“10. ກຸ່ມຖານະປະໂລຫິດແຫ່ງອາໂຣນ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“10. ກຸ່ມຖານະປະໂລຫິດແຫ່ງອາໂຣນ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
10.
ກຸ່ມຖານະປະໂລຫິດແຫ່ງອາໂຣນ
10.1
ຈຸດປະສົງ ແລະ ອົງການ
10.1.1
ຈຸດປະສົງ
ຈຸດປະສົງຂອງກຸ່ມຄືຊ່ວຍໃຫ້ຜູ້ດຳລົງຖານະປະໂລຫິດເຮັດວຽກງານນຳກັນເພື່ອບັນລຸວຽກງານແຫ່ງຄວາມລອດ ແລະ ຄວາມສູງສົ່ງ.
10.1.2
ຄຳຂວັນຂອງກຸ່ມຖານະປະໂລຫິດແຫ່ງອາໂຣນ
“ເຮົາເປັນບຸດທີ່ຮັກຂອງພຣະເຈົ້າ, ແລະ ພຣະອົງມີວຽກງານໃຫ້ເຮົາເຮັດ.
“ດ້ວຍສຸດໃຈ, ພະລັງ, ຄວາມຄິດ, ແລະ ກຳລັງ, ເຮົາຈະຮັກພຣະເຈົ້າ, ຮັກສາພັນທະສັນຍາຂອງເຮົາ, ແລະ ໃຊ້ຖານະປະໂລຫິດຂອງພຣະອົງເພື່ອຮັບໃຊ້ຄົນອື່ນ, ໂດຍເລີ່ມຕົ້ນຈາກບ້ານເຮືອນຂອງເຮົາເອງ.
“ຂະນະທີ່ເຮົາພະຍາຍາມຮັບໃຊ້, ໃຊ້ສັດທາ, ກັບໃຈ, ແລະ ປັບປຸງຕົວເອງໃນແຕ່ລະວັນ, ເຮົາຈະເໝາະສົມກັບພອນຂອງພຣະວິຫານ ແລະ ມີຄວາມຊື່ນຊົມອັນຍາວນານ ທີ່ພຽງແຕ່ໄດ້ຮັບຜ່ານທາງພຣະກິດຕິຄຸນ.
“ເຮົາຈະກຽມພ້ອມເພື່ອກາຍເປັນຜູ້ສອນສາດສະໜາທີ່ພາກພຽນ, ເປັນສາມີທີ່ຊື່ສັດ, ເປັນພໍ່ທີ່ໃຫ້ຄວາມຮັກ ໂດຍການເປັນສານຸສິດທີ່ແທ້ຈິງຂອງພຣະເຢຊູຄຣິດ.
“ເຮົາຈະຊ່ວຍກຽມໂລກສຳລັບການສະເດັດມາຂອງພຣະຜູ້ຊ່ວຍໃຫ້ລອດ ໂດຍການເຊື້ອເຊີນທຸກຄົນໃຫ້ມາຫາພຣະຄຣິດ ແລະ ຮັບເອົາພອນແຫ່ງການຊົດໃຊ້ຂອງພຣະອົງ.”
10.1.3
ກຸ່ມ
10.1.3.1
ກຸ່ມມັກຄະນາຍົກ
ຊາຍໜຸ່ມເຂົ້າຮ່ວມກຸ່ມມັກຄະນາຍົກເລີ່ມຕົ້ນໃນເດືອນມັງກອນຂອງປີທີ່ພວກເຂົາອາຍຸຄົບ 12 ປີ. ໃນເວລານີ້ພວກເຂົາມີສິດຮັບການແຕ່ງຕັ້ງເປັນມັກຄະນາຍົກ ຖ້າພວກເຂົາພ້ອມ ແລະ ມີຄ່າຄວນ.
ໜ້າທີ່ຂອງມັກຄະນາຍົກມີອະທິບາຍໄວ້ໃນ ຄຳສອນ ແລະ ພັນທະສັນຍາ 20:57–59; 84:111. ໜ້າທີ່ອື່ນໆແມ່ນລວມທັງການຢາຍສິນລະລຶກ ແລະ ການຊ່ວຍເຫລືອອະທິການໃນ “ການປະຕິບັດເລື່ອງຝ່າຍໂລກທັງປວງ” (ຄຳສອນ ແລະ ພັນທະສັນຍາ 107:68).
10.1.3.2
ກຸ່ມຄູສອນ
ຊາຍໜຸ່ມເຂົ້າຮ່ວມກຸ່ມຄູສອນເລີ່ມຕົ້ນໃນເດືອນມັງກອນຂອງປີທີ່ພວກເຂົາອາຍຸຄົບ 14 ປີ. ໃນເວລານີ້ພວກເຂົາມີສິດຮັບການແຕ່ງຕັ້ງເປັນຄູສອນ ຖ້າພວກເຂົາພ້ອມ ແລະ ມີຄ່າຄວນ.
ຄູສອນມີໜ້າທີ່ເໝືອນມັກຄະນາຍົກ. ພວກເຂົາກຽມສິນລະລຶກ ແລະ ຮັບໃຊ້ເປັນອ້າຍນ້ອງຜູ້ປະຕິບັດສາດສະໜາກິດເຊັ່ນກັນ. ໜ້າທີ່ເພີ່ມເຕີມມີອະທິບາຍໄວ້ໃນ ຄຳສອນ ແລະ ພັນທະສັນຍາ 20:53–59; 84:111.
10.1.3.3
ກຸ່ມປະໂລຫິດ
ຊາຍໜຸ່ມເຂົ້າຮ່ວມກຸ່ມປະໂລຫິດເລີ່ມຕົ້ນໃນເດືອນມັງກອນຂອງປີທີ່ພວກເຂົາອາຍຸຄົບ 16 ປີ. ໃນເວລານີ້ພວກເຂົາມີສິດຮັບການແຕ່ງຕັ້ງເປັນປະໂລຫິດ ຖ້າພວກເຂົາພ້ອມ ແລະ ມີຄ່າຄວນ.
ປະໂລຫິດມີໜ້າທີ່ເໝືອນມັກຄະນາຍົກ ແລະ ຄູສອນ. ໜ້າທີ່ເພີ່ມເຕີມມີອະທິບາຍໄວ້ໃນ ຄຳສອນ ແລະ ພັນທະສັນຍາ 20:46–52, 73–79.
10.1.4
ຂໍກະແຈຂອງຖານະປະໂລຫິດ
ສຳລັບຂໍ້ມູນເພີ່ມເຕີມກ່ຽວກັບຂໍກະແຈເຫລົ່ານີ້, ໃຫ້ເບິ່ງ 3.4.1.
10.1.5
ການປັບກຸ່ມຕາມຄວາມຕ້ອງການໃນທ້ອງຖິ່ນ
ໃນຫວອດ ຫລື ສາຂາທີ່ມີຊາຍໜຸ່ມສອງສາມຄົນ, ກຸ່ມຖານະປະໂລຫິດແຫ່ງອາໂຣນຈະຮ່ວມປະຊຸມນຳກັນເພື່ອຮັບຄຳແນະນຳ ແລະ ເຮັດກິດຈະກຳ.
10.2
ການມີສ່ວນຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ
10.2.1
ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ
10.2.1.2
ການຮຽນຮູ້ພຣະກິດຕິຄຸນ
ການປະຊຸມກຸ່ມຖືກຈັດຂຶ້ນໃນວັນອາທິດທີສອງ ແລະ ທີສີ່ຂອງເດືອນ. ມັນໃຊ້ເວລາ 50 ນາທີ. ສະມາຊິກຄົນໜຶ່ງໃນຝ່າຍປະທານກຸ່ມ (ຫລື ຜູ້ຊ່ວຍຄົນໜຶ່ງຂອງອະທິການໃນກຸ່ມປະໂລຫິດ) ດຳເນີນການປະຊຸມ. ລາວນຳພາກຸ່ມໃນການທ່ອງຈຳຄຳຂວັນ ແລະ ປຶກສານຳກັນກ່ຽວກັບການມອບໝາຍ, ໜ້າທີ່, ແລະ ເລື່ອງອື່ນໆ.
ແລ້ວສະມາຊິກກຸ່ມ ຫລື ຜູ້ນຳທີ່ເປັນຜູ້ໃຫຍ່ຄົນໜຶ່ງນຳພາການສິດສອນພຣະກິດຕິຄຸນ.
10.2.1.3
ການຮັບໃຊ້ ແລະ ກິດຈະກຳຕ່າງໆ
ການຮັບໃຊ້ ແລະ ກິດຈະກຳຕ່າງໆຄວນສ້າງປະຈັກພະຍານ, ເພີ່ມຄວາມເຂັ້ມແຂງໃຫ້ແກ່ຄອບຄົວ, ສົ່ງເສີມຄວາມເປັນໜຶ່ງໃນກຸ່ມ, ແລະ ໃຫ້ໂອກາດເພື່ອເປັນພອນໃຫ້ແກ່ຄົນອື່ນ.
ການຮັບໃຊ້ ແລະ ກິດຈະກຳບາງຢ່າງຄວນລວມທັງກຸ່ມຊາຍໜຸ່ມ ແລະ ກຸ່ມຍິງໜຸ່ມ, ໂດຍສະເພາະຊາວໜຸ່ມລຸ້ນໃຫຍ່ກວ່າ.
ກິດຈະກຳປະຈຳປີ. ນອກເໜືອຈາກກິດຈະກຳທີ່ຈັດຂຶ້ນເປັນປະຈຳຂອງຊາວໜຸ່ມແລ້ວ, ກຸ່ມຊາຍໜຸ່ມອາດເຂົ້າຮ່ວມກິດຈະກຳປະຈຳປີດັ່ງຕໍ່ໄປນີ້:
-
ຄ້າຍກຸ່ມຖານະປະໂລຫິດແຫ່ງອາໂຣນ (ເບິ່ງ Aaronic Priesthood Quorum Camp Guide).
-
ກອງປະຊຸມຫວອດ ຫລື ສະເຕກສຳລັບຊາວໜຸ່ມ ຫລື ກອງປະຊຸມ ສຳລັບຄວາມເຂັ້ມແຂງຂອງຊາວໜຸ່ມ (FSY).
10.2.1.4
ການພັດທະນາຕົນເອງ
ໃນຄວາມພະຍາຍາມທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດ, ຊາວໜຸ່ມຖືກເຊື້ອເຊີນໃຫ້ຕັ້ງເປົ້າໝາຍ ເພື່ອເຕີບໂຕທາງວິນຍານ, ສັງຄົມ, ຮ່າງກາຍ, ແລະ ສະຕິປັນຍາ (ເບິ່ງ ລູກາ 2:52).
ສຳລັບຂໍ້ມູນເພີ່ມເຕີມ, ໃຫ້ເບິ່ງ ChildrenandYouth.ChurchofJesusChrist.org.
10.2.2
ການດູແລຄົນຂັດສົນ
ຜູ້ດຳລົງຖານະປະໂລຫິດແຫ່ງອາໂຣນຊ່ວຍເຫລືອອະທິການໃນ “ການປະຕິບັດເລື່ອງຝ່າຍໂລກທັງປວງ” (ຄຳສອນ ແລະ ພັນທະສັນຍາ 107:68). ພວກເຂົາຄວນໄດ້ຮັບໂອກາດເປັນປະຈຳເພື່ອຮັບໃຊ້ຄົນອື່ນໃນຄອບຄົວ ແລະ ຮັບໃຊ້ກັບຄອບຄົວຂອງພວກເຂົາ, ລະຫວ່າງກິດຈະກຳຂອງຊາວໜຸ່ມ, ແລະ ຮັບໃຊ້ດ້ວຍຕົນເອງ.
10.2.2.1
ການປະຕິບັດສາດສະໜາກິດ
ຜູ້ດຳລົງຖານະປະໂລຫິດແຫ່ງອາໂຣນໄດ້ຮັບການມອບໝາຍການປະຕິບັດສາດສະໜາກິດເລີ່ມຕົ້ນໃນເດືອນມັງກອນຂອງປີທີ່ພວກເຂົາອາຍຸຄົບ 14 ປີ. ສຳລັບຂໍ້ມູນເພີ່ມເຕີມ, ໃຫ້ເບິ່ງ ບົດທີ 21.
10.2.3
ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ
ຜູ້ດຳລົງຖານະປະໂລຫິດແຫ່ງອາໂຣນມີໜ້າທີ່ “ເຊື້ອເຊີນທຸກຄົນໃຫ້ມາຫາພຣະຄຣິດ” (ຄຳສອນ ແລະ ພັນທະສັນຍາ 20:59).
ພໍ່ແມ່ ແລະ ຜູ້ນຳຊຸກຍູ້ຊາຍໜຸ່ມໃຫ້ຮັບໃຊ້ເຜີຍແຜ່ເຕັມເວລາ ແລະ ແບ່ງປັນພຣະກິດຕິຄຸນຕະຫລອດຊີວິດຂອງພວກເຂົາ.
10.2.4
ການເຕົ້າໂຮມຄອບຄົວເຂົ້າກັນຊົ່ວນິລັນດອນ
ຜູ້ດຳລົງຖານະປະໂລຫິດແຫ່ງອາໂຣນສາມາດຊ່ວຍເຕົ້າໂຮມຄອບຄົວເຂົ້າກັນຊົ່ວນິລັນດອນໄດ້ໃນຫລາຍວິທີທາງ.
-
ໃຫ້ກຽດແກ່ພໍ່ແມ່ ແລະ ເປັນແບບຢ່າງຂອງການດຳລົງຊີວິດເໝືອນດັ່ງພຣະຄຣິດໃນບ້ານຂອງພວກເຂົາ.
-
ກຽມພ້ອມທີ່ຈະຮັບເອົາພິທີການພຣະວິຫານ, ລວມທັງການແຕ່ງງານນິລັນດອນ.
-
ລະບຸຊື່ບັນພະບຸລຸດຜູ້ຕ້ອງການພິທີການພຣະວິຫານ (ເບິ່ງ FamilySearch.org).
-
ມີສ່ວນຮ່ວມໃນການບັບຕິສະມາ ແລະ ການຢືນຢັນແທນຄົນຕາຍເລື້ອຍໆ ເທົ່າທີ່ສະຖານະການຈະເອື້ອອຳນວຍ.
10.3
ຝ່າຍອະທິການ
ໜ້າທີ່ຮັບຜິດຊອບທີ່ສຳຄັນທີ່ສຸດຂອງອະທິການຄື ທີ່ຈະດູແລຊາຍໜຸ່ມ ແລະ ຍິງໜຸ່ມຢູ່ໃນຫວອດເພິ່ນ. ເພິ່ນຮູ້ຈັກຊື່ຂອງພວກເຂົາ ແລະ ເຂົ້າໃຈສະຖານະການຢູ່ທີ່ບ້ານຂອງພວກເຂົາ. ເພິ່ນເຂົ້າຮ່ວມກິດຈະກຳຂອງພວກເຂົາ ແລະ ການປະຊຸມໃນວັນອາທິດຂອງພວກເຂົາເປັນປະຈຳ.
ອະທິການເປັນປະທານຂອງກຸ່ມປະໂລຫິດ.
ທີ່ປຶກສາທີໜຶ່ງໃນຝ່າຍອະທິການມີໜ້າທີ່ຮັບຜິດຊອບສຳລັບກຸ່ມຄູສອນ. ທີ່ປຶກສາທີສອງຂອງເພິ່ນມີໜ້າທີ່ຮັບຜິດຊອບສຳລັບກຸ່ມມັກຄະນາຍົກ.
ຝ່າຍອະທິການມີໜ້າທີ່ຮັບຜິດຊອບເພີ່ມເຕີມດັ່ງຕໍ່ໄປນີ້ສຳລັບກຸ່ມຖານະປະໂລຫິດແຫ່ງອາໂຣນ:
-
ພົບກັບຊາຍໜຸ່ມແຕ່ລະຄົນຢ່າງໜ້ອຍປີລະສອງເທື່ອ (ເບິ່ງ 31.3.1).
-
ຊ່ວຍຊາຍໜຸ່ມກຽມພ້ອມທີ່ຈະຮັບເອົາຖານະປະໂລຫິດແຫ່ງເມນຄີເສເດັກ.
-
ດູແລບັນທຶກ, ລາຍງານ, ແລະ ການເງິນຂອງກຸ່ມຖານະປະໂລຫິດແຫ່ງອາໂຣນ.
ຜູ້ໃຫ້ຄຳແນະນຳກຸ່ມ ແລະ ຜູ້ຊ່ຽວຊານຊ່ວຍໃນໜ້າທີ່ຮັບຜິດຊອບເຫລົ່ານີ້ເມື່ອຖືກຮຽກຮ້ອງ.
10.4
ຜູ້ນຳກຸ່ມຊາວໜຸ່ມ
10.4.1
ການເອີ້ນ, ການສະໜັບສະໜູນ, ແລະ ການແຕ່ງຕັ້ງເປັນທາງການ
ອະທິການເອີ້ນປະໂລຫິດ ໜຶ່ງ ຫລື ສອງຄົນໃຫ້ເປັນຜູ້ຊ່ວຍຂອງເພິ່ນໃນການນຳພາກຸ່ມປະໂລຫິດ.
ສະມາຊິກຄົນໜຶ່ງໃນຝ່າຍອະທິການເອີ້ນປະທານກຸ່ມມັກຄະນາຍົກ ແລະ ປະທານກຸ່ມຄູສອນ. ເມື່ອມີຜູ້ດຳລົງຖານະປະໂລຫິດແຫ່ງອາໂຣນຫລາຍພໍທີ່ຈະຮັບໃຊ້, ກຸ່ມຊາຍໜຸ່ມເຫລົ່ານີ້ຈະພິຈາລະນາສະມາຊິກໃນກຸ່ມດ້ວຍການອະທິຖານ ເພື່ອແນະນຳໃຫ້ເປັນທີ່ປຶກສາ ແລະ ເລຂານຸການ.
ຫລັງຈາກໄດ້ມອບການເອີ້ນໃຫ້ແລ້ວ, ສະມາຊິກຄົນໜຶ່ງໃນຝ່າຍອະທິການຈະສະເໜີຜູ້ນຳກຸ່ມຊາວໜຸ່ມເພື່ອການສະໜັບສະໜູນ ຢູ່ໃນການປະຊຸມກຸ່ມຂອງເຂົາເຈົ້າ. ອະທິການແຕ່ງຕັ້ງຜູ້ຊ່ວຍຂອງເພິ່ນ ແລະ ປະທານກຸ່ມມັກຄະນາຍົກ ແລະ ປະທານກຸ່ມຄູສອນເປັນທາງການ. ເພິ່ນມອບຂໍກະແຈຂອງຖານະປະໂລຫິດໃຫ້ແກ່ປະທານກຸ່ມ. ເພິ່ນອາດມອບໝາຍໃຫ້ທີ່ປຶກສາຂອງເພິ່ນແຕ່ງຕັ້ງສະມາຊິກຄົນອື່ນໆໃນຝ່າຍປະທານ ແລະ ເລຂານຸການເປັນທາງການ.
10.4.2
ໜ້າທີ່ຮັບຜິດຊອບ
-
ນຳພາຄວາມພະຍາຍາມຂອງກຸ່ມເພື່ອເຂົ້າຮ່ວມໃນວຽກງານແຫ່ງຄວາມລອດ ແລະ ຄວາມສູງສົ່ງ (ເບິ່ງ ບົດທີ 1).
-
ທຳຄວາມຮູ້ຈັກ ແລະ ຮັບໃຊ້ສະມາຊິກກຸ່ມແຕ່ລະຄົນ, ລວມທັງຜູ້ທີ່ບໍ່ໄດ້ເຂົ້າຮ່ວມການປະຊຸມກຸ່ມ.
-
ຮັບໃຊ້ໃນສະພາຊາວໜຸ່ມຫວອດ (ເບິ່ງ 10.4.4).
-
ສິດສອນສະມາຊິກກຸ່ມໃຫ້ຮູ້ໜ້າທີ່ຖານະປະໂລຫິດຂອງຕົນ (ເບິ່ງ ຄຳສອນ ແລະ ພັນທະສັນຍາ 107:85–88).
-
ວາງແຜນ ແລະ ດຳເນີນການປະຊຸມກຸ່ມ (ເບິ່ງ 10.2.1.2).
-
ວາງແຜນ ແລະ ດຳເນີນການຮັບໃຊ້ ແລະ ກິດຈະກຳກຸ່ມໃຫ້ສຳເລັດ (ເບິ່ງ 10.2.1.3).
10.4.3
ການປະຊຸມຝ່າຍປະທານກຸ່ມ
ຝ່າຍປະທານກຸ່ມຖານະປະໂລຫິດແຫ່ງອາໂຣນພົບກັນເປັນປະຈຳ. ປະທານກຸ່ມດຳເນີນການປະຊຸມເຫລົ່ານີ້. ຢ່າງໜ້ອຍຜູ້ໃຫຍ່ສອງຄົນເຂົ້າຮ່ວມນຳ—ສະມາຊິກຄົນໜຶ່ງໃນຝ່າຍອະທິການ, ຜູ້ໃຫ້ຄຳແນະນຳ, ຫລື ຜູ້ຊ່ຽວຊານ.
10.4.4
ສະພາຊາວໜຸ່ມຫວອດ
ເບິ່ງ 29.2.6 ສຳລັບຂໍ້ມູນກ່ຽວກັບສະພາຊາວໜຸ່ມຫວອດ.
10.8
ແນວທາງຊີ້ນຳ ແລະ ນະໂຍບາຍເພີ່ມເຕີມ
10.8.1
ການປົກປ້ອງຊາວໜຸ່ມ
ເມື່ອຜູ້ໃຫຍ່ປະຕິສຳພັນກັບຊາວໜຸ່ມຢູ່ໃນສະພາບແວດລ້ອມຂອງສາດສະໜາຈັກ, ຄວນມີຜູ້ໃຫຍ່ທີ່ຮັບຜິດຊອບຢ່າງໜ້ອຍສອງຄົນຢູ່ນຳ.
ຜູ້ໃຫຍ່ທຸກຄົນທີ່ເຮັດວຽກກັບຊາວໜຸ່ມຄວນຜ່ານການຝຶກອົບຮົມເລື່ອງການປົກປ້ອງເດັກ ແລະ ຊາວໜຸ່ມ ພາຍໃນໜຶ່ງເດືອນຫລັງຈາກໄດ້ຮັບການສະໜັບສະໜູນ (ProtectingChildren.ChurchofJesusChrist.org).