។ សូមអានលទ្ធផលទាំងពីរសម្រាប់ចំណេះចំណានខាងគោលលទ្ធិនៅក្នុងជំពូក « សេចក្តីណែនាំស្ដីពីចំណេះចំណានខាងគោលលទ្ធិ » នៃ ឯកសារគោលនៃចំណេះចំណានខាងគោលលទ្ធិ ។
ជារៀងរាល់សប្តាហ៍នៅក្នុងថ្នាក់សិក្ខាសាលា អ្នកនឹងរៀនអំពីចំណេះចំណានខាងគោលលទ្ធិ ។ នៅក្នុងមេរៀនទាំងនេះភាគច្រើន អ្នកនឹងសិក្សាអំពីវគ្គបទគម្ពីរមួយក្នុងចំណោមវគ្គបទគម្ពីរ ២៤ នៃព្រះគម្ពីរសញ្ញាថ្មី ដែលត្រូវបានគេស្គាល់ថាជាវគ្គបទគម្ពីរចំណេះចំណានខាងគោលលទ្ធិ ។ ដ្យាក្រាមខាងក្រោមបង្ហាញពីអ្វីដែលអ្នកនឹងធ្វើនៅក្នុងមេរៀនចំណេះចំណានខាងគោលលទ្ធិ ។
ស្គាល់ និងពន្យល់ពីគោលលទ្ធិ
នៅដើមមេរៀន អ្នកបានវាយតម្លៃខ្លួនឯងថាតើអ្នកមានអារម្មណ៍ស្រណុកចិត្តយ៉ាងណាក្នុងការប្រើព្រះគម្ពីរដើម្បីពន្យល់ពីគោលលទ្ធិរបស់ព្រះយេស៊ូវគ្រីស្ទ ។ មិនថាអ្នកវាយតម្លៃខ្លួនឯងយ៉ាងដូចម្ដេចទេ ការសិក្សាអំពីចំណេះចំណានខាងគោលលទ្ធិនឹងបង្កើនចំណេះដឹងរបស់អ្នកអំពីព្រះអង្គសង្រ្គោះ និងគោលលទ្ធិរបស់ទ្រង់ ។ សមត្ថភាពរបស់អ្នកក្នុងការពន្យល់ពីគោលលទ្ធិរបស់ទ្រង់ដោយប្រើព្រះគម្ពីរនឹងរីកចម្រើនឡើង ។
សូមមើលបញ្ជីនៃវគ្គបទគម្ពីរចំណេះចំណានខាងគោលលទ្ធិព្រះគម្ពីរសញ្ញាថ្មី និងឃ្លាព្រះគម្ពីរគន្លឹះរបស់វា ។ អ្នកអាចរកឃើញបញ្ជីនេះនៅជិតចុងបញ្ចប់នៃ ឯកសារគោលនៃចំណេះចំណានខាងគោលលទ្ធិ ។ សូមជ្រើសរើសវគ្គបទគម្ពីរមួយដែលអ្នកឃើញថាគួរឲ្យចាប់អារម្មណ៍ ដែលអាចជួយដល់តម្រូវការផ្ទាល់ខ្លួន ឬអាចជួយដល់សំណួរដែលអ្នកមាន ។
១. សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកបានជ្រើសរើសវគ្គបទគម្ពីរមួយណា ?
-
តើវគ្គបទគម្ពីរនេះបង្រៀនអ្នកអ្វីខ្លះអំពីព្រះយេស៊ូវគ្រីស្ទ និងគោលលទ្ធិរបស់ទ្រង់ ?
-
តើតាមរបៀបណា ដែលការដឹងពីរបៀបពន្យល់អំពីគោលលទ្ធិចេញមកពីវគ្គបទគម្ពីរនេះផ្ដល់ពរដល់ជីវិតអ្នក ?
ការទទួលបានចំណេះដឹងខាងវិញ្ញាណ
នៅក្នុងមេរៀនចំណេះចំណានខាងគោលលទ្ធិ អ្នកនឹងមានឱកាសរៀនបន្ថែមទៀតអំពីគោលការណ៍នៃការទទួលបានចំណេះដឹងខាងវិញ្ញាណ និងអនុវត្តការប្រើប្រាស់វាដើម្បីជួយអ្នកឲ្យឆ្លើយសំណួរផ្ទាល់ខ្លួន និងសង្គម ព្រមទាំងសំណួរអំពីគោលលទ្ធិ ការអនុវត្ត ឬប្រវត្តិសាសនាចក្រ ។ ការរៀន និងការប្រើគោលការណ៍ទាំងនេះនឹងជួយអ្នកសង់គ្រឹះរបស់អ្នកលើព្រះអង្គសង្គ្រោះ ហើយបែរទៅរកទ្រង់នៅពេលអ្នកប្រឈមនឹងសំណួរនានា ។ គោលការណ៍បីក្នុងចំណោមគោលការណ៍ទាំងឡាយនៃការទទួលបានចំណេះដឹងខាងវិញ្ញាណ ដែលអ្នកនឹងអនុវត្តការប្រើប្រាស់ក្នុងថ្នាក់សិក្ខាសាលាគឺ ៖
-
ធ្វើសកម្មភាពដោយសេចក្ដីជំនឿ ។
-
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច ។
-
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ។
ប្រសិនបើអ្នកមិនស្គាល់គោលការណ៍ទាំងនេះទេ អ្នកប្រហែលជាចង់អាន កថាខណ្ឌទី ៥–១២ ក្នុងជំពូក « ការទទួលបានចំណេះដឹងខាងវិញ្ញាណ » ក្នុង ឯកសារគោលនៃចំណេះចំណានខាងគោលលទ្ធិ ។
២. សូមឆ្លើយយ៉ាងហោចណាស់ពីរសំណួរក្នុងចំណោមសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកដឹងអ្វីខ្លះអំពីគោលការណ៍ទាំងនេះ ?
-
តើអ្នកមានបទពិសោធន៍អ្វីខ្លះជាមួយនឹងគោលការណ៍ទាំងនេះ ?
-
តើអ្នកគិតថា គោលការណ៍ទាំងនេះអាចជួយអ្នកស្ថាបនាមូលដ្ឋានគ្រឹះរបស់អ្នកលើព្រះគ្រីស្ទ និងទប់ទល់នឹងខ្យល់គួចខាងវិញ្ញាណយ៉ាងដូចម្ដេច ?
វគ្គបទគម្ពីរចំណេះចំណានខាងគោលលទ្ធិ
ជារៀងរាល់ឆ្នាំ នៅក្នុងថ្នាក់សិក្ខាសាលាអ្នកនឹងត្រូវបានលើកទឹកចិត្តឲ្យទន្ទេញឃ្លាបទគម្ពីរសំខាន់មួយសម្រាប់វគ្គបទគម្ពីរចំណេះចំណានខាងគោលលទ្ធិទាំង ២៤ ។
អែលឌើរ រីឆាដ ជី ស្កត ( ឆ្នាំ ១៩២៨–២០១៥ ) ក្នុងកូរ៉ុមនៃពួកសាវកដប់ពីរនាក់បានបង្រៀនអំពីការទន្ទេញបទគម្ពីរ ៖
អំណាចដ៏មហិមាអាចកើតឡើងពីការទន្ទេញបទគម្ពីរ ។ ការទន្ទេញបទគម្ពីរមួយគឺជាការបង្កើតមិត្តភាពមួយថ្មី ។ វាដូចជាការរកឃើញបុគ្គលម្នាក់ថ្មីដែលអាចជួយក្នុងពេលត្រូវការ ផ្ដល់ការបំផុសគំនិត និងការលួងលោមចិត្ត ហើយជាប្រភពនៃការលើកទឹកចិត្តសម្រាប់ការផ្លាស់ប្ដូរដែលចាំបាច់ ។
( រីឆាដ ជី ស្កត « The Power of Scripture » Liahona ខែ វិច្ឆិកា ឆ្នាំ ២០១១ ទំព័រ ៦ )
សូមគិតអំពីសំណួរខាងក្រោមនេះ ៖
-
ហេតុអ្វីអ្នកគិតថា វានឹងមានប្រយោជន៍ក្នុងការទន្ទេញចាំវគ្គបទគម្ពីរផ្សេងៗ ?
-
តើអ្នកគិតថា ការទន្ទេញចាំនូវបទគម្ពីរទាំងឡាយអាចជួយអ្នកឲ្យស្ថាបនាមូលដ្ឋានគ្រឹះរបស់អ្នកលើព្រះយេស៊ូវគ្រីស្ទ និងទប់ទល់នឹងខ្យល់គួចខាងវិញ្ញាណយ៉ាងដូចម្ដេច ?
សូមចំណាយពេលពីរបីនាទីដើម្បីពិនិត្យឡើងវិញនូវវគ្គបទគម្ពីរចំណេះចំណានខាងគោលលទ្ធិទាំង ២៤ និងឃ្លាបទគម្ពីរសំខាន់ៗសម្រាប់វគ្គសិក្សាព្រះគម្ពីរសញ្ញាថ្មី ។ អ្នកអាចប្រើកម្មវិធី Doctrinal Mastery ឬ ឯកសារគោលនៃចំណេះចំណានខាងគោលលទ្ធិ ។ អ្នកប្រហែលជាចង់ចាប់ផ្ដើមទន្ទេញបទគម្ពីរយោង និងឃ្លាបទគម្ពីរសំខាន់ៗសម្រាប់វគ្គបទគម្ពីរដែលអ្នកបានជ្រើសរើសពីមុន ។
ជម្រើស ៖ តើចង់រៀនសូត្របន្ថែមទៀតដែរឬទេ ?
ហេតុអ្វីចំណេះចំណានខាងគោលលទ្ធិសំខាន់ ?
ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានបង្រៀន ៖
[ ចំណេះចំណានខាងគោលលទ្ធិ ] នឹងផ្ដោតទៅលើការស្ថាបនា និងការពង្រឹងសេចក្ដីជំនឿរបស់សិស្សយើងទៅលើព្រះយេស៊ូវគ្រីស្ទ ហើយពង្រឹងពួកគេតាមរយៈការបង្កើនសមត្ថភាពក្នុងការរស់នៅ និងការអនុវត្តដំណឹងល្អនៅក្នុងជីវិតពួកគេ ។ ពេលប្រើបទគម្ពីរ និងពាក្យសម្ដីរបស់ពួកព្យាការី ពួកគេនឹងរៀនអំពីរបៀប ដើម្បីធ្វើសកម្មភាពដោយសេចក្ដីជំនឿទៅលើព្រះគ្រីស្ទ ដើម្បីទទួលបានចំណេះដឹងខាងវិញ្ញាណ និងការយល់ដឹងអំពីដំណឹងល្អរបស់ទ្រង់ ។ ហើយពួកគេនឹងមានឱកាសដើម្បីរៀនអំពីរបៀបអនុវត្តគោលលទ្ធិនៃព្រះគ្រីស្ទ និងគោលការណ៍នៃដំណឹងល្អចំពោះសំណួរ និងឧបសគ្គនានាដែលពួកគេស្ដាប់ឮ និងមើលឃើញជារៀងរាល់ថ្ងៃនៅក្នុងចំណោមមិត្តភក្ដិ និងប្រព័ន្ធផ្សព្វផ្សាយសង្គម ។
( អិម រ័សុល បាឡឺដ « The Opportunities and Responsibilities of CES Teachers in the 21st Century » [ ជំនួបជាមួយអ្នកមានសិទ្ធិអំណាចទូទៅ ថ្ងៃទី ២៦ ខែ កុម្ភៈ ឆ្នាំ ២០១៦ ] នៅលើគេហទំព័រ ChurchofJesusChrist.org )