Celestial, Terrestrial, ug Telestial nga mga Lawas
Imahe
Pamayhon sa usa ka Batan-ong Babaye diha sa kasanag sa hayag sa adlaw.
Nganong angay lang ang pagsunod kang Jesukristo bisan kon tan-awon ang uban mura og nakakaplag og kalipay diha sa sala? Si Pablo mipasabot sa usa sa mga hinungdan pinaagi sa pagtudlo sa Mga Taga-Corinto mahitungod sa lainlaing mga ang-ang sa himaya diha sa Pagkabanhaw. Kini nga leksiyon makatabang nimo sa pagpaningkamot nga mahimong takos sa usa ka celestial nga pagkabanhaw pinaagi ni Jesukristo.
Umaabot nga mga panalangin sa plano sa Dios
Kon ikaw makahibalo nga ang inyong magtutudlo maghatag og ganti sa tanang magsul-ob ug pihong kolor karon, makaapekto ba kana sa imong pagpili sa sinena?
Ikasagmuyo ba nimo kon imong nahibaloan kini nga ulahi na kaayo? Ngano o nganong dili?
Tungod kay ang Langitnong Amahan nahigugma kanato, Siya misulti kanato sa unsay mahitabo human niining kinabuhi ug unsa nga mga pagpili ang magdala og kalipay o pagmahay. Sa imong pagtuon sa mga kasulatan karon, pangita og mga kamatuoran nga magdasig kanimo sa paghimo og mga pagpili nga maggiya ngadto sa mahangtoron nga kalipay.
1. Kompletoha ang mosunod nga kalihokan sa pagdrowing ug tubaga ang mosunod nga mga pangutana diha sa imong journal sa pagtuon.
Pagdrowing og yanong paghulagway o dayagram kon unsa ang imo nang nahibaloan mahitungod sa plano sa Dios sa kaluwasan. Ilakip kon diin kita sa wala pa matawo, kinabuhi sa kalibotan, ug unsa ang mahitabo human sa kamatayon. Sa imong pagdrowing, seguroha nga makapamalandong kabahin sa papel ni Jesukristo sa tibuok plano sa atong Amahan.
Sa unsang paagi nga ang pagsabot sa plano sa Langitnong Amahan alang kanato human sa kamatayon makaapekto sa mga desisyon nga imong himoon sa mortalidad?
Sa unsang paagi nga si Jesukristo ang sentro sa maong plano?
Sa 1 Mga Taga-Corinto 15:1–29, si Apostol Pablo mikoriher sa sayop nga pagtuo nga “wala may pagkabanhaw ang mga nangamatay” (1 Mga Taga-Corinto 15:13). Siya dayon mipasidaan sa mga Taga-Corinto nga dili magpalingla pinaagi sa kinaiya sa mga tawo nga moingon, “Mangaon ug manginom kita kay ugma mangamatay man kita”.(1 Mga Taga-Corinto 15:32), nga nagpadayag og sayop nga pagtuo nga walay kinabuhi human sa kamatayon ug, busa, bisan unsa ang atong buhaton niining kinabuhi dili importante.
Lain pang sayop nga pagtuo mao nga, dili igsapayan kon unsa may atong mga pagpili, ang Dios mohatag sa tanan og mga panalangin sa kinabuhing dayon (tan-awa sa 2 Nephi 28:8; Alma 1:4).
Sa unsang paagi nga ang sayop nga mga pagtuo nga walay kinabuhi human sa kamatayon o nga ang Dios mohatag sa tanan og mga panalangin sa kinabuhing dayon makaapekto sa atong mga desisyon ug mga kinaiya? Ngano man?
Ang 1 Corinthians 15:40–42 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas sayon ra nimo kining makit-an. Makakat-on ka og dugang pa mahitungod niini nga tudling sa doktrinal nga kahanas sa sunod nga leksiyon.
Basaha ang 1 Mga Taga-Corinto 15:40–42, nga mangita sa mga pagtulon-an ni Pablo mahitungod sa pagkabanhaw diha sa plano sa Langitnong Amahan. Makatabang ang kahibalo nga ang Hubad ni Joseph Smith sa 1 Mga Taga-Corinto 15:40 nagpasabot usab sa telestial nga mga lawas.
Nganong importante man nga mahibalo sa kamatuoran nga sa plano sa Langitnong Amahan, adunay lainlaing ang-ang sa himaya alang sa nabanhaw nga mga lawas?
Mga ang-ang sa himaya
Imahe
Paghulagway sa tulo ka ang-ang sa himaya. Usa ka adlaw, buwan ug mga bitoon gihulagway. Mga tinukog nga drowing sa ubos nagpakita sa nagkalain-laing ang-ang sa bidlisiw sa kahayag.
2. Kompletoha ang mosunod nga kalihokan diha sa imong journal sa pagtuon.
Ang pagpadayag pinaagi sa modernong mga propeta naghatag og dugang nga mga panabot ngadto sa mga pagtulon-an ni Pablo. Tun-i ang Doktrina ug mga Pakigsaad 76:50–52, 62–64, 69–70, 71–76, 81–85; 88:21–24 ug basaha ang mosunod nga pamahayag ni Presidente Thomas S. Monson (1927–2018). Pangita og mga tubag sa tulo ka mga pangutana nga mosunod sa pamahayag.
Imahe
Opisyal nga litrato ni Presidente Thomas S. Monson, 2008.
Isip resulta sa kadaogan ni Kristo [batok] sa lubnganan, kitang tanan mabanhaw. Mao kini ang katubsanan sa kalag. Si Pablo misulat: “Adunay … mga lawas nga langitnon, ug mga lawas nga yutan-on: apan lain ang kasanag sa mga langitnon, ug lain usab ang mga kasanag sa mga yutan-on” (1 Mga Taga-Corinto 15:40).
Ang celestial nga himaya ang atong gipangita. Kita nagtinguha sa pagpuyo diha sa presensiya sa Dios. Diha sa mahangtoron nga pamilya nga kita gustong mahisakop. Ang ingon nga mga panalangin maangkon pinaagi sa tibuok kinabuhi nga pagpaningkamot, pagtinguha, paghinulsol, ug sa kataposan kalamposan.
Unsa ang papel sa Manluluwas sa atong panaw paingon sa celestial nga himaya?
Unsa ang kinahanglan natong buhaton aron makadawat sa celestial nga himaya?
Nganong ang pagdawat sa celestial nga himaya maoy angay nga paningkamotan kay sa terrestrial o telestial nga himaya?
Pamalandongi asa nimo dapita makita ang imong kaugalingon sa dalan paingon sa celestial nga gingharian. Nagasalig ka ba nga tabangan ka sa Manluluwas sa pagpuyo sa ingon nga paagi nga ikaw makadawat niini nga mga panalangin?
Makakab-ot ba gayod kita sa celestial nga himaya?
Ang pipila ka mga tawo mibati og kawalay kadasig kon ilang maamgohan unsa sila kalayo gikan sa pagpuyo sa celestial nga kinabuhi dinhi sa kalibotan. Basaha unsa ang gitudlo ni Elder Dieter F. Uchtdorf sa Korum sa Napulog Duha ka Apostoles mahitungod sa atong mahangtoron nga pag-uswag, o tan-awa ang bidyo nga “Ang Dios taliwala Kanato,” gikan sa time code 5:01 hangtod 6:58, anaa sa ChurchofJesusChrist.org.
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Ang akong kasingkasing napuno sa pasalamat alang sa akong Langitnong Amahan. Ako nakaamgo nga Siya wala molaglag sa Iyang mga anak aron nga maglisod sa mortalidad nga walay paglaom alang sa usa ka hayag ug walay kataposan nga kaugmaon. Siya naghatag og mga panudlo nga mipadayag sa dalan balik ngadto Kaniya. Ug ang sentro niining tanan mao ang Iyang Pinalanggang Anak, si Jesukristo, ug ang Iyang sakripisyo alang kanato. …
Kitang tanan mga bata pa kon ikomparar sa mga nilalang sa himaya ug kahalangdon nga diin kita gidesinyo nga mamahimo. Walay mortal nga mga paglambo sa tawo gikan sa pagkamang ngadto sa paglakaw ngadto sa pagdagan nga walay kanunay nga mga pagkadagma, mga pagkabangga ug mga bun-og. Sa ingon niana kita makat-on.
Unsa ang natabang sa pamahayag ni Elder Uchtdorf sa imong pagsabot mahitungod sa Langitnong Amahan?
Sa unsang paagi kana nakaimpluwensiya sa imong mga pagbati ngadto Kaniya ug sa imong relasyon diha Kaniya?
Unsa ang imong nadasig nga pagabuhaton tungod sa unsay imong nakat-onan karong adlawa?
Opsiyonal: Gustong Makakat-on Pa og Dugang?
Unsa kaha kon kita naningkamot sa pagpuyo nga matinud-anon niining kinabuhia apan nagpabilin gihapon nga dili hingpit sa higayon nga kita mamatay?
Si Propeta Joseph Smith (1805–44) mipasabot:
Imahe
Hulagway sa katunga sa barog ni Propeta Joseph Smith, Jr. Ang ulo ni Joseph naglingi og diyutay sa kilid, nanighawak sa tuo nga kamot ug ang iyang wala nga kamot naggunit og mga panid sa papel. Siya gipakita nga nagsul-ob og kapehon og kolor [dark brown] nga amerkana ug puti nga polo ug korbata.
Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtod ikaw moabot sa ibabaw; ug ingon usab niini ang mga [baroganan] sa ebanghelyo—kinahanglan nga ikaw magsugod sa sinugdanan, ug mopadayon hangtod nga ikaw makakat-on sa tanang mga [baroganan] sa kahimayaan. Apan mahimo nga madugay-dugay nga ikaw [makaagi lahos] sa tabil sa dili pa ikaw makakat-on [niini]. Dili ang tanan mahimong masabtan dinhi sa kalibotan; may dako nga buluhaton sa pagkat-on sa atong kaluwasan ug kahimayaan nga molungtad lapas sa lubnganan.
(Mga Pagtulon-an sa mga Presidente sa Simbahan: Joseph Smith [2007], 323)
Unsa ang gipasabot sa “Ang lawas nga ilubong madunot, apan sa pagbanhaw na niini, dili na kini madunot” (1 Mga Taga-Corinto 15:42)?
Gitandi ni Pablo ang mortal nga lawas ngadto sa usa ka liso nga dili hingpit, o madunot (tan-awa sa 1 Mga Taga-Corinto 15:37–38, 42). Human kita mamatay ug malubong (gipugas o gitanom), kita usa ka adlaw mobangon gikan sa lubnganan sama sa usa ka tanom nga mitubo gikan sa yuta. Ang atong nabanhaw nga mga lawas dili na gayod madunot, apan mahimong hingpit pinaagi sa gahom sa Dios.
Kinsa ang makadawat sa celestial nga himaya?
Ang celestial nga gingharian mao ang lugar nga giandam alang niadtong mga “nakadawat sa pagpamatuod ni Jesus” ug “nahimo nga hingpit pinaagi ni Jesus ang tigpataliwa sa bag-o nga pakigsaad, kinsa nagbuhat niini nga hingpit nga pag-ula pinaagi sa pagpaagas sa iyang kaugalingon nga dugo” (Doktrina ug mga Pakigsaad 76:51, 69). Aron mapanunod kini nga gasa, kita kinahanglang makadawat sa mga ordinansa sa kaluwasan, motuman sa mga kasugoan, ug maghinulsol sa atong mga sala. Alang sa detalyadong pagpasabot niadtong mga makapanunod sa celestial nga himaya, tan-awa ang Doktrina ug mga Pakigsaad 76:50–70; 76:92–96.
(Giya ngadto sa mga Kasulatan, “Gingharian sa Langit [Kingdoms of Glory],” topics.ChurchofJesusChrist.org)
