“Tijem̧ba 21–27. Kūrijm̧ōj: ‘Enaaj Itok n̄an Laļ n̄an Lo̧mo̧o̧ren Armej ro An,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)

“Tijem̧ba 21–27. Kūrijm̧ōj,” Itok, Ļoor Eō—N̄an Kajjojo Armej im Baam̧le ko: 2020

Pija

Josep, Meri, im nin̄nin̄ Jisōs ilo juon jikin m̧ōn̄ā an menin mour

Lo Ļaam an Anij, jān Walter Rane

Tijem̧ba 21–27

Kūrijm̧ōj

“Enaaj Itok n̄an Laļ n̄an Lo̧mo̧o̧ren Armej ro An”

Tōre in iien Kūrijm̧ōj ej juon iien n̄an kejekļo̧kjeņ ioon im kwaļo̧k kam̧m̧oolol kōn ļotak eo an ad Rilo̧mo̧o̧r, Jisōs Kraist. Ilo am̧ riit im kejekļo̧kjeņ ilo wiik in kōn ļotak im mour eo An, ļōmņak kōn ekōjkan an ekkatak eo am̧ kōn Bok in Mormon iiō in kar kōkajoorļo̧k naan in kam̧ool eo am̧ bwe E ej Rilo̧mo̧o̧r eo an laļ. Je im̧we ko me rej itok n̄an eok.

Je En̄jake ko Rej Im̧we Eok

Jān Nipai n̄an Moronai, aolep rikanaan an Bok in Mormon kar kallim̧ur n̄an jibadbad eo ekwojarjar kar kwaļo̧k ilo tukaduin ilo taitōļ peij eo: “Kareel [aolep armej] bwe Jisōs ej RiKraist eo.” Juon rikanaan eaar lo E āinwōt juon jetōb ilo mour eo m̧okta, im bar juon eaar lo ļotak eo im jerbal in karejar eo An ilo juon visōn. Juon eaar jutak ioon wo̧o̧ļ eo n̄an kean̄ kōn kakōļļe ko kōn ļotak eo An im mej eo An, im bar juon eaar bukwelōlō im̧aan ānbwin jerkakepej eo An un̄ur kinej ko ilo Pein im neen, im katūn. Aolepāer raar jeļā m̧ool in emenin aikuj: “ejjeļo̧k bar iaļ ak wāween eo im ie armej remaron̄ mour, kōn wōt bōtōktōkin pinmuur an Jisōs Kraist, eo … ej itok n̄an lo̧mo̧o̧ren laļ” (Hilamōn 5:9).

Kōn menin ilo tōre in iien Kūrijm̧ōj in, ilo an ro rej tōmak ipeļaakin laļ in kemem e em̧m̧an eo im iakwe eo an Anij ilo jilkintok Nejin, kejekļo̧kjeņ kōn ekōjkan an Bok in Mormon kar kōkajoorļo̧k tōmak eo an ilo Kraist. Ilo am̧ ļōmņak kōn ļotak eo An, kejekļo̧kjeņ kōn etek Eaar itok im ekōjkan an itok eo An kar ukōt mour eo am̧. Innām komaron̄ ejjake m̧ool in lan̄lōn̄ eo an Kūrijm̧ōj—mennin letok eo me Jisōs Kraist eaar lewaj n̄an eok.

Pija

pija ej bōk jikin ekkatak ippam̧ make

Ļōmņak ko n̄an Ekkatak Jeje ko Rekwojarjar Ippam̧ Make

1 Nipai 11:13–36; Mosaia 3:5–10; Hilamōn 14:1–13; 3 Nipai 1:4–22

Jisōs Kraist eaar itok n̄an laļ n̄an erom Rilo̧mo̧o̧r eo aō.

Ej iminene n̄an riiti bwebwenato eo kōn ļotak eo an Rilo̧mo̧o̧r eo ilo Kallim̧ur Ekāāl ilo iien Kūrijm̧ōj, bōtaab komaron̄ barāinwōt lo naan in kanaan ko rekōm̧m̧akūt kōn iien in ekwojarjar ilo Bok in Mormon. N̄an waanjon̄ak, naan in kanaan ko kōn ļotak eo an Rilo̧mo̧o̧r im jerbal in karejar eo rej loi ilo 1 Nipai 11:13–36; Mosaia 3:5–10; Hilamōn 14:1–13; and 3 Nipai 1:4–22. Ta en̄jake ko kōn Jisōs Kraist rej itok n̄an eok ilo am̧ riiti naan kein im kōļmānļo̧kjeņ kōn meļeļe ko remaron̄ kōn kakōļļe ko kōn ļotak eo An? Ekōjkan an naan in kam̧ool ko an rikanaan rein ilo Amedka eo etto kōkajoorļo̧k naan in kam̧ool eo am̧ kōn Kraist im mijen eo An?

Lale barāinwōt Matu 1:18–25; 2; Luk 2.

2 Nipai 2:6; Alma 7:7–13; 11:40; Hilamōn 5:9; 14:16–17

Jisōs Kraist ej Ripinmuur eo an aolep armej.

Enaaj kar ejjeļo̧k ad un n̄an kemem e ļotak eo an Jisōs Kraist n̄e eaar jab kōn pinmuur in en̄taan eo An, eo kōn E ej lo̧mo̧o̧ren kōj jān jerawiwi im mej, kaenōm̧m̧an kōj ilo kaen̄tanan ko ad, im jipan̄ kōj “weeppān ilo E” (Moronai 10:32). Ta eo em̧ōj am̧ ekkatak jān Bok in Mormon iiō in kōn kajoor eo an Rilo̧mo̧o̧r eo n̄an lo̧mo̧o̧ren eok? Elōn̄ ke iaan bwebwenato ko ak katak ko reļļap n̄an eok? Ļōmņak kōn ta eo waanjon̄ak kein rej katakin eok kōn mijen in pinmuur eo an Rilo̧mo̧o̧r: 2 Nipai 2:6; Alma 7:7–13; 11:40; im Hilamōn 5:9; 14:16–17. Ta eo kwoj en̄jake im̧we n̄an kōm̧m̧ane n̄an kwaļo̧k kam̧m̧oolol eo am̧ n̄an E? (Christmas.ComeUntoChrist.org has some ideas that can get you started.)

1 Nipai 6:4; 19:18; 2 Nipai 25:23, 26; 33:4, 10

Bok in Mormon eo ej kam̧ool kōn Jisōs Kraist.

“Bar Juon Kallim̧ur kōn Jisōs Kraist” eļapļo̧k jān baj juon taitōļ n̄an Bok in Mormon, ej juon ennaan kōn jibadbad kwojkwoj eo an. Kejekļo̧kjeņ kōn ta eo kwoj ekkatak jān eoon kein kōn mijen eo an Bok in Mormon n̄an kam̧ool kōn Kraist: 1 Nipai 6:4; 19:18; im 2 Nipai 25:23, 26; 33:4, 10.

Ļōmņak in je ilo juon jōnōļ kōn ekōjkan ekkatak kōn Bok in Mormon iiō in eaar kepaakļo̧k eok n̄an Kraist. En̄jake kein remaron̄ jipan̄:

“Juon men ekāāļ iaar ekkatak kōn Rilo̧mo̧o̧r eo iiō in eaar …”
“Riiti [eoon ko kōn Rilo̧mo̧o̧r ro] kar ukōt wāween eo ij …”
“Armej eo [bwebwenato eo] ilo Bok in Mormon kar katakin eō bwe Rilo̧mo̧o̧r eo …”

Pija

pija ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.

1 Nipai 11:13–23; Mosaia 3:5–10; Hilamōn 14:1–13; 3 Nipai 1:4–22

Ajri ro remaron̄ m̧ōņōņō in jin̄aik pija ko kōn ta eo rej ron̄ ilo am̧ riiti bwebwenato ko kōn ļotak eo Im jerbal in karejar eo an Kraist ilo 1 Nipai 11:13–23; Mosaia 3:5–10; Hilamōn 14:1–13; im 3 Nipai 1:4–22. Innām ajri ro remaron̄ bar ba bwebwenato ko kōjerbal pija ko raar jin̄aiki.

“E Ej Mennin Letok eo”

N̄an jipan̄ baam̧le eo kalimjōk wōt mennin letok eo Jemedwōj Ilan̄ eaar letok n̄an kōj kōn jilkintok Nejin, komaron̄ kitimi juon pija in Jisōs Krasit āinwōt juon mennin leļo̧k ilo Kūrijm̧ōj. Ro uwaan baam̧le eo remaron̄ kōnono kōn mennin leļo̧k ko rem̧m̧an tata ippāer an Kūrijm̧ōj raar bōke ak kōjatdikdik in bōke. Innām remaron̄ kōjarļo̧k peba eo kilin pija eo an Kraist im ekōnono kōn ekōjkan An kar juon mennin letok aorōk n̄an kōj. Pija in alooj eo “He Is the Gift” (ChurchofJesusChrist.org) emaron̄ jipan̄ eok ekōnono ekōjkan am̧ maron̄ lo, kaorōk, im kwaļo̧k mennin letok eo an Rilo̧mo̧o̧r āinwōt juon baam̧le Kūrijm̧ōj in.

Baam̧le eo am̧ emaron̄ barāinwōt jeraam̧m̧an jān ļōmņak kōn juon “mennin leļo̧k” rekōņaan leļo̧k n̄an Rilo̧mo̧o̧r, eo āinwōt kōm̧m̧ane juon kijejeto n̄an joujļo̧k n̄an doon ak jerbal n̄an anjo̧ ioon juon iminene nana. Ļōmņak in kūr ro uwaan baam̧le eo n̄an je ļōmņak ko aer, kitim er āinwōt juon mennin leļo̧k, im likūt mennin leļo̧k ko aer ipeļaakin juon pija in Rilo̧mo̧o̧r.

Jitbōn Kūrijm̧ōj eo

Emaron̄ in kam̧ōņōņō n̄an karōk m̧akūtkūt ko baam̧le eo am̧ emaron̄ kōm̧m̧ani ilo raan ko im̧aan Kūrijm̧ōj eo n̄an en̄jake Jetōb eo an Kraist, eo āinwōt jerbal n̄an juon ak al al in kūrijm̧ōj ko ippān doon. (Kōn ļōmņak ko, lale christmas.ComeUntoChrist.org.)

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkm̧anm̧anļo̧k Ad Katakin

Bar ro̧o̧lļo̧k im lale kūr ko n̄an kōm̧m̧ane. “N̄e kwoj etale juon kūr n̄an jerbal, kwoj kwaļo̧k n̄an [ro uwaan baam̧le eo am̧]. bwe kwoj kea kōn er im ekōjkan an gospel eo kōjeraam̧m̧an mour ko aer. Kwoj barāinwōt leļo̧k n̄an er iien ko rem̧m̧an n̄an kwaļo̧k en̄jake ko aer, eo ej kōkajoorļo̧k kallim̧ur eo aer im kōtļo̧k bwe ren rejtake doon ilo mour kōn gospel eo” (Teaching in the Savior’s Way, 35).