Mensahe gikan sa Unang Kapangulohan ug sa Korum sa Napulog Duha ka Apostoles
Minahal nga Pangserbisyo nga Misyonaryo:
Ang Basahon ni Mormon nagtudlo, “Ug tan-awa, ako mosulti kaninyo niini nga mga butang nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Ang Dios mitawag kanimo nga mahimong usa ka pangserbisyo nga misyonaryo aron mohimo og importante nga buhat niining higayona. Mapasalamaton kaayo kami sa imong kaandam sa paghimo niini.
Nag-awhag kami kanimo sa “pag-ampo ngadto sa Amahan uban sa tibuok kusog sa kasingkasing” nga ikaw unta mapuno sa tiunay nga gugma ni Kristo nga itugyan ngadto sa “tanan kinsa tinuod nga mga sumusunod” ni Jesukristo (Moroni 7:47–48). Kami nagdapit kanimo sa pagpalambo sa imong mga talento ug mga kahanas alang sa himaya sa Dios. Siya motabang kanimo sa pagpanalangin sa Iyang mga anak samtang ikaw moserbisyo kanila isip usa ka pangserbisyo nga misyonaryo.
Ang Mga Sumbanan sa Misyonaryo alang sa mga Disipulo ni Jesukristo—Pangserbisyo nga mga Misyon gisangkap sa Unang Kapangulohan ug Korum sa Napulog Duha ka mga Apostoles aron mogiya sa imong pagserbisyo. Kami nag-awhag kanimo nga mahimong pamilyar niini ug motuman sa mga sumbanan nga gilatid. Kini nga mga sumbanan makatabang sa pagpanalipod kanimo sa pisikal, espirituhanon ug emosyonal nga paagi. Makatabang kini kanimo nga mahimong tinuod nga disipulo ni Jesukristo ug molambo nga mahimong sama Kaniya. Pagtuon kanunay niini nga mga sumbanan ug paningkamot sa pagsunod niini. Kon ikaw adunay mga pangutana, mainampoon nga mangaliyupo sa Ginoo nga tabangan ka, ug dayon pakigtambag sa imong presidente sa stake ug sa mga lider sa pangserbisyo sa misyon kon gikinahanglan.
Kami nag-ampo nga imong makaplagan ang tinuod nga kalinaw ug hingpit nga kalipay isip usa ka pangserbisyo nga misyonaryo diha sa pagserbisyo sa Ginoo nga si Jesukristo ug sa mga anak sa Langitnong Amahan.
Uban sa gugma ug pagtahod,
Unang Kapangulohan ug Korum sa Napulog Duha ka mga Apostoles
Ang Simbahan ni Jesukristo sa mga Santos sa Ulahing mga Adlaw