Суралцагч юу хийдэг вэ?

EnglishConnect-ийн багшийн хувьд та суралцагчид амжилтдаа хүрэхэд нь туслахын тулд тэдний юу хийхийг ойлгох хэрэгтэй. Суралцагчид бие даан суралцах үйл ажиллагаагаа дуусгаж, ярианы бүлэгт оролцож, өдөр бүр англи хэлээр ярьж дадлага хийх дадал хэвшилтэй болсноор хамгийн амжилттай байх болно. EnglishConnect 1 Суралцагчдад зориулсан, EnglishConnect 2 Суралцагчдад зориулсан хэлний хичээл бүр нь“Personal Study” (Бие даан суралцах) болон “Conversation Group” (Ярилцлагын бүлэг) гэсэн хоёр хэсэгт хуваагдана. Суралцагчийн туршлагыг ойлгоход тань туслахын тулд EnglishConnect суралцагчийн гарын авлагаас “Танилцуулга”-ыг уншина уу.

Судлахаар мөн итгэлээр суралцахыг эрэлхийл

EnglishConnect-ийн туршлагын үндэс нь суралцагчдад “судлахаар мөн тэрчлэн итгэлээр суралцахыг эрэлхийлэхэд” (Сургаал ба Гэрээ 88:118) тусалдаг. EnglishConnect-ийн хэлний хичээл бүр суралцах зарчим дээр төвлөрдөг. Эдгээр нь суралцах, заах чадвараа нэмэгдүүлэхийн тулд Их Эзэнд найдахад бидэнд тусалдаг сүнслэг зарчмууд юм. Суралцах зарчмууд нь бидний жинхэнэ боломжийг болон Аврагчийн бидэнд туслах чадварыг ойлгоход тусална. EnglishConnect-ийн туршлага дээр бидний судалж, үлгэр жишээ үзүүлэх суралцах зарчмууд нь:

Та бол Бурханы хүүхэд

Би бол мөнхийн боломж, зорилготой Бурханы хүүхэд.

(Ром 8:16–17; “Гэр бүл: Дэлхий дахинаа өргөх тунхаг-ийг үзнэ үү.”)

Есүс Христэд итгэх итгэлээ хөгжүүлэх

Би Есүс Христэд итгэх итгэлээ хөгжүүлснээр Тэрээр надад бүх зүйлийг хийхэд тусалж чадна.

(Филиппой 4:13; Ифер 12:27; Моронай 7:33-ыг үзнэ үү.)

Хариуцлага хүлээдэг бай

Би сонгох эрх мэдэлтэй, би өөрөө суралцах үүрэгтэй.

(2 Нифай 2:14, 16; Сургаал ба Гэрээ 58:27–28-ыг үзнэ үү.)

Бие биеэ хайрлаж, нэг нэгэндээ заагаарай.

Би бусадтай хамт хайрлаж, зааж, сурч байхдаа Ариун Сүнснээс суралцаж чадна.

(Иохан 13:34–35; Иохан 14:26–27; Сургаал ба Гэрээ 84:106; 88:77, 122–123-ыг үзнэ үү.)

Урагш тэмүүл

Би саад бэрхшээлтэй тулгарсан ч Бурханы тусламжтайгаар урагш тэмүүлж чадна.

(2 Нифай 31:20; 32:9; Сургаал ба Гэрээ 50:41-42-ийг үзнэ үү.)

Их Эзэнтэй зөвлөлд

Би хичээл зүтгэлийнхээ талаар өдөр бүр Бурхантай зөвлөлдсөнөөр мэдлэгээ сайжруулдаг.

(Сургаалт үгс 3:5-6; Матай 7:7-8; Алма 37:37-г үзнэ үү.)

Хувиараа суралцах

Ярилцлагын бүлэгт орохын өмнө суралцагчид суралцагчийн гарын авлагын “Personal Study” (Бие даан суралцах) хэсгийг бөглөнө. Энэ хэсэгт суралцагчид суралцах зарчмыг судалж, үг цээжилж, өгүүлбэрийн загвар ашиглан дасгал хийдэг.

Үгээ цээжлэх, загвараар дадлага хийх нь бие даан суралцах явцад хамгийн сайн хийгддэг үйл ажиллагаанууд юм. Энэ нь суралцагчдад ойлголтыг өөрийн хурдаар эзэмших боломжийг олгодог.

Ярианы бүлэг

Ярианы бүлэгт суралцагчид суралцагчийн гарын авлагын “Conversation Group” (Ярианы бүлэг) үйл ажиллагааг гүйцэтгэнэ. Суралцагчид жижиг бүлгүүд эсвэл хоёр хоёроороо ажиллахдаа суралцах зарчмын талаар ярилцаж, үгс, өгүүлбэрийн загвар хянаж, харилцан яриа өрнүүлдэг. Үйл ажиллагаа бүр нь суралцагчдыг дараагийн үйл ажиллагаанд бэлтгэдэг. Ярианы бүлэг бүрийн төгсгөлд суралцагчид өөрсдийн ахиц дэвшлийг үнэлж, өдөр тутмын дадлага хийх зорилгоо тавьдаг.

Өдөр бүр дадлага хийх

Англи хэлийг хамгийн сайн сурахын тулд суралцагчид өдөр бүр дадлага хийх дадалтай болох хэрэгтэй. Энэ дадлыг суулгахын тулд суралцагчид англи хэлийг өдөр тутмынхаа үйл ажиллагаанд оруулах арга замыг олох хэрэгтэй. Жишээлбэл, тэд хөгжим сонсохдоо англиар сонсох боломжтой. Суралцагчид гэртээ, ажил дээрээ эсвэл сүм дээрээ англиар энгийн яриа өрнүүлэх боломжтой. (EnglishConnect суралцагчийн гарын авлагын “Суралцахад санал болгох зүйлс” хэсгээс нэмэлт санаануудыг үзнэ үү.) Өдөр тутмын дадлага ажлын гол түлхүүр нь суралцагчдад англи хэлийг ердийн амьдралдаа ашиглах арга замыг олоход нь туслах явдал юм.

Сурагчид өдөр тутмын дадлага ажлынхаа нэг хэсэг болгон суралцагчийн гарын авлагын “Personal Study” (Бие даан суралцах) хэсгийг бөглөж болно. Тэд мөн хичээлийн үйл ажиллагаа, үнэлгээг englishconnect.org/learner/resources болон EnglishConnect 1, EnglishConnect 2 дасгалын ном дээр онлайнаар бөглөж болно.