Vahe 3

Tānaki ʻo e Fakamatalá mei ʻApí

Te ke lava ke tānaki mei he ngaahi maʻuʻanga tokoni kehekehe ʻa e fakamatala ki he hisitōlia fakafāmilí. ʻOku ʻi ai e niʻihi ʻe faingofua ange hono maʻú ʻi he niʻihi kehé. Te ke lava ke fakaʻaongaʻi lelei ange ho taimí ʻi hoʻo tānaki e fakamatala mei he ngaahi maʻuʻanga tokoni ʻoku faingofua hoʻo maʻú kimuʻa peá ke hoko atu ki he ngaahi maʻuʻanga tokoni ʻoku faingataʻa hono maʻú. Hangē ko ʻení, ko hoʻo manatú ko ha maʻuʻanga tokoni lelei ʻaupito ia ki he fakamatala ʻo e hisitōlia fakafāmilí. Te ke toe lava foki ke maʻu ha fakamatala mahuʻinga ki he fāmilí mei he ngaahi lekooti ʻoku maʻu ʻi ho ʻapí. Muimui ki he ueʻi ʻa e Laumālie Māʻoniʻoní ʻi hoʻo fakakaukauʻi e feituʻu ke kamata tānaki mei ai ʻa e fakamatalá.

Fakaʻaongaʻi e Saiti ko e FamilySearch Internet

ʻOku maʻu ʻa e saiti ko e FamilySearch Internet, ʻi he new.familysearch.org, pea mahalo pē kuo ʻosi ʻi ai ha fakamatala kau ki hoʻo ngaahi kuí. Toe vakaiʻi e fakamatala ko ʻení ʻi he kamataʻanga hoʻo fekumí ke fakaʻehiʻehi mei hono toe fakahoko ha ngāue kuo ʻosi faí.

Lekooti e Fakamatalá mei he Meʻa ʻOkú ke Manatuʻí

Ko hoʻo manatú ʻa e maʻuʻanga fakamatala vave taha kau ki ho fāmilí. Lekooti e ngaahi hingoa te ke lava ʻo manatuʻí, ʻaho mo e feituuʻu naʻe fāʻeleʻi aí, mali, mate, mo e ngaahi meʻa mahuʻinga kehe naʻe hoko he moʻui hoʻo ngaahi kuí. Te ke lava ke hiki e fakamatala ko ʻení ʻi ha lekooti kulupu fakafāmili mo e saati hokohoko fakafāmili pe ʻi ha kiʻi tohi fakamatala ki he fekumí, pe ko hoʻo lekooti ia ʻi he saiti ko e FamilySearch Internet (vakai, vahe 4 ʻo e fakahinohino ko ʻení). Fakapapauʻi ʻoku fakamoʻoniʻi hoʻo fakamatalá ʻaki hano fakatatau ia ki he fakamatala ʻokú ke maʻu mei he ngaahi maʻuʻanga tokoni kehé. ʻOku faʻa mole ʻa e manatú pea ʻokuʻikai ke tonu maʻu pē.

Tānaki ʻo e Fakamatalá mei he Ngaahi Maʻuʻanga Tokoni mei ʻApí

Ko ha maʻuʻanga tokoni mahuʻinga ki he fakamatala ʻo e hisitōlia fakafāmilí ʻa ho ʻapí. Fakamoleki ha taimi ke fekumi ai ki he ngaahi lekooti ʻoku maʻu ʻi ho ʻapí. Te ke lava ke ʻilo ai ʻa e:

Lekooti kulupu fakafāmilí, saati hokohoko fakafāmilí, ngaahi tohi manatú, pe ngaahi meʻa motuʻa ʻoku hiki ai ha fakamatalá.
Ngaahi Tohitapu Fakafāmilí.
Ngaahi tohinoa, fakamatala, mo e tohi.
Ngaahi hisitōlia fakatāutahá mo e ngaahi fakamatala nounou ki he moʻuí.
Ngaahi hisitōlia ʻo e fāmilí.
Ngaahi laʻi tā motuʻa.
Ngaahi fakamatala ki ha taha kuo pekia mo e fakamatala naʻe kosi mei he nusipepá.
Ngaahi tohitaʻu, tohi mali, mo e tohi mate.
Ngaahi pepa ki hono lēsisita ʻo e ʻapí mo e lēsisita fakamatakalí.

Naʻe fokotuʻu mai ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ha founga faingofua ʻe taha ki hono tānaki ʻo e ngaahi meʻá ni:

“Kumi ha puha pepa fefeka. Ha faʻahinga puha pē. Tuku ia ʻi ha feituʻu ʻokú ke fou maʻu atu pē aí, … ha faʻahinga feituʻu pē he ʻikai taʻe fakatokangaʻi ai. Pea, ʻi he ngaahi uike siʻi ka hokó, tānaki mo faʻo ki he puhá ʻa e lekooti kotoa pē hoʻo moʻuí, hangē ko ho tohi taʻú, tohi fakamoʻoni ʻo ho tāpuakiʻí, tohi fakamoʻoni ʻo ho papitaisó, tohi fakamoʻoni ʻo ho fakanofó, mo hoʻo tohi ʻosi mei he akó. Tānaki hoʻo ngaahi tipilomá, ngaahi taá kotoa, ngaahi fakalāngilangi, pe ngaahi pale, ha tohinoa kapau ʻoku ʻi ai, ha faʻahinga meʻa pē ʻokú ke maʻu fekauʻaki mo hoʻo moʻuí; ha meʻa pē ne tohi, pe lēsisita, pe lekooti te ne lava ʻo fakamoʻoniʻi ʻokú ke kei moʻui pea mo e meʻa naʻá ke fakahokó” (“Ko Ho Hisitōlia Fakafāmilí: Ko Hono Kamatá,” Liahona, ʻAokosi 2003, 15).

ʻE lava ke fakahoko ʻa e founga tatau ki hono tānaki ʻo e fakamatala ki hoʻo ngaahi kuí. ʻI hoʻo maʻu e ngaahi lekooti ʻoku ʻi ai e fakamatala ki he fāmilí, faʻo e ngaahi meʻa kotoa pē te ke maʻu kau kiate koé ʻi ha puha, fokotuʻunga pe foulutā (folder) ʻe taha. Faʻo e meʻa kotoa kau ki he fāmili hoʻo mātuʻá pe kuí ʻi ha puha, fokotuʻunga, pe foulutā mavahe.

ʻI he kulupu fakafāmilí, te ke lava ʻo fokotuʻutuʻu e fakamatalá ʻo fakatatau ki he tokotaha fakafoʻituitui takitaha ʻi he kulupu fakafāmilí. Te ke lava ʻo fokotuʻutuʻu ha fakamatala fakahokohoko ki he taʻú maʻá e tokotaha fakafoʻituitui takitaha, pea vahevahe ʻa e fakamatalá ki he faʻahinga ʻe tolu—kei siʻí, talavoú, mo e matuʻotuʻá. Mahalo ʻe toe ʻi ai mo ha ngaahi fakakaukau ʻe toe fakalahi atu ʻe he tokotaha fai faleʻi ki he hisitōlia fakafāmili ʻi ho uōtí pe koló ki he founga ke fokotuʻutuʻu ai e fakamatala ki hoʻo hisitōlia fakafāmilí.

ʻI hoʻo tānaki e fakamatala mei he ngaahi lekooti ʻoku maʻu ʻi homou ʻapí, lekooti ia ʻi he saiti ko e FamilySearch Internet pe ʻi he ngaahi foomu fakapepa totonú (vakai, vahe 4 ʻo e fakahinohino ko ʻení).