Alma ej peptaiji armej ro ilo Dān ko an Mormon

Minerva Teichert (1888–1976), Alma ej Kōpeptaij ilo Dān ko Mormon, 1949–1951, oil ioon masonite, 35⅞ x 48 inches. Brigham Young University Museum of Art, 1969

Nobōm̧ba 30–Tijem̧ba 6

Moronai 1–6

“Kōjparok Er ilo Wāween Ejim̧we”

Moronai ekar kōņaan bwe men ko ekar je renaaj kar “maron̄ aorōk” n̄an ro otemjej rej mour ilo raan ko āliktata (Moronai 1:4). Ilo am̧ riiti Moronai 1–6, lukkuun ļōmņak kōn men ko me renaaj lukkuun aorōk n̄an ro kwoj katakin.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jet iien ro uwaan kūlaaj eo rej em̧m̧anļo̧k aer kwaļo̧k en̄jake ko aer make jān aer make ekkatak n̄e ewōr jidik aer iien n̄an keememej ta eo rekar riiti. Komaron̄ bōk jejjo minit ko ilo jinoin kūlaaj eo im etale heading ko an jeba eo n̄an Moronai 1–6. (Menin emaron̄ barāinwōt jipan̄ ro uwaan kūlaaj eo ro rekar jab riit ilo m̧weo.) Innām kajjitōk ippān ro uwaan kūlaaj eo n̄an pukot jebta ko kōn juon eoon rekar loe im eaorōk im renaaj kōņaan in kwaļo̧k ippān ro jet uwaan kūlaaj eo.

pija ej bōk jikin katakin

Katakin Katak ko

Moronai 2–6

Kain̄i ko an priesthood eo rej aikuj in kōm̧m̧an āinwōt an Irooj kean̄.

• Eļan̄n̄e ro uwaan kūlaaj eo am̧ (ak ro rej iakwe er) rej m̧aanjabpopo n̄an bōk kain̄i ko an priesthood eo, emaron̄ in aorōk n̄an etale ta eo Moronai ekar katakin kōn kain̄i ko ilo Moronai 2–6. Ro uwaan kūlaaj eo remaron̄ in jerbal ruo iaan ruo n̄an role-play ikkure ko āinwōt kein. (1) Ļaddik eo jeim ak jatūm̧ ej itōn ekkapit n̄an priesthood eo. Ta ko̧o̧njeļ eo kwonaaj leļo̧k jān Moronai 3? (2) Juon jeram̧ jān bar juon tōmak ej ļōmņak etke emenin aorōk n̄an bōk m̧ōttan kwojkwoj eo aolep wiik. Ta eo kwonaaj ba? (lale Moronai 4–5). (3) Peptaij eo an leddik eo nejim̧ epaaktok, ak ejjab lukkuun jeļā eļan̄n̄e epojak. Ewi wāween am̧ jipan̄ er? (lale Moronai 6:1–3). Ālkin role play ko, kūlaaj eo emaron̄ ekōnono kōn ta eo rekar ekkatak jān doon. Remaron̄ in barāinwōt kwaļo̧k naan in kam̧ool ko aer kōn wāween an kain̄i ko āinwōt kein kar kepaakeļo̧k er n̄an Jemedwōj Ilan̄ im Jisōs Kraist.

• N̄an kwaļo̧k kadkad in juon iien ekōnono kōn m̧aanjabpopo n̄an peptaij, komaron̄ in kajjitōk ippān juon uwaan kūlaaj eo n̄an kōmeļeļeiki wāween ko rekar kōpopo kaki n̄an kallim̧ur ko raorōk ilo mour ko aer, āinwōt juon mijen, m̧are, erom̧ jinen im jemān, ak juon jerbal ekāāl. Ewi wāween an m̧aanjabpopo in keidi n̄an m̧aanjabpopo eo n̄an ekkar n̄an peptaij, āinwōt an kōmeļeļe ilo Moronai 6:1–3? (lale barāinwōt Mosaia 18:8–10; KB 20:37). Etke kadkad kein rej ellaajrak ilo eoon kein rej mennin aikuj n̄an peptaij? Ewi wāween ad jeļā eļan̄n̄e jej pojak n̄an kain̄i in? Kōketak ro uwaan kūlaaj eo n̄an kejōkļo̧kjeņ kōn ewi jon̄ak an em̧m̧an aer mour kōn jon̄ak kein jān tōre eo rekar peptaij im ta eo remaron̄ in kōkōm̧anm̧anļo̧k. Komaron̄ barāinwōt kajjitōk ippāer n̄an je jabdewōt im̧we ko rej būki im en emakijkij aer lali.

  Jiron̄ eo ej bōk juon kōjeraam̧m̧an

  Kain̄i ko rej kōm̧m̧an jān kajoor eo an priesthood eo.

Moronai 4–5

Bōk m̧ōttan kwojkwoj eo ej jipan̄ kōj epaakeļo̧k Jisōs Kraist.

• laajrak eo an wiik in in Itok, Ļoor Eō—N̄an Kajjojo Armej im Baam̧le ko elmakoti m̧akūtkūt in ekkatak ko rejjet n̄an kwojkwoj eo. Bōlen komaron̄ in kajjitōk ippān jejjo ro uwaan kūlaaj eo n̄an kamōje m̧akūtkūt kein ilo m̧weo m̧weer im itok n̄an kūlaaj eo pojak n̄an kwaļo̧ke ta eo rekar ekkatak. Komaron̄ barāinwōt kajjitōk ippān ro uwaan kūlaaj eo n̄an kwaļo̧k ippān doon ta eo rej kōm̧m̧ane n̄an kōpooj er make im baam̧le ko aer n̄an bōk en̄jake ko rekwojarjar kōn kwojkwoj eo.

• Elōn̄ wōt iaad jaar ron̄ jar ko an kwojkwoj eo elōn̄ alen, bōtaab jej ke ļōmņak eļap kōn ta meļeļe in naan ko? N̄an jipan̄ ro uwaan kūlaaj eo kejōkļo̧kjeņ kōn jar kein, komaron̄ in leļo̧k n̄an er jejjo minit ko n̄an aer je ruo jar in kwojkwoj ko jān aer keememej. Innām kajjitōk ippāer n̄an keidi ta eo rekar je ippān Moronai 4:3 im 5:2. Ta eo ekar pidodo aer keememeje? Ta eo rekar meļo̧kļo̧k? Rej ke kile jabdewōt men kōn jar kein me rekar jab kar kile m̧okta? Kajjitōk ippān ro uwaan kūlaaj eo n̄an kwaļo̧k naan in meļeļe ko jān jar ko an kwojkwoj eo me rej alikkar n̄an er ak me rej jipan̄ er en̄jake kwojarjar eo an kain̄i in. N̄an kam̧wilaļļo̧k an ro uwaan kūlaaj eo kam̧m̧oolol kōn kwojkwoj eo, ļōmņak in kajjitōk ippān juon uwaan kūlaaj eo n̄an al ak kōjan̄ juon al in kwojkwoj. Komaron̄ barāinwōt kwaļo̧k pija in alooj eo “Always Remember Him” (ChurchofJesusChrist.org).

Moronai 6:4–9

Rikaļoor ro an Jisōs Kraist rej jerbal in karejar n̄an doon.

• Ļōmņak in kōjerbal juon bwebwenato n̄an jipan̄ ro uwaan kūlaaj eo “naajdik jān em̧m̧an eo an naan in Anij” (Moronai 6:4). N̄an waanjon̄ak, kain naajdik rot eo emenin aikuj n̄an juon ine ak juon nin̄nin̄? Ta eo ej waļo̧k eļan̄n̄e kwoj kowaane juon men eo ej aikuj naajdiki? Ewi wāween an ro uwaan Kabun̄ in rekāāl im rej kab bar ro̧o̧ltok āinwōt juon ine ak juon nin̄nin̄ aikuj in naajdiki? Ro uwaan kūlaaj eo remaron̄ in etale Moronai 6:4–9 n̄an ļōmņak ko kōn wāween aer maron̄ “naajdik” doon ilo jetōb. Remaron̄ barāinwōt lale ļōmņak ko ilo “Kein Jipan̄ ko Jet.” Komaron̄ in kwaļo̧k juon en̄jake eo me juon rikaļoor m̧ōttam̧ ekar jerbal in karejar n̄an eok. Bōlen ro uwaan kūlaaj eo renaaj m̧ōņōņō in kwaļo̧k en̄jake ko aer.

• Moronai 6:4–9 emaron̄ jipan̄ ro uwaan kūlaaj eo meļeļe ewi wāween ad jeraam̧m̧an n̄e jej “bōnbōn ilubwilijin armej ro an kabun̄ eo an Kraist” im pād ilo kweilo̧k ko an Kabun̄ in. Ewi wāween ad kōmeļeļeik kōjeraam̧m̧an kein n̄an juon armej eo ej kajjitōk kajjitōk ko kōn aikuj eo n̄an juon kabun̄ eo em̧ōj an ejaak? Bōlen ro uwaan kūlaaj eo remaron̄ etale eoon kein n̄an pukot juon men eo remaron̄ kwaļo̧ke. Ak remaron̄ in kōlaajrake jet iaan kōjeraam̧m̧an ko rekar būki āinwōt membōr ro an Kabun̄ eo (lale D. Todd Christofferson, “Why the Church,” Ensign ak Liahona, Nov. 2015, 108–11). Ta eo jemaron̄ in kōm̧m̧ane n̄an lale bwe rikaļoor ro m̧ōttad maron̄ “keememej im naajdik er jān em̧m̧an eo naan in Anij” ilo ad “kwelo̧k emmakijkij”? (Moronai 6:4–5).

pija ej bōk jikin ekkatak

Kōketak Ekkatak ilo Mweo

Ro uwaan kūlaaj eo remaron̄ in kōņaan riiti Moronai 7–9 wiik in tok eļan̄n̄e kwoj kōmeļeļeiki bwe ekitbuuj ruo leta ko kar jeje jān Mormon n̄an jipan̄ ļaddik eo nejin tiljek wōt ilo iien ko reppen.

pija ej bōk jikin kein jipan̄ ko

Kein Jipan̄ ko jet

Naajdik jān naan in Anij.

Elder Jeffrey R. Holland ekar katakin: “Enan̄in aolep armej rejjab itok im jar ilo aer pukot wōt jejjo m̧ool ko an gospel eo ak n̄an lo ro jeraer etto, men̄e aolepān men kein rej aorōk. Rej itok n̄an pukot juon en̄jake ilo jetōb. Rekōņaan aenōm̧m̧an. Rekōņaan bwe tōmak eo aer kajoorļo̧k im kōjatdikdik eo aer en kōkāāl. Rekōņaan, ilo tukadu, n̄an naajdik jān em̧m̧an in naan in Anij, n̄an kōkajoorļo̧k jān kajoor ko an lan̄” (“A Teacher Come from God,” Ensign, May 1998, 26).

Būreejtōn Gordon B. Hinckley ekar kōmeļeļeiki bwe naajdik rioktak ro kōn naan in Anij “ej juon jerbal n̄an aolep. Ej juon jerbal n̄an rūkaki in loļo̧k m̧ōko an em̧m̧aan ro im rūkaki in loļo̧k m̧ōko an kōrā ro [kiiō ej rikarejar jeiū ak jatū m̧aan ak kōrā ]. Ej juon jerbal n̄an bisoprik eo, n̄an doulul ko an priesthood, n̄an Doulul eo an Kōrā ro, doulul eo an likao ro im doulul eo an jiron̄ ro, aaet Būraimere.

“Ikar pād ilo juon kweilo̧k in jitlo̧k im kwaļo̧k naan in kam̧ool Jabōt eo ļo̧k wōt. Juon 15- ak 16-iiō-rūtto ļaddik ekar jutak im̧aan jarlepju eo im kar ba bwe ekar pepe bwe en peptaij.

“Innām juon ilo̧k juon, ļaddik ro ilo doulul eo an rūkaki ro rekar wanlōn̄ļo̧k n̄an kein kōnnaan eo im kwaļo̧k aer iakwe e, n̄an ba n̄an e bwe ekar kōm̧m̧ane men eo ejim̧we, im n̄an kwaļo̧k ke renaaj jutak ippān im jipan̄ e. Ekar juon en̄jake eo em̧m̧an n̄an ron̄jake likao ro rej kōnono naan in kam̧m̧oolol im kōketak n̄an ro m̧ōttaer. Ekar ju būruwō bwe aolep ļaddik rein, ekoba eo ekar peptaij wiik eo ļo̧k, renaaj etal n̄an mijen ko.

“Ilo juon iien intōrpiu ikar kajjitōk, ‘Ta eo ekar letok am̧ m̧ōņōņō eļap ilo am̧ loe jerbal eo an Kabun̄ in rainin?’

“Uwaak eo aō: ‘En̄jake eo eļap an kam̧ōņōņōik eō ej n̄an lo ta eo gospel eo ej kōm̧m̧ane n̄an armej ro. Ej leļo̧k n̄an er tarlep in mour in. Ej leļo̧k n̄an er juon jibadbad eo rejan̄in kar en̄jake m̧okta. Ej lelōn̄ļo̧k ļōmņak ko n̄an men ko rem̧m̧an im kwojarjar. Juon men ej waļo̧k an er im ekabwilōn̄lōn̄ n̄an lo. Rej reilo̧k n̄an Kraist im itok im mour.’

“… Ij kajjitōk ippem kajjojo n̄an jipan̄ ilo wāween in” (“Converts and Young Men,” Ensign, May 1997, 48).

Kōkōm̧anm̧anļo̧k Ad Katakin

Kappuōk im̧we eo am̧ make. Ijello̧kin lale laajrak kein āinwōt kōmeļeļe ko kwoj aikuj in ļoori, kōjerbali n̄an bōk ļōmņak ko ak n̄an kabbōļ kejōkļo̧kjeņ eo am̧ make ilo am̧ kejōkļo̧kjeņ kōn aikuj ko an ro kwoj katakin.