« ថ្ងៃទី ២៣–២៩ ខែ តុលា ។ ធីម៉ូថេ ទី១ និង ទី២; ទីតុស; ភីលេម៉ូន ៖ ‹ ចូរធ្វើជាគំរូដល់ពួកអ្នកជឿ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២១ )
« ថ្ងៃទី ២៣–២៩ ខែ តុលា ។ ធីម៉ូថេ ទី១ និង ទី២; ទីតុស; ភីលេម៉ូន » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣
ថ្ងៃទី ២៣–២៩ ខែ តុលា
ធីម៉ូថេ ទី១ និង ទី២; ទីតុស; ភីលេម៉ូន
« ចូរធ្វើជាគំរូដល់ពួកអ្នកជឿ »
សូមអាន ធីម៉ូថេ ទី១ និង ទី២; ទីតុស និង ភីលេម៉ូន ដោយគិតអំពីសមាជិកក្នុងថ្នាក់របស់បងប្អូន ។ គំនិត និងចំណាប់អារម្មណ៍ដែលនឹងកើតមាន នឹងជួយបងប្អូនឲ្យដឹកនាំសមាជិកក្នុងថ្នាក់ទៅរកវគ្គបទគម្ពីរដែលទាក់ទង ហើយនាំព្រះវិញ្ញាណចូលមកក្នុងថ្នាក់រៀនរបស់បងប្អូន ។
អញ្ជើញឲ្យចែកចាយ
វាអាចមានសារៈប្រយោជន៍ចំពោះសមាជិកក្នុងថ្នាក់ ដើម្បីស្ដាប់ឮសមាជិកក្នុងថ្នាក់ផ្សេងទៀតនិយាយអំពីជោគជ័យ និងការប្រឈមរបស់ពួកគេជាមួយនឹងការសិក្សាព្រះគម្ពីរ ទាំងជាលក្ខណៈបុគ្គល និងជាក្រុមគ្រួសារ ។ សូមពិចារណាចាប់ផ្ដើមថ្នាក់ដោយការអញ្ជើញសមាជិកក្នុងថ្នាក់ឲ្យនិយាយអំពីអ្វី ដែលនឹងដំណើរការល្អនៅក្នុងការសិក្សាព្រះគម្ពីររបស់ពួកគេ ។
បង្រៀនគោលលទ្ធិ
ធីម៉ូថេ ទី១ និង ទី២; ទីតុស
ការយល់ដឹងពីគោលលទ្ធិពិតនឹងជួយយើងឲ្យចៀសវាងពីការត្រូវគេបោកបញ្ឆោតបាន ។
-
សមាជិកក្នុងថ្នាក់របស់បងប្អូនកំពុងរស់នៅក្នុងជំនាន់មួយ ដែលវាអាចពិបាកនឹងកំណត់ពីអ្វីដែលពិត និងអ្វីដែលមិនពិត ។ ធីម៉ូថេ និងទីតុសក៏បានរស់នៅក្នុងគ្រាមួយបែបនោះដែរ ដូច្នេះប្រហែលជាពាក្យទូន្មានរបស់ប៉ុលទៅកាន់ពួកលោកអាចមានតម្លៃនាសព្វថ្ងៃនេះ ។ នេះគឺជាវគ្គបទគម្ពីរមួយចំនួន ដែលមាននូវពាក្យទូន្មានរបស់ប៉ុល ៖ ធីម៉ូថេ ទី១ ១:១–៧; ៤:១–២, ៦; ៦:៣–៥, ២០–២១; ធីម៉ូថេ ទី២ ៣:១៣–១៧; ៤:២–៤; ទីតុស ១:៧–៩; ២:១, ៧–៨ ។ បងប្អូនអាចចាត់សមាជិកក្នុងថ្នាក់ម្នាក់ៗឲ្យអានវគ្គមួយក្នុងចំណោមវគ្គបទគម្ពីរទាំងនេះ ហើយចែកចាយអ្វីដែលគាត់ ឬនាងបានរៀនអំពីសារៈសំខាន់នៃគោលលទ្ធិពិត( សូមមើលផងដែរ អាលម៉ា ៣១:៥ ) ។ តើគោលលទ្ធិរបស់ព្រះអង្គសង្រ្គោះជួយយើងឲ្យចៀសវាងពីការបោកបញ្ឆោតដោយរបៀបណា ? សមាជិកក្នុងថ្នាក់ក៏អាចចែកចាយបទពិសោធន៍នានា ដែលអំណាចនៃគោលលទ្ធិពិតបានផ្ដល់ពរជ័យដល់ពួកគេ ។
« កុំឲ្យអ្នកណាមើលងាយអ្នក ដោយព្រោះនៅក្មេងនោះឡើយ ចូរធ្វើជាគំរូដល់ពួកអ្នកជឿ » ( ធីម៉ូថេ ទី១ ៤:១២ ) ។
« ចូរធ្វើជាគំរូដល់ពួកអ្នកជឿ » ។
-
វាអាចកើតឡើងបានដែលសមាជិកក្នុងថ្នាក់របស់បងប្អូន ពុំបានដឹងអំពីអានុភាពនៃគំរូល្អដែលពួកគេកំពុងធ្វើ ។ សូមពិចារណាអញ្ជើញពួកគេឲ្យនិយាយអំពីរបៀបរបស់មនុស្សដែលពួកគេស្គាល់ រួមទាំងសមាជិករួមថ្នាក់ផងដែរ បានធ្វើជាគំរូនៃសិស្សរបស់ព្រះគ្រីស្ទ ។ វាអាចជួយដល់ការពិភាក្សានោះបាន ប្រសិនបើបងប្អូនសរសេរនៅលើក្ដារខៀននូវពាក្យពេចន៍ក្នុង ខទី ១២ ដែលពិពណ៌នាអំពីរបៀបដែលយើងគួរធ្វើជាគំរូ—ពាក្យសម្ដី ការសន្ទនា ( ដែលអាចមានន័យថាជាការប្រព្រឹត្តិ ឬអាកប្បកិរិយាផងដែរ ) សេចក្ដីសប្បុរស ព្រះវិញ្ញាណ សេចក្ដីជំនឿ និង សេចក្ដីបរិសុទ្ធ ។ សមាជិកក្នុងថ្នាក់អាចពិភាក្សាអំពីរបៀប ដែលយើងអាចធ្វើជាគំរូដល់ពួកអ្នកជឿតាមរបៀបនីមួយៗនៃរបៀបទាំងនេះបាន ។
« ដ្បិតព្រះទ្រង់មិនបានប្រទានឲ្យយើងមានវិញ្ញាណដែលតែងតែខ្លាចឡើយ គឺឲ្យមានវិញ្ញាណដ៏មានអំណាចសេចក្តីស្រឡាញ់ និង ប្រាជ្ញានឹងធឹងវិញ » ។
-
គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ណែនាំឲ្យស្រាវជ្រាវក្នុង ធីម៉ូថេ ទី២ រកមើលពាក្យទូន្មាន ដែលប៉ុលបានផ្ដល់ដើម្បីលើកទឹកចិត្តធីម៉ូថេនៅក្នុងការងារបម្រើរបស់លោក ។ សូមឲ្យសមាជិកក្នុងថ្នាក់ចែកចាយការយល់ដឹងនានា ដែលពួកគេបានរកឃើញ ។ ឬបងប្អូនអាចផ្ដល់ពេលវេលាពីរបីនាទីឲ្យសិស្សក្នុងថ្នាក់រកមើល និងចែកចាយពាក្យទូន្មានមួយចំនួនរបស់ប៉ុល ( ជំពូក ១ មានគំរូល្អៗមួយចំនួន ) ។ ពួកគេក៏អាចចែកចាយបទពិសោធន៍មួយនៃគ្រា ដែលព្រះបានជួយពួកគេឲ្យយកឈ្នះលើការភ័យខ្លាចរបស់ពួកគេ ហើយប្រទានដល់ពួកគេនូវ « វិញ្ញាណដ៏មានអំណាច សេចក្តីស្រឡាញ់ និងប្រាជ្ញានឹងធឹង … » ផងដែរ ( ធីម៉ូថេ ទី២ ១:៧ ) ។
ការសិក្សាព្រះគម្ពីរអាចជួយយើងឲ្យយកឈ្នះលើគ្រោះថ្នាក់នៃថ្ងៃចុងក្រោយ ។
-
បន្ទាប់ពីការព្រមានធីម៉ូថេអំពី « គ្រាលំបាកណាស់ » ដែលនឹងកើតមាន នោះប៉ុលបានថ្លែងទីបន្ទាល់អំពីអំណាច និងសារៈសំខាន់នៃព្រះគម្ពីរ ( សូមមើល ធីម៉ូថេ ទី២ ៣:១, ១៤–១៧ ) ។ ដើម្បីចាប់ផ្ដើមការពិភាក្សាមួយអំពីរបៀបដែលព្រះគម្ពីរអាចពង្រឹងយើងនៅក្នុងគ្រាលំបាកៗបាន នោះបងប្អូនអាចអញ្ជើញសមាជិកក្នុងថ្នាក់ឲ្យរំឭកឡើងវិញ នូវការពិពណ៌នារបស់ប៉ុលអំពីគ្រាលំបាកៗនៃថ្ងៃចុងក្រោយ ដែលមាននៅក្នុង ធីម៉ូថេ ទី២ ៣:១–៧ ។ បន្ទាប់មក ពួកគេអាចស្រាវជ្រាវ ហើយចែកចាយបទគម្ពីរដែលបានជួយការពារពួកគេឲ្យតតាំងនឹងគ្រាលំបាកដូចជាគ្រាទាំងនេះ ( គំរូមួយចំនួនមានសរសេរនៅក្នុង « ធនធានបន្ថែមទាំងឡាយ » ) ។ តើការសិក្សាព្រះគម្ពីរការពារយើងពីបញ្ហានានានៅក្នុងពិភពលោកសព្វថ្ងៃនេះតាមរបៀបណា ?
-
ការសិក្សាពាក្យទូន្មានរបស់ប៉ុលអំពីអំណាចនៃបទគម្ពីរ អាចជាឱកាសមួយដើម្បីឲ្យសមាជិកក្នុងថ្នាក់លើកទឹកចិត្តគ្នា នៅក្នុងការខិតខំរបស់ពួកគេដើម្បីសិក្សាព្រះបន្ទូលរបស់ព្រះ ។ ប្រហែលជាសមាជិកក្នុងថ្នាក់អាចអាន ធីម៉ូថេ ទី២ ៣:១៤–១៧ ហើយរកឃើញពរជ័យ និងការការពារដែលកើតចេញពីការសិក្សាព្រះគម្ពីរ ។ បន្ទាប់មក ពួកគេអាចចែកចាយបទពិសោធន៍នានា នៅពេលដែលពួកគេបានទទួលពរជ័យទាំងនេះដោយសារតែការសិក្សាព្រះគម្ពីររបស់ពួកគេ ។ បងប្អូនក៏អាចទុកពេលឲ្យសមាជិកក្នុងថ្នាក់ពិចារណាពីអ្វីដែលពួកគេអាចធ្វើបាន ដើម្បីមានបទពិសោធន៍កាន់តែមានអត្ថន័យជាមួយនឹងព្រះគម្ពីរ ទាំងជាលក្ខណៈបុគ្គល និងជាក្រុមគ្រួសារ ។
ធនធានបន្ថែមទាំងឡាយ
សេចក្ដីពិតក្នុងព្រះគម្ពីរដែលការពារយើងឲ្យតតាំងនឹងគ្រាលំបាកនៃថ្ងៃចុងក្រោយ ( សូមមើល ធីម៉ូថេ ទី២ ៣:២ ) ។
|
គ្រាលំបាកនៃថ្ងៃចុងក្រោយ |
សេចក្ដីពិតដែលការពារយើង |
|---|---|
គ្រាលំបាកនៃថ្ងៃចុងក្រោយ ស្រឡាញ់តែខ្លួនឯង | សេចក្ដីពិតដែលការពារយើង |
គ្រាលំបាកនៃថ្ងៃចុងក្រោយ លោភលន់ | សេចក្ដីពិតដែលការពារយើង |
គ្រាលំបាកនៃថ្ងៃចុងក្រោយ អួតអាង | សេចក្ដីពិតដែលការពារយើង |
គ្រាលំបាកនៃថ្ងៃចុងក្រោយ ឆ្មើងឆ្មៃ | សេចក្ដីពិតដែលការពារយើង |
គ្រាលំបាកនៃថ្ងៃចុងក្រោយ ម្រមាថមើលងាយ | សេចក្ដីពិតដែលការពារយើង |
គ្រាលំបាកនៃថ្ងៃចុងក្រោយ មិនស្ដាប់បង្គាប់ឪពុកម្ដាយ | សេចក្ដីពិតដែលការពារយើង |
គ្រាលំបាកនៃថ្ងៃចុងក្រោយ រមិលគុណ | សេចក្ដីពិតដែលការពារយើង |
គ្រាលំបាកនៃថ្ងៃចុងក្រោយ មានចិត្តមិនបរិសុទ្ធ | សេចក្ដីពិតដែលការពារយើង |
ការកែលម្អការបង្រៀនរបស់យើង
ការរីកចម្រើនខាងវិញ្ញាណកើតឡើងនៅក្នុងគេហដ្ឋាន ។ បងប្អូននៅជាមួយនឹងសមាជិកក្នុងថ្នាក់របស់បងប្អូនក្នុងរយៈពេលខ្លីប៉ុណ្ណោះ គឺតែពីរដងក្នុងមួយខែ ។ ពួកគេភាគច្រើនកំពុងមានបទពិសោធន៍ខាងវិញ្ញាណដ៏មានអត្ថន័យនៅក្រៅថ្នាក់រៀន ហើយបទពិសោធន៍ទាំងនេះអាចពង្រឹងសមាជិកផ្សេងទៀតក្នុងថ្នាក់ ។ សូមសួរសំណួរ ដែលលើកទឹកចិត្តសមាជិកក្នុងថ្នាក់ឲ្យចែកចាយនូវអ្វីដែលពួកគេកំពុងរៀនសូត្រ នៅពេលពួកគេសិក្សាដំណឹងល្អនៅឯគេហដ្ឋាន ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៨ ) ។