“11. Young Women,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).
“11. Young Women,” Kinatibuk-ang Tamdanan nga Basahon.
Imahe
mga batan-ong babaye nga anaa sa gawas
11.
Young Women
11.1
Katuyoan ug Organisasyon
Ang organisasyon sa Young Women nagtabang sa mga anak sa Dios nga makaandam sa pagbalik ngadto sa Iyang presensya. Samtang sila maningkamot sa pagtuman sa ilang mga pakigsaad sa Dios, ang mga batan-ong babaye “sangkapan sa katar[o]ng ug uban sa gah[o]m sa Dios sa dako nga himaya” (1 Nephi 14:14).
11.1.1
Katuyoan
Ang organisasyon sa Young Women nagtabang sa mga batan-ong babaye sa paghimo ug pagtuman og sagrado nga mga pakigsaad ug pagpalig-on sa ilang pagkakabig ngadto ni Jesukristo ug sa Iyang ebanghelyo.
Ang katuyoan sa usa ka klase sa Young Women mao ang pagtabang sa mga batan-ong babaye nga magtambayayong sa pag-apil sa buhat sa Dios sa kaluwasan ug kahimayaan. Sa ilang mga klase, ang mga batan-ong babaye moserbisyo sa uban, motuman sa mga responsibilidad sa pakigsaad, mopalambo og panaghiusa, ug mokat-on ug mosunod sa doktrina.
11.1.2
Tema sa Young Women
Ang tema sa Young Women makatabang sa matag batan-ong babaye nga makasabot sa iyang balaang pagkatawo ug makabig ngadto ni Jesukristo. Ang mga batan-ong babaye ug ang ilang mga lider mosubli sa tema sa sinugdanan sa mga miting sa Dominggo ug sa ubang mga panagpundok sa Young Women. Ang tema mabasa sama sa mosunod:
“Ako usa ka hinigugmang anak nga babaye sa langitnong mga ginikanan, nga adunay diosnong kinaiya ug mahangturong padulngan.
“Isip usa ka disipulo ni Jesukristo, ako maningkamot nga mahimong sama Kaniya. “Ako magtinguha ug motuman sa personal nga pagpadayag ug mangalagad sa uban diha sa Iyang balaan nga ngalan.
“Ako mobarug ingon nga usa ka saksi sa Dios sa tanan nga mga panahon ug diha sa tanan nga mga butang ug diha sa tanan nga mga dapit.
“Samtang ako maningkamot aron mahimong angay sa kahimayaan, akong hatagan og bili ang gasa sa paghinulsol ug magtinguha nga molambo sa matag adlaw. Uban sa hugot nga pagtuo, akong lig-unon ang akong panimalay ug pamilya, mohimo ug motuman sa sagradong mga pakigsaad, ug modawat sa mga ordinansa ug mga panalangin sa balaan nga templo.”
Ang mga batan-ong babaye mahimong mga sakop sa usa ka klase sa Young Women sugod sa Enero sa tuig nga sila mag-edad og 12.
Ang mga klase sa mga batan-ong babaye i-organisar pinaagi sa mga grupo sa kaedad. Ang grupo sa kaedad mao ang tanang mga batan-ong babaye nga mag-edad sa samang pangidaron nianang tuiga. Ang usa ka klase mahimong maglakip og labaw sa usa ka grupo sa kaedad. Ang mga batan-ong babaye mouswag ngadto sa bag-ong klase sa Enero sa tuig nga sila mag-edad sama sa mga batan-ong babaye niana nga bag-ong klase.
Ang mga bishopric ug ang mga hamtong nga mga lider sa Young Women magmainampoong mohukom unsaon sa pag-organisar ang mga klase sumala sa edad. Sila mokonsiderar sa mga oportunidad sa pagpangulo alang sa mga batan-ong babaye. Ang matag klase, bisan unsa ang gidak-on, kinahanglang adunay presidente ug, kon posible, usa o duha ka mga magtatambag ug usa ka secretary. Sa mga yunit nga dunay igong mga batan-ong babaye, ang mga klase kinahanglang may igong gidak-on aron ang mga kapangulohan sa klase adunay mga sakop sa klase nga kaserbisyohan.
Imahe
klase sa mga batan-ong babaye
Ang mga klase pagatawgon sa makapahiusang ngalan nga “Young Women.” Kon ang usa ka ward adunay labaw sa usa ka klase, ang mga grupo sa ka edad gamiton sa pag-ila sa mga klase.
11.2
Pag-apil sa Buhat sa Dios sa Kaluwasan ug Kahimayaan
Ang Dios nagdapit sa tanan nga moduol ngadto ni Kristo ug moabag sa Iyang buhat pinaagi sa:
Pagsunod sa ebanghelyo ni Jesukristo.
Pag-atiman niadtong nanginahanglan.
Pagdapit sa tanan nga modawat sa ebanghelyo.
Paghiusa sa mga pamilya alang sa kahangtoran.
Ang mga kapangulohan sa klase, gisuportahan sa hamtong nga mga lider, magtinambagay kon unsaon pagtabang nga matuman kini nga buhat. Alang sa dugang nga impormasyon mahitungod sa buhat sa Dios sa kaluwasan ug kahimayaan, tun-i ang kapitulo 1.
11.2.1
Pagsunod sa Ebanghelyo ni Jesukristo
11.2.1.1
Mga Tahas sa mga Ginikanan ug sa mga Lider
Ang mga ginikanan mao ang responsable sa pagtudlo sa ilang mga anak sa ebanghelyo ug pagtabang nila nga mosunod niini (tan-awa sa Doktrina ug mga Pakigsaad 68:25–28). Ang bishopric, ang mga lider sa Young Women, ug ang mga kapangulohan sa klase mosuporta sa mga ginikanan niini nga responsibilidad sumala sa mosunod:
Moawhag og komunikasyon tali sa mga batan-ong babaye ug sa ilang mga pamilya.
Moseguro nga ang mga kalihokan sa kabatan-onan mosuporta ug mopanalangin sa mga pamilya.
Motabang sa mga ginikanan sa pag-andam sa ilang mga anak nga babaye alang sa tuga sa templo, full-time nga misyonaryo nga pagserbisyo (kon gusto ang mga batan-ong babaye), kaminyoon sa templo, ug pagkainahan.
Ang mga lider kinahanglan nga sensitibo ngadto sa kabatan-onan nga kulang og suporta sa pamilya sa pagsunod sa ebanghelyo.
Ang mga ginikanan ug mga lider maningkamot nga mahimong maayong mga ehemplo ngadto sa kabatan-onan. Sila motudlo sa kabatan-onan sa ilang mga paningkamot nga mahimong mas sama ni Jesukristo. Ang programa sa Kabataan ug Kabatan-onan makatabang niini nga mga paningkamot (tan-awa sa ChildrenandYouth.ChurchofJesusChrist.org).
11.2.1.2
Pagkat-on sa Ebanghelyo
Ang mga lider sa Young Women ug ang mga kapangulohan sa klase moawhag sa mga batan-ong babaye ug sa ilang mga pamilya nga magkat-on sa ebanghelyo diha sa panimalay. Ang mga lider magtuon sa ebanghelyo ug mopaambit sa mga batan-ong babaye sa unsay ilang nakat-unan. Sila modapit sa mga sakop sa klase nga mopaambit diha sa simbahan sa unsay ilang nakat-unan diha sa panimalay.
Ang mga klase sa Young Women magmiting sa mga Dominggo aron sa paglig-on sa hugot nga pagtuo, pagpalambo sa panaghiusa, paglig-on sa mga pamilya ug mga panimalay, ug paghimo og mga plano sa pag-apil sa buhat sa Dios sa kaluwasan ug kahimayaan. Ang mga kapangulohan sa klase, gisuportahan sa hamtong nga mga lider, magplano sa mga miting sa Dominggo.
Ang mga miting sa klase pagahimoon sa ikaduha ug ikaupat nga mga Dominggo sa bulan. Kini molungtad og 50 ka minuto. Ang mga miting sugdan sa pag-ampo. Usa ka sakop sa kapangulohan sa klase ang mopahigayon. Siya mangulo sa klase sa pag-recite sa tema ug pagtinambagay mahitungod sa mga buluhaton ug sa ubang mga butang.
Dayon ang usa ka sakop sa klase o hamtong nga lider mangulo dayon sa instruksiyon sa ebanghelyo. Ang mga kapangulohan sa klase magpakitambag sa hamtong nga mga lider mahitungod kon kinsa ang motudlo. Ang mga plano sa miting makita diha sa Dali, Sunod Kanako—Alang sa mga Korum sa Aaronic nga Pagkapari ug sa mga Klase sa Young Women (tan-awa sa ComeFollowMe.ChurchofJesusChrist.org). Ang mga miting kinahanglan nga taposon uban sa usa ka pag-ampo.
Kon ang usa ka ward adunay labaw sa usa ka klase sa Young Women, sila magbulag sa pagklase. Hinoon, sila mahimong magpundok kon adunay espesyal nga panginahanglan. Ang mga batan-ong babaye ug mga batan-ong lalaki mahimong magtipon panagsa alang sa leksiyon sa Dominggo, kon gisabotan sa bishopric ug sa kapanguloan sa Young Women.
Ang mga batan-ong babaye giawhag sa pag-apil sa seminary (tan-awa sa 15.1).
11.2.1.3
Serbisyo ug mga Kalihokan
Ang mga kapangulohan sa klase, nga gisuportahan sa hamtong nga mga lider, magplano og serbisyo ug mga kalihokan. Kini makatabang sa pagtuman sa buhat sa Dios sa kaluwasan ug kahimayaan. Ang serbisyo ug mga kalihokan kinahanglan nga mopalambo og mga pagpamatuod, molig-on og mga pamilya, mopasiugda og panaghiusa sa klase, ug mohatag og mga oportunidad sa pagpanalangin sa uban. Kinahanglan kini nga mabalanse sa upat ka bahin sa personal nga kauswagan: espirituwal, sosyal, pisikal, ug intelektuwal.
Kadaghanan sa mga kalihokan sa kabatan-onan pagahimoon sa mga panahon nga dili Dominggo o kagabhion sa Lunes. Kini sa kasagaran pagahimoon matag semana. Sa ubang mga dapit, ang gilay-on, pagkaluwas, o ubang mga hinungdan makahimo sa sinemana nga mga kalihokan nga dili praktikal. Niini nga mga dapit, ang mga kalihokan mahimong dili himoon kanunay, apan kini sa kinatibuk-an pagahimoon dili mominos matag bulan. Ang mga kalihokan mahimong planohon sa Sample Service and Activity Planner, nga anaa sa ChurchofJesusChrist.org.
Ang pipila ka serbisyo ug mga kalihokan kinahanglang maglakip sa mga batan-ong lalaki ug mga batan-ong babaye, ilabi na sa mas taas og edad nga kabatan-onan.
Ang kabatan-onan makabenepisyo gikan sa pagpakig-uban diha sa mas dagko nga mga grupo. Ang kabatan-onan sa duha o daghan pa nga mga ward mahimong magkauban panagsa alang sa serbisyo ug mga kalihokan. Ang mga stake o mga district mahimong magplano panagsa og serbisyo ug mga kalihokan alang sa kabatan-onan (tan-awa sa 20.3.2).
Ang hamtong nga mga lider motabang sa pagseguro nga ang mga kalihokan luwas (tan-awa sa safety.ChurchofJesusChrist.org; tan-awa usab sa 20.7 niini nga tamdanan nga basahon). Dili mominos duha ka responsable nga hamtong nga mga lider kinahanglan nga anaa sa tanang mga kalihokan (tan-awa sa 11.6.1).
Alang sa dugang nga impormasyon, tan-awa sa YoungWomen.ChurchofJesusChrist.org. Tan-awa usab sa JustServe.org kon diin kini anaa. Kini nga mga kapanguhaan maghatag og mga ideya sa serbisyo ug kalihokan.
Tinuig nga mga Kalihokan. Agi’g dugang sa regular nga mga kalihokan sa kabatan-onan, ang mga batan-ong babaye mahimong moapil sa mosunod matag tuig:
Usa ka miting alang sa kabatan-onan ug sa ilang mga ginikanan duol sa sinugdanan sa tuig. Kini mahimong himoon alang sa mga batan-ong lalaki ug mga batan-ong babaye nga magbulag o magtipon. Kini usab mahimong himoon sa ward o sa stake nga level. Kini planohon ug pangulohan sa mga kaabag sa bishop diha sa korum sa mga priest ug sa kapangulohan sa pinakataas og edad nga klase sa Young Women. Ang mga batan-ong babaye nga mag-edad na og 12 nianang tuiga mahimong makadawat sa ilang mga simbolo sa pagkasakop niini nga miting (tan-awa sa 11.6.3). Alang sa dugang nga impormasyon, tan-awa sa ChildrenandYouth.ChurchofJesusChrist.org.
Usa ka kamping sa Young Women (tan-awa sa Young Women Camp Guide). Ang mga batan-ong babaye mahimong moapil sa dugang nga tibuok gabii nga mga kamping, ug mga kalihokan sa tibuok tuig, kon mahimo.
Usa ka komperensiya sa kabatan-onan sa ward o stake o komperensiya sa Alang sa Kalig-on sa mga Kabatan-onan (AKK). Alang sa impormasyon mahitungod AKK nga mga komperensiya, tan-awa sa FSY.ChurchofJesusChrist.org. Alang sa impormasyon mahitungod sa ward ug stake nga AKK nga mga calling ug mga responsibilidad, tan-awa sa FSYLeader.ChurchofJesusChrist.org (alang sa U.S. ug Canada) o ang FSY Planning Guide (alang sa tanang ubang dapit).
Dili mominos sa usa ka kalihokan nga naghatag og gibug-aton sa mga sumbanan sa Alang sa Kalig-on sa mga Kabatan-onan [AKK]. Kini nga kalihokan mahimong maglakip sa mga batan-ong lalaki ug mga batan-ong babaye. Ang mga ginikanan mahimo usab nga dapiton.
Mga Kinahanglanon sa Edad. Uban sa pagtugot sa ilang mga ginikanan, ang mga batan-ong babaye motambong og tibuok gabii nga mga kamping sa Young Women sugod sa Enero sa tuig nga sila mag-edad og 12. Sila mahimong motambong og mga sayaw, mga komperensya sa kabatan-onan, ug mga komperensya sa FSY sugod sa Enero sa tuig nga sila mag-edad og 14.
Pagbayad alang sa mga Kalihokan. Ang mga kalihokan, lakip na ang mga suplay, pagabayran gikan sa badyet sa ward. Ang pagbiyahe ug mga galastohan kinahanglan dili kaayo dako.
Isip usa ka eksepsiyon, kon ang badyet sa ward dili paigo nga ibayad alang sa mga kalihokan sa daghang mga adlaw, sama sa mga kamping, ang mga lider mahimong mohangyo sa mga partisipante nga motabang sa pagbayad niini. Bisan pa niana, ang usa ka batan-ong babaye kinahanglan dili pugngan sa pag-apil kon siya dili makatabang sa pagbayad. Kon magkinahanglan gihapon og dugang nga kwarta, ang bishop mahimong motugot og usa ka kalihokan aron makakolekta og pundo matag tuig (tan-awa sa 20.6.5).
Ang bishopric moseguro nga ang badyet ug ang mga kalihokan alang sa mga batan-ong babaye ug mga batan-ong lalaki igo ug resonable. Ang badyet alang sa mga batan-ong babaye gibase sa gidaghanon sa mga batan-ong babaye diha sa ward. Ang badyet alang sa mga korum sa Aaronic nga Pagkapari gibase sa gidaghanon sa mga batan-ong lalaki diha sa ward.
Imahe
mga batan-on nga babaye nagsinabligay og tubig
Tan-awa sa FSY.ChurchofJesusChrist.org alang sa kasayuran mahitungod sa paggahin og pundo alang sa mga komperensiya sa FSY.
11.2.1.4
Personal nga Kalamboan
Sa ilang mga paningkamot nga mahimong mas sama sa Manluluwas, ang kabatan-onan gidapit sa paghimo og mga tumong aron motubo sa espirituwal, sa sosyal, sa pisikal, ug sa intelektuwal nga paagi (tan-awa diha sa Lucas 2:52). Ang kabatan-onan magtinguha og inspirasyon aron madiskobrehan unsay ilang kinahanglan nga trabahoon. Uban sa tabang gikan sa mga ginikanan, sila mohimo og mga plano, mobuhat sa ilang mga plano, ug mamalandong unsay ilang nakat-onan. Ang mga lider motanyag usab og suporta kon gikinahanglan. Bisan pa niana, sila kinahanglang dili mosubay sa mga tumong o kauswagan sa mga batan-ong babaye. Ang mga ginikanan ug mga lider mahimong mosugyot og mga tumong, apan sila motugot sa kabatan-onan sa pagpangita sa ilang kaugalingong inspirasyon mahitungod kon unsa nga mga tumong ang sundon.
Giawhag ang kabatan-onan sa pagkompleto og dili mominos sa duha ka tumong sa matag usa sa upat ka bahin kada tuig. Sila makagamit sa Personal nga Kalamboan: Giya nga Basahon sa Kabatan-onan o sa Gospel Living nga app sa paghimo ug pagrekord sa mga tumong.
Ang mga batan-ong babaye kinahanglang adunay regular nga mga oportunidad sa pagserbisyo sa uban diha ug kuyog sa ilang mga pamilya, atol sa mga kalihokan sa kabatan-onan, ug sa ilang kaugalingon. Ang mga ideya sa pagserbisyo anaa sa ChildrenandYouth.ChurchofJesusChrist.org. Kon anaa, ang JustServe.org nagsugyot og mga oportunidad sa pagserbisyo diha sa komunidad.
11.2.2.1
Pagpangalagad
Ang pagpangalagad mao ang pag-atiman sa uban sama sa buhaton sa Manluluwas. Ang mga batan-ong babaye modawat sa mga buluhaton sa pagpangalagad sugod sa Enero sa tuig nga sila mag-edad og 14. Alang sa dugang nga impormasyon, tan-awa sa kapitulo 21.
11.2.3
Pagdapit sa Tanan nga Modawat sa Ebanghelyo
Ang mga batan-ong babaye modapit sa tanan nga modawat sa ebanghelyo samtang sila “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Ang pipila ka paagi nga kini ilang mahimo gilista sa ubos:
Magpakita og maayong ehemplo isip mga disipulo ni Jesukristo.
Mopakigbahin sa ilang mga pagpamatuod ngadto sa mga higala ug mga sakop sa pamilya.
Mangalagad sa dili kaayo aktibo nga mga sakop sa ilang mga klase.
Modapit sa mga higala nga motambong sa simbahan o sa mga kalihokan sa kabatan-onan.
Modapit sa mga higala nga moapil sa programa sa Kabataan ug Kabatan-onan. Ang mga lider makigtambayayong pag-ayo sa mga ginikanan niini nga kabatan-onan aron sa pagtabang nila nga makasabot sa programa ug motino kon sa unsang paagi sila ug ang ilang mga anak makaapil.
Modapit sa mga higala nga magpatudlo sa mga misyonaryo.
Ang mga ginikanan ug ang mga lider moawhag sa mga batan-ong babaye sa pag-andam sa pagpakigbahin sa ebanghelyo sa ilang tibuok kinabuhi. Ang pipila ka paagi nga kini ilang mahimo gilista sa ubos:
Moawhag sa mga batan-ong babaye nga moangkon og personal nga pagpamatuod sa plano sa kalipay sa Langitnong Amahan, sa Pag-ula ni Jesukristo, ug sa pagpahiuli sa Iyang ebanghelyo.
Mohatag og mga oportunidad sa pagserbisyo diha sa Simbahan.
Mohatag og mga oportunidad sa pagtudlo sa ebanghelyo diha sa mga miting sa klase ug sa ubang mga sitwasyon.
Kon ang mga batan-ong babaye magtinguha nga moserbisyo og full-time nga mga misyon, ang mga ginikanan ug mga lider motabang nila sa pagpangandam. Kini naglakip sa pagtudlo kanila mahitungod sa mga panalangin ug mga gilauman sa full-time nga misyonaryo nga buhat.
Isip kabahin niini nga pagpangandam, ang bishopric o ang kapangulohan sa stake mahimong mo-organisar og klase sa pagpangandam alang sa misyonaryo. Ang nag-unang mga kapanguhaan alang niini nga klase mao ang mga kasulatan, Mga Sumbanan sa Misyonaryo alang sa mga Disipulo ni Jesukristo, ug ang Isangyaw ang Akong Ebanghelyo. Kini nga klase dili himoon sa regular nga mga miting sa Dominggo.
Ang Missionary.ChurchofJesusChrist.org naghatag og dugang nga mga kapanguhaan nga makatabang sa mga batan-ong babaye kinsa nagtinguha sa pagpangandam nga moserbisyo og misyon. Tan-awa sa mga kapitulo 23 ug 24 alang sa dugang nga impormasyon.
11.2.4
Paghiusa sa mga Pamilya alang sa Kahangtoran
Ang mga batan-ong babaye makatabang sa paghiusa sa mga pamilya alang sa kahangtoran sa daghang mga paagi. Ang pipila niini ka paagi gilista sa ubos:
Pagtahod sa ilang mga ginikanan ug pagpakita og ehemplo sa Kristohanong pagpuyo diha sa ilang panimalay.
Pagpangandam sa pagbaton og ilang kaugalingong mahangtorong pamilya.
Adunay balido nga rekomend sa templo.
Pagpangandam sa pagdawat sa mga ordinansa sa templo, lakip sa mahangturong kaminyoon.
Pagserbisyo isip mga consultant sa templo ug family history, kon tawagon sa bishopric (tan-awa sa 25.2.4).
11.3
Pagpangulo sa Young Women sa Ward
11.3.1
Bishopric
Ang labing importante nga responsibilidad sa bishop mao ang pag-atiman sa mga batan-ong babaye ug mga batan-ong lalaki sa iyang ward. Siya ug ang iyang mga magtatambag moila sa ilang mga ngalan ug mosabot sa mga sirkumstansiya sa ilang panimalay. Sila makighimamat sa matag batan-ong babaye sa dili mominos kaduha sa usa ka tuig (tan-awa sa 31.3.1).
Ang bishop adunay responsibilidad sa organisasyon sa Young Women sa ward. Siya makigmiting kanunay sa presidente sa Young Women. Siya mo-report kabahin sa Young Women diha sa mga miting uban sa bishopric.
Ang bishop ug ang iyang mga magtatambag kanunay nga moapil sa mga miting, serbisyo, ug mga kalihokan sa Young Women. Kon adunay daghang mga klase sa Young Women, ang bishop mahimong mosangun sa iyang kaugalingon ug sa iyang mga magtatambag sa pagtabang sa piho nga mga klase.
11.3.2
Hamtong nga Kapangulohan sa Young Women
Ang bishop motawag ug mo-set apart og hamtong nga babaye nga moserbisyo isip presidente sa Young Women sa ward. Kon ang yunit may igong gidak-on, siya morekomendar og usa o duha ka hamtong nga babaye nga tawagon isip iyang mga magtatambag (tan-awa sa kapitulo 30). Ang bishopric mokonsiderar sa iyang mga rekomendasyon ug mohatag sa mga calling.
Sa usa ka gamay nga yunit, ang presidente sa Young Women mahimo nga mao lamang ang gitawag nga hamtong nga lider sa organisasyon sa Young Women. Niini nga sitwasyon, siya makigtambayayong sa mga ginikanan sa pag-organisar og instruksiyon ug mga kalihokan alang sa mga batan-ong babaye. Siya usab moseguro nga dili mominos sa duha ka responsable nga hamtong ang anaa sa tanang mga miting ug mga kalihokan. Kon posible, ang mga magtatambag ug secretary kinahanglan nga matawag.
Kon ang usa ka branch walay presidente sa Young Women, ang presidente sa Relief Society mahimong mo-organisar og instruksiyon alang sa mga batan-ong babaye hangtod matawag ang presidente sa Young Women.
Imahe
babaye ug batan-ong babaye nag-istorya
Ang presidente sa Young Women aduna sa mosunod nga mga responsibilidad. Ang iyang mga magtatambag moabag kaniya.
Moserbisyo diha sa konseho sa ward. Siya moserbisyo isip (1) usa ka sakop sa konseho sa ward kinsa motabang sa pagtubag sa mga panginahanglan sa ward ug mangita og mga kasulbaran ug (2) usa ka representante sa Young Women (tan-awa sa 29.2.5).
Moserbisyo isip sakop sa konseho sa kabatan-onan sa ward (tan-awa sa 29.2.6).
Mangalagad ngadto sa indibidwal nga mga batan-ong babaye.
Mosumiter og mga rekomendasyon ngadto sa bishopric alang sa mga sister nga moserbisyo diha sa Young Women.
Motudlo sa ubang mga lider ug mga kapangulohan sa klase sa Young Women sa ilang mga responsibilidad.
Makigtambag sa mga batan-ong babaye mahitungod sa mga hagit nga wala magkinahanglan sa bishop o naglambigit og abuso (tan-awa sa 32.3, 31.3.1, ug 38.6.2).
Motudlo sa mga kapangulohan sa klase sa ilang mga responsibilidad sa pagpangulo. Ang matag klase tabangan ug dumalahon sa usa ka piho nga sakop sa kapangulohan sa Young Women.
Mosuporta sa mga batan-ong babaye kinsa nagserbisyo isip mga kompanyon ngadto sa hamtong nga mga igsoong babaye sa pagpangalagad (tan-awa sa 21.2.2).
Kanunay nga mopahigayon og mga miting sa kapangulohan sa Young Women ug makigmiting sa bishop.
Modumala sa mga rekord, mga report, badyet, ug mga panalapi sa organisasyon sa Young Women.
Kon ang yunit may igong gidak-on, ang presidente sa Young Women morekomendar ngadto sa bishop og hamtong nga sister nga moserbisyo isip secretary sa Young Women. Siya mahimong aduna sa mosunod nga mga responsibilidad:
Motabang sa kapangulohan sa Young Women sa pag-andam sa mga agenda alang sa mga miting sa kapangulohan. Siya motambong niini nga mga miting, mosulat sa gihisgotan, ug mosubay sa mga buluhaton.
Motudlo sa mga secretary sa klase ug motabang nila sa pagtipig og mga rekord sa nanambong.
Gamit ang LCR, makigtinabangay sa secretary sa Relief Society sa pagtipig og mga rekord sa nanambong alang sa hamtong nga mga sister nga nagserbisyo sa Young Women.
Motabang sa kapangulohan sa Young Women sa pag-andam og badyet ug pagsubay sa mga nagasto.
11.3.4
Kapangulohan ug Secretary sa Klase
11.3.4.1
Pagtawag, Pagpaluyo, ug Pag-set Apart
Matag klase sa Young Women kinahanglang adunay kapangulohan sa klase. Ang kapangulohan sa Young Women mahimong morekomendar og mga batan-ong babaye nga moserbisyo isip mga presidente sa klase. Ang mga sakop sa bishopric mainampoong magtinambagay aron sa pagtino kinsa ang tawagon.
Ang usa ka sakop sa bishopric motawag og usa ka batan-ong babaye nga moserbisyo isip usa ka presidente sa klase. Kon adunay igong mga batan-ong babaye nga moserbisyo, siya mainampoong mokonsiderar og mga sakop sa klase nga irekomendar isip mga magtatambag ug secretary. Ang bishopric mokonsiderar sa iyang mga rekomendasyon ug mohatag sa mga calling.
Sa dili pa mohangyo sa usa ka batan-ong babaye nga moserbisyo sa bisan hain niini nga mga calling, ang sakop sa bishopric mangayo og pagtugot gikan sa mga ginikanan sa batan-ong babaye.
Human sa paghatag niini nga mga calling, ang usa ka sakop sa bishopric mopresentar sa mga batan-ong babaye ngadto sa ilang klase alang sa pagpaluyo. Ang bishop o ang gisangonan nga magtatambag mo-set apart sa mga batan-ong babaye.
Ang usa ka sakop sa bishopric mopahibalo niini nga mga calling diha sa panagtigom alang sa sakramento. Siya dili mopresentar nila aron paluyohan.
Ang mga presidente sa klase moserbisyo sa konseho sa kabatan-onan sa ward (tan-awa sa 11.3.4.4). Ang mga kapangulohan sa klase usab aduna sa mosunod nga mga responsibilidad:
Mogiya sa mga paningkamot sa klase sa pag-apil sa buhat sa Dios sa kaluwasan ug kahimayaan (tan-awa sa kapitulo 1).
Moila-ila ug moserbisyo sa matag batan-ong babaye, lakip niadtong wala magtambongan og mga miting alang sa klase. Makahibalo sa ilang mga panginahanglan ug mga sirkumstansiya.
Pag-apil diha sa mga paningkamot sa ward sa pagpaambit sa ebanghelyo ug pagpalig-on sa bag-o ug mibalik nga mga miyembro. Usa ka sakop sa kapangulohan sa labing edaran nga klase sa Young Women ang motambong sa pakigkoordinasyon nga mga miting (tan-awa sa 23.5.7).
Moapil sa buhat sa ward diha sa templo ug sa family history nga mga paningkamot. Usa ka sakop sa kapangulohan sa labing edaran nga klase sa Young Women ang motambong sa pakigkoordinasyon nga mga miting (tan-awa sa 25.2.7).
Magplano ug mopahigayon sa mga miting sa klase sa Dominggo (tan-awa sa 11.2.1.2).
Magplano ug mopatuman sa serbisyo ug mga kalihokan sa klase (tan-awa sa 11.2.1.3).
Kanunay nga mopahigayon og mga miting sa kapangulohan sa klase (tan-awa sa 11.3.4.3).
Kon ang mga secretary sa klase tawagon, sila moandam sa mga agenda alang sa mga miting, mosulat sa gihisgotan, ug mosubay sa nanambong.
Ang mga sakop sa kapangulohan sa Young Women regular nga motudlo sa mga kapangulohan sa klase kabahin sa ilang mga responsibilidad (tan-awa sa 11.3.2). Ang mga tigtambag ug mga espesyalista sa klase kinahanglang aktibo nga motabang (tan-awa sa 11.3.5 ug 11.3.6).
11.3.4.3
Miting sa Kapangulohan sa Klase
Ang mga kapangulohan sa klase sa Young Women magmiting kanunay. Ang presidente sa klase mopahigayon niini nga mga miting. Ang hamtong nga mga lider sa Young Women nga gisangunan sa pagsuporta sa kapangulohan sa klase motambong usab. Atol niini nga mga miting, ang mga lider magtinambagay ug magtinguha og pagpadayag mahitungod sa kabubut-on sa Ginoo alang sa ilang klase. Ang agenda maglakip sa panaghisgotan sa mosunod nga mga butang:
Pagtabang nga matuman ang buhat sa Dios sa kaluwasan ug kahimayaan
Pagserbisyo sa mga sakop sa klase, uban ang espesyal nga pagtagad sa pagsuporta sa bag-ong mga miyembro ug sa pagluwas sa dili kaayo aktibo nga mga miyembro
Pagtabang niadtong anaa sa laing mga relihiyon ug mga tinuohan
Pagplano og mga panagtigom alang sa klase, serbisyo, ug mga kalihokan
Instruksiyon sa pagpangulo gikan sa hamtong nga mga lider sa Young Women o sa usa ka sakop sa kapangulohan sa klase
Ang katuyoan sa konseho sa kabatan-onan sa ward mao ang pagtabang sa kabatan-onan sa pagdala sa uban ngadto ni Jesukristo ug sa pagtabang nga matuman ang buhat sa Dios sa kaluwasan ug kahimayaan.
Ang bishop modumala sa konseho sa kabatan-onan sa ward. Ang mga sakop niini nga konseho naglakip sa:
Ang bishopric.
Usa sa mga kaabag sa bishop diha sa korum sa mga priest, ang presidente sa korum sa mga teacher, ug ang presidente sa korum sa mga deacon.
Mga presidente sa klase sa Young Women (o sa tibuok kapangulohan sa klase kon ang ward adunay usa lamang ka klase sa Young Women).
Ang presidente sa Young Women.
Ang konseho sa kabatan-onan sa ward maghisgot og mga pamaagi nga matabangan ang uban nga molambo ang mga pagpamatuod, modawat sa makaluwas nga mga ordinansa, motuman sa mga pakigsaad, ug mahimong mapahinungurong mga sumusunod ni Jesukristo (tan-awa sa Moroni 6:4–5). Sila magtinambagay mahitungod sa mga panginahanglan sa mga batan-ong babaye ug sa mga batan-ong lalaki sa ward. Sila mahimong maghisgot og mga kalihokan aron matubag kini nga mga panginahanglan. Hinoon, ang detalyado nga pagplano sa mga kalihokan kinahanglang mahitabo diha sa mga miting sa korum o sa kapangulohan sa klase.
Tan-awa sa 29.2.6 alang sa dugang nga impormasyon mahitungod sa konseho sa kabatan-onan sa ward.
Ang kapangulohan sa Young Women mahimong morekomendar nga ang bishopric motawag og mga tigtambag sa Young Women. Ang matag tigtambag maglihok uban sa usa ka piho nga grupo nga kaedad sa mga batan-ong babaye.
Ang mga tigtambag aduna sa mosunod nga mga responsibilidad:
Motabang sa kapangulohan sa Young Women sa ilang mga responsibilidad.
Mosuporta ug mogiya sa mga kapangulohan sa klase samtang sila magkat-on ug mohimo sa ilang mga responsibilidad.
Motudlo sa mga leksyon sa Dominggo kon gikinahanglan. Motabang sa mga batan-ong babaye kinsa gidapit sa pagtudlo og leksyon nga makaandam ug makatudlo sa epektibong paagi.
Motambong sa mga kalihokan sa klase.
Motambong sa mga miting sa kapangulohan sa Young Women sa ward kon gidapit.
Dili mominos duha ka responsable nga hamtong nga mga babaye ang kinahanglang anaa sa matag miting ug kalihokan sa klase. Ang mga tigtambag kinahanglang mokompleto sa pagbansay sa ProtectingChildren.ChurchofJesusChrist.org (tan-awa sa 11.6.1).
Diin gikinahanglan, ang kapangulohan sa Young Women mahimong morekomendar nga ang bishopric motawag og mga espesyalista sa pagtabang sa usa ka piho nga kalihokan, sama sa kamping, usa ka komperensiya sa kabatan-onan, o paugnat sa kusog.
Ang tanang espesyalista moserbisyo ubos sa direksyon sa kapangulohan sa Young Women sa ward.
Pagtabang sa Young Women nga Makaandam sa Pag-apil sa Relief Society
Ang usa ka batan-ong babaye mahimong moapil sa Relief Society kon siya mag-edad na og 18. Sa edad nga 19, ang matag batan-ong babaye kinahanglan nga hingpit nang nakaapil sa Relief Society. Sa pipila ka sitwasyon, ang usa ka batan-ong babaye mosulod sa Relief Society nga mas sayo kay sa iyang ika-18 nga adlaw nga natawhan. Ang matag batan-ong babaye magpatambag sa iyang mga ginikanan ug sa bishop sa paghukom unsay labing maayong makatabang kaniya nga magpadayon sa pagpalig-on sa iyang hugot nga pagtuo kang Jesukristo.
Ang mga ginikanan ug ang mga lider sa Young Women ug Relief Society magtambayayong sa pagtabang sa matag batan-ong babaye nga malampusong mouswag ngadto sa Relief Society. Kini nga mga lider mohatag sa nagpadayon nga mga oportunidad alang sa mga batan-ong babaye ug sa mga igsoong babaye sa Relief Society sa paghimo og mga koneksyon ug pagpalambo og mga relasyon.
Ang usa ka sakop sa kapangulohan sa stake motawag og usa ka hamtong nga babaye nga moserbisyo isip presidente sa Young Women sa stake. Kon ang usa ka stake may igong gidak-on, siya morekomendar og usa o duha ka hamtong nga mga babaye nga moserbisyo isip mga magtatambag ug ang laing usa nga moserbisyo isip secretary. Kini nga mga babaye tawagon ug i-set apart sa usa ka sakop sa kapangulohan sa stake o sa gisangonan nga high councilor. Alang sa impormasyon mahitungod sa mga responsibilidad sa kapangulohan ug secretary sa Young Women sa stake, tan-awa sa 6.7.1, 6.7.1.2, ug 6.7.3.
Ang usa ka magtatambag sa kapangulohan sa stake adunay responsibilidad alang sa organisasyon sa Young Women diha sa stake. Siya usab adunay responsibilidad alang sa buhat sa kapangulohan sa Young Women sa stake. Siya usab motudlo sa mga bishop sa ilang mga responsibilidad alang sa mga batan-ong babaye.
Ang kapangulohan sa stake mosangon sa usa ka high councilor nga makigtambayayong sa kapangulohan sa Young Women sa stake (tan-awa sa 6.5).
Ang kapangulohan ug secretary sa Young Women sa stake moserbisyo sa komitiba sa pagpangulo sa kabatan-onan diha sa stake (tan-awa sa 29.3.10).
Imahe
mga batan-ong babaye diha sa klase
11.6
Dugang nga mga Lagda ug mga Palisiya
11.6.1
Pagpanalipod sa Kabatan-onan
Kon ang mga hamtong adunay mga pakig-inter-aksiyon sa kabatan-onan diha sa Simbahan, dili mominos sa duha ka responsable nga hamtong ang kinahanglan nga anaa. Tingali gikinahanglan nga tipunon ang mga klase sa paghimo niini nga posible.
Ang tanang hamtong nga naglihok uban sa kabatan-onan kinahanglang mokompleto sa pagbansay sa pagpanalipod sa kabataan ug kabatan-onan sulod sa usa ka bulan human mapaluyohi (ProtectingChildren.ChurchofJesusChrist.org). Sila mosubli sa pagbansay matag tulo ka tuig human niana.
Alang sa impormasyon mahitungod kon sa unsa nga paagi nga kining mga lagda magamit sa tigpangalagad nga mga kompanyon, tan-awa sa 21.2.2.
11.6.2
Mga Batan-ong Babaye nga adunay mga Kakulangan
Ang mga kapangulohan sa klase mohatag og espesyal nga pag-atiman ngadto sa mga batan-ong babaye kinsa adunay mga kakulangan. Alang sa impormasyon mahitungod sa pagtabang niining mga batan-ong babaye, tan-awa sa disability.ChurchofJesusChrist.org; tan-awa usab sa 38.8.27 niini nga tamdanan nga basahon.
11.6.3
Mga Simbolo sa Kabataan ug Kabatan-onan
Ang mga batan-ong babaye modawat og mga simbolo isip kabahin sa programa sa Kabataan ug Kabatan-onan. Ang matag batan-ong babaye kinahanglang makadawat sa simbolo sa pagkasakop gikan sa iyang kapangulohan sa klase kon siya mahimo nang sakop sa Young Women. Siya usab makadawat og kopya sa Personal nga Kalamboan: Giya nga Basahon sa Kabatan-onan. Kini mahimo kon ang kapangulohan sa klase ug ang hamtong nga mga lider sa Young Women makigkita kaniya aron sa pag-abi-abi kaniya ngadto sa Young Women. Kini usab mahimo diha sa usa ka tinuig nga miting alang sa kabatan-onan ug sa ilang mga ginikanan (tan-awa sa 11.2.1.3).
Sa Enero sa tuig nga ang usa ka batan-ong babaye mag-edad na og 18, siya makadawat og dugang nga simbolo sa pagkasakop.
Ang mga batan-ong babaye mahimong makaangkon og usa ka simbolo sa kalampusan pinaagi sa pagpaningkamot nga mahimong mas sama sa Manluluwas.