3

Talangofua

Fakalaulauloto:Ko e hā ʻa e ngaahi lao kuo pau ke u talangofua ki ai ke u moʻui fakafalala lahi ange pē kiate au?

Mamata:“Obedience Brings Blessings” (No video? Lau ʻa e peesi hono hokó.)

Aleaʻi:ʻOku taki ʻe he talangofua ki he ngaahi fono mo e ngaahi tefitoʻi moʻoni ʻa e ʻOtuá ki he ngaahi tāpuaki fakalaumālié mo fakatuʻasinó. Ko e hā haʻo ngaahi aʻusia ke fakamoʻoniʻi ʻaki ʻeni?

Lau:Tokāteline mo e Ngaahi Fuakava 130:20--21; mo e lea naʻe fai ʻe Siosefa Sāmitá (ʻi he toʻomataʻú)

“‘Oku ʻi ai ha fono … ʻa ia ʻoku makatuʻunga ki ai ʻa e ngaahi tāpuaki kotoa pē—Pea ʻo ka tau ka maʻu ha tāpuaki mei he ʻOtuá, ʻoku tupunga ia ʻi he talangofua ki he fono ʻa ia ʻoku makatuʻunga ia ki aí.

Tokāteline mo e Ngaahi Fuakava 130:20–21

“Naʻá ku ʻai ʻeni ko ʻeku lao: Ko e taimi ʻoku fekau mai ai ʻe he ʻEikí, fai ia.”

Joseph Smith, ʻi he History of the Church, 2:170.

Akoako Fakahoko:Vakai ki he tēpile ʻi laló. Fakatokangaʻi ʻa e founga ʻoku fakaiku ʻa e talangofua ki ha ngaahi fono paú ki ha ngaahi tāpuaki paú. ʻOku ʻoatu heni ha ngaahi sīpinga.

Sai, tuku ha ngaahi miniti siʻi ke:

1. Hiki ha ngaahi tāpuaki pau ʻokú ke fie maʻu ʻi hoʻo kumi ngāué, ngāue pē kiate koé, pe akó. Fakaʻaongaʻi ʻa e ʻotu ʻi toʻomataʻú.

2. Fakaʻaongaʻi ʻa e ʻotu ʻi toʻohemá ke hiki ai ʻa e ngaahi fono te ke lava ʻo talangofua ki ai ke maʻu ʻa e ngaahi tāpuaki ko iá.

Talangofua	Ke Maʻu
Ngaahi fonó pe ngaahi tefitoʻi moʻoní	Ngaahi tāpuakí
Ko e Lea ʻo e Potó (T&F 89)	Moʻui lelei ange, poto lahi
Vahehongofulú mo e ngaahi foakí (Malakai 3:10--12)	Ngaahi tāpuaki fakatuʻasino mo fakalaumālie, lavameʻa ʻi he ngāué, maluʻi
ʻAlu taimi totonu ki he ngāué ʻi he ʻaho kotoa pē	Kei maʻu pē ngāue maʻuʻanga moʻui mo malava ke fakahū ha paʻanga
Kai ʻa e meʻa fakatupu moʻui leleí mo fakamālohisino maʻu pē	ʻOku siʻi ange hoʻo liʻaki ngāué koeʻuhí ko e puké

Akoako Fakahoko:Hiki ha founga mahino ʻe ua pe tolu te ke lava ai ʻo fakatupulaki hoʻo talangofua ki he ngaahi fono naʻá ke filí:

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e fanga kiʻi puhá ʻi he taimi kuó ke fakakakato ai e ngāué takitaha:

• Akoako ke talangofua ʻi he ʻaho kotoa pē.

• Akoʻi ʻa e tefitoʻi moʻoni ko ʻení ki ho fāmilí.

• Hokohoko atu hono akoako fakahoko e tefitoʻi moʻoni kimuʻá.

“Kapau ʻoku tau saiʻia ʻi he koloá pe ngaahi meʻa ʻoku fie maʻú ʻo laka ange ʻi heʻetau saiʻia he talangofuá, ʻe mole meiate kitautolu ʻa e ngaahi tāupaki ʻokú Ne fie foaki mai kiate kitautolú.”

Spencer W. Kimball, ʻi he Teachings of Spencer W. Kimball, ed. Edward L. Kimball (1982), 212

Tokoni ʻa e Taki e Kulupú

Poupouʻi ʻa e taha kotoa ke fakahoko mo tauhi ha ngaahi tukupā mahino pea akoʻi honau fāmilí.

ʻOku ʻOmi ʻe he Talangofuá ʻa e Ngaahi Tāpuakí

Kapau ʻoku ʻikai ke mou lava ʻo mamata ʻi he foʻi vitioó, lau ʻa e fakamatala ko ʻení.

President Thomas S. Monson

Ko ha talaʻofa nāunauʻia moʻoni! “Ko ia ia ʻokú ne tauhi [e] ngaahi fekau [ʻa e ʻOtuá] ʻokú ne maʻu ʻa e moʻoní mo e māmá, kae ʻoua ke fakanāunauʻi ia ʻi he moʻoní peá ne ʻiloʻi ʻa e ngaahi meʻa kotoa pē” [T&F 93:28]. …

Kāinga, ko e sivi lahi taha ʻo e moʻui ní ko e talangofuá. Naʻe folofola ʻa e ʻEikí, “Pea te tau siviʻi ʻa kinautolu ʻi he meʻá ni, ke vakai pe te nau fai ʻa e meʻa kotoa pē ʻe fekau ʻe he ʻEiki ko honau ʻOtuá kiate kinautolú” [ ʻĒpalahame 3:25].

Naʻe fakahā ʻe he Fakamoʻuí: “He ko kinautolu kotoa pē ʻoku fie maʻu ha tāpuaki mei hoku nimá, te nau tauhi ʻa e fono ʻa ia naʻe fokotuʻu ki he tāpuaki ko iá, pea mo hono ngaahi tuʻunga ʻo iá, ʻo hangē ko ia naʻe fokotuʻu ʻi he teʻeki ai ke ʻai ʻa e tuʻunga ʻo e māmaní” [T&F 132:5].

ʻOku ʻikai ha faʻifaʻitakiʻanga maʻongoʻonga ange ʻo e talangofuá ʻi ha faʻifaʻitakiʻanga hotau Fakamoʻuí. Naʻe pehē ʻe Paula kau kiate ia:

“Neongo ko e ʻAló Ia, ka naʻe akonekina ia ke talangofua ʻe he ngaahi meʻa naʻá ne [kātakiʻí];

“Pea kuo fakahaohaoa ia, peá ne hoko ko e tupuʻanga ʻo e moʻui taʻengatá kiate kinautolu kotoa pē ʻoku talangofua kiate iá” [Hepelū 5:8–9].

Naʻe fakahaaʻi ʻe he Fakamoʻuí ʻa e ʻofa moʻoni ki he ʻOtuá ʻaki ʻEne moʻui haohaoa, fakahoko e misiona toputapu naʻe ʻAʻaná. Naʻe ʻikai fie māʻolunga. ʻIkai ʻulupupula ʻo hīkisia. Naʻe māteaki. Naʻe loto fakatōkilalo maʻu ai pē. Loto fakamātoato maʻu ai pē. Mo talangofua maʻu ai pē. …

Ko e taimi naʻe fehangahangai ai mo e mamahi ʻi Ketisemaní, ʻa ia naʻá Ne kātekina ai ʻa e mamahí pea ko ʻEne “tautaʻá ko e taʻataʻa naʻe tō ʻi he tulutā lalahi ki he kelekelé” [Luke 22:44], naʻá Ne fakafōtunga ʻa e ʻAlo talangofuá ʻaki ʻEne pehē, “ʻE Tamai, kapau ko ho finangaló, ʻave ʻa e ipú ni ʻiate au: kae ʻoua naʻa fai hoku lotó, ka ko e finangalo ʻoʻoú” [Luke 22:42].

Hangē ko hono fakahinohino ʻe he Fakamoʻuí ʻa ʻEne Kau ʻUluaki ʻAposetoló, ʻoku pehē ʻa ʻEne fakahinohinoʻi koe mo aú: “Muimui koe ʻiate au” [Sione 21:22]. ʻOku tau loto fiemālie nai ke talangofua?

Ko e ʻilo ʻoku tau kumiá, ko e ngaahi tali ʻoku tau fakaʻamuá, pea mo e ivi ʻoku tau fie maʻu he ʻahó ni ke feau ʻaki e ngaahi faingataʻa ʻo e mamahi fihituʻu mo faʻaliliuá, ʻe ʻatautolu ia ʻi he taimi te tau loto fiemālie ai ke talangofua ki he ngaahi fekau ʻa e ʻEikí. Te u toe lau mei he ngaahi folofola ʻa e ʻEikí: “Ko ia ia ʻokú ne tauhi ʻene ngaahi fekaú ʻokú ne maʻu ʻa e moʻoní mo e māmá, kae ʻoua ke fakanāunauʻiaʻi ia ʻi he moʻoní peá ne ʻiloʻi ʻa e ngaahi meʻa kotoa pē” [T&F 93:28].

ʻOku ou lotua ʻi he loto fakatōkilalo ke tāpuekina kitautolu ʻaki ʻa e ngaahi pale lelei kuo talaʻofa ki he talangofuá. ʻI he huafa ʻo Sīsū Kalaisi, ko hotau ʻEiki mo e Fakamoʻuí, ʻēmeni.

(Thomas S. Monson, “ʻOku ʻOmi ʻe he Talangofuá ʻa e Ngaahi Tāpuakí,” Ensign pe Liahona, Mē 2013, 89, 92)