Dugang nga Giya

Hugot nga Pagtuo, Pakigdait, ug Paglambo

Pagpasiugda og hugot nga pagtuo, pakigdait, ug paglambo. Motabang sa pagmugna og kahimtang diin ang mga tigkat-on makapauswag sa ilang hugot nga pagtuo, makasinati og pakigdait, ug makapalambo sa ilang mga kapasidad. Mahimo nimo kini pinaagi sa pagtawag og mga magtutudlo, paghatag og mga pasilidad, ug pagseguro nga ang mga tigkat-on ug mga magtutudlo aduna sa gikinahanglan nga mga kapanguhaan. Mahimo ka usab nga makigkoordinar sa uban nga makasuporta sa mga tigkat-on, sama sa mga misyonaryo ug uban nga mga grupo sa pagbarog pinaagi sa kinaugalingong paningkamot.

Mga Lider sa Pagkapari

Pagpakigtambag sa mga lider sa pagkapari. Seguroha nga ang imong programa giaprobahan ug gidumala sa mga lider sa pagkapari. Ang mga lider sa pagkapari naglakip niadtong nagdumala sa pagbarog pinaagi sa kinaugalingong paningkamot, mga seminary ug mga institute, ug misyonaryo nga mga paningkamot. Pagpakigtambag sa mga lider sa pagkapari bahin sa:

• Pagtakda ug pagsubay sa mga tumong ug mga kalamposan (tan-awa sa “Ang EnglishConnect Nagsuporta sa Buhat sa Dios sa Kaluwasan ug Kahimayaan”).

• Pagpalambo sa mga resulta sa programa.

• Pagtawag og bag-ong mga magtutudlo (tan-awa sa “Mga Magtutudlo”).

• Pagdapit og dugang nga mga tigkat-on aron moapil (tan-awa sa “Pagdapit ug Pagkahibalo”).

• Pagpalapad sa akses (tan-awa sa “Lokasyon ug Kapirmihon”).

• Pagdapit sa mga tigkat-on sa pagsiksik sa dugang nga mga kapanguhaan sa Simbahan (tan-awa sa “Pagkonektar sa Ubang mga Kapanguhaan sa Simbahan”).

Pag-report ngadto sa mga lider sa pagkapari. Pag-report og balik ngadto sa mga lider sa pagkapari mahitungod sa kalamposan ug mga hagit sa mga grupo sa EnglishConnect.

Pagseguro sa legal nga pagsunod. Pagseguro nga ang programa sa EnglishConnect nahasubay sa lokal nga legal nga mga gikinahanglan nga makita diha sa englishconnect.org/leader/approved-locations.

Pahinumdom: Ang mga kapanguhaan sa EnglishConnect giprotektahan sa balaod sa katungod sa pagmantala ug kinahanglan dili usbon kon walay pagtugot.

Pagpakigtambayayong sa Misyon

Planoha ang paggamit sa EnglishConnect sa pagpaambit sa ebanghelyo. Ang EnglishConnect pwedeng himoon nga mahinungdanong bahin sa plano sa misyon sa ward. Ang mga grupo sa EnglishConnect mahimong:

• Makadugang sa mga oportunidad sa pagpangita ug pagtudlo alang sa full-time nga mga misyonaryo.

• Makapalig-on sa mga relasyon tali sa mga miyembro, mga higala sa Simbahan, ug mga misyonaryo.

• Makatabang sa mibalik nga mga miyembro o mga tawo nga gitudloan sa mga misyonaryo nga mahisakop ngadto sa ward.

• Makatabang sa mga miyembro nga mogamit sa mga baroganan sa paghigugma, pagpakigbahin, ug pagdapit (tan-awa sa Kinatibuk-ang Tamdanan nga Basahon, 23.1).

Ang gipasiugdahan sa mga miyembro, gisuportahan sa mga misyonaryo nga mga paningkamot labing makatabang nga makab-ot kini nga mga resulta. Kon ang mga miyembro ang mangulo sa mga grupo sa EnglishConnect, ang mga partisipante adunay kahigayonan nga makamugna og panaghigalaay sa mga miyembro ug makigbahin og makapalig-on sa pagtuo nga mga kasinatian. Ang mga misyonaryo, mga lider sa misyon, ug mga komitiba sa pagbarog pinaagi sa kinaugalingong paningkamot kinahanglan nga magtinambagay aron mahimo ang mga grupo sa EnglishConnect nga usa ka dapit diin ang pagpaambit ug pagsunod sa ebanghelyo yano ug natural.

Dapita ang mga misyonaryo nga motabang. Sa mga dapit diin ang mga stake o mga ward ang nagsangkap sa mga grupo sa EnglishConnect, dapita ang mga misyonaryo nga motabang pinaagi sa:

• Pagtambong sa mga grupo ug pagpraktis atol sa mga kalihokan.

• Magpraktis kauban sa mga tigkat-on tali sa mga panag-istoryahanay sa mga grupo.

• Magtudlo og pipila ka leksiyon kon gikinahanglan.

Mga Magtutudlo

Tahas sa mga Magtutudlo

Ang mga magtutudlo adunay mahinungdanon kaayo nga tahas sa pagdapit sa Espiritu ug pagpasiugda og hugot nga pagtuo, pakigdait ug paglambo diha sa mga grupo sa EnglishConnect. Dili sila kinahanglan nga mga eksperto sa Iningles o adunay kasinatian sa pagtudlo. Dili sila kinahanglan nga mosulti og sama nga pinulongan sa mga tigkat-on. Ang mga leksiyon sa EnglishConnect gidesinyo gamit ang napamatud-an na nga mga baroganan sa pagkat-on og pinulongan, ug ang mga magtutudlo magmalamposon samtang sila mahigugmaon nga mogiya sa mga tigkat-on pinaagi sa mga leksiyon. Ang mga magtutudlo nagtabang sa mga tigkat-on nga mas mapaduol sa Dios pinaagi sa pagkat-on og Iningles.

Mga Kalidad sa Magtutudlo

Ang maayo nga mga magtutudlo adunay:

• Kadasig, kahinam, ug pasyon alang sa pagtudlo og Iningles.

• Gugma ug pasensiya alang sa mga tigkat-on ug kusog kaayo nga tinguha nga makita silang magmalamposon.

• Usa ka positibo ug malaomon nga kinaiya.

• Pagkamasaligan ug anaa kanunay aron mangulo sa mga grupo.

Pagtawag og mga magtutudlo. Tungod kay ang mga tigkat-on sa EnglishConnect maglakip sa mga menor de edad, ang lokal nga mga lider sa pagkapari kinahanglan nga mointerbiyo sa matag potensiyal nga magtutudlo ug morebyo sa ilang rekord sa pagkamiyembro alang sa mga anotasyon sa dili pa hatagan og calling. Ang mga grupo nga adunay mga menor de edad kinahanglan nga adunay duha ka hamtong nga motambong ug magsunod sa mga palisiya sa Simbahan sa pagpanalipod sa kabatan-onan. Girekomendar nga ang dili mga batan-on nga mga grupo adunay duha ka magtutudlo usab aron nga sila magkatinabangay og tudlo o mohulip sa usag usa kon ang usa wala o nasakit.

Pagbansay sa mga magtutudlo. Mahimo nimong bansayon ang mga magtutudlo gamit ang EnglishConnect alang sa mga Magtutudlo ug ang mga kapanguhaan diha sa englishconnect.org/teacher. Kinahanglan nga hatagan usab nimo ang mga magtutudlo og kopya sa manwal ug workbook sa tigkat-on (tan-awa sa “Mga Materyal”). Ang mga magtutudlo giawhag usab nga regular nga magmiting aron magtinambagay, mopakigbahin sa labing maayo nga mga gipangbuhat, motubag sa mga pangutana sa usag usa, ug magrebyo sa mga materyal alang sa pagbansay.

Motabang sa mga tigkat-on nga mouswag aron mahimong mga magtutudlo. Ang mga magtutudlo mahimong motino sa mga tigkat-on diha sa grupo kinsa makaandam aron sa pagtudlo og grupo sa umaabot. Ang pagtudlo makatabang sa mga tigkat-on nga mopadayon sa paglambo ug mapalapdan ang pag-akses ngadto sa programa.

Mga Materyal

Hatagi ang mga tigkat-on og mga materyal. Ang mga tigkat-on magkinahanglan nga makaakses sa EnglishConnect 1 alang sa mga Tigkat-on o EnglishConnect 2 alang sa mga Tigkat-on sa digital man diha sa Gospel Library o giimprinta pinaagi sa online nga tindahan sa Simbahan diha sa store.ChurchofJesusChrist.org. Dugang nga mga kapanguhaan anaa usab aron mapalambo ang pagkat-on, lakip na ang mga workbook ug mga kalihokan sa online. Alang sa mga deskripsiyon sa tanang kapanguhaan nga anaa alang sa mga tigkat-on, tan-awa sa “Unsa ang mga materyal sa tigkat-on ug magtutudlo alang sa EnglishConnect?” diha sa “Mga Kanunayng Ipangutana” nga seksiyon.

Iimprinta ang mga Kapanguhaan

Kon mohatag ka og giimprinta nga mga kapanguhaan, ang lokal nga mga yunit mosuporta niini nga mga paningkamot gamit ang ilang kasamtangan nga badyet. Kon nagkinahanglan ka og pundo, ang mga presidente sa stake kinahanglan nga mosunod sa giaprobahan nga proseso sa paghangyo og pundo. Ayaw pangayo og bisan unsa nga bayad sa pag-apil sa mga tigkat-on. Kon ang mga tigkat-on gilaoman nga mopalit og gi-imprinta nga mga kapanguhaan alang sa ilang kaugalingon, mahimo nila kana pinaagi sa lokal nga mga sentro sa pagpang-apod-apod o sa online nga tindahan sa Simbahan.

Pahinumdom: Ang mga manwal tingali mokabat og hangtod sa unom ka semana usa pa moabot.

Hatagi ang mga magtutudlo og mga materyal. Ang mga magtutudlo kinahanglan nga magtuon sa EnglishConnect alang sa mga Magtutudlo diha sa Gospel Library ingon man sa ubang mga kapanguhaan sa pagbansay diha sa englishconnect.org/teacher.

Mga Presentasyon sa Virtual nga mga Leksiyon

Ang mga magtutudlo mahimong mogamit sa mga kapanguhaan sa presentasyon sa EnglishConnect aron makatabang sa paggiya sa virtual nga panag-istoryahanay sa mga grupo. Ang mga presentasyon sa leksiyon anaa sa englishconnect.org/resources/teaching-materials.

Lokasyon ug Kapirmihon

Desisyoni kon magtanyag ka ba og mga grupo nga magkitaay o virtual. Ang mga grupo nga magkitaay sa mga bilding sa Simbahan girekomendar aron makahatag og mga oportunidad sa pakigdait. Kon ang pag-adto sa bilding sa Simbahan usa ka hagit alang sa mga partisipante, ikonsiderar ang pagtanyag og mga grupo sa online. Ang “Giya sa Pagdumala og Virtual nga mga Grupo” ug “Giya sa Partisipante sa Virtual nga Grupo” makatabang sa mga lider, mga magtutudlo, ug mga tigkat-on nga makamugna og makapadasig nga kahimtang sa pagkat-on diha sa online. Ang mga presentasyon sa virtual nga leksiyon anaa sa englishconnect.org/resources/teaching-materials.

Desisyoni kon unsa kapirmihon nga magkita ang grupo. Kadaghanan sa mga grupo magkita kausa o kaduha sa usa ka semana, apan ang mga leksiyon gisulat aron ang mga grupo mas pirmi nga magkakita kon gustohon. Hinumdomi nga ang mga tigkat-on nagkinahanglan og panahon aron makompleto ang mga kalihokan sa personal nga pagtuon sa wala pa ang matag leksiyon.

Desisyoni kon kanus-a ug unsa ka dugay nga magkita ang mga grupo. Pagpili og adlaw ug oras nga maayo para sa mga tigkat-on ug sa mga magtutudlo. Kadaghanan sa mga grupo magkita og 90 minutos, apan ang mga grupo mahimong magkita sa lahi nga gitas-on sa oras kon gustohon.

Desisyoni ang gidugayon sa mga grupo ug kon asa nga mga yunit ang ilang iapil. Daghang grupo ang nagpadayon pa, buot ipasabot nga sila magsugod sa leksiyon 1 pagkahuman nila sa manwal. Ang uban nga mga grupo motuki sa manwal og kausa o maghisgot lamang og bahin sa mga yunit nga naa sa manwal.

Tan-awa ang seksiyon nga “Mga Ehemplo” alang sa mga paagi nga ang mga lider miorganisar og mga grupo.

Rehistrasyon ug mga Sertipiko (QuickReg)

Paghimo ug pagdumala og mga grupo diha sa Quiskreg. Ang QuickReg usa ka himan nga giaprobahan sa Simbahan aron modumala sa mga grupo sa pagbarog pinaagi sa kinaugalingong paningkamot. Paghimo og mga grupo diha sa QuickReg pinaagi sa pag-adto sa quickreg.englishconnect.org. Unya ipadayon ang paggamit sa QuickReg aron sa:

• Pag-advertise sa mga grupo.

• Pag-ilis sa petsa, oras, ug lokasyon sa mga grupo.

• Pag-imprinta og mga sertipiko sa mga partisipante.

• Pag-usab sa estado sa tigkat-on.

• Pagtapos sa mga grupo.

Tan-awa ang tutorial sa QuickReg diha sa englishconnect.org/leader alang sa pagbansay.

Pahinumdom: Aron makagamit sa QuickReg, ang miyembro kinahanglan nga (1)adunay calling sa Simbahan ug (2) ug iparekord ang ilang calling diha sa Leader and Clerk Resources.

Magprinta ug maghatag og mga sertipiko gikan sa QuickReg. Ang mga magtutudlo ug mga espesyalista sa pagbarog pinaagi sa kinaugalingong paningkamot makaprinta ug makahatag og mga sertipiko sa pag-apil ngadto sa mga tigkat-on nga naenrol sa QuickReg.

Pagdapit ug Pagkahibalo

Paggamit og materyal sa pagpahibalo. Ang promosyonal nga mga materyal anaa sa online nga tindahan sa Simbahan diha sa store.ChurchofJesusChrist.org ug diha sa englishconnect.org/resources/leader#publicity.

Pagdapit og mga tigkat-on. Mahimo ka nga mogamit sa kasagaran nga mga paagi sa komunikasyon aron i-advertise ang mga grupo sa EnglishConnect, sama sa tigpangalagad nga mga brother ug mga sister, mga misyonaryo, mga bulletin sa ward, mga flyer, ug uban pa. Kon gitugotan ug gipundohan sa lokal nga mga yunit, ang mga grupo mahimo usab nga mokonsiderar sa pag-advertise sa social media o sa usa ka web page sa lokal nga ward o stake. Sa dili pa magpasiugda og bisan unsa niini nga mga pamaagi sa pag-advertise, rebyoha ang lokal nga legal nga mga lagda diha sa englishconnect.org/leader/approved-locations.

Pag-abiabi sa mga tigkat-on. Pag-establisar og plano kon unsaon nimo sa pag-abi-abi ang mga tigkat-on kon sila morehistro alang sa grupo.

Pagdapit og mga higala sa lain nga mga tinuohan. Ikaw giawhag nga apilon ang mga tawo nga gikan sa nagkalainlain nga gigikanan nga tinuohan. Kanunay nga magpakita og respeto sa mga gituohan sa uban samtang bukas nga mopakigbahin sa imong hugot nga pagtuo nga ang Dios makatabang sa mga partisipante nga makat-on og Iningles.

Ikonsiderar ang pagdapit sa kabatan-onan. Mahimo ka nga mag-organisar og mga grupo nga alang sa kabatan-onan lamang, o mahimo ka nga modapit sa kabatan-onan nga motambong kauban sa mga hamtong. Sa EnglishConnect, ang bag-o nga henerasyon makat-on unsaon nga makadawat og tabang sa Dios aron makat-on og Iningles. Kini nga mga leksiyon makatabang nila nga makabaton og hugot nga pagtuo nga ang Dios motabang nila sa tanang aspeto sa ilang kinabuhi.

Sunda ang mga palisiya sa Simbahan sa pagpanalipod sa kabatan-onan. Ang mga menor de edad (kadtong nag-edad og 18 o mas bata pa ug nagpuyo sa panimalay) kinahanglan adunay porma sa pagtugot nga pinirmahan sa ginikanan sa dili pa motambong sa grupo. Ang mga porma anaa sa daghang pinulongan sa englishconnect.org/resources/leader. Dugang pa, ang mga grupo sa EnglishConnect kinahanglan nga kanunayng mosunod sa palisiya nga labing minos duha ka responsable nga hamtong ang anaa sa tanang higayon atol sa mga miting sa grupo. Kini nga mga palisiya kinahanglan nga sundon bisan kon ang grupo magmiting sa virtual nga paagi.

Pag-uswag ngadto sa Sunod nga Lebel

Tudloi ang mga tigkat-on sa EnglishConnect ug BYU–Pathway Worldwide nga edukasyon ug subayon nga propesyon. Ang EnglishConnect ug BYU–Pathway Worldwide nagtanyag og usa ka dalan alang sa mga tigkat-on aron makakab-ot og bag-ong mga kahanas diha sa kahimtang sa pakigdait ug hugot nga pagtuo. Makita nimo ang mga kapanguhaan diha sa byupathway.org/englishconnect.

Tabangi ang mga tigkat-on nga maenrol sa EnglishConnect 3. Tan-awa sa seksiyon nga “Pagkonektar sa mga Tigkat-on ngadto sa EnglishConnect 3 nga mga Grupo.”

Pakigkonektar sa imong lokal nga BYU–Pathway Worldwide nga pangserbisyo nga mga misyonaryo. Paghisgot og mga paagi nga masuportahan ang mga tigkat-on sa ilang transisyon gikan sa EnglishConnect 3 ngadto sa BYU–Pathway Worldwide.

Pagkonektar ngadto sa Uban nga mga Kapanguhaan sa Simbahan

Mokonektar sa dugang nga mga kapanguhaan sa Simbahan. Paghimo og mga plano nga makonektar ang mga partisipante sa dugang nga mga kapanguhaan sa Simbahan, sama sa ubang mga grupo sa pagbarog pinaagi sa kinaugalingong paningkamot, mga kalihokan sa kabatan-onan, ug mga oportunidad nga makat-on og dugang mahitungod sa ebanghelyo ni Jesukristo. Tan-awa ang page nga “Mga Kapanguhaan alang sa Emosyonal, Pang-edukasyon ug Panarbaho”, sa ChurchofJesusChrist.org alang sa dugang nga impormasyon.