Christ and the Fishermen [Si Kristo ug ang mga Mangingisda], ni J. Kirk Richards

1

Ang Imong Kasinatian sa Pagkamisyonaryo

1.0

Pasiuna

Ang imong misyon wala gayod magsugod sa adlaw nga ikaw gi-set apart. Dili kini matapos sa adlaw nga ikaw i-release. Ang usa ka pangserbisyo nga misyon labaw pa kay sa pagsul-ob og uniporme sa buntag unya huboon kini inig tapos sa adlaw.

Ang imong kasinatian sa pangserbisyo nga misyon nagpakita sa imong pasalig ni Jesukristo ug sa imong tinguha sa pagserbisyo sa uban diha sa Iyang ngalan. Sukad sa imong pagbunyag, ikaw nabutang na sa dalan sa pakigsaad nga padulong ngadto sa mahangturon nga kamaya, kalipay, ug kalinaw. Ang imong kasinatian sa misyon makapausab nimo, ug kinahanglan nimong dad-on kana nga mga kausaban sa tibuok nimong kinabuhi.

Makita gikan sa mahangturong panglantaw, ang imong misyon mas labaw pa kay sa tsekanan nga kahon [checkbox] nga markahanan. Usa kini ka paagi nga makatabang nimo sa imong gipangandoy nga mahimong disipulo ni Jesukristo sa tibuok kinabuhi. Si Presidente Marion G. Romney miingon, “Ang pagserbisyo dili usa ka butang nga atong antuson dinhi sa yuta aron kita makaangkon sa katungod nga mopuyo sa celestial nga gingharian. Ang pagserbisyo mao ang labing mahinungdanong butang diin nahimo ang nahimaya nga kinabuhi diha sa celestial nga gingharian” (“The Celestial Nature of Self-reliance,” Ensign, Nob. 1982, 93).

Ang Ginoo miingon, “Busa, kon kamo adunay tinguha sa pag-alagad sa Ginoo kamo gitawag ngadto sa buhat” (Doktrina ug mga Pakigsaad 4:3). Bisan kon ikaw orihinal man nga gisangonan nga mahimong usa ka pangserbisyo nga misyonaryo, gibalhin man aron mahimong usa ka pangserbisyo nga misyonaryo, o gipabalik man isip usa ka pangserbisyo nga misyonaryo, ikaw adunay pribilehiyo sa pagpahinungod niining panahona sa imong kinabuhi sa pagserbisyo sa Ginoo pinaagi sa pagserbisyo sa uban diha sa Iyang ngalan. Niini nga calling, ikaw adunay mga oportunidad nga mohatag og serbisyo nga makapanalangin sa ubang mga tawo, sa imong kaugalingong kinabuhi, imong pamilya, sa Simbahan, ug sa mga organisasyon nga imong giserbisyohan.

Matag usa kanato gipadala dinhi sa yuta nga adunay nagkalainlaing mga abilidad ug mga talento. Gamit ang imong talagsaong mga talento ug mga abilidad, makahimo ka og makahuluganong kontribusyon ngadto sa buhat sa Dios dinhi sa yuta. Ang imong matinud-anong pagserbisyo isip misyonaryo usa ka madawat nga halad ngadto sa Ginoo.

Tagamtama ang imong kasinatian sa misyon samtang ikaw mohigugma sa Dios ug mohigugma sa imong silingan. Mao kini ang panahon sa paglipay ug sa pagsinati og malungtaron nga kalipay ug kalinaw pinaagi ni Jesukristo.

1.1

Pagkamasulundon

Ang tinuod nga mga disipulo ni Jesukristo mga masulundon. Ang Manluluwas nagtudlo, “Kon nahigugma kamo kanako, tumana ninyo ang akong mga sugo” (Juan 14:15). Ang pagtuman sa mga sugo nagpasabot nga ikaw andam ug matinud-anong mobuhat sa unsay gipangayo sa Ginoo tungod kay ikaw nahigugma Kaniya. Ang pagsunod sa mga sugo nagpasabot usab nga ikaw motuman sa mga sugo uban sa “kamaya” (Mga Taga-Colosas 1:11) ug “malipayon ug mapaubsanong kasingkasing” (Mga Buhat 2:46).

Si Jesukristo mao ang ehemplo sa hingpit nga pagkamasulundon. Ang tanan Niyang gibuhat mao ang kabubut-on sa Amahan. Sunda Siya pinaagi sa pagbuhat sa imong labing maayo sa pagtuman sa tanan Niyang mga sugo ug sunda ang mga sumbanan sa pangserbisyo nga misyonaryo. Ang pagkamasulundon ug pagkamatinud-anon nagpasabot usab nga ikaw naningkamot nga makakat-on, mouswag, ug molambo. Korihii dayon ang mga sayop. Ipakita nga ikaw matinud-anon ug masulundon pinaagi sa pag-angkon sa personal nga responsibilidad alang sa imong mga binuhatan.

Ikaw mapanalanginan kon mosunod ka sa mga sugo ug sa mga sumbanan sa misyonaryo ug mogamit sa maayong paghukom. Palihog timan-i nga bisan kon nagtuman ka sa mga sugo, mahimong makasinati ka og kasamok, mga sakit, o mga hagit (tan-awa sa Juan 16:33). Ang Manluluwas nakasinati niining tanang butang (tan-awa sa Alma 7:11–12; Doktrina ug mga Pakigsaad 122:8). “Dili ko kamo biyaan nga daw mga ilong tuwapos: Mobalik ako kaninyo.” (Juan 14:18).

Ang Dios nahigugma kaninyo. Pilia ang pagtuman sa mga sugo tungod kay ikaw nahigugma sa Dios. Ayaw pagsulay sa paghimo og pakigsabot sa Ginoo o isipon nga ang imong pagkamasulundon usa ka transaksyon aron makaangkon og piho nga mga panalangin.

1.2

Kabubut-on

Ang kabubut-on, o ang abilidad sa pagpili ug paglihok alang sa imong kaugalingon, usa sa labing mahinungdanon nga mga gasa sa Dios ngadto sa Iyang mga anak. Ang atong mahangturon nga pag-uswag nag-agad kon giunsa nato paggamit kini nga gasa. Kinahanglan gayod kita nga mopili kon mosunod ba kang Jesukristo ug sa Iyang mga pagtulon-an. Ang kabubut-on nagtugot kanimo sa pagkat-on, pag-uswag, ug pagsunod sa Manluluwas. Uban niini, ikaw “gawasnon sa pagpili sa kalingkawasan ug kinabuhing dayon, pinaagi sa halangdon nga Tigpataliwala sa tanan nga mga tawo (2 Nephi 2:27).

Ikaw maoy responsable sa mga desisyon nga imong himoon. Ikaw anak sa Dios nga adunay dakong kalig-on. Ikaw adunay abilidad sa pagpili sa pagkamatarong ug kalipay bisan unsa pa ang imong mga kahimtang.

Ikaw mao usab ang responsable sa pagpalambo sa mga abilidad ug mga talento nga gihatag sa Dios kanimo. Ang imong misyon mao ang panahon sa pagkat-on nga mahimong may tulubagon ngadto Kaniya sa unsay imong gihimo sa imong mga abilidad ug kon giunsa nimo paggamit ang imong panahon. Ayaw usiki ang panahon pinaagi sa pagtinapolan. Magmahimong andam nga motrabaho og maayo. Pilia nga magmakanunayon ug masaligan, ug himoa ang daghang maayo nga mga butang sa imong kaugalingong kabubut-on.

1.3

Katuyoan sa Pangserbisyo nga Misyonaryo

Ang pagpangalagad sa Manluluwas maoy ehemplo sa duha ka dako nga sugo: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan” ug “Higugmaa ang imong silingan sama sa imong kaugalingon” (Mateo 22:37, 39). Atong gipahayag ang atong gugma sa atong mga silingan kon kita moserbisyo kanila. Samtang magserbisyo kita sa uban, kita nagpakita usab sa atong gugma sa Dios: “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Ang Unang Kapangulohan mihatag og katuyoan sa pangserbisyo nga misyonaryo aron mogiya nimo diha sa imong sagrado nga tawag sa pagserbisyo:

“Ang atong katuyoan mao ang pagtabang sa uban nga moduol ngadto kang Kristo pinaagi sa pagserbisyo kanila sama sa buhaton sa Manluluwas. Kita boluntaryo nga moserbisyo diha sa manggihatagon nga mga organisasyon, mga kalihokan sa Simbahan, ug sulod sa komunidad. Kita mangalagad diha sa Iyang ngalan ngadto sa usa ka tawo, sama sa Iyang gibuhat, nga nagpahayag sa Iyang mahigugmaong pagkamabination.”

Hinumdomi nga kon giunsa nimo sa pagserbisyo ang Manluluwas maoy mas importante kay sa asa ka nagserbisyo o unsa ang imong gihimo. Si Presidente Russell M. Nelson namahayag: “Pinaagi sa tibuok kinabuhi nga pagserbisyo niining Simbahan, akong nakat-[o]nan nga dili gay[o]d kana igsapayan asa moserbisyo ang usa ka tawo. Ang gipakabanaan pag-ayo sa Ginoo mao ang giunsa pagserbisyo sa usa ka tawo” (“Ang Pagpangalagad uban sa Gah[o]m ug Katungod sa Dios,” Liahona, Mayo 2018, 68). Ang imong pagserbisyo alang sa Agalon, ug ikaw gidapit sa pagserbisyo sama Niya!

1.4

Mga Tumong sa Misyonaryo

Ang Unang Kapangulohan mihatag usab sa mosunod nga mga tumong sa pangserbisyo nga misyon:

• Mohatag og oportunidad sa tanang andam nga mga batan-ong babaye ug mga batan-ong lalaki sa pagserbisyo sa Ginoo ug pagpalambo sa pagpamatuod bahin Kaniya.

• Motabang sa matag pangserbisyo nga misyonaryo sa pag-andam alang sa tibuok kinabuhi nga pagserbisyo.

• Mohatag og gikinahanglan ug bililhon nga serbisyo ngadto sa Ginoo pinaagi sa pagserbisyo diha sa Simbahan ug sa mga organisasyon sa komunidad.

Samtang matinud-anon ka nga moserbisyo sa Manluluwas diha sa Iyang ngalan ug sa Iyang paagi atol ug human sa imong misyon, mapalambo nimo ang Kristohanong mga kinaiya. Kini nga mga kinaiya, o mga hiyas, makatabang nimo nga matuman ang imong mga tumong sa misyonaryo.

Ikaw adunay oportunidad sa pag-ugmad og bag-ong espirituhanon, sosyal, pisikal, ug intelektwal nga mga kahanas nga makapanalangin ug makaimpluwensya kanimo diha sa tanang aspeto sa imong kinabuhi.

1.5

Mga Sumbanan sa Kinabuhi

Ang Dios nagdapit kanimo sa pagpahinungod sa imong kaugalingon ngadto Kaniya sa tibuok nimong kinabuhi. Ang mga sumbanan sa misyon sama sa personal nga pagtuon, paghimo og tumong, ug ang matarong nga paggamit sa teknolohiya makapanalangin kanimo diha sa imong misyon ug sa tibuok nimong kinabuhi.

Tugoti nga ang mga sugo diha sa mga kasulatan ug kining mga sumbanan sa misyonaryo mamahimong giya nga mga baroganan sa tibuok kinabuhi. Samtang magsunod ka sa mga sugo ug mga sumbanan sa Dios, Siya motudlo, mopanalangin, ug mogiya kanimo sa tibuok nimong kinabuhi.