“11. ຍິງໜຸ່ມ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“11. ຍິງໜຸ່ມ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
11.
ຍິງໜຸ່ມ
11.1
ຈຸດປະສົງ ແລະ ອົງການ
11.1.1
ຈຸດປະສົງ
ອົງການຍິງໜຸ່ມຊ່ວຍໃຫ້ຍິງໜຸ່ມເຮັດ ແລະ ຮັກສາພັນທະສັນຍາ ແລະ ປ່ຽນໃຈເຫລື້ອມໃສຢ່າງເລິກເຊິ່ງຕໍ່ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ.
11.1.2
ຄຳຂວັນຂອງກຸ່ມຍິງໜຸ່ມ
“ເຮົາເປັນທິດາທີ່ຮັກຫອມຂອງພຣະບິດາມານດາເທິງສະຫວັນ, ພ້ອມດ້ວຍທຳມະຊາດແຫ່ງສະຫວັນ ແລະ ມີຈຸດໝາຍປາຍທາງນິລັນດອນ.
“ໃນຖານະສານຸສິດຂອງພຣະເຢຊູຄຣິດ, ເຮົາພະຍາຍາມກາຍເປັນເໝືອນດັ່ງພຣະອົງ. ເຮົາສະແຫວງຫາ ແລະ ກະທຳຕາມການເປີດເຜີຍສ່ວນຕົວ ແລະ ປະຕິບັດສາດສະໜາກິດຕໍ່ຄົນອື່ນ ໃນພຣະນາມອັນສັກສິດຂອງພຣະອົງ.
“ເຮົາຈະຢືນເປັນພະຍານຂອງພຣະເຈົ້າ ໃນທຸກເວລາ ແລະ ໃນທຸກສິ່ງ ແລະ ໃນທຸກບ່ອນ.
“ຂະນະທີ່ເຮົາພະຍາຍາມໃຫ້ເໝາະສົມຕໍ່ຄວາມສູງສົ່ງ, ເຮົາຈະທະນຸຖະໜອມຂອງປະທານແຫ່ງການກັບໃຈ ແລະ ສະແຫວງຫາທີ່ຈະພັດທະນາຕົວເອງໃນແຕ່ລະວັນ. ດ້ວຍສັດທາ, ເຮົາຈະເພີ່ມຄວາມເຂັ້ມແຂງໃຫ້ແກ່ບ້ານເຮືອນ ແລະ ຄອບຄົວຂອງເຮົາ, ເຮັດ ແລະ ຮັກສາພັນທະສັນຍາທີ່ສັກສິດ, ແລະ ຮັບເອົາພິທີການ ແລະ ພອນຂອງພຣະວິຫານທີ່ສັກສິດ.”
11.1.3
ຫ້ອງຮຽນ
ຍິງໜຸ່ມກາຍເປັນສະມາຊິກຂອງຫ້ອງຮຽນຍິງໜຸ່ມເລີ່ມຕົ້ນໃນເດືອນມັງກອນຂອງປີທີ່ພວກເຂົາອາຍຸຄົບ 12 ປີ.
ຝ່າຍອະທິການ ແລະ ຜູ້ນຳຍິງໜຸ່ມທີ່ເປັນຜູ້ໃຫຍ່ຕັດສິນໃຈດ້ວຍການອະທິຖານວ່າ ຈະຈັດຫ້ອງຮຽນອີງຕາມອາຍຸແນວໃດ. ແຕ່ລະຫ້ອງ, ອີງຕາມຂະໜາດ, ຄວນມີປະທານ ແລະ, ໃນບ່ອນທີ່ເປັນໄປໄດ້, ມີທີ່ປຶກສາໜຶ່ງ ຫລື ສອງຄົນ ແລະ ເລຂານຸການ.
11.2
ການມີສ່ວນຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ
11.2.1
ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ
11.2.1.2
ການຮຽນຮູ້ພຣະກິດຕິຄຸນ
ການປະຊຸມຫ້ອງຮຽນຖືກຈັດຂຶ້ນໃນວັນອາທິດທີສອງ ແລະ ທີສີ່ຂອງເດືອນ. ມັນໃຊ້ເວລາ 50 ນາທີ. ສະມາຊິກຄົນໜຶ່ງໃນຝ່າຍປະທານຫ້ອງດຳເນີນການປະຊຸມ. ລາວນຳພາຫ້ອງຮຽນໃນການທ່ອງຈຳຄຳຂວັນ ແລະ ປຶກສານຳກັນກ່ຽວກັບການມອບໝາຍ ແລະ ເລື່ອງອື່ນໆ.
ແລ້ວສະມາຊິກຫ້ອງຮຽນ ຫລື ຜູ້ນຳທີ່ເປັນຜູ້ໃຫຍ່ຄົນໜຶ່ງນຳພາການສິດສອນພຣະກິດຕິຄຸນ.
11.2.1.3
ການຮັບໃຊ້ ແລະ ກິດຈະກຳຕ່າງໆ
ການຮັບໃຊ້ ແລະ ກິດຈະກຳຕ່າງໆຄວນສ້າງປະຈັກພະຍານ, ເພີ່ມຄວາມເຂັ້ມແຂງໃຫ້ແກ່ຄອບຄົວ, ສົ່ງເສີມຄວາມເປັນໜຶ່ງໃນຫ້ອງຮຽນ, ແລະ ໃຫ້ໂອກາດເພື່ອເປັນພອນໃຫ້ແກ່ຄົນອື່ນ.
ການຮັບໃຊ້ ແລະ ກິດຈະກຳບາງຢ່າງຄວນລວມທັງກຸ່ມຊາຍໜຸ່ມ ແລະ ກຸ່ມຍິງໜຸ່ມ, ໂດຍສະເພາະຊາວໜຸ່ມລຸ້ນໃຫຍ່ກວ່າ.
ກິດຈະກຳປະຈຳປີ. ນອກເໜືອຈາກກິດຈະກຳທີ່ຈັດຂຶ້ນເປັນປະຈຳຂອງຊາວໜຸ່ມແລ້ວ, ກຸ່ມຍິງໜຸ່ມອາດເຂົ້າຮ່ວມກິດຈະກຳປະຈຳປີດັ່ງຕໍ່ໄປນີ້:
-
ຄ້າຍກຸ່ມຍິງໜຸ່ມ (ເບິ່ງ Young Women Camp Guide).
-
ກອງປະຊຸມຫວອດ ຫລື ສະເຕກສຳລັບຊາວໜຸ່ມ ຫລື ກອງປະຊຸມ ສຳລັບຄວາມເຂັ້ມແຂງຂອງຊາວໜຸ່ມ (FSY).
11.2.1.4
ການພັດທະນາຕົນເອງ
ໃນຄວາມພະຍາຍາມທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດ, ຊາວໜຸ່ມຖືກເຊື້ອເຊີນໃຫ້ຕັ້ງເປົ້າໝາຍ ເພື່ອເຕີບໂຕທາງວິນຍານ, ສັງຄົມ, ຮ່າງກາຍ, ແລະ ສະຕິປັນຍາ (ເບິ່ງ ລູກາ 2:52).
ສຳລັບຂໍ້ມູນເພີ່ມເຕີມ, ໃຫ້ເບິ່ງ ChildrenandYouth.ChurchofJesusChrist.org.
11.2.2
ການດູແລຄົນຂັດສົນ
ຍິງໜຸ່ມຄວນໄດ້ຮັບໂອກາດເປັນປະຈຳເພື່ອຮັບໃຊ້ຄົນອື່ນໃນຄອບຄົວ ແລະ ຮັບໃຊ້ກັບຄອບຄົວຂອງພວກເຂົາ, ລະຫວ່າງກິດຈະກຳຂອງຊາວໜຸ່ມ, ແລະ ຮັບໃຊ້ດ້ວຍຕົນເອງ.
11.2.2.1
ການປະຕິບັດສາດສະໜາກິດ
ຍິງໜຸ່ມອາດໄດ້ຮັບການມອບໝາຍໃຫ້ປະຕິບັດສາດສະໜາກິດເລີ່ມຕົ້ນໃນເດືອນມັງກອນຂອງປີທີ່ພວກເຂົາອາຍຸຄົບ 14 ປີ. ສຳລັບຂໍ້ມູນເພີ່ມເຕີມ, ໃຫ້ເບິ່ງ ບົດທີ 21.
11.2.3
ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ
ຍິງໜຸ່ມເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ ເມື່ອພວກເຂົາ “ຢືນເປັນພະຍານຂອງພຣະເຈົ້າ ໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ” (ໂມໄຊຢາ 18:9).
ພໍ່ແມ່ ແລະ ຜູ້ນຳສາມາດຊ່ວຍຍິງໜຸ່ມກຽມພ້ອມທີ່ຈະແບ່ງປັນພຣະກິດຕິຄຸນຕະຫລອດຊີວິດຂອງພວກເຂົາ.
11.2.4
ການເຕົ້າໂຮມຄອບຄົວເຂົ້າກັນຊົ່ວນິລັນດອນ
ຍິງໜຸ່ມສາມາດຊ່ວຍເຕົ້າໂຮມຄອບຄົວເຂົ້າກັນຊົ່ວນິລັນດອນໄດ້ໃນຫລາຍວິທີທາງ.
-
ໃຫ້ກຽດແກ່ພໍ່ແມ່ ແລະ ເປັນແບບຢ່າງຂອງການດຳລົງຊີວິດເໝືອນດັ່ງພຣະຄຣິດໃນບ້ານຂອງພວກເຂົາ.
-
ກຽມພ້ອມທີ່ຈະຮັບເອົາພິທີການພຣະວິຫານ, ລວມທັງການແຕ່ງງານນິລັນດອນ.
-
ລະບຸຊື່ບັນພະບຸລຸດຜູ້ຕ້ອງການພິທີການພຣະວິຫານ (ເບິ່ງ FamilySearch.org).
-
ມີສ່ວນຮ່ວມໃນການບັບຕິສະມາ ແລະ ການຢືນຢັນແທນຄົນຕາຍເລື້ອຍໆ ເທົ່າທີ່ສະຖານະການຈະເອື້ອອຳນວຍ.
11.3
ການເປັນຜູ້ນຳຍິງໜຸ່ມໃນຫວອດ
11.3.1
ຝ່າຍອະທິການ
ໜ້າທີ່ຮັບຜິດຊອບທີ່ສຳຄັນທີ່ສຸດຂອງອະທິການຄື ທີ່ຈະດູແລຍິງໜຸ່ມ ແລະ ຊາຍໜຸ່ມຢູ່ໃນຫວອດເພິ່ນ. ເພິ່ນ ແລະ ທີ່ປຶກສາຂອງເພິ່ນຮູ້ຈັກຊື່ຂອງພວກເຂົາ ແລະ ເຂົ້າໃຈສະຖານະການຢູ່ທີ່ບ້ານຂອງພວກເຂົາ. ພວກເພິ່ນຈະພົບກັບຍິງໜຸ່ມແຕ່ລະຄົນຢ່າງໜ້ອຍປີລະສອງເທື່ອ (ເບິ່ງ 31.3.1).
ອະທິການມີໜ້າທີ່ຮັບຜິດຊອບສຳລັບອົງການຍິງໜຸ່ມຢູ່ໃນຫວອດ. ເພິ່ນພົບກັບປະທານອົງການຍິງໜຸ່ມເປັນປະຈຳ.
ອະທິການ ແລະ ທີ່ປຶກສາຂອງເພິ່ນເຂົ້າຮ່ວມການປະຊຸມ, ການຮັບໃຊ້, ແລະ ກິດຈະກຳຂອງກຸ່ມຍິງໜຸ່ມ ເປັນປະຈຳ.
11.3.2
ຝ່າຍປະທານອົງການຍິງໜຸ່ມທີ່ເປັນຜູ້ໃຫຍ່
ອະທິການເອີ້ນ ແລະ ແຕ່ງຕັ້ງຜູ້ຍິງທີ່ເປັນຜູ້ໃຫຍ່ຄົນໜຶ່ງເປັນທາງການໃຫ້ຮັບໃຊ້ເປັນປະທານອົງການຍິງໜຸ່ມໃນຫວອດ. ຖ້າຫາກໜ່ວຍສາດສະໜາຈັກໃຫຍ່ພໍ, ລາວຈະແນະນຳຊື່ຜູ້ຍິງທີ່ເປັນຜູ້ໃຫຍ່ ໜຶ່ງ ຫລື ສອງຄົນ ເພື່ອຮັບໃຊ້ເປັນທີ່ປຶກສາຂອງລາວ (ເບິ່ງ ບົດທີ 30).
ໃນໜ່ວຍນ້ອຍ, ປະທານອົງການຍິງໜຸ່ມອາດເປັນຜູ້ນຳທີ່ເປັນຜູ້ໃຫຍ່ຄົນດຽວທີ່ໄດ້ຮັບການເອີ້ນໃນອົງການຍິງໜຸ່ມ. ໃນກໍລະນີນີ້, ລາວເຮັດວຽກງານກັບຜູ້ເປັນພໍ່ແມ່ເພື່ອຈັດບົດຮຽນ ແລະ ກິດຈະກຳສຳລັບກຸ່ມຍິງໜຸ່ມ.
ຖ້າຫາກສາຂາບໍ່ມີປະທານອົງການຍິງໜຸ່ມ, ປະທານສະມາຄົມສະຕີສົງເຄາະອາດຈັດບົດຮຽນສຳລັບກຸ່ມຍິງໜຸ່ມ ຈົນກວ່າໄດ້ເອີ້ນປະທານອົງການຍິງໜຸ່ມ.
ປະທານອົງການຍິງໜຸ່ມມີໜ້າທີ່ຮັບຜິດຊອບດັ່ງຕໍ່ໄປນີ້. ທີ່ປຶກສາຂອງລາວຊ່ວຍເຫລືອລາວ.
-
ຮັບໃຊ້ໃນສະພາຫວອດ.
-
ຮັບໃຊ້ເປັນສະມາຊິກໃນສະພາຊາວໜຸ່ມຫວອດ (ເບິ່ງ 29.2.6).
-
ປະຕິບັດສາດສະໜາກິດຕໍ່ຍິງໜຸ່ມແຕ່ລະຄົນ.
-
ສິດສອນໜ້າທີ່ຮັບຜິດຊອບໃຫ້ແກ່ຜູ້ນຳຍິງໜຸ່ມຄົນອື່ນໆ ແລະ ຝ່າຍປະທານຫ້ອງ.
-
ປຶກສາກັບຍິງໜຸ່ມກ່ຽວກັບການທ້າທາຍທີ່ບໍ່ຮຽກຮ້ອງອະທິການ ຫລື ກ່ຽວຂ້ອງກັບການຂົ່ມເຫັງ (ເບິ່ງ 32.3, 31.3.1, ແລະ 38.6.2).
11.3.4
ຝ່າຍປະທານຫ້ອງ ແລະ ເລຂານຸການ
11.3.4.1
ການເອີ້ນ, ການສະໜັບສະໜູນ, ແລະ ການແຕ່ງຕັ້ງເປັນທາງການ
ຫ້ອງຮຽນຍິງໜຸ່ມແຕ່ລະຫ້ອງຄວນມີຝ່າຍປະທານຫ້ອງ.
ສະມາຊິກຄົນໜຶ່ງໃນຝ່າຍອະທິການເອີ້ນຍິງໜຸ່ມຄົນໜຶ່ງໃຫ້ຮັບໃຊ້ເປັນປະທານຫ້ອງ. ເມື່ອມີຍິງໜຸ່ມຫລາຍພໍທີ່ຈະຮັບໃຊ້, ລາວຈະພິຈາລະນາສະມາຊິກໃນຫ້ອງດ້ວຍການອະທິຖານ ເພື່ອແນະນຳໃຫ້ເປັນທີ່ປຶກສາ ແລະ ເລຂານຸການ.
ຫລັງຈາກໄດ້ມອບການເອີ້ນໃຫ້ແລ້ວ, ສະມາຊິກຄົນໜຶ່ງໃນຝ່າຍອະທິການຈະສະເໜີຍິງໜຸ່ມຕໍ່ຫ້ອງຮຽນຂອງພວກເຂົາເພື່ອການສະໜັບສະໜູນ. ອະທິການ ຫລື ທີ່ປຶກສາທີ່ຖືກມອບໝາຍຈະແຕ່ງຕັ້ງຍິງໜຸ່ມເປັນທາງການ.
11.3.4.2
ໜ້າທີ່ຮັບຜິດຊອບ
ປະທານຫ້ອງຮັບໃຊ້ໃນສະພາຊາວໜຸ່ມຫວອດ (ເບິ່ງ 11.3.4.4). ຝ່າຍປະທານຫ້ອງມີໜ້າທີ່ຮັບຜິດຊອບດັ່ງຕໍ່ໄປນີ້:
-
ນຳພາຄວາມພະຍາຍາມຂອງຫ້ອງຮຽນເພື່ອເຂົ້າຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ (ເບິ່ງ ບົດທີ 1).
-
ທຳຄວາມຮູ້ຈັກ ແລະ ຮັບໃຊ້ຍິງໜຸ່ມແຕ່ລະຄົນ, ລວມທັງຜູ້ທີ່ບໍ່ໄດ້ເຂົ້າຮ່ວມການປະຊຸມຫ້ອງຮຽນ.
-
ວາງແຜນ ແລະ ດຳເນີນການປະຊຸມຫ້ອງຮຽນວັນອາທິດ (ເບິ່ງ 11.2.1.2).
-
ວາງແຜນ ແລະ ດຳເນີນການຮັບໃຊ້ ແລະ ກິດຈະກຳຫ້ອງຮຽນໃຫ້ສຳເລັດ (ເບິ່ງ 11.2.1.3).
11.3.4.3
ການປະຊຸມຝ່າຍປະທານຫ້ອງ
ຝ່າຍປະທານຫ້ອງຍິງໜຸ່ມພົບກັນເປັນປະຈຳ. ປະທານຫ້ອງດຳເນີນການປະຊຸມເຫລົ່ານີ້. ຜູ້ນຳຍິງໜຸ່ມທີ່ເປັນຜູ້ໃຫຍ່ທີ່ຖືກມອບໝາຍໃຫ້ສະໜັບສະໜູນຝ່າຍປະທານຫ້ອງກໍຈະເຂົ້າຮ່ວມນຳ.
11.3.4.4
ສະພາຊາວໜຸ່ມຫວອດ
ເບິ່ງ 29.2.6 ສຳລັບຂໍ້ມູນກ່ຽວກັບສະພາຊາວໜຸ່ມຫວອດ.
11.6
ແນວທາງຊີ້ນຳ ແລະ ນະໂຍບາຍເພີ່ມເຕີມ
11.6.1
ການປົກປ້ອງຊາວໜຸ່ມ
ເມື່ອຜູ້ໃຫຍ່ປະຕິສຳພັນກັບຊາວໜຸ່ມຢູ່ໃນສະພາບແວດລ້ອມຂອງສາດສະໜາຈັກ, ຄວນມີຜູ້ໃຫຍ່ທີ່ຮັບຜິດຊອບຢ່າງໜ້ອຍສອງຄົນຢູ່ນຳ. ອາດຈຳເປັນຕ້ອງໄດ້ລວມຫລາຍຫ້ອງເຂົ້າກັນເພື່ອເຮັດໃຫ້ສິ່ງນີ້ເປັນໄປໄດ້.
ຜູ້ໃຫຍ່ທຸກຄົນທີ່ເຮັດວຽກກັບຊາວໜຸ່ມຄວນຜ່ານການຝຶກອົບຮົມເລື່ອງການປົກປ້ອງເດັກ ແລະ ຊາວໜຸ່ມ ພາຍໃນໜຶ່ງເດືອນຫລັງຈາກໄດ້ຮັບການສະໜັບສະໜູນ (ProtectingChildren.ChurchofJesusChrist.org).