Pag-atiman sa Nanginahanglan diha sa Atong mga Pamilya

2

Organisasyon ug mga Kalihokan sa Pangserbisyo nga Misyonaryo

2.0

Pasiuna

Ang Ginoo nag-ingon, “Kamo motukod sa inyong mga kaugalingon ug motudlo sa matag [lalaki ug babaye] sa iyang pagkatinugyanan” (Doktrina ug mga Pakigsaad 104:11). Kini nga seksyon sa mga sumbanan sa misyonaryo naghulagway sa organisasyon sa pangserbisyo nga misyon. Nagpasabot usab kini kon unsaon nimo nga makaserbisyo og maayo sa uban pinaagi sa putli nga gugma ni Kristo samtang moapil ka sa mga buluhaton ug mga kalihokan sa pangserbisyo nga misyon (tan-awa sa Moroni 7:44–47).

Ang termino nga mga lider sa misyonaryo nagpasabot ngadto sa mga misyonaryo nga adunay mga buluhaton sa pagpangulo, sama sa mga lider sa district ug mga lider nga mga sister. Ang termino nga mga lider sa pangserbisyo nga misyon nagpasabot ngadto sa mga lider nga adunay inadlaw-adlaw nga responsibilidad alang nimo ug sa ubang mga misyonaryo sa inyong gisangon nga dapit (tan-awa sa 2.1.1).

Niining tamdanan nga basahon ang mga termino nga presidente sa stake, bishop, stake, ug ward magamit usab ngadto sa mga presidente sa district, mga presidente sa branch, mga district, ug mga branch.

2.1

Pagpangulo sa Pangserbisyo nga Misyon

Ang imong labing importanting responsibilidad, bisan unsa man nga buluhaton sa pagkalider, mao ang pagkahimong matinud-anon ug mapahinunguron nga misyonaryo. Ikaw mapanalanginan samtang mosunod ka sa tambag gikan sa imong mga lider ug samtang nag-ugmad ka og mahigugmaong pakigrelasyon uban nila.

2.1.1

Mga Lider sa Pangserbisyo nga Misyon

Panalanginan sa Ginoo ang Iyang mga misyonaryo pinaagi sa pagtawag og magtiayon sa pangserbisyo nga misyon aron mangulo kanila. Ang imong mga lider sa pangserbisyo nga misyon makigtinabangay isip isigka mga lider ubos sa direksyon sa lokal nga mga lider sa pagkapari. Sila gitawag sa Dios ug gi-set apart aron mangulo sa pangserbisyo nga mga misyonaryo sa inyong gisangon nga dapit. Silang duha mohigugma kanimo, moserbisyo kanimo, ug motabang kanimo nga matuman ang imong katuyoan isip usa ka misyonaryo. Makigtambayayong sa imong presidente sa stake, sila motabang sa pagpangita og mga oportunidad sa pagserbisyo alang nimo. Sila motabang nimo sa pagpalambo sa imong gipahiangay nga eskedyul sa misyonaryo ug sa imong mga buluhaton. Sila usab:

• Makigkita ug mointerbiyo nimo kanunay.

• Mosusi ug mosuporta sa imong pag-uswag.

• Mosuporta ug modasig kanimo.

• Maminaw sa imong mga kabalaka, motubag sa imong mga pangutana, ug mohatag og tambag.

• Mogamit og inspirasyon ug pagpadayag sa pagtabang nimo nga magmalampuson isip usa ka misyonaryo.

Sa katingbanan [summary], sila adunay inadlaw-adlaw nga responsibilidad alang sa pakigtambayayong nimo aron ikaw adunay makapausab sa kinabuhi nga kasinatian sa misyon.

Kon ikaw adunay interbiyo uban sa mga lider sa pangserbisyo nga misyon, mahimo nimong dapiton ang imong mga ginikanan o ang usa ka suporta nga misyonaryo nga anaa sa dapit [on-site support missionary] aron moapil sa interbiyo. Ang imong desisyon sa pagdapit og tawo nga moapil uban kanimo dili makapakunhod sa gugma, pagpakabana, o pagdayeg sa mga lider sa imong pangserbisyo nga misyon alang kanimo.

2.1.2

Presidente sa Stake

Tungod kay sakop ka sa usa ka stake, ang imong presidente sa stake adunay responsibilidad sa pagkapari alang nimo. Sa pakigtambayayong sa mga lider sa pangserbisyo nga misyon, siya ang motakda og espirituhanon ug pamatasan nga maoy mga gilauman sa imong misyon ug moaprobar og usa ka pagpahiangay sa misyonaryo nga kasinatian alang sa imong pagserbisyo.

Ang imong presidente sa stake ang responsable alang sa mga interbiyo bahin sa katakos. Siya mosiguro nga ikaw nagsunod sa mga sumbanan sa pangserbisyo nga misyon. Sa pakigtambag uban sa mga lider sa pangserbisyo nga misyon, siya morebiyo sa imong eskedyul ug mga buluhaton. Sa kataposan sa imong misyon, siya mo-release nimo ug mopasalamat nimo alang sa imong misyonaryo nga pagserbisyo.

Sa ubang sitwasyon ang gilay-on ang makapalisod sa presidente sa stake nga makigkita nimo kanunay. Kon mao, siya mahimong mosangon og stake specialist o laing lider sa pagkapari nga makigtambayayong sa mga lider sa pangserbisyo nga misyon aron mosuporta kanimo ug motabang sa pagsiguro nga ikaw adunay makapausab sa kinabuhi nga kasinatian sa pagkamisyonaryo.

2.1.3

Organisasyon sa Pagpangulo sa Pangserbisyo nga Misyon

Ang imong mga lider sa pangserbisyo nga misyon mogamit sa inspirasyon ug pagpadayag sa pag-organisar sa buhat. Sila mahimong mosangon og mga misyonaryo nga mahimong mga lider sa dapit sa pangserbisyo nga misyonaryo (sama sa mga lider sa district o mga lider nga sister). Ikaw mahimo usab nga hangyoon nga mangulo o mohatag og pagbansay diha sa imong kalihokan o mga buluhaton sa komunidad.

2.1.4

Mga Responsibilidad sa mga Lider sa Misyonaryo

Ang mga lider sa misyonaryo, sama sa tanang misyonaryo, mosunod sa tambag ni Jesukristo sa “pag-alagad sa [Dios] sa tibuok [nilang] kasingkasing, gahum, hunahuna ug kusog” ug “[paghinumdom sa] hugot nga pagtuo, hiyas, kahibalo, pagkamapugnganon, pailub, inigsoon nga pagkamabination, pagkadiosnon, gugma nga putli, pagkamapainubsanon, kakugi” (Doktrina ug mga Pakigsaad 4:2, 6). Ang mga buluhaton sa pagpangulo wala magpasabot og espesyal nga pag-ila o pag-uswag, ni nagpakita kini og bili sa usa ka misyonaryo.

Ang mga lider sa misyonaryo adunay responsibilidad nga:

• Mopakita og ehemplo sa mga sumbanan sa misyonaryo alang sa pamatasan (tan-awa sa kapitulo 3).

• Kon gimandoan sa mga lider sa pangserbisyo nga misyon, motabang sa pagbansay sa ubang mga misyonaryo.

• Mohigugma ug makighigala sa ubang mga misyonaryo.

• Motabang sa ubang mga misyonaryo sa pag-ila sa bili sa ilang mga paningkamot.

• Maminaw sa mga kabalaka sa ubang mga misyonaryo ug mopaambit sa mga gikinahanglan ngadto sa ubang mga lider sa misyon.

• Mosubay sa ilang mga katungdanan sa pagpangulo ngadto sa mga lider sa misyon.

• Ubos sa direksyon sa mga lider sa pangserbisyo nga misyon, motabang sa pag-organisar ug pagpahigayon og mga komperensiya, mga miting, ug mga kalihokan.

Sama sa tanang misyonaryo, ang mga elder ug mga sister nga adunay mga buluhaton sa pagpangulo kinahanglang mopakita og sama kang Kristo nga pagpangulo. Kon ang pamatasan ni bisan kinsa nga misyonaryo, lakip na ang mga lider sa misyonaryo, morag wala mahiuyon sa mga sugo ug mga sumbanan sa misyonaryo, hisgoti ang isyu uban sa imong mga lider sa pangserbisyo nga misyon lamang ug dili sa ubang mga misyonaryo, mga ginikanan, o mga higala.

2.1.5

Personal nga mga Responsibilidad

“[Mag]palambo sa [imong] buluhaton ngadto sa Ginoo” (Jacob 1:19), espirituhanong mobarug pinaagi sa kinaugalingong paningkamot, ug “molihok sa [imong kaugalingong kabubut-on]” (2 Nephi 2:16) pinaagi sa pagsalig sa Ginoo ug sa pagsunod sa Espiritu.

Kon ikaw adunay mga pangutana o mga kabalaka:

• Gamita ang pagtulon-an sa “[p]agtuon niini diha sa imong hunahuna; unya … mangutana kanako kon kini husto” (Doktrina ug mga Pakigsaad 9:8).

• Tinguhaa ang giya pinaagi sa personal nga pagpadayag, pag-ampo, pagtuon sa mga kasulatan (ilabi na sa Basahon ni Mormon), mga pagtulon-an sa buhi nga mga propeta, ug mga sumbanan sa pangserbisyo nga misyonaryo.

Pakig-istorya sa imong bishop o sa presidente sa stake mahitungod sa mga isyu sa katakos. Pakig-istorya sa imong mga lider sa pangserbisyo nga misyon mahitungod sa mga kabalaka bahin sa dinaliang seguridad, sama sa pagsulong, pag-abuso, o ubang mga isyu.

Tingali adunay mga panahon atol sa imong misyon nga magkalisod ka nga matutokan ang imong buluhaton sa pagserbisyo tungod sa kasamtangan nga mga hagit, personal o mga butang kalabot sa pamilya, o gani mga nanglabay na nga mga kasinatian. Ayaw pagduha-duha sa pagpaambit sa imong mga kabalaka ngadto sa imong mga lider sa pangserbisyo nga misyon.

Hinumdumi ang imbitasyon sa Manluluwas: “Paghunahuna ngari kanako sa matag hunahuna; ayaw pagduha-duha, ayaw kahadlok. Hunahunaa ang mga samad nga milapos sa akong kilid, ug usab ang mga marka sa mga lansang sa akong mga kamot ug tiil; pagmatinud-anon, paghupot sa akong mga sugo, ug kamo makapanunod sa gingharian sa langit. Amen” (Doktrina ug mga Pakigsaad 6:36–37).

2.2

Pagtinabangay sa Pagserbisyo

Sa matag karon ug unya, mahimong sangonan ka uban sa laing pangserbisyo nga mga misyonaryo sa samang dapit. Isip mga misyonaryo nga nagtinabangay sa pagserbisyo, kamo kinahanglan nga:

• Magkahiusa sa buhat ug pagserbisyo sama sa buhaton sa Manluluwas.

• Mosuporta sa espirituhanon, emosyonal, ug pisikal nga kaayohan sa usag usa.

• Magmanggihunahunaon sa seguridad sa usag usa samtang nagtinabangay sa pagserbisyo.

• Magmahimong may tulubagon sa usag usa sa pagtuman sa mga sumbanan sa pangserbisyo nga misyonaryo.

2.2.1

Mga Kompanyon

Ang mga lider sa pangserbisyo nga misyon mahimong mosangon sa mga managkompanyon sa pagpalambo sa gihan-ay nga pagtuon sa ebanghelyo ug sosyal nga pakig-inter-aksiyon atol sa imong kasinatian sa misyon. Ang mga managkompanyon mahimong idestino sa mga dapit sa pangserbisyo nga mga misyonaryo, sa mga dapit sa pagserbisyo, o alang sa espesyal nga mga kalihokan sa pagserbisyo.

Hinumdomi kanunay ang mosunod samtang makig-inter-aksiyon ka sa ubang pangserbisyo nga mga misyonaryo:

• Higugmaa, respetoha, ug lig-ona ang ubang mga misyonaryo.

• Magmapainubsanon ug moila sa mga kalig-on nga anaa sa usag usa.

• Tagda ang usag usa sama sa pagtagad nga imong gusto.

• Likayi ang pagpanaway ug panagbingkil, ug moila sa kamaayo nga anaa sa ubang mga misyonaryo.

• Likayi ang pagsulti og negatibo mahitungod sa usag usa ngadto sa laing pangserbisyo nga mga misyonaryo, mga miyembro sa Simbahan, o sa pamilya ug mga higala.

Kon makamatikod ka og bisan unsang dili maayo nga mga sitwasyon o pamatasan, hisgoti kini uban sa imong mga lider sa pangserbisyo nga misyon.

2.3

Mga Miting, mga Komperensiya, ug mga Konseho

Isip mga misyonaryo, magtinambagay kamo samtang mohatag kamo ug modawat og pagbansay ug samtang magplano kamo ug magsabot sa inyong pagserbisyo. Ang mga miting, mga komperensiya, ug mga konseho kinahanglang magdapit sa Espiritu sa Ginoo ug kinahanglang usa kini ka panahon alang sa inspirasyon ug pagpadayag (tan-awa sa Doktrina ug mga Pakigsaad 6:32). Ang pagpundok isip mga misyonaryo makahatag usab ninyo og oportunidad sa pagsuporta sa usag usa ug maglipay nga maghiusa (tan-awa sa Doktrina ug mga Pakigsaad 43:8; 50:22).

Ang mga miting nga organisahon sa mga lider sa misyonaryo, ubos sa direksyon sa mga lider sa pangserbisyo nga misyon, naglakip sa:

• Regular nga mga miting sa district

• Sinemana o binulan nga mga miting

• Mga Komperensiya

• Mga konseho sa pagpangulo

2.4

Mga Buluhaton ug mga Eskedyul

Magmatinud-anon ug makugihon sa imong pagsunod sa imong misyonaryo nga mga buluhaton ug eskedyul.

2.4.1

Gipahiangay nga mga Buluhaton

Ikaw gitawag sa Ginoo isip usa ka misyonaryo. Ikaw gisangonan nga moserbisyo sa usa ka gipahiangay nga kasinatian sa misyon nga gipili sa talagsaong paagi alang sa imong mga talento, mga kahanas, ug mga gasa. Atol sa imong misyon, mahimong makaserbisyo ka sa daghang buluhaton, lakip na diha sa gitugotan nga manggihatagon nga mga organisasyon, mga operasyon sa Simbahan, mga templo, ug gisangon sa stake nga mga oportunidad sa pagserbisyo.

Mahimong makaserbisyo ka og sobra sa usa ka dapit atol sa semana. Sa matag dapit, mo-report ka sa superbisor kinsa mohatag og pagbansay, mga himan, ug suporta nga imong gikinahanglan sa pagtuman sa imong mga responsibilidad. Moabot ka sa gidestinohan nimo nga dapit sa tukmang oras ug andam nga moserbisyo og tarong. Magmahimong masaligan ug mapiyalan. Sunda ang mga mando sa imong mga superbisor sa mainampingon ug sa kompletong paagi. Buhata ang imong labing maayo nga makatampo sa buhat sa makahuluganong mga paagi. Magmahimong positibo ug makadasig nga impluwensiya niadtong imong serbisyohan ug ika-inter-aksiyon. Pagtrabaho sa luwas nga paagi, ug kanunayng maningkamot nga molambo.

2.4.2

Mga Pagbalhin ngadto sa Destinohan nga mga Dapit

Pinaagi sa pagtambayayong, ang imong presidente sa stake ug mga lider sa pangserbisyo nga misyon mahimong mopahiangay sa destinohan nimo nga mga dapit nga serbisyohan atol sa imong misyon.

2.4.3

Inadlaw-adlaw nga Eskedyul

Pinaagi sa pagtambayayong, ang imong mga lider sa pangserbisyo nga misyon, uban sa imong ideya, mohimo og inadlaw-adlaw nga eskedyul. Ang imong presidente sa stake ang moaprobar sa eskedyul. Kini nga eskedyul mahimong maglakip sa mga buluhaton ug mga kalihokan nga masakop ubos sa mosunod nga dapit nga palamboon:

• Espirituhanon

• Sosyal

• Pisikal

• Intelektwal

Magmakanunayon ug masaligan sa pagsunod sa imong inadlaw-adlaw nga eskedyul sa misyonaryo. Magdala kini kanimo og mas dakong kalamboan, kalipay, ug espirituhanong mga panalangin atol sa imong misyonaryo nga pagserbisyo.

Ang imong inadlaw-adlaw nga eskedyul mahimong maglakip sa:

• Pagtakda ug pagrebiyo sa imong pangserbisyo nga misyonaryo nga mga tumong.

• Pagpangandam ug pagkompleto sa imong mga buluhaton matag adlaw.

• Pagtuon sa mga kasulatan (ilabi na sa Basahon ni Mormon), mga pagtulon-an sa buhi nga mga propeta ug mga apostoles, Pagpahiangay ngadto sa Kinabuhi sa Pangserbisyo nga Misyonaryo, may kalabotan nga mga seksyon sa Isangyaw ang Akong Ebanghelyo, ug uban pang giaprobahan nga mga kapanguhaan. (Tan-awa sa 2.4.5.)

2.4.4

Sampol sa Inadlaw-adlaw nga Eskedyul

Kauban sa imong mga lider ug mga ginikanan o mga tigbantay, paghimo og usa ka sinulat nga kinatibuk-ang eskedyul. Ilakip ang imong oras sa mga buluhaton ug mga oras nga imong gamiton ang imong kabubut-on sa pagtino kon unsaon sa pagserbisyo, pagpalambo, ug pag-uswag (gitawag og “mga oras sa kabubut-on”). Rebiyoha ug sunda ang imong mga plano matag adlaw.

Ang inadlaw-adlaw nga eskedyul alang sa imong misyon mahimong mahisama sa mosunod nga ehemplo.

Buntag:
[oras nga magsugod]	Mobangon ug mag-ampo.
[oras nga magsugod]	Mag-ehersisyo sulod sa 30 minutos. (Pangonsulta sa imong propesyonal nga tig-atiman sa kahimsog kon unsay labing maayo alang sa imong kahimsog ug mga kahimtang sa panglawas.)
[oras nga magsugod]	Maligo, mamahaw, ug humanon ang mga pagpangandam nianang adlawa.
[oras nga magsugod]	Moapil sa debosyonal o magtuon sa ebanghelyo.
[oras nga magsugod]	Mo-report ngadto sa gedistinohan nimo nga dapit sa tukmang oras. (Motambong sa miting sa pag-ampo o debosyonal sa dili pa ang imong pagserbisyo kon adunay usa nga naka-eskedyul.)
Hapon:
[oras nga magsugod]	Maniudto.
[oras nga magsugod]	Moserbisyo hangtod makompleto ang imong oras sa buluhaton.
Gabii:
[oras nga magsugod]	Manihapon.
[oras nga magsugod]	Mosunod sa imong plano sa personal nga mga kalihokan gikan sa imong inadlaw-adlaw nga eskedyul. Kinahanglang maglakip kini sa oras sa personal nga pagtuon sa ebanghelyo. Mahimong maglakip usab kini sa pagtambong sa templo, mga klase sa institute, mga kalihokan sa YSA, ug mga buluhaton sa pamilya.
[oras nga magsugod]	Morekord sa imong mga pagbati ug espesyal nga mga kasinatian diha sa imong journal.
[oras nga magsugod]	Mangandam alang sa pagkatulog. Mag-ampo ug matulog.

Bisan kon wala ka magserbisyo sa gidestinohan nimo nga dapit, ikaw usa gihapon ka misyonaryo. Ang imong pamatasan, mga hunahuna, ug mga lihok kinahanglang makita diha sa imong kahimtang sa pagkamisyonaryo.

2.4.5

Mga Sesyon sa Pagtuon uban sa Laing Pangserbisyo nga mga Misyonaryo

Kon mahimo, pagtuon uban sa laing pangserbisyo nga misyonaryo. Usa ka tawo ang mahimong isangon nganha kanimo sa imong mga lider sa pangserbisyo nga misyon. Kining managkauban nga pagtuon mahimong buhaton usab sa personal o virtual nga paagi.

Tutokan ang mga kasulatan (ilabi na ang Basahon ni Mormon), mga pagtulon-an sa buhi nga mga propeta, ug mga sumbanan sa pangserbisyo nga misyonaryo, Pagpahiangay ngadto sa Kinabuhi sa Pangserbisyo nga Misyonaryo, may kalabotan nga mga seksyon sa Isangyaw ang Akong Ebanghelyo, ug mga sumbanan sa pangserbisyo nga mga misyon. Kining giaprobahan nga mga kapanguhaan makapalig-on sa imong kahibalo ug pagpamatuod sa gipahiuli nga ebanghelyo ni Jesukristo ug makatabang nimo nga maandam sa pagkab-ot sa mga panginahanglan niadtong inyong gitudloan.

2.5

Mga Panghitabo, mga Kalihokan, ug Pagpangandam nga walay kalabotan sa mga Buluhaton sa Pagserbisyo

Ang imong eskedyul isip misyonaryo mahimong maglakip sa oras nianang semanaha sa pag-atiman sa imong personal nga mga panginahanglan ug pagpangandam, sama sa mga buluhaton sa panimalay, medikal nga mga pakigsabot, oras sa pamilya, ug paglingaw-lingaw. Kini tibuok adlaw tingali o kabahin sa usa ka adlaw. “Pagpundok sa inyong mga kaugalingon; pag-andam sa matag gikinahanglan nga butang, ug pagtukod og usa ka balay, gani … usa ka balay sa kahusay” (Doktrina ug mga Pakigsaad 109:8).

Palihog hinumdomi ang tukma sa panahon nga mga pasidaan sa Ginoo: “ayaw pagdagan og labaw ka tulin ug pagbuhat og labaw ka daghan kay sa imong kusog” (Doktrina ug mga Pakigsaad 10:4), ug “mopahulay sa higdaanan og sayo, nga kamo dili kapuyon; bangon og sayo, nga ang inyong mga kalawasan ug ang inyong hunahuna mahimo nga malagsik” (Doktrina ug mga Pakigsaad 88:124). Ang paghunong aron mopahulay ug mangandam sa imong kaugalingon makatabang nimo sa pagpatunhay sa imong abilidad sa pagserbisyo sa uban.

2.6

Mga Kalihokan sa Adlawng Igpapahulay

Pagplano og mga kalihokan sa Igpapahulay nga makatabang nimo sa pagtuman sa imong misyonaryo nga katuyoan sa pagtabang sa uban nga moduol ngadto kang Kristo pinaagi sa pagserbisyo nila sama sa buhaton sa Manluluwas. Hinumdomi ang mga pagtulon-an sa Ginoo mahitungod sa adlawng Igpapahulay diha sa Doktrina ug mga Pakigsaad 59:13–19.

Sa pagpakigtambayayong sa imong mga lider sa pangserbisyo nga misyon, ang imong lokal nga mga lider sa pagkapari mahimong mohatag nimo og calling sa ward o sa stake nga dili makabalda sa eskedyul sa imong misyon o mga buluhaton. Mahimo usab nga moserbisyo ka isip usa ka tigpangalagad nga brother o sister.

2.7

Pagserbisyo sa Komunidad

Usa ka paagi sa pagkat-on nga mahimong disipulo ni Jesukristo mao ang pinaagi sa pagserbisyo sama sa Iyang gibuhat. Ang imong mga lider sa pangserbisyo nga misyon motabang sa pagpangita og mga oportunidad aron makaserbisyo ka sa uban diha sa komunidad, “nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Kinahanglang moserbisyo ka inubanan sa bug-os nga tinguha sa pagtabang sa uban, nga walay bisan unsang gilaoman nga mga balos. Hinumdomi, ikaw wala tawaga aron motudlo sa ebanghelyo gamit ang imong mga pulong. Pinaagi sa imong ehemplo sa Kristohanong pagserbisyo, imong ipakita ang imong gugma alang sa Dios. Ayaw pagsangyaw sa ebanghelyo samtang nagserbisyo ka sa manggihatagon nga mga organisasyon.

Ang piho nga mga buluhaton nagkinahanglan og dugang nga pagbansay ug pagdumala. Gawas kon ang manggihatagon nga organisasyon nga imong giserbisyohan nakasumiter og piho nga plano sa pagbansay ngadto sa imong mga lider sa pangserbisyo nga misyon, dili ka moapil sa bisan unsa sa mosunod nga gidili nga mga kalihokan:

• Pakig-inter-aksyon sa mga bata o huyang nga mga hamtong

• Pagdumala sa mga makina, ekipo, o mga sakyanan

• Paggunit og bisan unsang kwarta o bililhong mga butang

• Paghatag og propesyonal nga opinyon