Ngaahi Fehuʻi he Lēsoni Filí

Ko Sīsū Kalaisi mo e fānaú

Fakahinohino ki he Faiakó

ʻOku malava pē ke fakaʻaongaʻi ʻa e Hikiʻi Hake Aʻusia ʻi he Akó ko ʻení ʻi ha kalasi ʻinisititiuti pē ka ʻoku ʻikai ko ha kalasi Makatuliki. ʻOku ʻi ai ha ngaahi fehuʻi ʻoku mahuʻinga ke ō fakataha mo e ngaahi laukonga kuo vahe atú pea mo e kau mai ʻa e kalasí. ʻE lava ʻe he fakaafeʻi mo hono tokoniʻi ʻo e kau akó ke nau ako, moʻui ʻaki, lekooti, mo vahevahe ʻa e ngaahi tefitoʻi moʻoní mo e tokāteliné ʻo tokoni ke fakamālohia ʻenau fakamoʻoní mo fakaloloto ange ʻenau uluí.

Fakatatau ki hoʻo fakahinohinó, ʻe tali ʻe he kau akó ha fehuʻi ʻe tolu mei he ngaahi fehuʻi ʻe fitu ʻoku ʻi he laʻipepa fakahinohino ki he kau akó. ʻOku totonu ke fakatefito ʻa hono toʻo ʻo e tali ʻa e kau akó mei he ngaahi meʻa kuo nau ako mo fakaʻaongaʻi lolotonga ʻa e faʻahitaʻu akó. Neongo ʻe fie maʻu ke liliu ʻa hono fakahoko ʻo e Hikiʻi Hake Aʻusia ʻi he Akó ʻo fakatatau mo e kalasí pe kau akó fakafoʻituitui, ka ʻe tokoni atu e ngaahi founga ko ʻení kiate koe mo hoʻo kau akó ke ola lelei ʻa e meʻa ʻoku nau aʻusiá:

1. Teuteu: Kimuʻa pea kamata ʻa e kalasí, toe vakaiʻi ʻa e ngaahi fehuʻí pea fokotuʻu ha palani ki hono fakahoko e Hikiʻi Hake Aʻusia ʻi he Akó. Mahalo ʻe kau ʻi hoʻo teuteú ʻa e ngaahi founga ke fakafeʻiloaki ʻaki e ngaahi fehuʻí ki he kalasí pea mo hono fakamatalaʻi e ngaahi fie maʻu ki he Hikiʻi Hake Aʻusia ʻi he Akó, hangē ko e ngaahi ʻaho ki hono vakaiʻi mo fakahū ʻa e ngaahi tali ʻa e kau akó, ko e lōloa ʻoku fie maʻu ki he ngaahi talí, mo e founga ki hono fokotuʻutuʻu ʻo e ngaahi talí. ʻOku fokotuʻu atu ke ke vakaiʻi ʻa e tali taki taha ʻe tolu ʻa e toko taha akó ʻi ha ngaahi ʻaho kehekehe ʻe tolu kuó ke fili ʻi he ʻalu ʻa e faʻahitaʻu akó.

2. Fokotuʻu ha ngaahi fie maʻu pau: ʻI he kamata ʻa e kalasí, ʻoange ki he tokotaha ako takitaha ha tatau ʻo e ngaahi fehuʻi ʻoku maʻu ʻi he laʻipepa fakahinohino ki he tokotaha akó. ʻE ʻoange heni ha taimi lahi ki he kau akó ke ako, moʻui ʻaki, pea lekooti ʻenau ngaahi tali ki he fehuʻí ʻi he lolotonga ʻa e semesitaá. Tokoni ke mahino kiate kinautolu ʻa e taumuʻa ʻo e Hikiʻi Hake Aʻusia ʻi he Akó. Fakamatala mahino hoʻo ngaahi fie maʻu ki heʻenau ngaahi talí, kau ai ʻa e ngaahi ʻaho ki hono vakaiʻí mo hono fakahuú.

3. Muimuiʻi: ʻI he faʻahitaʻu ako ko ʻení, toutou poupouʻi mo tokoniʻi e kau akó kotoa ʻi heʻenau ngāue ke fakakakato ʻa e ngaahi fehuʻi ki he Hikiʻi Hake Aʻusia ʻi he Akó. Fekumi ki ha ngaahi founga ʻe lava ʻo fakafehokotaki ai e ngaahi fehuʻí ki he nāunau fakalēsoní, pe fakaʻaongaʻi ʻi he ngaahi ʻekitivitī fakakalasí. Te ke lava pē ʻo tuku ki he kau akó ke nau ngāue ki heʻenau ngaahi talí ʻi he kalasí, ʻi tuʻa he kalasí, pe fakatouʻosi.

4. Toe vakaiʻí mo toe fakaleleiʻi: ʻI he ngaahi ʻaho kuó ke fakataimitēpileʻi ke toe vakaiʻi aí, fakaafeʻi mo fakamanatu ki he kau akó ke nau omi mo ʻenau ngaahi tali ki he (ngaahi) fehuʻí ki he kalasí. Fakaafeʻi kinautolu ke fakamatalaʻi, vahevahe, pea fakamoʻoni ʻi heʻenau ngaahi talí ki he meʻa kuo nau ako mo fakaʻaongaʻi mei he kalasí. ʻE lava ke ʻaonga ki he kau akó haʻanau tauhoa pe fakakulupu ʻo fevakaiʻiʻaki ʻenau ngāué. Te ke lava pē ʻo fakaafeʻi ʻa e kau akó ke nau toe vakaiʻi ʻenau ngaahi talí ʻo ka fie maʻu kimuʻa pea toki fakahuú.

5. Tānaki: ʻOku fakakakato ʻe he kau akó ʻa e Hikiʻi Hake Aʻusia ʻi he Akó ʻaki ʻenau tānaki atu ʻenau ngaahi tali ki he fehuʻi ʻe tolú ʻo fakatatau mo hoʻo fie maʻú. Neongo ʻoku sai pē ke ʻomi ha fakamatala tokoni ki he ngaahi tali ʻa e kau akó, ka ʻoku ʻikai fakamamafaʻi ia. Lekooti ʻa e fakamatalá ʻi he WISE Gradebook maʻá e kau ako ne fakahū mai ʻenau ngaahi talí.

Fakatokangaʻi ange: Fakapapauʻi ʻoku maʻu ʻe he kau ako ʻoku ʻi ai ʻenau ngaahi fie maʻu makehé, faingataʻaʻia fakaesinó pe ʻi ai haʻanau tūkunga fakaemoʻui leleí, ʻa e tokoni ʻoku nau fie maʻú ke nau kau ai ki he siví ni ʻi he tuʻunga tatau pē mo honau kaungā akó. ʻE lava ke kau he tokoni makehe ʻe faí hano ʻoange ha tatau kuo paaki mata lalahi pe tatau ʻo e nāunaú kuo hiki tepi, fakaʻatā e kau akó ke tokoniʻi kinautolu ʻe ha niʻihi kehe ʻi hono fakakakato e ngaahi talí , fakaʻatā ke fakamatala ngutu atu pē ʻenau ngaahi talí kae ʻikai tohiʻi atu pe ko hano fakaʻatā ke tala-kae-tohi ʻenau talí ki ha sikalaipe pe taha failēkooti. Hū ki he lds.org/topics/disability ke maʻu ha fakamatala fakalūkufua fekauʻaki mo hono tokoniʻi ʻo e niʻihi fakafoʻituitui ʻoku faingataʻaʻia fakaesinó.

Fakahinohino ki he Kau Akó

ʻOku ʻi he Hikiʻi Hake Aʻusia ʻi he Akó ha ngaahi fehuʻi ʻoku mahuʻinga ke ō fakataha mo e kau mai mo hono ako ʻe hoʻo kalasí ʻa e ngaahi laukonga kuo vahe atú. ʻE tokoni atu hoʻo ngāue ki he tali e ngaahi fehuʻi ko ʻení ʻi he faʻahitaʻu akó ʻi hoʻo ako, moʻui ʻaki, lekooti, pea vahevahe e ngaahi tefitoʻi moʻoní mo e tokāteliné ke fakamālohia hoʻo fakamoʻoní pea fakaloloto ʻa hoʻo ului ki he ongoongolelei ʻo Sīsū Kalaisí.

Tali ha fehuʻi ʻe TOLU mei he ngaahi fehuʻi ʻe fitu ko ʻení ʻo fakatatau mo e tokāteline, ngaahi tefitoʻi moʻoni, mo e fakatamatala kuó ke ako mo moʻui ʻaki lolotonga ʻa e kalasi ko ʻení. (ʻE malava pē ke vahe atu ʻe he faiakó ha ngaahi fehuʻi pau.) Fakakaukau ki he ngaahi fokotuʻu ʻi he konga “Talí” ʻi laló ʻi hono fai hoʻo talí. Mateuteu maʻu pē ke vahevahe ʻa e meʻa kuó ke ako mo moʻui ʻakí ʻi hono ʻomi hoʻo ngaahi talí ki he kalasí ʻi he ʻaho toe vakaiʻi ʻoku fakataimitēpileʻi ʻe hoʻo faiakó.

Ngaahi fehuʻi

1. Ko e hā ha founga kuó ke ʻiloʻi lelei ange ai ho Tamai Hēvaní?

2. Ko e hā kuó ne tokoni ke toe mahino ange kiate koe mo ke falala kia Sīsū Kalaisi mo ʻEne Fakaleleí?

3. Kuo tupulaki fēfē ʻa hoʻo fakamoʻoni ki hono Fakafoki mai ʻo e ongoongoleleí?

4. Ko e hā kuó ne tokoniʻi koe ke toe taau ange ai ki he ngaahi tāpuaki ʻo e temipalé?

5. Ko e fē ngaahi moʻoni mei he kalasi ko ʻení kuó ne tāpuekina hoʻo moʻuí?

6. Kuó ke fakamālohia fēfē hoʻo fakamoʻoní ki he __________? (ʻE ʻoatu ʻe he faiakó ʻa e tefitoʻi moʻoni pe tokāteline ki he fehuʻi ko ʻení.)

7. Kuo tupulaki fēfē hoʻo moʻuí koeʻuhi kuo fakaloloto hoʻo mahino ki he __________? (Fili ha TAHA ʻo e ngaahi kaveinga fakatokāteline ko ʻení.)

   • Ko e Toluʻi ʻOtuá

   • Ko e Palani ʻo e Fakamoʻuí

   • Ko e Fakalelei ʻa Sīsū Kalaisí

   • Ko Hono Fakafoki Mai ʻo e Ongoongoleleí

   • Kau Palōfitá mo e Fakahaá

   • Lakanga Fakataulaʻeikí mo e Ngaahi Kī ‘o e Lakanga Fakataulaʻeikí

   • Ngaahi Ouaú mo e Ngaahi Fuakavá

   • Nofo-malí mo e Fāmilí

   • Ngaahi Fekaú

Talí

Te ke lava ʻo fakakau atu ʻa e ngaahi meʻá ni ʻi he tali takitaha:

• ʻIlo ha tokāteline ʻoku toe ʻuhingamālie ange kiate koe ʻi hoʻo kau ki he kalasi ko ʻení.

• Fakamatalaʻi ʻa e tokāteliné ʻo fakaʻaongaʻi ʻa e lea pē ʻaʻau, potufolofola, pe lea ʻo e kau palōfita moʻuí.

• Vahevahe ha aʻusia kimuí ni mai naʻá ke ongoʻi ai ʻa e mālohi ʻo e tokāteline ko iá ʻi hoʻo moʻuí.

• Vahevahe ʻa e founga kuo fakaloloto ai ʻe he aʻusia ko iá ʻa hoʻo ului ki he ongoongolelei ʻo Sīsū Kalaisí.

Fakatokangaʻi ange: Kapau ʻoku ʻi ai haʻo fie maʻu makehe, faingataʻaʻia fakaesino pe palopalema fakaemoʻui lelei, talanoa ki hoʻo faiakó ke ne lava ʻo fokotuʻutuʻu ha founga ke tokoni atu ke ke fakakakato ai e aʻusiá ni.