“Apan Ang Tinuod Mao Nga Si Kristo Gibanhaw gikan sa mga Patay”
Imahe
Debuho ni Jesukristo nga naghangad sa langit nga gituyhad ang Iyang mga bukton pataas. Siya anaa tungod sa lubnganan diin Siya gipahiluna.
Handurawa sa makadiyot nga si Jesukristo wala mabanhaw. Unsa ang kahulogan niana alang sa kalibotan? alang kanimo sa personal? Nganong importante man kaayo ang Pagkabanhaw ni Kristo? Dihang ang mga Santos sa Corinto mikwestiyon sa mga kamatuoran mahitungod sa Pagkabanhaw, si Pablo nagsulat ngadto kanila mahitungod sa unsa ang kahulogan sa Pagkabanhaw sa Manluluwas alang kanila. Kini nga leksiyon makatabang kanimo nga mobati og mas dakong gugma ug pagpasalamat alang kang Jesukristo tungod sa Iyang kadaogan ibabaw sa kamatayon.
Ang adlaw nga mibag-o sa kasaysayan
Si Elder Dieter F. Uchtdorf sa Korum sa Napulog Duha ka Apostoles mipakigbahin og usa ka pangutana nga iyang gisiksik kaniadto. Tan-awa ang “Tan-awa ania ra ang Tawo!” gikan sa time code nga 1:37 hangtod sa 2:31, anaa sa ChurchofJesusChrist.org, o basaha ang mosunod nga pamahayag.
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Bag-ohay lang nangutana ko sa internet, “Unsa nga adlaw ang mas nakapausab sa dagan sa kasaysayan?”
Ang mga tubag gikan sa makapatingala ug kahibudgan ngadto sa puno sa ideya ug makapaukyab sa hunahuna. Apil niini, mao ang adlaw nga ang usa ka prehistoric nga asteroid miigo sa Yucatán Peninsula; o sa dihang niadtong 1440, nahuman ni Johannes Gutenberg ang iyang printing press; ug siyempre ang adlaw sa 1903 sa dihang ang managsoong Wright mipakita nga ang mga tawo mahimo gayod nga makalupad.
Kon ang samang pangutana ipangutana nganha ninyo, unsa man ang inyong isulti?
Unsa nga adlaw ang imong masulti nga labing nakapausab sa dagan sa kasaysayan? Ngano man?
Si Elder Uchtdorf mipakigbahin sa hitabo nga iyang nabati nga labing nakapausab sa dagan sa kasaysayan. Tan-awa ang “Tan-awa, ania ra ang Tawo!” gikan sa time code nga 4:20 hangtod sa 4:55, o basaha ang mosunod nga pamahayag.
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Oo, dunay daghang panghitabo sa tibuok kasaysayan nga nakaapekto gayod sa kapalaran sa kanasoran ug katawhan. Apan hiusaha kining tanan, ug dili kini makatandi sa kaimportante sa unsay nahitabo nianang unang buntag sa Pasko sa Pagkabanhaw.
Unsa may nakapahimo sa walay kinutoban nga sakripisyo ug sa Pagkabanhaw ni Jesukristo nga labing importante nga panghitabo sa kasaysayan—nga mas impluwensiyal pa kay sa mga gubat sa kalibotan, makagun-ob nga mga katalagman, ug makapausab sa kinabuhi nga siyentipikanhong mga nadiskobrehan?
Sa imong hunahuna ngano nga ang Pag-ula sa Manluluwas ug Pagkabanhaw mao ang labing importanteng hitabo sa kasaysayan?
Nganong importante man ang Pagkabanhaw ni Jesukristo nganha kanimo?
Ang Pagkabanhaw ni Jesukristo
Si Pablo nagsulat sa mga Santos nga Taga-Corinto aron itul-id ang sayop nga pagtuo nga mitumaw nga walay nahitabong Pagkabanhaw. Sa imong pagtuon sa iyang mga pulong, pagmugna og usa ka tsart parehas sa mosunod aron irekord ang mga detalye ug mga kamatuoran gikan sa mga kasulatan, ingon man usab ang mga pag-aghat nga imong nadawat gikan sa Espiritu Santo. Ang pagbuhat sa ingon mahimong makatabang kanimo aron mas makasabot sa mga kasulatan, mas makaangkon og usa ka mas gamhanang kasinatian sa pagkat-on, ug mapalawom ang imong gugma ug pagsabot sa Manluluwas ug sa Iyang kadaogan ibabaw sa kamatayon.
1. Drowinga ug kompletoha ang mosunod nga tsart diha sa imong journal sa pagtuon:
Kon si Jesukristo wala nabanhaw …
Tungod kay si Jesukristo nabanhaw …
Basaha ang 1 Mga Taga-Corinto 15:13–19. Pagdugang og duha o tulo ka mga pamahayag sa walang bahin sa imong tsart base sa unsa ang imong nakat-onan gikan niini nga mga bersikulo.
Sa unsang paagi ikaw ug ang uban maapektohan kon si Jesus wala nabanhaw?
Ang 1 Mga Taga-Corinto 15:20–22 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas sayon ra nimo kining makit-an. Makakat-on ka og dugang pa mahitungod niini nga tudling sa doktrinal nga kahanas sa sunod nga leksiyon.
Karon basaha ang 1 Mga Taga-Corinto 15:20–22. Pangitaa unsa ang mahitabo tungod sa Pagkabanhaw ni Jesukristo. Idugang kini ngadto sa tuo nga kolum sa imong tsart. Timan-i nga ang “nahaunang gibanhaw” sa bersikulo 20 nagpasabot kang Jesukristo isip unang tawo nga nabanhaw.
Unsa ang gipasabot pag-ayo ni Pablo nga mahitabo tungod kay si Jesukristo nabanhaw?
Kini nga tudling nagtabang kanato nga makasabot nga, tungod sa Pagkabanhaw ni Jesukristo, ang tanan mabanhaw. Ang pisikal nga kamatayon moabot sa tanan isip resulta sa Pagkapukan ni Adan ug ni Eba. Si Jesukristo mibuntog niini nga sangpotanan alang sa tanan isip usa ka libreng gasa.
Hunong ug paghunahuna mahitungod sa unsa ang gitudlo kanimo niini nga gasa sa unibersal nga pagkabanhaw mahitungod kang Jesukristo.
Unsa ang gitudlo diha kanimo sa pagbuntog sa Manluluwas sa pisikal nga kamatayon alang sa tanang katawhan mahitungod Kaniya?
Kon mahimo, tan-awa ang “#Aleluya —Usa ka Mensahe sa Pasko sa Pagkabanhaw mahitungod ni Jesukristo [#Hallelujah—An Easter Message about Jesus Christ ]” (2:13), anaa sa ChurchofJesusChrist.org. Pangitaa ug ilista diha sa husto nga kolum sa imong tsart kon sa unsang paagi nga ikaw mapanalanginan tungod sa Pagkabahaw sa Manluluwas. Ang “Aleluya” mao ang usa ka pagpahayag nga nagpasabot og “dayegon ninyo ang Ginoo” (tan-awa sa Bible Dictionary, “ Hallelujah ”).
Unsay imong nakat-onan gikan sa bidyo nga makapahimo kanimo nga gustong modayeg sa Ginoo?
Hunahunaa pagbalik ang pangutana sa nahaunang bahin niini nga leksiyon: “Nganong ang Pagkabanhaw importante man kanimo?”
Sa unsang paagi nga ang imong tubag niana nga pangutana naapektohan sa unsa ang imong gitun-an karon?
Giunsa nimo paghanduraw ang imong bation mahitungod ni Jesukristo inig hatag Niya og bag-ong kinabuhi kanimo ug sa imong mga minahal sa kinabuhi?
Unsa ang kahulogan sa Iyang Pagkabanhaw alang kanato
Ang karaan ug bag-ong mga lider sa Simbahan nagpamatuod sa unsa ang kahulogan sa kadaogan sa Manluluwas ibabaw sa kamatayon alang kanato.
Basaha ang 1 Mga Taga-Corinto 15:51–58, Alma 11:42–44, ug ang mosunod nga pamahayag ni Elder Paul V. Johnson sa Seventy, kansang anak nga babaye namatay gumikan sa kanser. Pagdugang og importante nga mga detalye nga imong makita diha sa imong tsart. Timan-i nga ang “dili na madunot” ( 1 Mga Taga-Corinto 15:52) nagpasabot nga magpadayon hangtod sa kahangtoran ug dili madugta.
Imahe
Elder Paul V. Johnson sa Korum sa Seventy nagpakuha og opisyal nga hulagway, 2021.
Ang matag usa kanato adunay pisikal, mental, ug emosyonal nga mga limitasyon ug mga kahuyang. Kini nga mga hagit … sa kataposan mahimong masulbad ra. Walay usa niining mga problema moabot nato human kita mabanhaw. …
… Nasayod kita nga si [Kristo] makahimo kanato nga hingpit bisan unsa ang naguba kanato. Nasayod kita nga Iyang “pagapahiran ang tanang luha gikan sa [atong] mga mata; ug ang kamatayon wala na, ug wala na usab unyay pagminatay, ni paghilak o kasakit” [Gipadayag 21:4].
Sa kinaubsan sa imong tsart, isulat unsa ang imong nakat-onan o nabati karon nga labing mahinungdanon kanimo ug ngano.
Opsiyonal: Gustong Makakat-on Pa og Dugang?
Sa unsang paagi nga ang kahibalo sa gahom sa Pagkabanhaw ni Kristo nakaimpluwensiya kanako?
Si Presidente Dallin H. Oaks sa Unang Kapangulohan mipasabot:
Imahe
Opisyal nga Litrato ni Presidente Dallin H. Oaks nga gikuha niadtong Marso 2018.
Ang kasiguroan nga ang pagkabanhaw maglakip sa oportunidad nga makig-uban sa atong mga sakop sa pamilya—bana, asawa, mga ginikanan, mga igsoong lalaki ug mga babaye, mga anak, ug mga apo—usa ka gamhanan nga pag-awhag kanato sa pagtuman sa atong mga responsibilidad sa pamilya diha sa pagka-mortal. Kini makatabang kanato nga magpuyo sa gugma niini nga kinabuhi sa pagpaabot sa malipayon nga mga panaghiusa ug mga pakig-uban sa sunod.
(Dallin H. Oaks, “Pagkabanhaw,” Liahona, Mayo 2000, 16)
Ikonsiderar ang pagtan-aw sa “Ang Dominggo Moabot [Sunday Will Come]” (2:31) alang sa dugang nga mga panabot. Kini nga bidyo anaa sa ChurchofJesusChrist.org.
Sa unsang paagi nga ang Pag-ula ug Pagkabanhaw sa Manluluwas nagtabang sa mga kawad-on nga atong nasinati sa mortalidad?
Tan-awa ang “Bisan Unsa ang Mahitabo, ug Dawata Kini [Come What May, and Love It ]” gikan sa time code 8:23 hangtod 9:12, diin si Elder Joseph B. Wirthlin (1917–2008) sa Korum sa Napulog Duha ka Apostoles mipasabot kon sa unsang paagi ang Manluluwas motabang kanato sa mga pagkawala nga atong masinati sa mortalidad. Kini nga bidyo anaa sa ChurchofJesusChrist.org.
Si Elder D. Todd Christofferson sa Korum sa Napulog Duha ka Apostoles mitudlo:
Imahe
Hulagway ni Elder D. Todd Christofferson. Gilitratohan niadtong Marso 2020.
Ang Manluluwas mihimo sa tanang butang nga matarong. Walay inhustisya sa mortalidad nga permanente, bisan ang kamatayon, kay Siya mipahiuli sa kinabuhi pag-usab. Walay mga kasakit, kakulangan, pagluib, o pang-abuso nga dili kabayran sa kataposan tungod sa Iyang walay kinutoban nga kaangayan ug kaluoy.
“Gipasabot ni Pablo nga ang Pagkabanhaw nagsunod og naestablisar nga han-ay o pagkasunod-sunod (tan-awa sa 1 Mga Taga-Corinto 15:23). …
“Si Jesukristo ang unang nabanhaw. Human dayon sa Iyang Pagkabanhaw, dihay matarong nga mga Santos nga mibangon gikan sa lubnganan (tan-awa sa Mateo 27:52–53). Sa Ikaduhang Pag-anhi, ang Pagkabanhaw magpadayon uban sa pagbangon sa laing matarong nga mga Santos, kinsa ‘iya ni Kristo sa iyang pag-anhi’ (1 Mga Taga-Corinto 15:23). Pinaagi sa ulahing adlaw nga pagpadayag, atong nahibaloan nga kining mga tawhana makapanunod sa celestial nga gingharian [tan-awa sa Doktrina ug mga Pakigsaad 76:50–70; 88:97–98]. Dayon moabot ang pagkabanhaw niadtong kinsa makadawat sa terrestrial nga himaya [tan-awa sa Doktrina ug mga Pakigsaad 76:71–79; 88:99]. Pagasundan sila sa kataposan sa Milenyum niadtong makapanunod sa telestial nga himaya [tan-awa sa Doktrina ug mga Pakigsaad 76:81–86; 88:100–101]. Sa kataposan, ang Pagkabanhaw taposon uban sa pagbangon niadtong kinsa … ang ‘mga anak sa kapildihan’ kinsa walay madawat nga ang-ang sa himaya apan ‘mobalik pag-usab sa ilang kaugalingon nga dapit, aron maglipay nianang diin sila mouyon sa pagdawat, tungod kay sila wala mouyon sa paglipay niana nga sila unta makadawat’ [tan-awa sa Doktrina ug mga Pakigsaad 76:31–39, 43–44; 88:28–32, 35, 101–2]” (Manwal sa Estudyante sa Bag-ong Tugon [New Testament Student Manual] [2014], 385).
Kadtong mga espiritu nga nagrebelde sa premortalidad ug wala makadawat og usa ka mortal nga lawas dili mauban sa kadtong mabanhaw (tan-awa ang Doktrina ug mga Pakigsaad 76:32–39).
