Leksyon 28 Materyal sa Pagpangandam sa Klase: Ang Ginoo Nagpadali sa Iyang Buhat
“Leksyon 28 Materyal sa Pagpangandam sa Klase: Ang Ginoo Nagpadali sa Iyang Buhat,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 28 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Imahe
kinatibuk-ang komperensya diha sa Conference Center
Leksyon 28 Materyal sa Pagpangandam sa Klase
Ang Ginoo Nagpadali sa Iyang Buhat
Si Presidente Russell M. Nelson nagtudlo: “Kini makapaukyab nga mga panahon. Ang Ginoo nagpadali sa Iyang buhat nga kita mga saksi niini. Kini kulba-hinam. Kini malisud. Daghan pa ang gikinahanglan gikan sa matag usa kanato––labaw pa kay sa gikinahanglan kaniadto. Ug daghan pa ang gihatag” (“A Personal Invitation to Participate in Seminary and Institute,” Peb. 4, 2019, ChurchofJesusChrist.org). Samtang ikaw magtuon niini nga materyal, pangita og mga paagi nga ikaw makaapil samtang nagpadali ang Ginoo sa Iyang buhat agi og pagpangandam alang sa Iyang Ikaduhang Pag-anhi.
Seksyon 1
Unsa ang padulngan sa Ang Simbahan ni Jesukristo sa mga Santos sa Ulahing mga Adlaw?
Pagka-Martes, Abril 6, 1830, mga 50 ka mga tawo nagpundok ug naglibut sa troso nga panimalay ni Peter Whitmer sa Fayette, New York. Didto, si Joseph Smith ubos sa paggiya ni Jesukristo, mi-organisar pag-usab sa Simbahan sa Ginoo dinhi sa yuta. Bisan tuod og ang Simbahan misugod sa gamay, ang padulngan niini mao ang pagpuno sa tibuok yuta.
Sa mga panahon sa Daang Tugon, ang hari sa Babelonia nga si Nabucodonosor dihay usa ka damgo diin iyang nakita nga “gikan sa usa ka bukid gisapsap [nga] walay kamot ang usa ka bato” (Daniel 2:45). Kini nga bato mitubo ang gidak-on hangtud kini “nahimong usa ka dakong bukid, ug gipuno niini ang tibuok kalibutan” (Daniel 2:35). Diha sa iyang hubad sa damgo sa hari, gipanagna ni propeta Daniel nga sa ulahing mga adlaw, ang Ginoo motukod og usa ka gingharian nga dili gayud malumpag apan molungtad sa walay katapusan (tan-awa sa Daniel 2:28, 44).
Gibalik sa Ginoo ang panagna ni Daniel ngadto ni Propeta Joseph Smith 18 ka bulan human sa pagka-organisar sa Simbahan, sa panahon diin dihay mga 600 lamang ka mga Santos sa Ulahing mga Adlaw ibabaw sa yuta. Sa Doktrina ug mga Pakigsaad 65:2 atong mabasa: “Ang mga yawe sa gingharian sa Dios gitugyan ngadto sa tawo sa yuta, ug gikan dinhi ang ebanghelyo mokaylap ngadto sa mga kinatumyan sa yuta, ingon sa bato nga gipikas gikan sa bukid nga walay gigamit nga mga kamot mokaylap, hangtud kini mopuno sa tibuok yuta.”
Duha ka tuig ug tunga ang milabay, sa Abril 1834, mihimo si Propeta Joseph Smith og talagsaong panagna mahitungod sa padulngan sa Simbahan ngadto sa usa ka pundok sa mga tighupot sa pagkapari sa Kirtland, Ohio.
Si Presidente Wilford Woodruff, kinsa niana nga panahon diha sa miting, nahinumdom:
Imahe
Presidente Wilford Woodruff
“Ang Propeta mitawag sa tanan kinsa naghupot sa Pagkapari nga magpundok ngadto sa gamay nga eskwelahan nga binuhat sa troso nga gihimo nila didto. Gamay kini nga balay, tingali mga 14 pye kwadrado. Apan nakapahiluna kini sa tibuok Priesthood sa Simbahan ni Jesukristo sa mga Santos sa Ulahing mga Adlaw sa dihang didto pa sa lungsod sa Kirtland. … Ang Propeta miingon, “Mga kaigsoonan, … Gusto ko nga mosulti kaninyo sa atubangan sa Ginoo, nga wala kamoy mas labaw pa nga nahibaloan kabahin sa mga kapalaran niini nga Simbahan ug sa gingharian kaysa usa ka gamay nga bata diha sa sabakan sa iyang inahan. Wala ninyo kini masabti.” Ingon og nakalitan ako. Miingon siya, “Diyutay ra kaayo nga mga Pagkapari ang inyong makita dinhi karong gabhiona, apan kini nga Simbahan mopuno sa Amihanan ug Habagatang Amerika—pun-on niini ang kalibutan.” (Wilford Woodruff, sa Mga Pagtulun-an sa mga Presidente sa Simbahan: Joseph Smith [2007], 161)
Labaw sa 160 ka mga tuig ang milabay, human mitubo ang Simbahan ngadto sa sobra sa 11 ka milyon ka mga miyembro ug nagkatag pag-ayo sa kalibutan, si Presidente Gordon B. Hinckley mitudlo:
Imahe
Presidente Gordon B. Hinckley
Akong mga kaigsoonan, nakaamgo ba kamo kon unsay ania kanato? Nailhan ba ninyo ang atong dapit niining talagsaong drama sa kasaysayan sa tawo? Mao kini ang sentro sa tanan nga miagi na kaniadto. Kini ang panahon sa pasig-uli. Kini ang mga panahon sa pagpahiuli. … Mao kini ang katingbanan sa tanan nga mga siglo sa panahon sukad sa pagkatawo ni Kristo hangtud niini karon ug talagsaong adlaw. (Gordon B. Hinckley, “At the Summit of the Ages,” Ensign, Nob. 1999, 74)
Ug kulang sa usa ka dekada wala madugay, mi-anunsyo si Presidente Hinckley:
Imahe
Presidente Gordon B. Hinckley
Usa ka dakong milagro ang nahitabo nga atong nasaksihan. …
Ug kini sinugdanan pa lamang. Kini nga buhat magpadayon sa pagtubo ug pag-uswag ug molukop sa tibuok yuta. (Gordon B. Hinckley, “Ang Bato nga Gipikas Gikan sa Bukid nga Walay Kamot nga Gigamit,” Liahona, Nob. 2007, 83–84)
Imahe
icon, pamalandong
Pamalandong agi og Pagpangandam alang sa Klase
Ngano kaha nga importante ang pagsabut ug pagbaton og pagpamatuod sa kapalaran sa Simbahan sa Ginoo?
Seksyon 2
Giunsa sa Ginoo pagpadali ang Iyang buhat karon?
Namulong kabahin sa dali nga pagtubo ug impluwensya sa Simbahan sa Ginoo, si Presidente Thomas S. Monson mitudlo:
Imahe
Presidente Thomas S. Monson
Ang rason nga ang Simbahan nagtubo karon kay gisulti sa Ginoo nga kini motubo. Sa Doktrina ug mga Pakigsaad, Siya miingon, “Tan-awa, Ako modali sa akong buluhaton diha sa iyang angay nga panahon” [Doktrina ug mga Pakigsaad 88:73].
Kita, isip espiritu nga mga anak sa atong Langitnong Amahan, kita gipadala sa yuta niining panahona aron kita makaapil sa pagpadali niining dakong buhat. (Thomas S. Monson, “Pagpadali sa Buhat,” Liahona, Hunyo 2014, 4)
Ang mosunod nga mga ehemplo mao ang pipila sa mga paagi nga ang Ginoo ug ang Iyang mga sulugoon nagdapit kanimo sa pag-apil diha sa pagpadali sa buhat sa kaluwasan. Hunahunaa ang pagmarka sa bisan hain sa mga baruganan o mga ideya nga ingon og importante kanimo, ug pangandam sa pagpakigbahin sa imong mga hunahuna mahitungod niini diha sa klase.
Pagpundok sa Israel
Imahe
icon, pagtuon
Pagtuon agi og Pagpangandam alang sa Klase
Basaha sa Doktrina ug mga Pakigsaad 29:4, 7, diin mga bahin sa usa ka unang pagpadayag gikan sa Ginoo ngadto sa mga elder sa Simbahan.
Namulong kabahin niini nga pagpundok, si Presidente Russell M. Nelson mitudlo:
Imahe
Presidente Russell M. Nelson
Minahal kong batan-ong mga kaigsoonan, sigurado nga kini mao ang ulahing mga adlaw, ug ang Ginoo mipadali sa Iyang buhat sa pagpundok sa Israel. Kana nga panagpundok mao ang labing importanting butang nga nahitabo sa yuta karon. Wala nay laing ikatandi sa gidak-on niini, wala nay ikatandi sa kaimportante, wala nay ikatandi sa kahalangdon. …
Kon maghisgot kita kalabut sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa matag habig sa tabil, angay nga makadungog sa mensahe sa gipahiuli nga ebanghelyo ni Jesukristo. Mohukom sila sa ilang kaugalingon kon gusto ba nilang masayud pa og dugang. (Russell M. Nelson, “Hope of Israel” [tibuok kalibutan nga debosyunal alang sa kabatan-onan, Hunyo 3, 2018], supplement to the Ensign and New Era, 8, ChurchofJesusChrist.org)
Pagpakigbahin sa Ebanghelyo
Imahe
icon, pagtuon
Pagtuon agi og Pagpangandam alang sa Klase
Basaha ang Doktrina ug mga Pakigsaad 123:12, mangita kon unsay gitudlo sa Ginoo ni Propeta Joseph Smith mahitungod sa daghan kinsa nabutaan pinaagi sa “maliputon nga paglingla sa mga tawo.”
Paghunahuna mahitungod sa pagtulun-an niini nga bersikulo samtang ikaw namalandong niini nga pagdapit ni Elder David A. Bednar sa Korum sa Napulog duha ka mga Apostoles nga nag-awhag kanato sa pagtabang diha sa buhat sa kaluwasan sa bag-o nga mga paagi:
Imahe
Elder David A. Bednar
Ang Ginoo nagpadali sa Iyang buhat, ug dili kini sulagma nga … gamhanang pagpalambo sa komunikasyon ug mga imbensyon nahitabo niining dispensasyon sa kahingpitan sa panahon. Ang mga channel sa social media mao ang mga himan sa tibuok kalibutan nga personal ug positibong makaapekto sa daghang mga indibidwal ug mga pamilya. Ug ako nagtuo nga ang panahon miabut alang kanato isip mga disipulo ni Kristo sa paggamit niining dinasig nga mga himan sa husto ug mas epektibo nga paagi sa pagpamatuod sa Dios ang Mahangturong Amahan, sa Iyang plano sa kalipay alang sa Iyang mga anak, ug sa Iyang Anak, nga si Jesukristo, isip ang Manluluwas sa kalibutan; sa pagsangyaw sa katinuod sa Pagpahiuli sa ebanghelyo sa ulahing mga adlaw; ug sa pagtuman sa buhat sa Ginoo. (David A. Bednar, “To Sweep the Earth as with a Flood” [Brigham Young University Education Week nga debosyonal, Ago. 19, 2014], ChurchofJesusChrist.org)
Pagpangalagad
Atol sa Iyang mortal nga pagpangalagad gitudlo sa Manluluwas sa Iyang mga disipulo nga Siya “mianhi dili aron paga-alagaran apan sa pag-alagad” (Mateo 20:28). Nangalagad Siya samtang Siya “nagpangadto-adto sa paghimog mga kaayohan” (Mga Buhat 10:38). Sa usa ka pagpadayag ngadto ni Joseph Smith, gidapit sa Ginoo si Frederick G. Williams sa pagpangalagad ngadto sa uban.
Susama kitang gitawag aron sa pagpangalagad. Si Elder Jeffrey R. Holland sa Korum sa Napulog Duha ka mga Apostoles mitudlo:
Imahe
Elder Jeffrey R. Holland
Ako mohatag sa akong kaugalingong pagsaksi nga kining mga kausaban [gikan sa home ug visiting teaching ngadto sa pagpangalagad] mga … dugang nga mga timailhan nga ang Ginoo mopadali sa Iyang buluhaton sa angay nga panahon. …
… Hinaot nga maghago ta uban sa Ginoo sa ubasan [tan-awa sa Jacob 5:70–72], sa paghatag sa Dios ug Amahan natong tanan sa Iyang dakong buluhaton sa pagtubag sa mga pag-ampo, paghatag og kahupayan, pagpahid sa mga luha, ug sa paglig-on sa huyang nga mga tuhod [tan-awa sa Doktrina ug mga Pakigsaad 81:5]. Kon ato kanang buhaton, mahimo kitang mas mahisama sa mga disipulo ni Kristo nga maoy angayan kanato. (Jeffrey R. Holland, “Magpaduol ug Maglig-on Kanila,” Liahona, Mayo 2018, 101, 103)
Si Sister Linda K. Burton, kanhi Presidente sa Kinatibuk-ang Relief Society mipakigbahin usab:
Imahe
Sister Linda K. Burton
Paghunahuna uban nako og pipila ka posibling mga karatula sa “tabang nga gikinahanglan” kalabut sa buhat sa kaluwasan:
Tabang nga gikinahanglan: mga ginikanan nga mopadako sa ilang mga anak diha sa kahayag ug kamatuoran
Tabang nga gikinahanglan: mga anak, mga managsuon, mga iyaan ug uyoan, mga ig-agaw, mga apohan, ug tinuod nga mga higala nga moserbisyo isip tigtudlo ug motabang diha sa dalan sa pakigsaad
Tabang nga gikinahanglan: kadtong maminaw sa mga pag-aghat sa Espiritu Santo ug molihok base sa mga panghunahuna nga nadawat
Tabang nga gikinahanglan: kadtong mosunod sa ebanghelyo matag adlaw sa ginagmay ug yano nga mga paagi
Tabang nga gikinahanglan: mga family history ug mga temple worker nga mosumpay sa mga pamilya sa hangtud
Tabang nga gikinahanglan: mga misyonaryo ug mga miyembro nga mosangyaw sa “maayong mga balita”—ang ebanghelyo ni Jesukristo
Tabang nga gikinahanglan: mga tigluwas nga mangita sa mga nahisalaag
Tabang nga gikinahanglan: mga motuman sa pakigsaad nga lig-ong mobarug alang sa kamatuoran ug matarung
Tabang nga gikinahanglan: tinuod nga mga disipulo ni Ginoong Jesukristo …
… Dili igsapayan kon kita dili pa perpekto ug kompleto. … Makalakaw kita isip usa, isip mga disipulo, isip mga sulugoon nga may andam nga kasingkasing ug mga kamot sa pagdali sa buhat sa kaluwasan. Kon kita mohimo niini, kita mahisama sa Manluluwas. (Linda K. Burton, “Gikinahanglan: Mga Kamot ug mga Kasingkasing sa Pagpadali sa Buhat,” Liahona, Mayo 2014, 124)
Pagtahud sa Igpapahulay
Imahe
icon, pagtuon
Pagtuon agi og Pagpangandam alang sa Klase
Basaha ang Doktrina ug mga Pakigsaad 59:9-10 aron makat-unan kon unsay gitudlo sa Ginoo sa mga Santos mahitungod sa paghupot sa adlaw nga Igpapahulay nga balaan.
Si Presidente M. Russell Ballard sa Korum sa Napulog Duha ka mga Apostoles mitudlo sa mosunod mahitungod sa gahum sa pagtahud sa adlaw nga Igpapahulay:
Imahe
Presidente M. Russell Ballard
Sa tanang kapunongan o mga kausaban sa palakaw o doktrinal nga pagbansay nga makapadali sa buhat sa kaluwasan niini nga panahon, atong napiho nga ang pagpasaka sa espiritu ug gahum sa adlaw nga Igpapahulay mahimong labing may impluwensya sa pagdala sa mga miyembro ug mga pamilya nga mas masuod ngadto ni Ginoong Jesukristo. (M. Russell Ballard, sa Chad H. Webb, “The Sabbath Day” [Seminaries and Institutes training satellite broadcast, Ago. 4, 2015], ChurchofJesusChrist.org)
Imahe
icon, rekord
Irekord ang Inyong mga Hunahuna
Unsay dugang nga ebidensya nga imong nakita nga ang Ginoo nagpadali sa Iyang buluhaton sa atong panahon? Unsa ang pipila ka mga paagi nga mas makatabang pa kamo sa buhat sa Ginoo? I-rekord ang inyong tubag diha sa inyong journal o sa luna nga gigahin ubos.
