“Tijem̧ba 14–20. Moronai 10: ‘Itok n̄an Kraist im Weppān ilo E,’” Itok, Ļoor Eō—N̄an Jabōt Jikuuļ: Bok in Mormon 2020 (2020)
“Tijem̧ba 14–20. Moronai 10,” Itok, Ļoor Eō—N̄an Jabōt Jikuuļ: 2020
Bwe Kom̧in Maron̄ Jeļā, jān Gary L. Kapp
Tijem̧ba 14–20
Moronai 10
“Itok n̄an Kraist, im weppān ilo E”
Ro uwaan kūlaaj eo am̧ emaron̄ in lōn̄ aer en̄jake ko rem̧m̧an kōn riiti Bok in Mormon eo iiō in. Kōnono kōn en̄jake ko n̄an kōketak aolep ilo kūlaaj eo n̄an katak jeje ko rekwojarjar.
Je En̄jake ko Rej Im̧we Eok
Kajjitōk bwe ren Kwaļo̧k
Komaron̄ kajjitōk ippān ro uwaan kūlaaj eo n̄an pijaik ilo kōļmenļo̧kjeņ an Moronai lowaj kūlaaj eo. Ta eo renaaj kar ba n̄an e kōn ta eo ekar je ilo Moronai 10? Elōn̄ ke eoon ko me rej ļap meļeļeier n̄an er? Bōlen remaron̄ kwaļo̧k en̄jake ko ewōr ippāer kōn eoon kein.
Katakin Katak ko
Imaron̄ jeļā m̧ool eo kōn kajoor eo an Jetōb Kwojarjar.
-
Ro uwaan kūlaaj eo remaron̄ bōk en̄jake ko rekāāl eļan̄n̄e rej katak Moronai 10:3–5 lukkuun tiljek. N̄an jipan̄ er, komaron̄ je naan ko raorōk jān eoon ko ilo juon peba ejenolo̧k im leļo̧k n̄an juon n̄an kajjojo ro uwaan kūlaaj eo ak n̄an juon kūrub an ro uwaan kūlaaj eo. Kajjitōk ippāer n̄an kejōkļo̧kjeņ ak kōnono kōn ta meļeļein naan ko, ekoba ta eo remaron̄ kōm̧m̧ane n̄an mour kake ilo mour ko aer. Innām komaron̄ riiti Moronai 10:3–5 ippān doon, bōjrak n̄e kwoj tōpar juon ennaan eo me ewōr juon eo ekar katak kake bwe ro eo uwaan kūlaaj eo en kwaļo̧k ļōmņak ko an.
-
N̄an rōjan̄ ro uwaan kūlaaj eo n̄an kwaļo̧k en̄jake ko ewōr ippāer ilo aer kōm̧m̧ane kajjitōk eo an Moronai ilo eoon kein, komaron̄ in kajjitōk ippāer n̄an ļōmņak n̄e rej kajjieon̄ in rōjan̄ juon m̧ōttāer ak ro uwaan baam̧le eo n̄an bōk juon naan in kam̧ool kōn Bok in Mormon eo. Ewi wāween remaron̄ kar kōjerbale Moronai 10:3–7? Ta en̄jake ko remaron̄ kwaļo̧k kwaļo̧k? Ewi wāween ad maron̄ jipan̄ ro jet meļeļe ta meļeļein n̄an jeļā juon men “kōn kajoor eo an Jetōb Kwojarjar”? (Moronai 10:5).
“Jab kaarmejjete mennin letok ko an Anij.”
-
Etke naan in kakkōļ in “jab kaarmejjete mennin letok ko an Anij” eļaptata ilo raan kein āliktata? (Moronai 10:4) Kōketak ro uwaan kūlaaj eo n̄an kejōkļo̧kjeņ kōn kajjitōk in ilo aer riiti Moronai 10:8–18. N̄an jipan̄ kōkajoorļo̧k tōmak eo an ro uwaan kūlaaj eo ilo mennin letok ko ilo jetōb, komaron̄ kajjitōk ippāer n̄an kwaļo̧k waanjon̄ak ko an armej kōjerbal kajjojo mennin lelļo̧k an jetōb eo ej laajrak ilo Moronai 10:9–16. Waanjon̄ak ko remaron̄ in itok jān jeje ko rekwojarjar, jān bwebwenato an Kabun̄ in, ak jān mour ko aer make. (Waanjon̄ak jān Bok in Mormon eo rej elmakoti ilo “Kein Jipan̄ ko Jet.”) Komaron̄ barāinwōt ekōnono kōn wāween an jet iaan mennin letok ko kar kōmeļeļeikier ilo eoon kein aer waļo̧ktok ilo itok eo an Bok in Mormon eo. Etke eaorōk n̄an juon eo ej pukot juon naan in kam̧ool eo an Bok in Mormon eo n̄an tōmak mennin letok ko an jetōb? Ta eo jet iien jej kōm̧m̧ane n̄an “kaarmejjete” mennin letok kein ilo mour ko ad? Ewi wāween an mennin letok kein an jetōb jipan̄ kōj “itok n̄an Kraist, im weppān ilo E”? (lale Moronai 10:30–33).
-
Jabdewōt wāween eo n̄an etali mennin letok ko an jetōb im kar kōmeļeļeiki ilo eoon kein ej n̄an je ioon bbot eo kajjitōk kein āinwōt Ta mennin letok ko an jetōb eo? Wōn ro rej leļo̧k n̄an er? Etke rej leļo̧k n̄an er? im Ewi wāween ad būki? Innām kajjitōk ippān ro uwaan kūlaaj eo n̄an etale Moronai 10:8–25 n̄an pukot uwaak ko. (Ennaan ko jān Brigham Young im Būreejtōn Dallin H. Oaks ilo “Kein Jipan̄ ko Jet” maron̄ barāinwōt jipan̄.) Ilo kakkobaba n̄an mennin letok ko ilo jetōb ilo eoon 9–16, ta “mennin letok ko an Anij” emōj ad būki ak kar jeraam̧m̧an jāne? (Moronai 10:8). Komaron̄ in kwaļo̧k ta eo Elder Bruce R. McConkie ekar katakin: “Mennin letok ko an jetōb rejjeļo̧k jem̧ļo̧kier im ļap ilo elōn̄ kain. Ko repād ilo naan eo kar kwaļo̧ke rej pijaik jetōb eo eļap an jouj kwojarjar eo me ej Anij eo ad em̧m̧an ej leļo̧k n̄an ro me rej iakwe im jerbal n̄an e” (A New Witness for the Articles of Faith [1985], 371).
Imaron̄ in kōllaajak n̄an Anij kōn Pinmuur eo an Kraist.
-
Ta eo kwoj en̄jake bwe enej jipan̄ ro uwaan kūlaaj eo bōk kajjitōk in an Moronai n̄an “itok n̄an Kraist, im weepān ilo E”? (Moronai 10:32). Bōlen jino kōn juon al kōn unin kōnono in, āinwōt “Come, Follow Me” (Hymns, no. 116), maron̄ karuwaineneiktok Jetōb eo n̄an ekōnono eo am̧, im ro uwaan kūlaaj eo remaron̄ kwaļo̧k jabdewōt ekkejelļo̧k ko rej loe ikōtaan al eo im m̧ool ko loi ilo Moronai 10:30–33. Ta eo jej ekkatak jān eoon kein im al in kōn ta meļeļein itok n̄an Kraist? Ta meļeļein n̄an erom̧ “weepān ilo Kraist”? (barāinwōt lale KB 76:50–53, 69). Kwaļo̧k en̄jake ko am̧ kōn ta meļeļein n̄an erom̧ “kōweeppān er kōn Jisōs” (KB 76:69), im kōketak ro uwaan kūlaaj eo n̄an kwaļo̧k ko aer.
-
Kōnke ej ekōnono eo am̧ āliktata an kūlaaj eo am̧ kōn Bok in Mormon iiō in, komaron̄ kōņaan kajjitōk ippān ro uwaan kūlaaj eo n̄an kwaļo̧k jet iaan ta ko rekar en̄jake im ekkatak ilo aer ekkatak bok in. N̄an jipan̄ ro uwaan kūlaaj eo kōm̧m̧ane menin, komaron̄ riiti Moronai 10:32–33 ippān doon im kajjitōk ippān ro uwaan kūlaaj eo n̄an joļo̧k jejjo minit ko kejōkļo̧kjeņ kōn wāween an Bok in Mormon eo kar jipan̄ er itok n̄an Kraist. Komaron̄ kajjitōk: Ewi wāween an Bok in Mormon eo kar jipan̄ kōj bōk eļapļo̧k iakwe n̄an Anij? Ewi wāween an kar jipan̄ kōj ļapļo̧k ad pedped ioon tūriamo̧ eo an Kraist? Ewi wāween an kar jipan̄ kōj n̄an “jab kaarmejjete” kajoor eo an Rilo̧mo̧o̧r eo? Kajjitōk ippān ro uwaan kūlaaj eo n̄an kwaļo̧k naan in kam̧ool ko kōn Bok in Mormon eo im an kam̧ool kōn Jisōs Kraist.
Kōketak Ekkatak ilo Mweo
N̄an jipan̄ ro uwaan kūlaaj eo reim̧aanļo̧k n̄an ekkatak Katak im Bujen ko iiō in tok, komaron̄ in etale Moronai 10:9–16 im kōmeļeļeiki bwe mennin letok kein rej aolep kein kam̧ool ilo Kabun̄ eo rainin. Ilo ad riiti Katak im Bujen ko, jenaaj loe ewi wāween an mennin letok ko im kajoor eo an Anij kar jerbal n̄an kōm̧m̧ane jerbal in An ilo raan kein āliktata.
Kein Jipan̄ ko jet
Waļo̧ktok ko an mennin letok ko an jetōb ilo Bok in Mormon eo.
-
Katakin jān Jetōb eo: Nipai im Liai (Hilamōn 5:17–19)
-
Tōmak eo Eļap: Alma, Amulek, Ammōn, im ro jet (Ether 12:13–22)
-
Kōmour: Alma (Alma 15:5–11)
-
Kabwilōn̄lōn̄ ko reļļap: Rikaļoor ro jilu (3 Nipai 28:19–22)
-
Kanaan: Liai (2 Nipai 1:6–7)
-
Lo enjeļ ro: Amulek (Alma 10:7–10)
-
Ukōt kajin ko: Mosaia (Mosaia 28:11–16)
Naan in kam̧ool eo an Būreejtōn Brigham Young kōn mennin letok ko an jetōb.
“Tōmak. N̄e kwoj tōmak pedped in katak ko an Gospel eo im būki n̄an tōmak, eo ej juon mennin letok an Anij, ej kōwōrļo̧k eļapļo̧k tōmak, kobaiki tōmak n̄an tōmak. …
“Mennin Letok eo an Kōmour. Ij pād ijin n̄an kam̧ool n̄an bukwi em̧m̧aan ro, kōrā ro, im ajri ro em̧ōj aer mour jān kajoor eo an Anij, jān leļo̧k ioon pā ko, im elōn̄ ro ikar loe aer jerkak jān kōjem̧ ko an mej, im bar bōktok er jān jon̄ak eo an indeeo; im jet ro me jetōb ko rekar em̧m̧akūt jān ānbwinnier, kar bar ro̧o̧ltok. Ij kam̧ool bwe ikar loe an rinan̄inmej eo mour jān leļo̧k ioon pā, ekkar n̄an kallim̧ur eo an Rilo̧mo̧o̧r eo. …
“Kanaan, Revelesōn, im Jeļāļo̧kjeņ. Aolep em̧m̧aan im kōrā ro remaron̄ erom̧ juon rikwaļo̧k revelesōn, im bōk naan in kam̧ool eo kōn Jisōs, eo ej jetōb in kanaan, im loe men ko im̧aan ilo kōļmenļo̧kjeņ im ankilaan Anij ekkar n̄an er, katoļo̧k nana, im kāālet men eo ej em̧m̧an” (Teachings of Presidents of the Church: Brigham Young [1997], 252–53).
“Likūt ioon aolep mennin letok ko rem̧m̧an.”
Būreejtōn Dallin H. Oaks ekar jiron̄ kōn wāween pukot mennin letok ko an jetōb rekar kōjeraam̧m̧an jinen: “Ālkin an luuji ļeo pāleen, eo emej pāleen jinō ekar jab likio. Ekar jar kōn ta eo ej aikuji n̄an kakūrm̧ool eddo eo an n̄an karuttoļo̧k jilu ajri ro reddik! Ekar kappukot, ekar erreo, im ekar jeraam̧m̧an! Jar ko an rekar uwaak ilo elōn̄ wāween ko, ekoba an bōk mennin letok ko an jetōb. Ekar lōn̄ an, ak men ko rekar alikkar ilo aō keememeji rej mennin letok eo an tōmak, naan in kam̧ool, im māletlet” (“Spiritual Gifts,” Ensign, Sept. 1986, 72).
Kōkōm̧anm̧anļo̧k Ad Katakin
Kōm̧m̧an iien n̄an an rikkatak ro kwaļo̧k. “N̄e rikkatak ro rej kwaļo̧k ta eo rej ekkatak, rejjab en̄jake wōt Jetōb eo im kōkajoorļo̧k naan in kam̧ool ko aer, ak rej barāinwōt rōjan̄ ro jet uwaan kūlaaj eo n̄an pukot m̧ool ko ippāer make” (Teaching in the Savior’s Way, 30).