“Tijem̧ba 21–27. Kūrijm̧ōj: ‘Enaaj Itok n̄an Laļ n̄an Lo̧mo̧o̧ren Armej ro An,’” Itok, Ļoor Eō—N̄an Jabōt Jikuuļ: Bok in Mormon 2020 (2020)
“Tijem̧ba 21–27. Kūrijm̧ōj,” Itok, Ļoor Eō—N̄an Jabōt Jikuuļ: 2020
Lo Lamb an Anij, jān Walter Rane
Tijem̧ba 21–27
Kūrijm̧ōj
“Enaaj Itok n̄an Laļ n̄an Lo̧mo̧o̧ren Armej ro An”
Ilo am̧ ekkatak kōn ļotak eo an Jisōs Kraist wiik in, ļōmņak kōn wāween am̧ maron̄ jipan̄ ro uwaan kūlaaj eo am̧ kōkajoorļo̧k naan in kam̧ool eo aer kōn Jisōs Kraist im Pinmuur eo An. Jet iaan ļōmņak ko ilo laajrak in emaron̄ jipan̄.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ro uwaan kūlaaj eo n̄an ejake ruo iaan doon ak kūrub ko reddik im kwaļo̧k ekōjkan an ekkatak kōn Jisōs Kraist jān Bok in Mormon eo ilo iiō in ekar kōkajoorļo̧k tōmak eo aer ilo E im katak ko An.
Katakin Katak ko
1 Nipai 11:13–23; Hilamōn 14:1–13; 3 Nipai 1:4–22
Jisōs Kraist ekar ļotak bwe en ad Rilo̧mo̧r.
-
Ewi wāween am̧ maron̄ kōjerbal Bok in Mormon eo n̄an katakin ro uwaan kūlaaj eo kōn m̧akūtkūt in ekwojarjar an ļotak eo an Rilo̧mo̧o̧r eo? Juon wāween n̄an ajeje kūlaaj eo n̄an jilu kūrub ko im leļo̧k n̄an kajjojo kūrub juon iaan eoon kein n̄an riiti ippān doon: 1 Nipai 11:13–23; Hilamōn 14:1–13; im 3 Nipai 1:4–22. Kajjitōk ippān kūrub ko n̄an ekōnono kōn ta eo eoon kein rej katakin er kōn ļotak eo an Rilo̧mo̧o̧r eo. Innām kajjojo kūrub emaron̄ kwaļo̧k ippān ro jet uwaan kūlaaj eo ta eo rekar ekkatak. Etke eaorōk bwe en wōr an Bok in Mormon kam̧ool kōn ļotak eo an Rilo̧mo̧o̧r eo?
-
Jeļā kōn ļotak eo an Kraist eaorōk, ak jeļā etke Ekar ļotak ej aorōk. Ewi wāween am̧ maron̄ jipan̄ ro kwoj katakin kejōkļo̧kjeņ kōn kajoor in pinmuur eo an Jisōs Kraist? Bōlen ro uwaan kūlaaj eo remaron̄ kwaļo̧k jet iaan bwebwenato ko im eoon ko rekar ekkatak wiik in (lale laajrak eo an wiik in ilo Itok, Ļoor Eō—N̄an Kajjojo Armej im Baam̧le ko). Kōketak er n̄an kwaļo̧k wāween an men ko rekar ekkatak kam̧wilaļļo̧k aer kam̧m̧oolol kōn ļotak eo an Rilo̧mo̧o̧r eo im kajoor in pinmuur eo An.
-
N̄an jino juon ekōnono kōn mennin letok ko an Anij ekar letok n̄an kōj kōn Nejin, komaron̄ in kajjitōk ippān ro uwaan kūlaaj eo n̄an kōnono kōn mennin letok ko rejenolo̧k rekar būki ilo Kūrijm̧ōj. Ewi wāween ad kwaļo̧k kam̧m̧oolol kōn mennin letok ko jej būki? Ro uwaan kūlaaj eo remaron̄ riiti kout eo jān Būreejtōn Thomas S. Monson loe ilo “Kein Jipan̄ ko Jet” im ekōnono kōn emān mennin letok ko Būreejtōn Monson ekar ba. Ta eddo eo im Rilo̧mo̧o̧r ej kōm̧m̧ane ilo mennin letok kein? Ewi wāween ad maron̄ kwaļo̧k ad kam̧m̧oolol n̄an Jemedwōj Ilan̄ kōn mennin letok kein?
-
Āinwōt m̧ōttan wōt ekōnono eo am̧ kōn Kūrijm̧ōj, ļōmņak in kajjitōk ippān ro uwaan kūlaaj eo n̄an kōjan̄ ak al al in Kūrijm̧ōj ko. Komaron̄ barāinwōt etale jet iaan kein jipan̄ ko ilo “Kein Jipan̄ ko Jet.”
Taitōl peij eo an Bok in Mormon; kadkad in n̄an Bok in Mormon eo; 2 Nipai 25:23, 26; 33:4, 10
Bok in Mormon eo ej kam̧ool kōn Jisōs Kraist.
-
Ilo am̧ ekkatak kōn Bok in Mormon eo ilo Jabōt Jikuuļ maron̄ itok n̄an an jem̧ļo̧k, komaron̄ in kōņaan leļo̧k n̄an ro uwaan kūlaaj eo juon iien em̧m̧an n̄an kejōkļo̧kjeņ kōn ta eo rekar rekar ekkatak kōn Jisōs Kraist ilo Bok in Mormon eo iiō in. N̄an jipan̄ jinoe juon iien ekōnono, komaron̄ in riiti ippān doon 2 Nipai 25:23, 26 im 33:4, 10, barāinwōt kōkadudu ko jān Kadkad in Bok in Mormon im taitōļ peij. Komaron̄ barāinwōt kwaļo̧ke juon bwebwenato ak eoon eo ekar kepaakļo̧k eok n̄an Jisōs Kraist im leļo̧k n̄an ro uwaan kūlaaj eo jejjo minit ko n̄an kwaļo̧k bwebwenato ko aer make ak eoon ko. Kwaļo̧k am̧ naan in kam̧ool kōn Bok in Mormon, im kajjitōk ippān ro jet uwaan kūlaaj eo n̄an kōm̧m̧an ejja wāween in wōt.
Kōketak Ekkatak ilo Mweo
N̄an im̧we ro uwaan kūlaaj eo n̄an jino riiti Katak im Bujen ko, komaron̄ kwaļo̧k juon eoon em̧m̧an ippem ak juon en̄jake ekar im̧we eok kōn am̧ kar ekkatak Katak im Bujen ko.
Kein Jipan̄ ko jet
Kein jipan̄ ko an Kūrijm̧ōj.
-
Pija ko ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko
-
“A Savior Is Born—Christmas Video” (video, ChurchofJesusChrist.org)
-
“Good Tidings of Great Joy: The Birth of Jesus Christ” (video, ChurchofJesusChrist.org)
-
First Presidency Christmas Devotionals (ChurchofJesusChrist.org/broadcasts/first-presidency-christmas-devotionals)
Mennin letok ko an Rilo̧mo̧o̧r eo.
Būreejtōn Thomas S. Monson ekar katakin:
“Ij kejōkļo̧kjeņ kōn oktak ko an Kūrijm̧ōj. Mennin letok ko reļļap wōņaer, pakij eo eļap wōņāān im em̧m̧an aer kar kitimi, epād ilo bok in kareelel ko rem̧m̧antata im aorōktata im ej kwaļo̧k naan eo ebun̄bun̄ ‘N̄an armej eo elōn̄tata m̧weien.’ Ilo juon iaan kōnono ko ikar lale emān taujin square foot em̧ōj kitimi ilo m̧weo kōn juon to kileplep im kaat in leļo̧k eo ekar ba, ‘Meri Kūrijm̧ōj.’ Men ko jet ekoba diamond-studded club ko n̄an rikkure golf eo, juon tūreep ilo Caribbean cruise, im juon tūreep eļap wōņāān n̄an Swiss Alps n̄an jam̧bo. Āinwōt elukkuun jejjet unin tōl eo an jin̄a in Kūrijm̧ōj eo ekar kwaļo̧k Jilu Rimāletlet rej etal n̄an Bethlehem kōn bo̧o̧k in mennin leļo̧k ko ioon kameļ ko. Juon ej ba, ‘Kōkkaļļeik naan kein aō, Balthazar, jej jinoe juon men kōn mennin leļo̧k kein im pen n̄an m̧adm̧ōdi!’ …
“Ium̧win jejjo iien ko, jemaron̄ in likūti bok in Kūrijm̧ōj ko, ippān mennin leļo̧k ko aer ejej uwaan meļeļe ko aer. Jen bōlen oktakļo̧k jān wūt ko n̄an ro Jined, im tie ko rem̧m̧an n̄an ro Jemād, to̧ļe eo em̧m̧an, tureen eo ej jan̄, baajkōļ eo eto kōttare … im tōlļo̧k ļōmņak ko ad n̄an mennin letok ko Anij ekar litok. Ikar kāālet jān juon laajrak eo eaitok baj emān wōt: …
“Juon, mennin letok eo an ļotak eo. Kar letok n̄an iood wōj kajjojo. Jeraam̧m̧an eo ad ekar ekwojarjar n̄an em̧m̧akūt jān m̧weo im̧ōd ilan̄ n̄an deļo̧n̄e ānbwinnin kanniōk im n̄an kwaļo̧k jān mour ko ad erreo im bōnjen ko rem̧m̧an n̄an juon raan jenaaj jepļaak n̄an E, jitōn̄ bōro ro raiboojoj, im juon aelōn̄ in kiin̄ ņaetan celestial. … Jeraam̧m̧an eo ad ej eddo eo n̄an kwaļo̧k ad kam̧m̧oolol kōn m̧akūtkūt ko kōn mour ko ad. …
“Ruo, mennin letok eo an aenōm̧m̧an. Ilo laļ in ebaijin eo jej mour ie, ainikien ko reļaaj, kareleel ko reļaaj an pija, im akweļap eo eļap likūt ilo ad iien—n̄an ba ejjeļo̧k jorrāān ko an laļ in—ej kōm̧m̧an metak bar, kipel metak, im kōm̧ōjņo̧ikļo̧k kajoor eo ad n̄an iaiao ippān men ko renana. …
“E eo ekar eddodo kōn būrom̧ōj im pād kōn limō ej kōnono n̄an aolep bōro ko remetak im leļo̧k ioer mennin leļo̧k an aenōm̧m̧an. ‘Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. N̄a Ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄’ (Jon 14:27). …
“Jilu, mennin letok eo an iakwe. ‘Ri Kaki, ewi kien eo eļap ilo kien ko?’ rikōm̧m̧an kien eo ekar kajjitōk im kōnono n̄an Jisōs. Emōkaj an itok uwaak eo: ‘Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.
“‘En̄in ej kien eo eļap im m̧oktata.
“‘Im eo kein karuo āinwōt in, Kwōn yokwe ri turum̧ im āinwōt kwe’ (Matu 22:37–39). …
“Emān, mennin letok eo an mour—aaet mour indeeo. Karōk eo an Jemedwōj Ilan̄ ej kitbuuj ennaan ko reļļap kōn iakwe em̧ool. Aolep ro jej iakwe er, aaet baam̧le ko ad, ro jerar, lan̄lōn̄ eo ad, jeļāļo̧kjeņ eo ad, naan in kam̧ool ko ad, renaaj jako eļan̄n̄e en kar jab Jemād im Nejin, Irooj Jisōs Kraist. Ilubwilijin aolep ļōmņak ko raorōk im jeje ko ilo laļ in ej ennaan eo ekwojarjar em̧ool: ‘Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo’ (Jon 3:16)” (“Gifts,” Ensign, May 1993, 59–62).
Kōkōm̧anm̧anļo̧k Ad Katakin
EM̧M̧AN n̄an ba, “Ijjab jeļā.” Ilo iien in kwoj aikuj kōm̧m̧ane jon̄an eo em̧m̧antata n̄an uwaake jabdewōt kajjitōk ko me ro uwaan kūlaaj eo am̧ ewōr ippāer kōn gospel eo, Irooj ejjab kōtmāne am̧ jeļā aolep men. N̄e kwoj jab jeļā wāween eo n̄an uwaake juon men, ļōmņak in uwaak ilo am̧ kajjitōk ippān ro uwaan kūlaaj eo bwe ren pukote ippān doon juon uwaak ilo jeje ko rekwojarjar im kwaļo̧k ta eo rej loe. (Lale Teaching in the Savior’s Way, 24.)