“15. Seminare ma Inisitituti o Mataupu Faalelotu,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2020).
“15. Seminare ma Inisitituti o Mataupu Faalelotu,” Tusitaulima Aoao.
15.
Seminare ma Inisitituti o Mataupu Faalelotu
15.0
Faatomuaga
O Seminare ma Inisitituti o Mataupu Faalelotu (S&I) e lagolago atu i matua ma taitai o le Ekalesia i le fesoasoani ai i le autalavou ma talavou matutua ia faateleina lo latou faatuatua ia Iesu Keriso ma Lana talalelei toefuataiina. E faia lenei mea e ala i le lagolagoina o se suesuega o tusitusiga paia ma upu a perofeta soifua ma isi taitai o le Ekalesia e faatotonugalemu-i-le-aiga.
O polokalama a le seminare ma le inisitituti o loo faafoeina i aiaiga faavae na faavaeina e le Fono Faatonu o A’oga a le Ekalesia, lea e taitaia e le Peresitene o le Ekalesia. O le au peresitene o le siteki e faatinoina nei polokalama i totonu o le siteki ma uarota. E iloiloina e le aunoa e taitai o siteki ma uarota le auai ai o o latou talavou i polokalama o le seminare ma le inisitituti.
E tofia se sui o le S&I i siteki taitasi e fesoasoani i taitai e faatautaia polokalama a le S&I.
15.1
Seminare
O le seminare o se polokalama e 4-tausaga lea e suesue ai e le autalavou le talalelei a Iesu Keriso e pei ona maua i tusitusiga paia ma a’oa’oga a perofeta o aso e gata ai. O tamaiti a’oga o le seminare e masani lava o le 14–18 tausaga le matutua.
O le au epikopo, taitai o le autalavou, ma au peresitene o korama ma vasega e faamalosiauina talavou uma ia auai atoatoa i le seminare. E uunaia e le au epikopo ia matua e lesitala a latou fanau i tausaga taitasi a o le’i amataina vasega o le seminare. Mo nisi faamatalaga, tagai i le Lesitala mo le Seminare i luga o le ChurchofJesusChrist.org.
15.1.1
O Faiaoga
Ofaiaoga seminare e tatau o ni tagata o le Ekalesia e i ai le faatuatua i le Alii o Iesu Keriso ma se molimau i Lana talalelei toefuataiina. E tatau ona latou ola i mataupu faavae latou te a’oa’o atu ma galulue lelei ma le autalavou. Afai e mafai, e tatau i faiaoga ona i ai se pepa faataga o aoga o le malumalu.
O se uso o le au peresitene o le siteki e fefautuaai ma le epikopo, supavaisa i le siteki, ma le sui o le S&I e uiga i ē onomea ona avea ma faiaoga seminare. O se uso o le au peresitene o le siteki po o se fautua maualuga e tofia, e valaauina, vaetofia, ma faamalolo ia faiaoga seminare a le siteki ma supavaisa a le siteki. A uma ona valaauina le tagata ma vaetofia, o le sui o le S&I e a’oa’oina ma lagolagoina o ia.
Ina ia puipuia faiaoga ma tamaiti aoga, e tatau ona toalua ni tagata matutua e i ai i le nofoaga po o le fale i le mea o loo a’oa’o ai le vasega seminare. E mafai ona valaauina se faiaoga faaopoopo, pe tofia foi se isi tagata matua faatuatuaina e auai. O le tagata matua lona lua e mafai ona tofi i ai le toalua o le faiaoga po o se mātua o se tasi o le vasega. E tatau ona itupa tutusa ma le faiaoga, se’i vagana ai o lena tagata o se tagata matua o le aiga o le faiaoga. E le tatau lava ona tuua na o se faiaoga i le potuaoga, fale, po o se taavale ma se tamaitiiti a’oga se’i vagana o le tamaitiiti a’oga o se tama a le faiaoga.
15.1.2
Filifiliga o le Seminare
E sili ona aogā le seminare pe a mafai ona potopoto tamaiti a’oga ma se faiaoga i aso taitasi o le vaiaso. Peitai, atonu e le mafai lea mea ona o faafitauli tau le saogalemu, mamao o feoa’iga, ma isi tulaga. Ua i ai i taitai o le lotoifale filifiliga nei mo le faia o seminare.
Filifiliga |
Numera o Lesona i Totonu o Vasega Faalevaiaso |
Numera o Lesona e Suesue i le Fale Faalevaiaso po o le Initoneti |
---|---|---|
Filifiliga A | Numera o Lesona i Totonu o Vasega Faalevaiaso 5 (50 minute) | Numera o Lesona e Suesue i le Fale Faalevaiaso po o le Initoneti Leai |
Filifiliga E | Numera o Lesona i Totonu o Vasega Faalevaiaso 4 (60 minute) | Numera o Lesona e Suesue i le Fale Faalevaiaso po o le Initoneti Leai |
Filifiliga I | Numera o Lesona i Totonu o Vasega Faalevaiaso 4 (50 minute) | Numera o Lesona e Suesue i le Fale Faalevaiaso po o le Initoneti 1 |
Filifiliga O | Numera o Lesona i Totonu o Vasega Faalevaiaso 3 (50 minute) | Numera o Lesona e Suesue i le Fale Faalevaiaso po o le Initoneti 2 |
Filifiliga U | Numera o Lesona i Totonu o Vasega Faalevaiaso 2 (90 minute) | Numera o Lesona e Suesue i le Fale Faalevaiaso po o le Initoneti 1 |
Filifiliga F | Numera o Lesona i Totonu o Vasega Faalevaiaso 2 (50 minute) | Numera o Lesona e Suesue i le Fale Faalevaiaso po o le Initoneti 3 |
Filifiliga G | Numera o Lesona i Totonu o Vasega Faalevaiaso 1 (50 minute) | Numera o Lesona e Suesue i le Fale Faalevaiaso po o le Initoneti 4 |
E fefautuaai taitai o le Ekalesia ma lo latou sui o le S&I e fai se faai’uga pe o lē fea filifiliga o le a:
-
Sili ona fesoasoani i tamaiti a’oga e a’oa’o ai le talalelei ma tuputupu a’e ai faaleagaga.
-
Tausisia ai le saogalemu o tamaiti a’oga.
-
Lē faamamafa ai ma le lē talafeagai i aiga.
Afai e faigata ona feiloai ma se faiaoga i le vaiaso, e mafai ona iloilo le faaaogaina o tekinolosi mo feiloaiga faavitio.
E le tatau ona faia vasega i le Aso Sa. O tuusaunoaga e manaomia ai le faamaoniga mai le Fono Faatonu o A’oga a le Ekalesia. E mafai e se peresitene o le siteki ona fautuaina atu i le sui o le S&I i le lotoifale ni suiga pe o le fea e filifili le siteki e faaaoga i le seminare. O le sui o le S&I e tuuina atu le fautuaga i le pulega o Seminare ma Inisitituti o Mataupu Faalelotu. E tatau ona i ai se faamaoniga mai le pulega a o le’i faatinoina le suiga.
E mafai foi ona faavae se au faatonu o a’oga i le lotoifale lea e tutusa ia atugaluga ma luitau o ni siteki o loo faia vasega seminare, vasega e suesue i le fale, po o le felata’i foi (tagai i le seminary.ChurchofJesusChrist.org).
15.1.3
Fale, Masini, ma Anomea
E faamautinoa e taitai o le siteki ma uarota o nofoaga e pei o falelotu po o fale o aiga o loo avanoa mo vasega seminare. E le tatau ona totogi ni fale po o potu mo vasega seminare. Afai e fai vasega i se falelotu, e tatau ona mafai e faiaoga ona faaaoga masini i le nofoaga autu mo punaoa.
O le sui o le S&I e tuuina atu anomea mo faiaoga ma tamaiti aoga mo vasega taitasi. E tatau i tamaiti aoga ona aumai a latou lava tusitusiga paia, tusilolomi pe faatekinolosi.
15.1.4
Au Mautofi o Vasega ma Gaoioiga
E mafai e se faiaoga seminare ona filifili le au mautofi o le vasega, e pei o se peresitene, sui peresitene, ma se failautusi. E muamua ona faafesootai e le faiaoga matua o tamaiti a’oga taitasi ma le epikopo mo se faamaoniga. O le au mautofi o vasega e le tuuina atu mo le lagolagoina pe vaetofiaina foi. E mafai ona latou fesoasoani i le faiaoga i tiute masani i le potuaoga ma faamalosiau atu i isi tamaiti aoga e o mai ma auai ai.
E le tatau i faiaoga seminare ona faia ni gaoioiga i fafo atu o le taimi o vasega masani pe ō ese ai mai le potuaoga. O tuusaunoaga e manaomia ai le faamaoniga mai taitai i le lotoifale.
15.1.5
Togi ma Faauuga
E mafai e tamaiti a’oga seminare ona a’oa’o ma le mataalia atili ma faalolotoina lo latou liua pe afai latou te auai e le aunoa i le vasega, auai i fetufaaiga, ma suesue i tusitusiga paia i fafo atu o le vasega. A latou faia nei mea, latou te mauaina foi se togi o le seminare i tausaga taitasi ma mafai ona faauu mai le seminare.
O nisi tamaiti a’oga atonu e faigata ona maua se togi o le seminare ona o luitau tau le faitautusi po o isi mafuaaga. E mafai e le faiaoga ona fetuunai mea e manaomia i manaoga o nei tamaiti a’oga. O fetuunaiga mo se polokalama atoa e mafai ona talosagaina e le sui o le S&I. O nei fetuunaiga e manaomia ai le faamaoniga mai le Ofisa Tutotonu o le S&I.
Ina ia faauu mai le seminare, e tatau i se tamaitiiti a’oga ona saili ia maua le fa tausaga o togi ma maua se faamaoniga faale-ekalesia mai se tasi o le au epikopo. O lea faamaoniga e faamaonia ai ua agavaa se tamaitiiti a’oga ma ua tautino e ola i tulaga faatonuina o le talalelei.
O tausaga taitasi e faia ai e le siteki se faauuga o le seminare. E fuafuaina lea gaoioiga e se tasi o le au peresitene o le siteki po o se fautua maualuga. E mafai ona fesoasoani i ai le sui o le S&I. Mo nisi faamatalaga, tagai i le O Se Taiala mo le Faatinoga o Faauuga o le Seminare ma le Inisitituti.
15.1.6
Seminare i le Taimi o le A’oga
I nisi eria i le Iunaite Setete ma Kanata, e faatagaina ai i tulafaono o le lotoifale ia tamaiti aoga e tuua le aoga ae ō i le seminare i le taimi o a’oga. O le Fono Faatonu o A‘oga a le Ekalesia e faamaoniaina po o fea e faaaoga ai lenei ituaiga o seminare. Mo nisi faamatalaga e uiga i seminare i le taimi o a’oga, tagai i le Seminare i le Taimi o le A’oga i luga o le ChurchofJesusChrist.org.
15.2
Inisitituti
O le inisitituti e saunia ai vasega mo le suesueina o le talalelei i se aso o le vaiaso, lea e faamalosia ai le faatuatua ma molimau ia Iesu Keriso ma Lana talalelei toefuataiina. O talavou nofofua matutua uma ua ta’i 18–30 tausaga, e tatau ona faamalosiauina e auai i vasega inisitituti, pe o aooga pe leai foi.
E le o maua i le tele o eria ia vasega inisitituti e fai i lotoa o a’oga. I nei tulaga, e mafai e peresitene o siteki ona faavae ni vasega inisitituti e faia i le stieki. O taitai o le siteki ma le sui o le S&I e faamaopoopoa ia fetuunaiga.
O loo maua taiala faaopoopo mo le faavaeina ma le faagaoioiga o vasega inisitituti e faia i le siteki, fuafuaina o fale ma fanua, valaauina o faiaoga, ma le aloa’iaina o mea e ausia e tamaiti a’oga, i le Inisitituti a le Siteki i le ChurchofJesusChrist.org.
15.2.1
O Isi Vasega Faalelotu
Atonu e mananao au peresitene o siteki e faia vasega faalelotu mo tagata matutua ua ta’i 31 tausaga ma luga atu. O nei vasega e le o se galuega a le S&I ma e le faaigoaina o ni vasega inisitituti. Peitai, e mafai ona faaaoga anomea o mataupu a’oa’oina a le inisitituti mo ia vasega.
15.3
Aoga a le Ekalesia ma le Ofisa o Aoga a le Ekalesia
Mo faamatalaga e uiga i a’oga tulagalua ma a’oga maualuga a le Ekalesia, BYU–Pathway Worldwide, ma faalapotopotoga o a’oga maualuluga atu, tagai i le CES.ChurchofJesusChrist.org. O faamatalaga e uiga i faamaoniga a taitai faale-ekalesia ina ia auai ai taimaiti aoga i nei a’oga o loo maua atu ai foi iina.
Ma le isi, o faamatalaga e uiga i faamaoniga faalegaluega mai taitai faalelotu e ala i le Ofisa o le Faatagaga Faalelotu a le Ofisa o Aoga a le Ekalesia e mafai ona maua i le help.ChurchofJesusChrist.org.