Toe Vakaiʻi Hono 22 ʻo e Fakataukei Fakatokāteliné
Ako Maʻuloto e Ngaahi Potufolofolá mo e Ngaahi Kupuʻi Lea Mahuʻinga he Folofolá
Kuó ke fifili nai ki he ʻuhinga ʻoku fuʻu mahuʻinga ai ke ako maʻuloto e folofolá? ʻE lava ke tokoni atu hono ako maʻuloto ʻo e folofolá ke ke maʻu ha ueʻi fakalaumālie, manatuʻi ʻa e Fakamoʻuí, mo akoʻi ʻa e ongoongoleleí ki he niʻihi kehé. ʻOku fakataumuʻa ʻa e lēsoni ko ʻení ke tokoniʻi koe ke ke ako maʻuloto ha konga ʻo e ngaahi potufolofola mo e ngaahi kupuʻi lea mahuʻinga fakafolofola ʻo e ngaahi potufolofola fakataukei fakatokāteline ʻi he Fuakava Foʻoú.
Ko e hā hono ʻuhinga ʻoku ako maʻuloto ai e folofolá?
Fakakaukauloto ʻokú ke kau ʻi ha savea ki he makasini Ki Hono Fakamālohia ʻo e Toʻu Tupú. Ko e hā haʻo tali kapau ʻe fai atu ʻe he Fakamoʻuí kiate koe ʻa e fehuʻi ko ʻení?
-
Ko e hā ʻa e ʻuhinga mahuʻinga ʻe nima ʻo hono ako maʻuloto ʻo e folofolá?
ʻOku lahi ha ngaahi ʻuhinga lelei ke ako maʻuloto ai e folofolá. ʻE lava ke hangē ʻa e ngaahi potufolofola kuo ako maʻulotó ko ha ngaahi kaungāmeʻa ʻoku nau lava ʻo ueʻi fakalaumālie, fakafiemālieʻi mo fakaʻaiʻai kitautolu ʻi he taimi ʻo e faingataʻá (vakai, Richard G. Scott, “Ko e Mālohi ʻo e Folofolá,” Liahona, Nōvema 2011, 6). ʻE lava ke tokoni hono ako maʻuloto ʻo e folofolá ke tau “sio pē ki [he Fakamoʻuí] ʻi he fakakaukau kotoa pē” (Tokāteline mo e Ngaahi Fuakava 6:36). ʻE lava ke tokoni hono ako maʻuloto ʻo e folofolá ke tau “maʻu [ʻa e folofola ʻa e ʻOtuá]” koeʻuhí ke tau lava ʻo akoʻi e niʻihi kehé (Tokāteline mo e Ngaahi Fuakava 11:21).
-
ʻE tokoniʻi fēfē ʻe hono ako maʻuloto ʻo e folofolá hoʻo vā fetuʻutaki mo Sīsū Kalaisí?
Ako maʻuloto e ngaahi vēsí
Fakaʻaongaʻi ha ngaahi miniti siʻi ke ako maʻuloto pe fakamanatu ai e ngaahi potufolofolá mo e ngaahi kupuʻi lea folofola mahuʻingá ʻi he ngaahi potufolofola fakataukei fakatokāteline ko ʻeni ʻo e Fuakava Foʻoú. Ko hoʻo maʻu pē ha loto-falala ʻokú ke ʻiloʻi e ngaahi fakamoʻoni fakafolofola mo e ngaahi kupuʻi lea mahuʻinga ko ʻení, fili ha ʻekitivitī ʻe taha pe lahi ange mei he ngaahi ʻekitivitī ko ʻení ke siviʻi hoʻo manatú.
Fakataukei Fakatokāteline ʻo e Fuakava Foʻoú: 1 Kolinitō–Fakahā
|
“Ko homou sinó ko e fale tapu ʻo e Laumālie Māʻoniʻoní.” | |
|
“ʻOku ʻikai ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí.” | |
|
“ʻOku hangē ʻoku mate kotoa pē ʻia ʻĀtamá, ʻe pehē foki ʻe moʻui kotoa pē ʻia Kalaisi.” | |
|
ʻI he Toetuʻú, ʻoku ʻi ai ʻa e ngaahi nāunau ʻe tolu. | |
|
“ʻI he kakato ʻo e ngaahi kuongá naʻá ne tuʻutuʻuni ke ne fakakātoa fakataha ʻa e meʻa kotoa pē ʻia Kalaisi.” | |
|
ʻOku fokotuʻu ʻa e Siasí “ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.” | |
|
“ʻA e ʻaho ʻo Kalaisí … ʻe ʻikai hoko ʻa e ʻaho ko iá, ʻo kapau ʻe ʻikai tomuʻa hoko ʻa e liliu koví.” | |
|
“Ko e ngaahi tohi māʻoniʻoní … ʻoku faʻa fakapoto koe ki he fakamoʻuí.” | |
|
Ko e Tamai Hēvaní ʻa e “Tamai ʻo e ngaahi laumālié.” | |
|
“Ka ai hamou taha ʻoku masiva ʻi he potó, ke kole ʻe ia ki he ʻOtuá.” | |
|
“Ko e tuí, kapau ʻoku ʻikai ʻi ai ʻa e ngaahi ngāué, ʻoku mate ia.” | |
|
“[Naʻe] malanga ʻaki ʻa e ongoongoleleí kiate kinautolu foki kuo maté.” | |
|
“Pea naʻe fakamāuʻi ʻa e pekiá … ʻo fakatatau ki heʻenau ngaahi ngāué.” |
Fakakakato ha taha ʻo e ngaahi ngāue ko ʻení.
Fili 1: Tā ha fakatātā
Kole ki haʻo kaungāmeʻa pe mēmipa ʻo e fāmilí ke tokoni atu ke ke fai ʻa e ʻekitivitī ko ʻení. Tuku ke fili ʻe he mēmipa ʻo e fāmilí pe kaungāmeʻá ha potufolofola fakataukei fakatokāteline mei he lisí kae ʻoua ʻe tala atu pe ko e potufolofola fē naʻá ne filí. Tuku leva ke nau tā ha fanga kiʻi tokoni (clues) ki he potufolofolá ʻo ʻikai fakaʻaongaʻi ha mataʻitohi pe mataʻifika kae ʻoua kuó ke lea ʻaki ʻa e potufolofola totonú mo e kupuʻi lea mahuʻingá. Te ke lava ʻo toutou fai ʻeni ki ha ngaahi potufolofola lahi.
-
ʻOkú ke pehē ʻe faitatau fēfē ha potufolofola kuo ako maʻulotó mo ha kaungāmeʻa te ne lava ʻo ʻoatu kiate koe ha ueʻi fakalaumālie, fakafiemālie, mo ha fakaʻaiʻai ʻi he taimi ʻo e faingataʻá?
Fili 2: Hiki ia
Fili ha potufolofola mei he lisí pea hiki ʻa e kupuʻi lea mahuʻinga mei he folofolá ʻoku hoa mo iá. Akoako tohi tuʻo fā pe nima ʻa e kupuʻi lea tatau. ʻAhiʻahi hiki e ngaahi kupuʻi lea mahuʻinga ʻo e folofolá ʻo ha ngaahi potufolofola kehekehe. Tānaki atu ha ngaahi founga kehekehe ʻaki haʻo tohi fakatohinima pe mataʻitohi lalahi. Te ke lava foki ʻo taimiʻi koe mo vakai ki he lelei ange hoʻo taimí.
-
ʻOkú ke pehē ʻe tokoniʻi fēfē koe ʻe hono ako maʻuloto ʻo e folofolá ke ke “sio pē ki [he Fakamoʻuí] ʻi he fakakaukau kotoa pē”? (Tokāteline mo e Ngaahi Fuakava 6:36).
Fili 3: ʻOmi e potufolofolá
Kole ki ha kaungāmeʻa pe mēmipa ʻo e fāmilí ke tokoni atu ke ke toe vakaiʻi e ngaahi potufolofola fakataukei fakatokāteliné. Talaange ki he tokotaha ko ʻení pe ko e foʻi lea ʻe fiha ke ne lau atu mei ha kupuʻi lea mahuʻinga, pea kole ange ke nau lau leʻolahi e lahi ʻo e ngaahi foʻi lea ko iá. Feinga ke ʻiloʻi ʻa e potufolofola totonú. Toutou fai ʻa e ngāue ko ʻení ʻi he tuʻo lahi taha te ke fiemaʻú pea feinga ke kole ke fetongitongi e lahi ʻo e ngaahi foʻi leá.
-
ʻOkú ke pehē ʻe tokoni fēfē hono ako maʻuloto ʻo e folofolá ke ke mateuteu ai ke vahevahe ʻa e ongoongoleleí mo e niʻihi kehé?
Fakakaukauloto ki hoʻo aʻusiá
1. Tali ʻa e ngaahi fehuʻi ko ʻení ʻi hoʻo tohinoa akó:
-
Ko e hā ha ngaahi ngāue naʻá ke fakaʻaongaʻi ke tokoniʻi koe ke ako maʻuloto e ngaahi potufolofolá mo e ngaahi kupuʻi lea mahuʻinga ʻo e folofolá?
-
ʻOku fēfē hoʻo ako maʻuloto e ngaahi potufolofolá mo e ngaahi kupuʻi lea mahuʻinga ki he ngaahi potufolofola fakataukei fakatokāteline ʻo e Fuakava Foʻoú? Ko e hā hoʻo palani ke ako maʻuloto ʻa e ngaahi meʻa ʻokú ke kei ngāue ki aí?
-
ʻOkú ke pehē ʻe tāpuekina fēfē hoʻo moʻuí ʻe he ako maʻuloto ʻo e folofolá?