Naʻe tohi ʻa Pita ki he kau ākonga ʻa Sīsū Kalaisí ʻa ia naʻe mālohi ʻenau tuí. ʻI he ofi ke ngata e moʻui ʻa Pitá, naʻá ne fie tokoni ki he Kāingalotu ko ʻení ke nau manatuʻi ʻa e ngaahi tāpuaki maʻongoʻonga kuo talaʻofa ki he kau faivelengá. Naʻá ne poupouʻi e Kāingalotú ke nau fakatupulaki ʻa e ngaahi ʻulungaanga ʻo Sīsū Kalaisí. ʻOku fakataumuʻa ʻa e lēsoni ko ʻení ke tokoniʻi koe ke ke fai ha ngaahi meʻa ke ke hoko ai ʻo hangē ange ko Sīsū Kalaisí.
Ngaahi lavameʻa fakahokohokó
Ko e hā ha taumuʻa mahuʻingamālie te ke fie aʻusiá?
Ko e hā ʻokú ke fakahoko ke ke aʻusia ai ‘a e tamuʻa ko ‘ení?
Naʻe vahevahe ʻe ʻEletā Sikoti D. Uaitingi ʻo e Kau Fitungofulú ha lēsoni naʻá ne ako mo hono uaifí lolotonga ha meʻa naʻá na aʻusia ʻi he lolotonga ʻena kaka ʻi he Moʻunga Susí ʻi Siapani. ʻE ala tokoni atu ʻa e lēsoni ne na akó ke ke ngāueʻi hoʻo ngaahi taumuʻá. Mahalo te ke fie mamata ʻi he foʻi vitiō “Hoko ʻo Hangē ko Iá,” ʻoku ʻi he ChurchofJesusChrist.org, mei he taimi 2:35 ki he 3:09, pe lau ʻa e fakamatala ko ʻení:
ʻĪmisi
Ko e Moʻunga Fusí, ʻi Siapani ʻoku hā fakaʻeiʻeiki mai mei mui ʻi ha efiafi ʻo e faʻahitaʻu fakatō lau. ʻOku lava ke ʻasi mai e ngaahi huelo fakaʻosi ʻo e laʻaá ʻi he fakahihifo ʻo e tafatafaʻaki ʻo e sinoú. ʻOku tuʻu ʻa e Anovai Kawaguchi ʻi muʻa mo e kolo ko Fujikawaguchiko ʻi he vahaʻa ʻo e anovaí mo e moʻungá. Kuo ʻufiʻufi ʻe ha sinou siʻisiʻi ʻa e koló mo e ʻuluʻakau ofi maí.
ʻĪmisi
Laʻitā Fakaʻofisiale ʻo ʻEletā Sikoti D Uītingi. Laʻitā Fakaʻofisiale ʻo ʻEletā Lōpeti C. Kei kimuʻa.
ʻI he ngaahi taʻu siʻi kuo hilí, ne u tuʻu ai mo hoku uaifí ʻi he kamataʻanga ʻo e foʻi hala ʻi he moʻunga māʻolunga taha ʻo Siapani ko Moʻunga Fusí. ʻI he kamata ke ma kaká ne ma sio ki ʻolunga ki he tumutumu ʻo e moʻungá peá ma fifili pe te ma lava koā ʻo aʻu ki ai.
ʻI he hokohoko atu ʻema kaká, ne ma ongoʻi helaʻia mo felāngaaki, he ko e haʻahaʻa ia ʻo e māʻolunga ʻa e moʻungá. Ne ma fakakaukau, ne mahuʻinga ange ke tukutaha ʻema tokangá ki he foʻi sitepu pē hono hokó. Naʻá ma pehē, “Mahalo he ʻikai ke u aʻu ki he tumutumú, ka te u lava he taimí ni ke manga ki he sitepu hono hokó.” Ne fai atu pē kuo fakaʻau ke faingofua ʻa e meʻa ne ngali faingataʻá—ʻi he foʻi laka ki he foʻi laka.
ʻE lava ke fakaʻaongaʻi e sīpinga ko ʻení ki hono aʻusia ha ngaahi taumuʻa kehekehe lahi. Ko e hā ʻe lava ʻo tokoni ke mahino kiate kitautolu ʻa e taumuʻa ʻo e hoko ʻo hangē ko Sīsū Kalaisí?
Fakaʻaongaʻi ha kiʻi taimi ke fakalaulauloto ai ki he meʻa kuó ke fai pea mo fakahoko ke ke hoko ai ʻo hangē ko Sīsū Kalaisí.
Ko e hā ʻoku faingataʻa ʻi he feinga ke hangē ange ko Sīsū Kalaisí?
Ko e hā kuó ne tokoniʻi koe ke ke fakalakalaka ʻi hoʻo hoko ʻo hangē ange ko Sīsū Kalaisí?
Manatuʻi ʻoku mahuʻinga ke vakai ki hoʻo fakalakalaká ʻi hoʻo hoko ʻo hangē ange ko Sīsū Kalaisí ko ha founga māmālie mo fakahokohoko. ʻI hoʻo ako ʻa e lēsoni ko ʻení, kumi e meʻa te ke ala fakahoko ʻi he tokoni ʻa e Fakamoʻuí ke hoko atu ki he sitepu hokó.
Natula faka-ʻOtuá
ʻI ha tohi ki he kāingalotu ʻo e Siasí kuo nau ʻosi tui kia Sīsū Kalaisí, naʻe fakahaaʻi ai ʻe he ʻAposetolo ko Pitá ʻa ʻene fakaʻamu ke nau maʻu ʻa e ngaahi tāpuaki ʻo hono ʻiloʻi ʻa e Tamai Hēvaní mo Sīsū Kalaisi pea mo Hona natula faka-ʻOtuá.
Lau ʻa e 2 Pita 1:2–4, ʻo kumi ki he ngaahi tāpuaki ʻe lava ke tau maʻu ʻi he ʻilo ko ʻení.
ʻOkú ke pehē ʻoku ʻuhinga ki he hā ke “kau ai ʻi he anga ʻa e ʻOtuá”? ( 2 Pita 1:4).
ʻOku tau takitaha maʻu ha natula faka-ʻOtua koeʻuhí ko e “foha mo e ʻofefine [kitautolu takitaha] ʻo ha mātuʻa fakalangi” (“Ko e Fāmilí: Ko ha Fanongonongo ki Māmani,” ChurchofJesusChrist.org). ʻE lava ke tokoniʻi kitautolu ʻe Sīsū Kalaisi ke tau fakatupulaki mo fakaleleiʻi ʻa e ngaahi ʻulungaanga faka-Kalaisí ʻi heʻetau feinga ke muimui ki Heʻene sīpinga haohaoá mo falala kiate Ia ke tokoni ke tau liliu.
1. Fakakakato ʻa e ʻekitivitī ko ení ʻi hoʻo tohinoa akó. Tānaki atu ki ai lolotonga e lēsoní.
Tā ʻi hoʻo tohinoa akó ha kiʻi fokotuʻutuʻu faingofua ʻo e Moʻunga Fusí pe ko ha moʻunga kehe te ke fili. Tohi ʻi hoʻo moʻungá ha niʻihi ʻo e ngaahi ʻulungaanga ʻo Sīsū Kalaisí.
Ko e fē ʻi he ngaahi ʻulungaanga ʻo Sīsū Kalaisí ʻokú ke saiʻia taha aí? Ko e hā hono ʻuhingá?
Lau ‘a e 2 Pita 1:5–7, ʻo kumi ki he ngaahi ʻulungaanga faka-Kalaisi naʻe hiki ʻe Pitá. Tānaki atu ʻa e ngaahi ʻulungaanga ko ʻení ki he ngaahi ʻulungaanga naʻá ke hiki ʻi hoʻo moʻungá ʻi hoʻo tohinoá.
Tuku ha kiʻi taimi ke ke fakakaukau ai ki he ʻuhinga ʻa Pita ki he kupuʻi lea “mātuʻaki [faivelenga] lahí” (veesi 5).
Te ke fakaʻasi fēfē nai ʻa e meʻá ni ʻi hoʻo fakatātaá?
Lau ʻa e 2 Pita 1:8–11, ʻo kumi ʻa e meʻa naʻe talaange ʻe Pita ki he Kāingalotú ʻe hoko kapau te nau fakatupulaki ʻa e ngaahi ʻulungaanga ko ʻení.
Ko e hā ha foʻi moʻoni ʻokú ke ako mei he ngaahi veesi ko ʻení?
Fakakaukau ki he meʻa te ke ala tānaki ki hoʻo fakatātaá koeʻuhí ko e meʻa ʻokú ke akó. Mahalo te ke fie tānaki atu ha hingoa ʻi ʻolunga ʻi hoʻo moʻungá ke ne fakamāʻopoʻopo ha foʻi moʻoni mahuʻinga ʻokú ke ako fekauʻaki mo e feinga ke ʻiloʻi ʻa Sīsū Kalaisí.
Te ke lava ʻo fakafehoanaki hoʻo fakatātaá ki he sīpinga ko ʻení pea tānaki atu ha faʻahinga fakaikiiki pē ʻokú ke ongoʻi ʻoku ʻaonga.
ʻĪmisi
Fakatātā ʻo e Moʻunga ʻo e Ngaahi ʻUlungaanga Faka-ʻOtuá
Ko e hā te tau lava ʻo fai ke fakatupulaki ai ʻa e ngaahi ʻulungaanga faka-Kalaisí?
ʻOkú ke pehē ʻoku tokoni fēfē nai hono fakatupulaki ʻo e ngaahi ʻulungaanga faka-ʻOtuá ke tau ʻiloʻi ʻa Sīsū Kalaisi pea hoko ʻo hangē ange ko Iá?
Ko Hono Fakatupulaki ʻo e Ngaahi ʻUlungaanga Faka-Kalaisí
ʻE lava ke kamata e fononga ʻo hono fakatupulaki e ngaahi ʻulungaanga faka-Kalaisí ʻaki e ʻuluaki sitepu faingofua ʻo hono fili ha ʻulungaanga ʻe taha pea ako lahi ange ki aí. Kamata ʻa e fononga ko ʻení ʻi he ʻahó ni ʻaki hono fili ha taha ʻo e ngaahi ʻulungaanga ʻoku hiki ʻi he 2 Pita 1:5–7 pea hiki ʻi hoʻo fakatātā ʻo e moʻungá.
Ko e founga ʻe taha te ke lava ai ʻo ako lahi ange fekauʻaki mo e ʻulungaanga naʻá ke filí ko hono fakaʻaongaʻi ʻa e Fakahinohino ki he Ngaahi Folofolá, pe ko e fekumi ʻi he Gospel Library ke maʻu e ngaahi potufolofola pe fakamatala ʻoku fekauʻaki mo e ʻulungaanga ko iá.
Hiki ha fanga kiʻi fakamatala ʻi hoʻo tohinoa akó, pea fakakaukau ke fakaʻilongaʻi ʻa e ngaahi kupuʻi lea mahuʻinga ʻi he ngaahi potufolofola ʻokú ke laú.
2. Tali ʻa e ngaahi fehuʻi ko ʻení ʻi hoʻo tohinoa akó:
Ko e ʻulungaanga fē naʻá ke fili ke tokanga taha ki aí?
Ko e hā naʻá ke ako fekauʻaki mo Sīsū Kalaisi pea mo e ʻulungaanga ko ʻení mei hoʻo akó?
ʻE fakalakalaka fēfē nai hoʻo moʻuí ʻi hono fakatupulaki e ʻulungaanga faka-Kalaisi ko ʻení?
Ko e hā ha ngaahi ngāue ʻokú ke loto-fiemālie ke fai ke hoko ʻo hangē ange ko e Fakamoʻuí ʻaki hono fakatupulaki e ʻulungaanga ko ʻení?
Fili Pē: Fie Ako Lahi Ange?
Ko e hā ʻe fiemaʻu ai ke u fakatupulaki ʻa e ngaahi ʻulungaanga faka-Kalaisí?
Naʻe fakamatala ʻe ʻEletā Sikoti D. Uaitingi ʻo e Kau Fitungofulú ʻo pehē:
ʻĪmisi
Laʻitā Fakaʻofisiale ʻo ʻEletā Sikoti D Uītingi. Laʻitā Fakaʻofisiale ʻo ʻEletā Lōpeti C. Kei kimuʻa.
Ke lava ʻo mamata ki he tupulaki moʻoní, ʻe fiemaʻu ke hokohoko atu hoʻo feingá. ʻOku hangē pē ia ko e fiemaʻu ke fai ha teuteu kimuʻa pea toki kaka he moʻungá, mo e kātaki mo e tui mateaki lolotonga ʻa e kaka hake ki ʻolungá, ʻoku pehē pē ʻa e fononga ko ʻení ʻoku fiemaʻu ki ai ha ngāue lahi mo ha feilaulau. ʻOku fiemaʻu maʻu pē hotau lelei tahá ki he anga faka-Kalisitiane moʻoní, ʻa ia ʻoku tau feinga ai ke hangē ko hotau ʻEikí. …
ʻOku ou ʻilo ko e hoko ʻo hangē ko Iá ʻo fakafou ʻi Heʻene tokoni fakalangí mo e mālohí ʻoku malava fakakongokonga ia. Kapau naʻe ʻikai malava ke pehē, naʻe ʻikai ke Ne ʻomi ʻa e fekau ko ʻení kiate kitautolu [vakai, 1 Nīfai 3:7].
Ko e hā ʻoku hoko ʻi heʻeku feinga ke maʻu e ngaahi ʻulungaanga faka-Kalaisí?
Naʻe fakamatalaʻi ʻe ʻEletā Lōpeti D. Heili (1932-2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
Laʻitā fakaʻofisiale ʻo ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá, 2003.
Ko e ngaahi ʻulungaanga ʻo e Fakamoʻuí, ʻi heʻetau vakai ki aí, ʻoku ʻikai ko ha fakamatala tohi ke muimuiʻi pe ko ha lisi ke fakaʻilongaʻi. Ko ha ngaahi ʻulungaanga ia ʻoku lalanga fakataha, ʻo tātānaki fakataha ʻa ia ʻoku fakatupu ʻiate kitautolu ʻi ha ngaahi founga ʻoku nau fekauʻaki. Ko hono ʻai ʻe tahá, he ʻikai ke tau lava ʻo maʻu ha taha ʻo e ngaahi ʻulungaanga faka-Kalaisí ʻo ʻikai maʻu mo tākiekina ai e toengá. Ko e taimi ʻoku fakaʻau ʻo mālohi ai ha ʻulungaanga ʻe tahá, ʻoku pehē pē mo ha ngaahi ʻulungaanga lahi ange.