Healing [Pagkaayo], ni J. Kirk Richards

4

Pisikal ug Emosyonal nga Kaaayohan

4.0

Pasiuna

Ang usa ka misyon mahimong makapalipay ug makapaluya. Ang mga sumbanan dinhi niining seksyon ug diha sa Pagpahiangay ngadto sa Kinabuhi sa Pangserbisyo nga Misyonaryo makatabang nimo sa pag-andam sa imong panghunahuna ug panglawas aron mas makaserbisyo og maayo sa Ginoo. Ribyuha kanunay kining mga sumbanan sa tibuok nimong misyon.

4.1

Pisikal nga Kahimsog

Ang imong kahimsog ug seguridad importante. Pagpabiling himsog aron makaserbisyo ka sa tibuok nimong kasingkasing, gahum, hunahuna, ug kusog.

Ikaw ug ang imong pamilya mao ang responsable alang sa pag-atiman sa imong mga panginahanglang medikal. Ang mga pagbisita ngadto sa doktor o mga propesyonal nga tig-atiman bahin sa kahimsog kinahanglang pakigsabotan nang daan sa imong mga superbisor.

4.1.1

Kinatibuk-ang mga Lagda sa Nutrisyon

Palihug gamita ang mosunod nga kinatibuk-ang mga lagda sa nutrisyon, sumala sa indibidwal nga pagpahiuyon kon gikinahanglan:

• Inom og igong gidaghanon sa tubig matag adlaw. Lagmit magkinahanglan ka og dugang nga tubig ug asin kon nagsingot ka og maayo sa tibuok adlaw o atol sa ehersisyo.

• Kaon og balanse nga mga pagkaon nga naglakip sa mga utanon, mga prutas, mga lugas, makaayo sa lawas nga mantikilya, ug protina.

• Limitahi ang mga junk food, dunay karbonato [carbonated] nga mga ilimnon, giproseso nga mga pagkaon, ug fast food.

• Sunda ang gitambag gikan sa imong mga propesyonal sa medikal kalabut sa espesyal nga mga diyeta, mga tumaron nga tambal, o uban pang mga buluhaton alang sa kahimsog sigon sa imong mga gikinahanglan.

4.2

Pag-ehersisyo

Ang pag-ehersisyo makatabang nimo nga magpabiling himsog ug makatabang nga mawala ang kaluya. Himoa ang pag-ehersisyo nga kabahin sa imong inadlaw-adlaw nga tulumanon kutob sa itugot sa imong mga kahimtang.

4.3

Emosyonal nga Kahimsog

Ang misyonaryo nga buhat lisod. Ang pagbati og kaluya sa matag karon ug unya normal ra. Makaandam ka sa imong panglawas ug panghunahuna aron mas madumala ang kaluya pinaagi sa pagpahimulos sa suporta sa pamilya. Makaandam ka usab pinaagi sa pagpraktis og mga gawi sa pagkaon og makapahimsog, kanunay nga pag-ehersisyo, saktong pagkatulog, pagrelaks, ug espirituhanong mga kalihokan (lakip na ang pag-ampo, pagpamalandong, ug pagtuon).

Sa tibuok nimong misyon, gamita ang Pagpahiangay ngadto sa Kinabuhi sa Pangserbisyo nga Misyonaryo aron matabangan ka sa pagdumala sa imong kaluya. Kon imong gibati nga ikaw naglisod sa pagdumala sa kaluya, o kon ikaw adunay emerhensiya sa mental ug emosyonal nga kahimsog, kontaka ang imong mga lider sa misyon.

Kon giresitahan ka og tambal alang sa kabalaka o sa bisan unsa nga kahimtang o sakit, sunda ang giresita ug ang gitudlo sa imong doktor.

4.4

Medikal nga Pag-atiman

Atimana ang imong pisikal ug emosyonal nga kahimsog sa seryoso nga paagi. Siguroa nga makakuha ka og bisan unsa nga gikinahanglang suporta gikan sa imong mga ginikanan o mga tigbantay alang sa bisan unsang medikal nga mga problema nimo (sama sa mga tambal nga imong gitumar, mga allergy nimo, o mga kalihokan nga kinahanglan nimong likayan). Mahimo usab nimong ipaambit ang piho nga medikal nga impormasyon ngadto sa imong mga lider sa pangserbisyo nga misyon o sa mga superbisor sa operasyon kon gikinahanglan.

Kon aduna kay mga emerhensiya sa panglawas, gamita ang sentido komon alang sa imong dinalian nga kasiguroan o pag-atiman. Tawag sa lokal nga emergency services (sama sa 911 sa Estados Unidos) gawas kon nahatagan ka og laing mga instruksyon. Sa labing dali nga panahon, kontaka ang imong mga lider sa pangserbisyo nga misyon.

Kon nagkinahanglan ka og medikal nga pag-atiman nga dili pang-emerhensiya atol sa usa ka buluhaton, tawaga dayon ang imong mga ginikanan o mga tigbantay. Mosulti sila nimo kon unsay buhaton. Sulayi ang pag-eskedyul daan sa ubang pag-atiman nga dili pang-emerhensiya aron dili kini makabalda sa imong mga buluhaton o eskedyul sa pagserbisyo.

4.5

Peligro nga mga Sitwasyon ug mga Hulga

Daghang posible nga mga peligro ang mahimong malikayan pinaagi sa paggamit sa maayong paghukom ug pinaagi sa pagsunod sa mga sumbanan sa misyonaryo. Hinoon, ang mga tawo mahimong mosulay sa pagpasakit kanimo bisan kon naningkamot ka nga mahimong luwas. Kon adunay problema, i-report dayon kini ngadto ni bisan kinsa sa imong mga lider sa misyon.

Biya dayon kon ikaw o ang imong kompanyon mobati nga dili komportable sa usa ka dapit, sa tawo, o sa sitwasyon. Paminaw sa espirituhanong mga pag-aghat.

4.6

Pinuy-anan

Motabang sa pag-atiman sa panimalay sa inyong pamilya ug buhata ang imong bahin sa mga buluhaton. Ipabilin ang imong lawak nga hapsay ug limpyo. Ipadayon ang imong personal nga mga kabtangan, lakip na ang elektronik nga mga device, diha sa maayong pagkahan-ay.

4.7

Transportasyon

Sunda kanunay ang mga lokal nga lagda sa trapiko, mga balaod, ug mga kustombre samtang magbiyahe ka. Kon magmaneho ka, magmaneho sa mapanalipdanong paagi.

Ang pangpublikong transportasyon sagad mas barato kay sa magmaneho. Ikonsiderar ang paggamit og pangpublikong transportasyon sa pag-adto o gikan sa imong buluhaton sa misyon.

Gamita ang maayong paghukom, kinahanglang kahibalo ka sa imong palibot, ug magmahimong pamilyar sa inyong dapit. Sunda ang kinatibuk-ang mga sumbanan sa seguridad niini nga tamdanan nga basahon.

4.7.1

Pagmaneho

Kon ang mga kahimtang sa pamilya motugot, mahimo ka nga magmaneho sa imong personal o sakyanan sa pamilya ngadto sa imong mga buluhaton ug mga kalihokan sa misyon. Ang pangserbisyo nga mga misyonaryo mao ang responsable sa tanang gasto sa pagmaneho, lakip na ang gasolina, pagmintenar sa sakyanan, ug insurance.

Ang pangserbisyo nga mga misyonaryo ug ang ilang mga pamilya ang moabaga sa tanang personal ug kapangakohan sa mga risgo kon magmaneho. Ang pangserbisyo nga mga misyonaryo dili magmaneho og mga sakyanan nga gipanag-iya sa Simbahan samtang magserbisyo. Ang mga plano sa pagbansay gikinahanglan kon ikaw magmaneho og mga sakyanan sa komunidad o sa manggihatagon nga mga organisasyon atol sa imong buluhaton sa pagserbisyo.

4.8

Personal nga Kwarta o mga Pagtigom

Ikaw giawhag nga mabinantayong mobadyet ug mogasto sa imong personal nga kwarta . Hinumdomi kanunay ang mga baroganan sa pagbayad sa mga ikapulo ug mga halad ug sa personal nga mga pagtigom.

Ang kwarta nga imong gigamit atol sa imong misyon nagrepresentar sa mga sakripisyo nimo, sa imong pamilya, ug sa uban. Dili mangayo og kwarta alang sa personal nga suporta sa pinansyal o alang sa organisasyon nga imong giserbisyohan.

4.9

Mga Aksidente

Kon nalambigit ka og aksidente samtang nagmaneho paingon o gikan sa imong misyonaryo nga buluhaton, mga miting, o mga komperensiya, tawag sa polis o pang-emerhensiya nga mga serbisyo kon gikinahanglan. Diha-diha dayon, kontaka usab ang imong pamilya. Dayon kontaka ang imong mga lider sa pangserbisyo nga misyon ug ang mga superbisor sa buluhaton.

Kon nalambigit ka og aksidente samtang nagserbisyo sa imong misyonaryo nga buluhaton, pakig-istorya sa imong superbisor sa dapit nga giserbisyohan. Kana nga tawo motawag og polis o pang-emerhensiya nga mga serbisyo kon gikinahanglan. Diha-diha dayon, kontaka usab ang imong mga lider sa pangserbisyo nga misyon ug ang imong pamilya. Ang imong presidente sa stake mokontak usab sa imong pamilya.

4.10

Panagway sa Pangserbisyo nga Misyonaryo

Ang paagi nga imong ipresentar ang imong kaugalingon makaimpluwensya sa panghunahuna sa mga tawo mahitungod nimo ug sa Simbahan sa Ginoo ug makatabang nimo nga mapanalipdan gikan sa kadaot. Ang imong panagway mao kanunay ang unang mensahe nga madawat sa uban mahitungod kanimo, ug kinahanglan kining mosuporta sa unsay imong gisulti ug gibuhat.

Ang paggamit og tukmang sinul-oban ug pamustura usa ka importante nga kahanas sa kinabuhi nga makatabang usab nimo human sa imong misyon. Pagsul-ob og sinina nga tukma sa imong mga buluhaton sa pagserbisyo ug nahiangay sa imong sagradong calling.

4.10.1

Alang sa Tanang Misyonaryo

Ipabilin ang inyong kaugalingon nga hapsay ug limpyo. Mag-shower o maligo matag adlaw. Sipilyohi ang inyong ngipon kanunay. Paggamit og deodorant. Taronga og hugas ang inyong mga kamot kanunay, ilabi na human sa paggamit sa kasilyas. Ipabilin nga ang inyong sinina limpyo, walay gisi, ug hapsay. Ayaw gayod itugot nga ang inyong panagway o kinaiya makaagni og atensyon palayo sa inyong calling.

Magtiner og taas nga sumbanan sa ligdong nga sininaan. Likayi ang sinina nga:

• Huot kaayo o luag kaayo

• Sihag o magpakita sa bisan unsang paagi

• Makaagni og atensyon sa bisan asa nga parte sa lawas

• Gum-os o pinauso-uso

Pagpakita og pagtahod sa Ginoo ug sa inyong kaugalingon pinaagi sa pagsul-ob og tukma alang sa mga miting ug mga kalihokan sa Simbahan, ilabi na sa panagtigum alang sa sakramento.

4.10.2

Alang sa mga Elder

• Buhok. Ligoa ang inyong buhok kanunay. Ipabilin kini nga mubo ug hapsay nga pagkakurti. Ang sobra o pinauso-uso nga mga estilo, sama sa pinatuy-od, pinakulot, o kinoloran nga buhok, dili tukma. Ang patilya kinahanglang dili moubos sa katunga sa dunggan. Kamo kinahanglang limpyo ang pagkabalbas nga walay bungot ang nawong matag adlaw gawas kon ang medikal nga mga kahimtang nagkinahanglan sa laing paagi.

• Alahas. Ayaw pagsul-ob og mga ariyos o mga kwentas. Ang mga ariyos sa ilong ug mga pagpatusok sa lawas dili pwede. Kon kamo adunay mga patik, kinahanglang tabonan kini kutob sa mahimo.

4.10.3

Alang sa mga Sister

• Buhok. Ligoa ang inyong buhok kanunay. Ang estilo, kolor, ug gitas-on sa inyong buhok kinahanglang dili makaagni og atensyon niini.

• Mga Accessory. Ang mga alahas ug ubang mga accessory kinahanglang yano ug propesyonal. Ayaw pagsul-ob og sobra sa usa ka ariyos sa kada dunggan. Ang mga ariyos sa ilong ug mga pagpatusok sa lawas dili pwede. Kon kamo adunay mga patik, kinahanglang tabonan kini kutob sa mahimo. Ang makeup, mga adorno sa buhok, ug manicure sa kuko kinahanglang konserbatibo.