Tauhi ha tohinoa ako ki he kalasí ʻa ia ʻokú ke lekooti maʻu pē ai e meʻa kuó ke akó, founga kuó ke fakaʻaongaʻi ai iá, mo e founga kuó ne fakatupulekina hoʻo tui kia Sīsū Kalaisí. Te ke malava ai ʻo fakakaukauloto mo ʻiloʻi e ngaahi tāpuaki hulu fau kuó ke maʻu mei he ʻOtuá. ʻE lava foki e tohinoá ʻo hoko ko ha maʻuʻanga ueʻi fakalaumālie mo e mālohi. ʻI he fakaʻosinga ʻo e kalasí te ke lipooti ki hoʻo faiakó naʻá ke tauhi maʻu pē ha tohinoa ako ki he kalasí mo e founga naʻe fakamālohia ai hoʻo tui kia Sīsū Kalaisí ʻe hoʻo aʻusiá.
Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
ʻEletā Richard G. Scott
“[Hiki ʻi ha feituʻu malu ʻa e ngaahi meʻa mahuʻinga ʻokú ke ako mei he Laumālié.] Te ke ʻilo ʻi hoʻo hiki e ngaahi ongo mahuʻinga ʻokú ke maʻú, ʻe lahi leva ʻene toutou hoko maí. Ko e meʻa foki ‘e tahá, te ke maʻu ‘i hoʻo moʻuí kotoa ‘a e ‘ilo te ke maʻu aí” (Richard G. Scott, “To Acquire Knowledge and the Strength to Use It Wisely,” Ensign, June 2002, 32).
Naʻe toe lea foki ʻa Palesiteni Henelī B. ʻAealingi ʻo e Kau Palesitenisī ʻUluakí ki he mahuʻinga ʻo hono lekooti e ngaahi ongo fakalaumālié:
ʻĪmisi
Palesiteni Henry B. Eyring
“Ne u aʻu tōmui mai ki ʻapi mei haʻaku ngāue faka-Siasi. …
“… ʻI heʻeku aʻu atu pē ki he matapaá, ne haʻu ki heʻeku fakakaukaú … ʻʻOku ʻikai ke u ʻoatu hoʻo ngaahi aʻusia ko ʻení maʻau pē. Hanga ʻo tohi ia.”
“… ʻI heʻeku fai iá, naʻe mahino kiate au ʻa e pōpoaki ne u fanongo ki ai ʻi hoku ʻatamaí. Ne fie maʻú ke u hiki ha lekooti maʻa ʻeku fānaú ke nau lau ʻi ha ʻaho, ʻa e founga ne u mamata ki hono faitāpuekina ʻe he toʻukupu ʻo e ʻOtuá ʻa homau fāmilí. …
“Ne taʻu lahi haʻaku hiki ha ngaahi fakamatala ʻi he ʻaho kotoa pē. … Kimuʻa peá u tohí, te u fakakaukauloto ki he fehuʻi ko ʻení: ‘Kuó u mamata nai ki he mafao mai e toʻukupu ʻo e ʻOtuá kiate kimaua pe ko ʻema fānaú pe fāmilí he ʻahó ni?’ “ʻI he hokohoko atu ʻeku hiki e ngaahi meʻá ni, naʻe kamata ke hoko ha liliu. …
“Ne tupulaki ʻi hoku lotó ha meʻa naʻe mahulu ange ia ʻi he loto houngaʻiá pē. Naʻe tupulaki ʻa e fakamoʻoní. Ne u ʻiloʻi fakapapau ange ʻoku fanongo mai ʻa ʻetau Tamai Hēvaní ki heʻetau ngaahi lotú mo Ne tali ia. Ne lahi ange ʻeku ongoʻi loto houngaʻiá ʻi he fakamolū mo e fakamaʻa ko ia ʻoku tupu mei he Fakalelei ʻa e Fakamoʻui ko Sīsū Kalaisí. Pea naʻe toe lahi ange ʻeku falala ʻe lava ke fakamanatu mai ʻe he Laumālie Māʻoniʻoní kiate kitautolu ʻa e ngaahi meʻa kotoa pē—ʻo aʻu pē ki he ngaahi meʻa naʻe ʻikai ke tau fakatokangaʻi pe tokanga ki heʻene hokó” (Henry B. Eyring, “ʻOiauē, Manatu, Manatu,” Ensign pe Liahona, Nōvema 2007, 66–67).