Kape in peij ko jinointata ilo Bok in Mormon

Pāpode 1–7

Katak im Bujen ko 10–11

“Bwe Kwōn Maron̄ Rianjo̧”

Ta en̄jake ko kwar en̄jake ilo am̧ kar riiti Katak im Bujen ko 10–11? Ta ļōmņak ko raar itok n̄an eok kōn aikuj ko an armej ro kwōj katakin?

Je En̄jake ko Rej Im̧we Eok

Kajjitōk n̄an Kwaļo̧k

N̄an leļo̧k juon iien em̧m̧an n̄an ro uwaan kūlaaj eo n̄an kōnono kōn ta eo raar ekkatak ilo iien ekkatak jeje ko rekwojarjar am̧ make im ippān baam̧le, komaron̄ jeje ioon board eo Katak im Bujen ko 10 im Katak im Bujen ko 11. Jet iaan ro uwaan kūlaaj remaron̄ jeje, um̧win ilōn̄in jebta kein jim̧wōr, numba in juon eoon ijo raar lo juon m̧ool aorōk. Kālet jet iaan ioon ko, im kūr ro uwaan kūlaaj n̄an kwaļo̧k m̧ool ko raar loi ilo eoon ko.

Katakin Katak ko

Katak im Bujen ko 10:1–33

Setan ej kappukot n̄an kakkure jerbal eo an Anij.

• Katak im Bujen ko 10 emaron̄ jipan̄ ro uwaan kūlaaj kile im anjo ioon jibadbad ko an Setan n̄an ko̧kkure tōmak ko aer. N̄an kwaļo̧k jidik kobban bwebwenato n̄an jekjōn in, komaron̄ kūr juon uwaan kūlaaj eo n̄an kwaļo̧k bwebwenato in Martin Harris me ekar kōjakoiki ukook in 116 peij ko ilo Bok in Mormon (lale jekjōn ilōn̄in jebta n̄an Katak im Bujen ko 3 im Rekwojarjar, 1:50–53). Ro uwaan kūlaaj remaron̄ kiiō kappukot Katak im Bujen ko 10:1–33 n̄an pukot kōttopar eo an Setan kōn peij ko rejako. Ta eo jej ekkatak jān eoon kein kōn wāween ko an Setan jerbal im etke ej kōm̧m̧ane men kein? (lale barāinwōt eoon 63). Ewi wāween an ejelak oktak an jerbal ilo raan kein ad? Ewi wāween an Irooj jipan̄ kōj anjo ioon Setan ilo mour ko ad?

Katak im Bujen ko 10:34–52

An Irooj “mālōtlōt eļapļo̧k jān aujiid ko an devil.”

• N̄e jej iten ebbwer kōn jerawiwi ko ad, jemaron̄ lo kejatdikdik ilo ad jela ke Irooj ekar kōļļaik jerawiwi eo me Josep Smith im Martin Harris raar kōm̧m̧ane ke rekar jab pokake Irooj im kōjakoiki ukook in peij ko 116 in Bok in Mormon. Ļōmņak kōn ewi wāween am̧ maron̄ jipan̄ ro uwaan kūlaaj kappukot kejatdikdik ilo bwebwenato in. N̄an waanjoņo̧k, komaron̄ karuwaineneik er n̄an kwaļo̧k jet men raar ekkatak kōn Irooj jān Katak im Bujen ko 10:34–52 (lale bōrainwōt Katak im Bujen ko 3:1–3). Ro uwaan kūlaaj remaron̄ kwaļo̧k ewi wāween aer kar lo ke an Irooj “mālōtlōt eļapļo̧k jān aujiid ko an devil” (Katak im Bujen ko 10:43). Ewi wāween an jeļāļo̧kjeņ in kōkajoorļak tōmak ko ad ilo E?

  

  Mormon Ej Kalbwin Pileej ko, jān Tom Lovell

Katak im Bujen ko 11

Eļan̄n̄e jenaaj kajjitōk ippān Anij, jenaaj bōk uwaak.

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko karuwaineneik kōj n̄an riiti Katak im Bujen ko 11 āinwōt ke kar jeiki n̄an kōj. Bōlen ro uwaan kūlaaj eo remaron̄ naaj m̧ōņōņō in kwaļo̧k jet men jen jekjōn in me ekkar im jejjet n̄an er. Ewi wāween aer kōtōpar n̄an kōjerbal ta eo raar ekkatak?

• Juon wāween n̄an rojan̄ kōmeļeļe kōn Katak im Bujen Ko 11 ej n̄an karuwaineneik ro uwaan kūlaaj eo n̄an kappukot juon kain̄i ilo jekjōn eo innem jeiki juon kajjitōk kake. Kain kajjitōk ko maron̄ kobaik “Ta meļeļein n̄an eddepļo̧k ippān Kraist kōn aolepān būruōm̧?” (eoon 19) ak “Ewi wāween ad bōk naan an Anij?” (eoon 21). Ro uwaan kūlaaj remaron̄ likit kajjitōk ko aer itulōn̄ in juon m̧ottan peba im letoletak peba ko aer ilo ruum̧ eo, kakobaba ļom̧ņak ko im uaak ko n̄an kajjojo kajjitōk ko aer. (Emaron̄ jipan̄ n̄an m̧okta kajebel kūlaaj eo n̄an doulul ro redik.) Ro uwaan kūlaaj eo remaron̄ kwaļo̧k ippān kūlaaj eo jet meļeļe ko me jet raar jeik kōn kajjitōk eo aer.

Katak im Bujen ko 11:8–26

Anij enaaj letok n̄an kōj Jetōp eo An ilo ad kepooj kōj make ilo wāween eo An.

• Ro uwaan kūlaaj eo am̧ renaaj ke jeram̧m̧an jān kōnono kōn ewi wāween n̄an kile revelesōn n̄an er make kōn Jetōb? Eļan̄n̄e āindein, komaron̄ ijino juon kōmeļeļe ilo am̧ kūr er n̄an pijaikl̦o̦k ke raar kajjitōk n̄an jeje jet m̧ool ko kōn ewi wāween n̄an bōk revelesōn n̄an er make. Ta eo remaron̄ kobaik jān Katak im Bujen ko 11:8–26? N̄an waanjon̄o̧k, ta eo remaron̄ jeje kōn kepopo n̄an bōk tōl n̄an mour ko ad im uwaak ko n̄an kajjitōk ko ad? Ta eo ren kar ba kōn ewi wāween n̄an kile uwaak ko n̄e rej itok? Karuwaineneik ro uwaan kūlaaj n̄an kōļmenļo̧kijen kōn ewi wāween aer naaj kōjerbal ta eo raar ekkatak ilo aer kate er n̄an kappukot revelesōn n̄an er make.

  Āinwōt m̧ōttan m̧akitkit in, komaron̄ kwaļo̧k enaan in jān Sister Julie B. Beck, kar Būreejtōn eo Eutiej an Kōrā Ro: “Maron̄ eo n̄an karbōb n̄an, bōk, im jerbale revelesōn n̄an kōj make ej jelā eo aurōktata n̄an bōke ” (“And upon the Handmaids in Those Days Will I Pour Out My Spirit,” Ensign ak Liaona, Māe 2010, 11).

Kōkōm̧anm̧anļo̧k Ad Katakin

Kobaik ro rej en̄taan ilo kajjieon̄. Ta eo komaron̄ kōm̧m̧ane n̄e juon uwaan kūlaaj eo alikkar an jab ekkejeļo̧k jān ro uwaan kūlaaj eo? Jet iien ļeo ak lieo ej aikuj wōt n̄an kakobaiki ilo kūlaaj eo. Ļōmņak in kajjitōk ippān armej in n̄an bōk kwoņaaļ ilo katak eo ej pedotok. Eļan̄n̄e ļeo ak lieo ejjab uwaake jibadbad eo am̧ ilo jinoin, wōnm̧aanļo̧k im kwaļo̧k iakwe im am̧ ļōm̧ņak kōn er. (Lale Teaching in the Savior’s Way, 8–9.)