Lift Up the Hands [Ipataas ang mga Kamot], ni J. Kirk Richards

5

Awtoridad ug mga Ordinansa sa Pagkapari

5.0

Pasiuna

Ang pagkapari mao ang awtoridad nga gihatag sa Dios sa Iyang mga anak aron sa pagdala og kaluwasan sa tanan. Ang mga lider sa pagkapari nga nakadawat ug naggamit sa mga yawe sa pagkapari adunay awtoridad sa pagkapari ug makahatag sa awtoridad sa pagkapari ngadto sa uban. Tungod kay ang “tanan nga lain nga mga kagamhanan [ug] mga buhatan diha sa simbahan mao ang mga sumpay niini nga [Melchizedek] nga pagkapari” (Doktrina ug mga Pakigsaad 107:5), ang tanang gihimo ubos sa direksyon niana nga mga yawe sa pagkapari gihimo nga may awtoridad sa pagkapari.

Kon ang usa ka babaye i-set apart isip usa ka misyonaryo, siya molihok ubos sa awtoridad sa pagkapari aron sa pagpahigayon og buluhaton sa pagkapari. Si bisan kinsang tawo nga adunay calling nga nadawat gikan sa tawo nga naghupot sa mga yawe sa pagkapari naggamit sa awtoridad sa pagkapari sa pagpahigayon sa gisangon kaniya nga mga katungdanan.

Kon ikaw usa ka naghupot sa Melchizedek nga Pagkapari, ikaw adunay mga kahigayonan sa pag-apil diha sa mga ordinansa ug mga panalangin sa pagkapari.

Gamita kining kinatibuk-ang lagda alang sa pagpahigayon sa mga ordinansa ug mga panalangin sa pagkapari. Ang impormasyon niini nga seksyon gipamub-an gikan sa kapitulo 18 sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw.

Pahinumdom: Sumala sa gipasabut diha sa mosunod nga mga seksyon, ang pipila ka ordinansa kinahanglan gayod nga adunay pagtugot sa tigdumalang awtoridad kinsa naghupot sa tukma nga mga yawe.

5.1

Pagpangalagad diha sa Pagkapari: Kinatibuk-ang mga Lagda alang sa Naghupot sa Melchizedek nga Pagkapari

Ang mga naghupot sa Melchizedek nga Pagkapari kinahanglan nga maningkamot kanunay nga mahimong takos ug magiyahan sa Espiritu Santo. Kinahanglan sila nga mopahigayon sa matag ordinansa ug panalangin pinaagi sa ligdong nga paagi, mosiguro nga kini nakatuman sa mosunod nga mga kinahanglanon:

1. Kinahanglan nga ipahigayon kini pinaagi sa ngalan ni Jesukristo.

2. Kinahanglan nga ipahigayon kini pinaagi sa awtoridad sa pagkapari.

3. Kinahanglan nga ipahigayon kini uban sa bisan unsa nga gikinahanglan nga mga pamaagi, sama sa paggamit sa piho nga mga pulong o gibalaan nga lana.

4. Kon gikinahanglan, kini kinahanglang adunay pagtugot sa tigdumalang awtoridad kinsa naghupot sa tukma nga mga yawe (kasagaran ang bishop, presidente sa stake, o presidente sa misyon), sumala sa mga instruksyon niini nga seksyon.

Kadtong kinsa mohatag og mga panalangin sa pagkapari molitok sa mga pulong sa panalangin (“Ako [o kami] mopanalangin kanimo nga …”) kay sa mag-ampo (“Langitnong Amahan, palihug panalangini kini nga tawo nga …”).

Kon pipila ka kalalakin-an ang moapil sa ordinansa o panalangin, ang matag usa gaan nga mopatong sa iyang tuong kamot sa ulo sa tawo (o sa ilawom sa bata nga gipanalanginan) ug ang iyang wala nga kamot ipatong sa abaga sa brother diha sa iyang wala.

Kadto lamang nga naghupot sa gikinahanglan nga pagkapari ug takos ang mahimong mopahigayon og usa ka ordinansa o panalangin. Ingon nga giniyahan sa Espiritu, ang mga bishop ug mga presidente sa stake makadapit og mga naghupot sa pagkapari kinsa dili pa hingpit nga takos sa templo aron mopahigayon o moapil sa pipila ka ordinansa ug mga panalangin (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 18.3, ChurchofJesusChrist.org).

Ang pagdapit og daghang sakop sa pamilya, mga higala, ug mga lider sa pag-abag diha sa usa ka ordinansa o panalangin wala giawhag tungod kay morag dili kini maayong tan-awon alang sa uban. Ang sobra ka daghan diha sa grupo makapahimo usab nga dili komportable sa pisikal nga paagi sa pagpahigayon sa ordinansa.

5.2

Pagbunyag

Ubos sa direksyon sa tigdumalang awtoridad, ang usa ka takos nga priest o naghupot sa Melchizedek nga Pagkapari mahimong mopahigayon sa ordinansa sa bunyag. Sa paghimo niini, kinahanglan siya nga mosunod sa nag-uban nga mga lakang:

1. Motindog siya diha sa tubig uban sa tawo nga pagabunyagan.

2. Mogunit siya sa tuo nga pulso sa tawo gamit ang iyang walang kamot (alang sa kasayon ug kasiguroan). Ang tawo nga bunyagan mogunit sa walang pulso sa naghupot sa pagkapari gamit ang iyang walang kamot.

3. Mopataas siya sa iyang tuo nga bukton nga pinaeskwala.

4. Mosulti siya sa kompleto nga ngalan sa tawo ug moingon, “Ingon nga sinugo ni Jesukristo, ako magbunyag kanimo sa ngalan sa Amahan, ug sa Anak, ug sa Espiritu Santo. Amen” (Doktrina ug mga Pakigsaad 20:73).

5. Tugotan niya ang tawo nga gunitan sa iyang tuo nga kamot ang iyang ilong (alang sa kasayon). Ang naghupot sa pagkapari mobutang sa iyang tuo nga kamot diha sa ibabaw nga bahin sa bukobuko sa tawo ug hingpit nga iunlod ang tawo, lakip ang gisul-ob nga sapot.

6. Motabang siya sa tawo sa pagkawas gikan sa tubig.

Sama sa gihulagway diha sa Kinatibuk-ang Tamdanan nga Basahon, 18.7.6, ang duha ka saksi mosiguro nga ang matag bunyag gipahigayon sa tukmang paagi. Ang bunyag kinahanglan nga usbon kon ang mga pulong wala malitok sa eksaktong paagi sumala sa gihatag diha sa Doktrina ug mga Pakigsaad 20:73. Kinahanglan usab nga usbon ang bunyag kon ang usa ka bahin sa lawas sa tawo o sinina wala maunlod sa hingpit.

5.3

Pagkumpirma

Usa o daghan pa nga naghupot sa Melchizedek nga Pagkapari ang mahimong moapil sa kumpirmasyon. Sila gaan nga mopatong sa ilang mga kamot sa ulo sa tawo. Dayon ang tawo kinsa nagpahigayon sa ordinansa mohimo sa mosunod:

1. Mosulti siya sa tibuok ngalan sa tawo.

2. Mosulti siya nga ang ordinansa gipahigayon pinaagi sa awtoridad sa Melchizedek nga Pagkapari.

3. Mokumpirma siya sa tawo nga usa ka miyembro sa Ang Simbahan ni Jesukristo sa mga Santos sa Ulahing mga Adlaw.

4. Mogamit siya sa mga pulong “Dawata ang Espiritu Santo” (dili “Dawata ang gasa sa Espiritu Santo”).

5. Mohatag siya sa panalangin sumala sa giya sa Espiritu.

6. Iyang tapuson pinaagi sa ngalan ni Jesukristo.

5.4

Pagbalaan sa Lana

Usa o daghan pa nga naghupot sa Melchizedek nga Pagkapari kinahanglang mobalaan sa lana sa oliba [olive oil] sa dili pa kini gamiton sa pagdihog sa masakiton o may balatian. Walay laing lana ang mahimong gamiton. Sa pagbalaan sa lana, ang usa ka naghupot sa pagkapari mosunod niini nga mga lakang:

1. Gunitan niya ang abli nga sudlanan sa lana sa oliba.

2. Motawag siya sa Langitnong Amahan.

3. Mosulti siya nga siya naglihok pinaagi sa awtoridad sa Melchizedek nga Pagkapari.

4. Mobalaan siya sa lana (dili sa sudlanan) ug mogahin niini alang sa pagdihog ug sa pagpanalangin sa masakiton ug may balatian.

5. Iyang tapuson pinaagi sa ngalan ni Jesukristo.

5.5

Pagpangalagad sa Masakiton ug may mga Balatian

Si Jesus mihatag og awtoridad sa pagkapari ngadto sa Iyang mga Apostoles “sa pag-ayo sa mga sakit, ug sa pagpagulag mga yawa” (Marcos 3:15). Ang mga naghupot sa Melchizedek nga Pagkapari adunay sama nga awtoridad. Mogamit niini nga gasa sa tukma nga paagi ug sa kanunay kon gikinahanglan.

Ang mga naghupot sa Melchizedek nga Pagkapari mao lamang ang mangalagad sa masakiton o may balatian. Sa kasagaran duha o mas daghan pa nga naghupot sa pagkapari ang mangalagad sa masakiton, apan mahimo ra og usa ang mopahigayon sa pagdihog ug sa pagsilyo sa panalangin kon gikinahanglan.

Kon walay gibalaan nga lana, usa ka panalangin mahimong ihatag pinaagi sa awtoridad sa pagkapari nga wala ang pagdihog.

Ang usa ka takos nga bana o amahan nga naghupot sa Melchizedek nga Pagkapari sa kasagaran mangalagad sa masakiton nga mga sakop sa iyang pamilya.

Ang mga naghupot sa pagkapari kinahanglang mangalagad sa masakiton sumala sa hangyo sa tawo nga masakiton o niadtong suod kaayo sa maong tawo aron ang mga panalangin mahiuyon sa ilang hugot nga pagtuo. Ang mga naghupot sa Melchizedek nga Pagkapari nga mobisita sa mga ospital kinahanglan dili mohangyo og mga oportunidad nga mangalagad sa masakiton.

Kon ang usa ka tawo mohangyo og sobra sa usa ka panalangin sa mao ra gihapon nga sakit, ang naghupot sa pagkapari dili na kinahanglan nga modihog pa og lana human sa unang panalangin. Hinoon, siya mohatag og panalangin pinaagi sa pagpandong sa mga kamot ug pinaagi sa awtoridad sa pagkapari.

Ang pagpangalagad ngadto sa masakiton adunay duha ka bahin: (1) pagdihog sa gibalaan nga lana ug (2) pagsilyo sa pagdihog.

Pagdihog sa Gibalaan nga Lana

Ang pagdihog sa lana himoon sa usa ka naghupot sa Melchizedek nga Pagkapari.

1. Mobutang siya og usa ka tolo sa gibalaan nga lana nganha sa ulo sa tawo.

2. Gaan niyang ipatong ang iyang mga kamot sa ulo sa tawo ug motawag sa tibuok ngalan sa tawo.

3. Mosulti siya nga siya naglihok pinaagi sa awtoridad sa Melchizedek nga Pagkapari.

4. Mosulti siya nga siya nagdihog gamit ang lana nga gibalaan alang sa pagdihog ug pagpanalangin sa masakiton ug may balatian.

5. Iyang tapuson pinaagi sa ngalan ni Jesukristo.

Pagsilyo sa Pagdihog

Sa kasagaran, duha o daghan pa nga mga naghupot sa Melchizedek nga Pagkapari gaan nga mopatong sa ilang mga kamot sa ulo sa tawo. Hinoon, ang usa ka naghupot sa Melchizedek nga Pagkapari makahimo niini nga siya ra kon gikinahanglan. Kon magsilyo sa pagdihog, ang naghupot sa Melchizedek nga Pagkapari mohimo sa mosunod:

1. Motawag siya sa tawo sa iyang tibuok nga ngalan.

2. Mosulti siya nga siya nagsilyo sa pagdihog pinaagi sa awtoridad sa Melchizedek nga Pagkapari.

3. Mohatag siya og mga pulong sa panalangin sumala sa giya sa Espiritu.

4. Iyang tapuson pinaagi sa ngalan ni Jesukristo.

5.6

Paghatag og mga Panalangin sa Kahupayan ug Tambag

Ang mga naghupot sa Melchizedek nga Pagkapari mahimo usab nga mohatag og mga panalangin sa kahupayan ug tambag ngadto sa uban kinsa mohangyo niini. Alang niini nga mga panalangin, usa o daghan pa nga naghupot sa pagkapari gaan nga mopatong sa ilang mga kamot sa ulo sa tawo. Dayon ang naghupot sa pagkapari kinsa mohatag sa panalangin mohimo sa mosunod:

1. Motawag siya sa tawo sa iyang tibuok nga ngalan.

2. Mosulti siya nga ang panalangin gipahigayon pinaagi sa awtoridad sa Melchizedek nga Pagkapari.

3. Mohatag siya og mga pulong sa panalangin sumala sa giya sa Espiritu.

4. Iyang tapuson pinaagi sa ngalan ni Jesukristo.

Ang mga misyonaryo nga mohatag og mga panalangin ngadto sa mga miyembro kinahanglan direktang mo-report sa panalangin ngadto sa bishop sa miyembro o pinaagi sa presidente sa korum sa mga elder o sa lider sa misyon sa ward, kinsa mosulti dayon sa bishop.