“Maingon Man Usab Diha Kang Kristo Ang Tanan Mangabuhi”
Imahe
Usa ka oil painting ni Maria nga nakakita sa nabanhaw nga Kristo. Ang lubnganan diha sa luyo, si Maria makita nga nagsinena og brown, ang iyang luyo nag-atubang sa tumatan-aw. Si Kristo nakita nga adunay mga marka diha sa iyang mga kamot, gisinaan og puti nga kupo.
Sa miaging leksiyon, imong nakat-onan nga tungod sa Pagkabanhaw sa Manluluwas, ang tanang mga anak sa Langitnong Amahan mabanhaw (tan-awa sa 1 Mga Taga-Corinto 15:20–22). Kini nga leksiyon makatabang nimo sa pagmemorya sa pakisayran sa doktrinal nga kahanas ug mahinungdanon nga hugpong sa mga pulong sa kasulatan alang sa 1 Mga Taga-Corinto 15:20–22, ipasabot ang doktrina sa Pagkabanhaw, ug gamita ang mga baroganan sa pag-ankon og espirituhanong kahibalo sa tinuod nga sitwasyon sa kinabuhi.
Isag-ulo ug ipasabot
Si Presidente Gordon B. Hinckley (1910–2008) nagtudlo nga “sa tanang mga panghitabo sa kasaysayan sa tawo, wala nay molabaw pa sa kamakahuluganon kaysa sa pagkabanhaw sa Anak sa Dios” (“The Empty Tomb Bore Testimony,” Ensign, Mayo 1988, 65).
1. Kompletoha ang mosunod diha sa imong journal sa pagtuon:
Gamita ang mga kamatuoran gikan sa 1 Mga Taga-Corinto 15:20–22, sama sa tungod sa Pagkabanhaw ni Jesukristo, ang tanan mabanhaw, aron ipasabot nganong ang Pagkabanhaw sa Manluluwas mao ang labing mahinungdanong hitabo sa kasaysayan sa tawo. Ilakip nganong mahinungdanon kini alang sa imong kaugalingon.
Paggahin og higayon sa pagsag-ulo sa pakisayran sa kasulatan ug sa mahinungdanong hugpong sa mga pulong sa kasulatan diha sa 1 Mga Taga-Corinto 15:20–22. Ang mosunod nga mga lakang makahatag og paagi aron mabuhat kini.
Sa kinababwan sa usa ka piraso nga papel, isulat ang pakisayran sa kasulatan ug mahinungdanon nga hugpong sa mga pulong:
1 Mga Taga-Corinto 15:20–22: “Diha kang Adan ang tanan nangamatay, maingon man usab diha kang Kristo ang tanan mangabuhi.”
Pilo-a ang ibabaw nga bahin sa imong papel paubos aron dili nimo makita ang imong gisulat. Dayon pagsulat og kutob sa inyong mahimo sa pakisayran sa kasulatan ug sa mahinungdanong mga hugpong sa mga pulong sa kasulatan nga inyong mahinumdoman.
Ablihi ang ibabaw aron ma-tsek ang pagka insakto niini ug usba ang bisan unsang mga sayop.
Balika kini nga proseso hangtod inyong mahingpit pagsulat ang pakisayran sa kasulatan ug ang mahinungdanong hugpong sa mga pulong sa kasulatan gikan sa panumdoman.
Bansaya ang paggamit
Tungod sa Pagkapukan ni Adan ug Eba, ang matag anak sa Langitnong Amahan kinsa nakasinati og mortalidad sa kalibotan mamatay (tan-awa sa 1 Mga Taga-Corinto 15:21–22). Kon kita makasinati nga mamatyan og usa ka tawo nga duol kanato, kita mobati og dili masabtan nga pagbangotan. Bisan og kini nga mga kasinatian managlahi sa tanan, ang pagsabot ug paggamit sa mga kamatuoran sa ebanghelyo ni Jesukristo mahimong makatabang niana nga pagbangotan.
Si Elder S. Mark Palmer sa Seventy naghulagway sa kasinatian sa iyang mga ginikanan sa pagkamatay sa ilang anak nga babaye sa wala pa sila makat-on mahitungod sa ebanghelyo ni Jesukristo.
Tan-awa ang “Mahimong Kalipay ang Atong Kaguol,” anaa sa ChurchofJesusChrist.org, gikan sa time code 3:27 hangtod 4:26, o basaha ang pamahayag sa ubos.
Imahe
Kanhi Opisyal nga hulagway ni Elder S. Mark Palmer. Gipulihan niadtong Marso 2017.
Ang akong mga ginikanan tigpamuhi og mga karnero sa New Zealand. Nalingaw sila sa ilang kinabuhi. Sa bag-o pa silang naminyo, gipanalanginan sila og tulo ka anak nga babaye. Ang kinamanghoran niini ginganlan og Ann. Usa ka adlaw samtang naglingaw-lingaw sila sa usa ka linaw, ang 17 ka bulan nga si Ann nawala dihang naglakaw-lakaw. Human sa mga minutos nga walay kahimoang pagpangita, nakit-an siyang patay na diha sa tubig.
Kining masulub-ong hitabo nagmugna og dili matukib nga kasubo. Si Papa misulat paglabay sa katuigan nga ang hudyaka nawala sa ilang kinabuhi sa hangtod. Misangpot usab kini sa pagtinguha og mga tubag sa [labing] importanteng mga pangutana sa kinabuhi: Unsay mahitabo sa among pinalangga kaayong si Ann? Makita ba namo siya pag-usab? Sa unsang paagi ang among pamilya magmalipayon pag-usab?
Kanus-a ka o ang imong kaila nakasinati og susamang mga pagbati sama niadtong sa mga ginikanan ni Elder Palmer human sa pagkamatay sa usa ka minahal sa kinabuhi?
Sa unsang paagi nga ang wala pagkasayod mahitungod sa plano sa kaluwasan sa Langitnong Amahan makahimo niini nga mga sitwasyon nga mas mahagiton?
Ang mga baroganan sa pag-angkon og espirituhanong kahibalo makatabang kanato aron matinud-anong molahutay sa malisod nga mga sitwasyon sama sa nasinati sa pamilya Palmer. Handurawa nga ikaw higala sa usa sa mga maguwang nga igsoong babaye ni Ann, kinsa karon nanlimbasog sa mga pangutana ug mga hagit human sa kamatayon ni Ann. Ikaw mibati nga naaghat sa pagsulat kaniya og pagdasig ug pagsuporta. Sa alternatibong paagi, pagsulat og usa ka sulat ug ihatag kini sa imong kaila kinsa makabenepisyo gikan niini.
Aron maandam sa pagsulat niini nga sulat, basaha ang mga parapo 5–8, 11 sa “Pag-angkon og Espirituhanong Kahibalo” nga bahin diha sa Mahinungdanon nga Dokumento sa Doktrinal nga Kahanas (2022). Pangitaa ug markahi ang mga pulong, mga hugpong sa mga pulong, mga kasulatan, o mga kamatuoran nga nabati nimong makatabang sa tawo nga imong gisulatan.
Sa unsang paagi nga ang pagpaningkamot sa pagtan-aw sa tawo nga imong gisulatan sama sa pagtan-aw sa Langitnong Amahan kanila makapausab sa unsa ang imong gisulat ngadto kanila?
2. Kompletoha ang mosunod diha sa imong journal sa pagtuon:
Pagsulat og usa ka sulat ngadto sa igsoong babaye ni Ann o ngadto sa laing tawo nga imong napili. Paglakip og mga panabot gikan sa tulo ka mga baroganan sa pag-angkon og espirituhanong kahibalo.
Ikonsiderar ang pipila sa mosunod nga mga ideya diha sa imong pagsulat.
Molihok inubanan sa hugot nga pagtuo
Unsa lagmit ang hitsura sa paglihok nga may hugot nga pagtuo kang Jesukristo sa ilang sitwasyon?
Sa unsang paagi nga ang paglihok nga may hugot nga pagtuo kang Kristo makatabang nato sa paglahutay sa pagbangotan?
Unsa ang usa ka kasinatian nga nasinati nimo o sa imong kaila diin ang paglihok nga may hugot nga pagtuo kang Jesukristo nakatabang sa paglahutay sa susamang hagit?
Susiha ang mga konsepto ug mga pangutana inubanan sa mahangtorong panglantaw
Unsa nga mga kamatuoran mahitungod sa Langitnong Amahan ug sa Iyang plano ang mahimong makapahupay sa sitwasyon sa tawo nga imong gisulatan? Ngano man?
Sa unsang paagi nga ang pagbaton og mahangtorong panglantaw makatabang kanila nga mahibalo unsaon pagsagubang ang ilang sitwasyon?
Tinguhaa ang dugang nga panabot pinaagi sa balaanong gitudlo nga mga tinubdan
Unsa nga mga hugpong sa mga pulong gikan sa 1 Mga Taga-Corinto 15:20–22 ang mahimong makatabang kanila? Ngano man?
Unsa pa ang uban nga balaanong gitudlo nga mga tinubdan ang makatabang kanila sa pagpalambo sa hugot nga pagtuo kang Jesukristo?
Mahimong taposon ang imong sulat pinaagi sa pagpakigbahin sa imong pagpamatuod.
